¹ Mpepo ayimutwara Yesusi mumburundu mukukamukasheteka mudyonaghuli. ² Kuruku rwakudilira mayuva dimurongone namatiku dimurongone, ayimukwata ndjara. ³ Aghamba kukwendi ashi, '' Ntjeneshi ove monaKarunga, rawira ghano mawe akare mboroto.'' ⁴ Ano ngoli Yesusi alimburura nakughambashi '' Vatjanga ashi, ' muntu nakuvhurashi kuparuka mboroto pantjayo anongoli nakukehe nkango yakutunda mukanwa kaKarunga.'' ⁵ Makura mudiyaboli amutwara kumbara yakupongka nakukamutura pawiru-wiru yantembeli, nakughambashi, '' ⁶ ntjene ove monaKarunga, kuvhukumine naghumoye palivhu, vatjangashi, ' Uye nga nangwira vaengeli vendi ngavakukawira; ntani ' Vavo ngava kudamuna mumahoko ghavo, mpongolishi ove kapishi ngaghupunduke mpadi doye muliwe.'' ⁷ Yesusi aghamba kukwendi ashi, '' vatjangashi, ' ngashaghusheteka Hompa Karunga ghoye.'' ⁸ Mundyonaghuli amutwara kundundu yayire ghunene nakumunegheda maghuntungi naghantje ghamughudyuni rambangako nashikoda shamo. ⁹ Uye aghamba ashi, '' Navintje vino ngani vikupa, ntjeneshi ghuntongamene.'' ¹⁰ Makura Yesusa aghambashi, '' Tundapo pano, Satani! vatjangashi, 'tongamena Hompa Karunga ghoye nakumukarere pantjendi ti.'' ¹¹ Makura mudiyaboli amushuvu, makura vaengeli avaya vayamukarere. ¹² Opo ayuvire Yesusi ashi Yohanesi vana mukwata uye atundu kuGaleleya. ¹³ Atundu kuNasareti ayende atunge muKaperenaumu, kunya kuviha vyalifuta lyaGaleleya mumukunda waSeburoni naNafitali. ¹⁴ Vino kwashorokilire mukutikitamo ovyo aghambire muporofete Yesaya, '' ¹⁵ Livango lyaSeburoni ntani livango lyaNafitali, kuviha vyalifuta, musheli munya yaYorodani, Galeleya yavahedana! ¹⁶ Vantu vatungo mumundema ngavamona ghukenu washikoda shendi, vantu vaparuko mushirongo shamundulye wamfa,ngavamona shite shendi.'' ¹⁷ Yesusi murvede runya atameke kuyaghura nakughambashi, '' Kushighurenu, ghuntungi waliwiru papepi ghunakara.'' ¹⁸ Apa ayendire kuntere yalifuta lyaGalileya, amono Simoni ogho vatwenyangashi Peturusi, namughunyendi Andriyasi, kuna kutegha likwe lyavo mulifuta, vavo kwakalire vashakangcongco. ¹⁹ Yesusi avatantere ashi, '' Yenu, munkwame, Nganimurenke ngmukarevankwati vavantu.'' ²⁰ Mpopo tupu avashuvu makwe ghavo amukwama. ²¹ Yesusi opo akutundire panya amono nka vantu namughunyendi vaviri, Yakopu namughunyendi Yohanesi,vana vaSebedeusi. Vavo kwakalire muwato nashavo Sebedeusi kuna kuwapayika makwe ghavo. Avavayita, ²² makura avashuvu wato wavo nashavo avamukwama. ²³ Yesusi ayendi muGaleleya nayintje, arongo musinagoge davo, kuyaghura mbudi yaruhafo yaghuntungi nakuverura marudi ghamaghuvera namahamba mukatji kavantu. ²⁴ Mbudi yakuhamena Yesusi ayi kuhanene muSiriya mudima, avayita vantu ovo kavahepango kumaghuvera ghakukushuva-shuva ntani kukora, novo vakaliro nampepo dadidona, navakavingondwe ntani navirema. Yesusi avaverwilire. ²⁵ Mbunga yayinene ayi mukwama kutunda kuGaleleya, Dekapolisi, Yerusalemu, Yudeya, ntani vakutunda mushelimunya yaYorodani.