¹ Vaunyande vakuhora kovo nataterera, ruhafo na ghu Hompa, mundjira yino karenu munayima ndjikiti mwaHompa, vaholi vakuhora. ² Ame nakukwatakana na Eyodia, ntani Ame nakukwatakana na Sintike, mukukara ashi maghano ghetu ghanakughu kumwetu mwaHompa. ³ Nhii, Ame namupura anwe, vakwatakaniti vaghuhunga, mukuvatera vakamali ovo varuwanino kumwe name mukuhanita mbudi yayiwa, kumwe na Clement ntani nava vakughupako varuwani vaunyande, ovo vakaro ashi madina ghavo mumbapira yamonyo. ⁴ Karenu naruhafo mwaHompa kehe pano. Ntani nka, kunighamba, hafenu. ⁵ Renkenu ghuwa wenu ghumoneke kwakehe muntu. Hompa pepi anakara. ⁶ Mwashakupakera shinka kwakehe vino. Nani ngoli, muvininke navintje mundapero ntani namumashungido na kutapa mpandu, renkenu mashungido ghenu ghayuvike kwaKarunga, ⁷ ntani mpora yaKarunga, oyo yatapango ghuyivi naghuntje, kuyipititira mutjima denu ntani maghayadaro ghenu mwaKristusi Jesusi. ⁸ Mukuhulita, vaunyande, kehe vino vininke vyauhunga, kehe vino vininke vyafumano, kehe vino vininke vyahungamo, kehe vino vininke vyakeno, kehe vino vininke vyashihoro, kehe vino vininke vyakaro naundipo waghuwa, nangeshi kehe vino vyawapa, nangeshi mpo vili po vyakuvura kuyerepeka, ghayarenu vininke ovyo. ⁹ Vininke ovyo mwakurongire ntani mwaviwanine ntani mwaviyuvire nakuvimona mumwande, ruwanenu vininke ovyo, ntani Karunga wampora kwakara nanwe. ¹⁰ Ame nahafa unene mwaHompa mukonda ashi weno mukuhulilira munawapukurura maghayadaro ghenu kwande. mwayuvire ushiri maghayadaro ghakukwande, mara kapi pamonikire shiruwo kukwenu shakuvura kuvatera. ¹¹ Ame kapi nakughamba vino ashi walye nakara. Ame nakuronga mukukara napama mukehe shishorokwa. ¹² Nayiva ashi ruhepo shininke munke, ntani shimpe nayiva ashi kukara navi vyayingi vinke. Mukehe ndjira ntani mukehe vininke navintje Ame nakuronga mahorameno ghakukara ghunakukutiki ndipo ashi mundjara, ntani weni omu ghuvura kukara navivyavingi ndipo ashi kukara mukushana. ¹³ Ame kuruwana navintje kutwara mumwendi ogho ghampo nkondo. ¹⁴ Nampiri ngoli, mwaruwana nawana mukukugawinina name murunyando rwande. ¹⁵ Anwe Vafilipi yivenu ashi kuntamekero yambudi yayiwa, opo namushuvire Mucedonia, kapi kwakalkire ngereka oyo yavuliro kumvhatera me muvinka vyakutapa navi vyakuwana kughupako anwe mpentjenu. ¹⁶ Nampili apa nakalire mu Tesolonika, anwe mwatumine mvhatero mukushana kupitakana parumwe. Kapishi ashi walye kwashanine ghushwi. ¹⁷ Nani ngoli, kwashanine vikwa nyango ovyo vivhuro kuwederera kumakongo ghenu. ¹⁸ Ame nawana navintje mukuyulilira, ntani navi vyaviyingi. Ame nakalire mwamuwa mukuviwana yira momu nawanine kwaEpaforoditusi vininke evi mwatumine. vyavyo vyashidumba shashiwa shaaroma, likudjambero valipanda ntani kuhafita Karunga. ¹⁹ Karunga wande kwagwanitapo vihepwa vyenu kutwara mughungagho wendi mughuyerere mwaKristusi Jesusi. ²⁰ Weno kwaKarunga ntani She kukare ghuyerere kwanaruntje nakunaruntje. Amen. ²¹ Kundenupo vantu vaKarunga navantje vakupongoka mwaKristusi Jesusi. Vaunyenu ava vanakaro name vanamumororapo. ²² Vantu vaKarunga vakupongoka navantje vanakaro kuno vanamumororapo, shinenepo vakalipata lya Kasari. ²³ Ghuyerere waHompa Jesusi Kristusi ghukare nampepo shenu. Amen.