¹ Opo ghaghurumukire Yesusi atunde kundundu, vantu vavangi avamukwama. ² Makura muntu wavingondwe aya kukwendi atongaminine kughuto,aghamba, ''Hompa, nangeshi ghuvipange, kuvhura nikenge.'' ³ Yesus aghonyonona livoko lyendi amukwata, aghamba, ''Ame navipanga. Kena.'' Mpopo akenine kuvingondwe vyendi. ⁴ Yesusi amutantere ashi,''washa vitantera kehe ghuno muntu. vembaghuka, kakuneghede kuvaruti, makura ghukatape ghushwi ogho amurawilire Mosesi, ngoghumbangi kukwavo. ⁵ Opo ayire muCapernaum, mukurona wavakavita aya kwendi, amukanderere ⁶ aghamba, ''Hompa, mukareli wande atompama kumundi kwato kuyenda ntani kuna kuyuva kukora ghunene.'' ⁷ Makura Yesusi aghamba kwendi, '' Kuniya niya muverure ''. ⁸ Mukurona wavakavita alimburura nakughamba, ''Hompa, ame kapi vyangwapere ashi ove ghukangene mumundi wande. Ghamba tupu nkango makura mukareli wande kwaveruka. ⁹ Mbyovyo ashi ame munda yampangeli nakara, munda yande vakavita vakaromo. Ame kughamba, '' Kayenda, '' ghuye kayenda,kwaghumwe, ''Yiya, '' ghuye kuya, ano kwamukareli wande, ruwana vino, ghuye kuviruwana. ¹⁰ Opo ayuvhire Yesusi vino, atetukire aghamba kovo vamukwamino, '' vyaushiri nakughamba, ame kapi nawanamo ghumwe wamapuliro ghano muIsraeli. ¹¹ Ame kuna kumutantera, vavangi ngava katundilira kughupumeyuva nakughutokeyuva, ngava kashungira kuntishe naAburahamu, Isaki,naYakopu, mughuntungi waliwiru. ¹² Anongoli vana vaghuntungi ngava kavavhukimina mumundema pandye, oko ngakukakaro malirankali ntani nakukukwetja mayegho.'' ¹³ Yesusi aghamba kwamukurona wavakavita, '' kayenda! morwa ghuna vipura, mongoli vavikurawanena.'' mukareli averukire paviri ndyoyinya. ¹⁴ Opo ayire Yesusi kundyugho yaPetrusi, amono vangumweya vaPetrusi vana rara kunakuvera nkwengu. ¹⁵ Yesusi avakwata kulivoko, makura nkwengu ayivatundu. Makura avashapuka vatameke kumuruwanena. ¹⁶ Ngurova ayiya, vantu vavangi vayita ovo vakaliro nampepo dadidona kwaYesusi. Ghuye atjidamo mpepo nankango ntani averura navantje ovo vaveliro. ¹⁷ Ovino kwatikiremo ovyo aghambire muporofete Yesaya, ashi, '' Ghuye aghupire maghuvera ghetu namahamba ghetu.'' ¹⁸ Opo amonine Yesusi mbunga yinakumundurukida, atapa manangwiro vayende musheli munya yalifuta lyaGalileya. ¹⁹ Makura mutjangi wamatjangwa aya nakughamba, ''Murongi, ame kuni kukwama kehe kuno ghuyenda.'' ²⁰ Yesusi aghambashi, ''Vambwawa vakara namakwina, ntani vidira vyakuwiru vyakara navitunguru, anongoli Mona Muntu kundereko kwakutateka mutwe wendi.'' ²¹ Ghumwe wavarongwa aghamba, ''Hompa, mpulitire pamuntango niyende nikavhumbike vavava.'' ²² Anongoli Yesusi amutantere ashi, ''nkwame, shuva vafe vavhumbike vafe vavo.'' ²³ Yesusi arondo muwato, navakashishongero vendi. ²⁴ likundungu lyalinene alirambuka,mankumbi aghafiki wato. Yesusi ghuye muturo. ²⁵ Vakashishongero aya kukwendi nakumurambwita, avaghamba ashi, ''Tupopere, Hompa, atwe kuna kufa!'' ²⁶ Yesusi aghamba ashi, ''Vinke munakutjilira, anwe vamapuliro ghamasheshu?'' Arambuka akandana likundungu mulifuta. Makura alikunyiki. ²⁷ Vantu avivatentura avaghamba, ''Muntu munke ghuno, nampili makundungu nalifuta kumulimburukwa?'' ²⁸ Opo ayire Yesusi muruha rumwe rwakushirongo shava Gadarenesi, vakafumu vaviri ovo vakalire nampepo dadidona avaku gwanekere naye. Vavo kwatundire pamayendo ntani kwakalire vashiponga ngudu, kwato kayi pitango oyo ndyira. ²⁹ Makura,avayiyiri nakughambashi, ''Vinke ovyo turuwana nove, Mona Karunga? Ove kunaya ghuyatundyonaghure shasho yashirugho kapi shinatiki po?'' ³⁰ Ghutanga wavinguru vyaviyingi kwalyelilire kunya, kapishi ghure navo. ³¹ Mpepo dadinona datwikilire kukushenga kwaYesusi adighambashi, ''Nange ghututjidamo, tutume mughutanga wavinguru.'' ³² Yesusi adipangere, ''Yendenu!'' mpepo dadidona aditundumo adiyendi muvinguru, ghutanga naghuntje aghuyomona ghughurumuke mulifuta avifu mumema. ³³ Ovo vatakamitiro vinguru avaduka vatundepo vayendi mumbara avakatanta navintje, shinenepo ovyo vyashorokiliro vakafumu ovo vaparukiro mumpepo dadidona. ³⁴ Makura, mbara nayintje avaya vaya wane Yesusi. Opo vakamuwanine, avamushungida atundemo mushirongo shavo.