¹ Kungurangura, Navantje Vapristeli vavanene ntani vakurona vavantu avaghamba mukukulimba naYesusa mukukamutokwera kumfa. ² Vavo avamumanga, avamughupupo, ntani nakukamutapa kwaPilatusi Ngughuru. ³ Makura Yudas, ogho amushoroliro, opo amonine ashi Yesusi vana mushiponga,akushighura avyuta vingcengere rontatu vyaShiliveri kuva rutikurona nakumatimbi. Aghambashi, '' ⁴ Ame nadyono mukushorora honde yakupira ndyo.'' Anongoli vavo avamutantereshi, '' Vinke ngoli ovyo kukwetu? Vikenga kovyo naghumoye.'' ⁵ Makura akavivhukuma vingcengcere vyashiliveri muntembeli, atundupo, makura arupuka ayendi. akakumangerera naghumwendi. ⁶ Varutikurona avaghupu vingcengcere vyashiliveri avaghambashi, '' Kapi vyapulitira kuvitura vino mushikesha mukonda ashi yayo ntjontjo yahonde,'' ⁷ Avakuyongo shishorokwa kumwe,avaghuru lifuva lyamushongi walirova omo ngava vhumbikanga vantunda virongo. ⁸ Nakonda yino olyo lifuva kwalitwenyanga ashi, '' Lifuva lyaHonde" nanamuntji lino. ⁹ Mposhi ovyo aghambire muporofete Yeremiya vyatikiliremo, kwaghambireashi, '' Vavo vaghupire vingcengcere rontantu vyashiliveri, ntjontjo vatulire pendi vana vaIsrayeli, ¹⁰ Avavitapa kulifuva lyamushongi walirova, yira momo avinangwilire ame Hompa.'' ¹¹ Makura Yesusi ayimana kumeho yangughuru,ngughuru amupura, '' Ove ne Hompa wavaYuda ndi?'' Yesusi amulimburura, '' Ove ghuna kuvighambo.'' ¹² Anongoli opo vamurundilire varutikurona namatimbi, kwato vyo alimburulire. ¹³ Makura Pilatusi aghamba kwendi ashi, '' Ove kapi ghuna kuviyuva navintje vana kukurundira ndi?'' ¹⁴ Anongoli ghuye kapi alimburulire nampili nkango yimwe,makura ngughuru vyamutetulire ngudu. ¹⁵ Paruvede rwashilika pakalire mpo yakushutura po nguvhuru nkwati yimwe mudorongo. ¹⁶ Pashirugho shinya pakalire mukadorongo adido walidina Yesusi Barabasi. ¹⁷ Opo vapongire kumwe, Pilatus avapura ashi, '' Are ogho munashana nimushutwira?'' Barabasi, ndi Yesusi ogho vatwenyanga ashi Kristusi?'' ¹⁸ Ghuye aviyivire ashi vavo kwamuyitire Yesusi mukonda yamfudu. ¹⁹ Ghuye nda ashungilira kushipuna shampanguro, mukamali wendi atumu nkango kwendi nakughamba ashi, '' Washarughanako vintu kogho mukafumu wakupira ndyo. Mbyovyo ashi ame nahepa ngudu namuntji mukonda yandyodi oyo nakara nayo yakuhamena kukwendi.'' ²⁰ Makura varutikurona namatimbi avashongaghura mbunga vapulireko Barabasi, vadipaghe Yesusi. ²¹ Nguvhuru avapura, '' Ghunindyepo pavaviri nimumangwilira po?'' Vavo avaghamba ashi, Barabasi''. ²² Pilatusi aghamba kukwavo, '' Vinke ovyo niruwana noghuno Yesusi ogho vatwenyanga ashi Kristusi?'' Navantje avalimbura ashi, '' Vamupamparere.'' ²³ Makura ghuye aghamba ashi, '' Konda, vinke vyavidona ovyo aruwana?'' Anongoli ayiyire nka ghunene, '' Vamupamparere.'' ²⁴ Pilatusi apa avimonine ashi navimweshi anakuwana po, muyoyo kuna kutameka, aghupu mema, akukushu mavoko ghendi kumeho yambunga, aghamba ashi, '' Ame kapishi mutjoni kuhonde yaghuno murwana. vikare vyenu. ²⁵ Vantu navantje avaghamba ashi, '' Honde yendi yikare papetu ntani navana vetu.'' ²⁶ Makura ghuye avamangwiliri Barabasi, anongoli ghuye atapa Yesusi vamupamparere. ²⁷ Makura vakavita vanguvhuru avatwara Yesusi mulivango lyampanguro lyalipangero yapongire mbunga nayintje yava kavita. ²⁸ Avamushutura vyma vyendi avamumanga shituku. ²⁹ Avaruwana nkata yamigha makura avamudwateke kumutwe wendi, avamutura mpango mulivoko lyendi lyarulyo. Vavo avatongamene kumeho yendi nakumushwaghura, nakughamba ashi, '' Ogho, Hompa wavaYuda! ³⁰ Avamutipiri, avaghupu mpango avayimutoghonita mumutwe rwarungi narwarungi. ³¹ Avamushwaghura avamushutura lirwakani makura avamutura lirwakani lyamwene avamutwara vakamupamparere. ³² Opo varupukire mo, avawana mukafumu wakuSayireni walidina Simoni, ogho vatininikire vayende kumwe naye mposhi ashimba shikurushe shendi. ³³ Avaya palivango vatwenyanga Gorogota, kutantashi '' Livango lyaMakorongongo.'' ³⁴ Avamupa vhinyu yakuvhonga nanyangwe anwe. Anongoli avimakilire,anongoli kapi ayi nwine. ³⁵ Opo vamanine kumupamparera, makura avakutapere vidwata vyendi pafungu-fungu, ³⁶ makura avashungire vamukunge. ³⁷ Pawiru yamutwe wendi avaturapo shitjangwa shakumurundira, osho shatantiro ashi, ''Oghu ne Yesusi, Hompa wavaYuda.'' ³⁸ Pakalire vakawidi vaviri ovo vamupampalire kumwe naye, ghumwe kurulyo rwendi ntani ghumwe kurumontjo. ³⁹ Ovo vapitiro avamutuku, avapungu dimutwe davo. ⁴⁰ Nakughamba ashi, '' Ove oghu ngaghu dyonaghuro ntembeli ngaghuyidikurure mumayuva matatu, kuyovoreko naghumoye! Ntjeneshi ove Mona Karunga, gcumpuka ko kushikurushe!'' ⁴¹ Munkedi yakukufana varutikurona vamushwaghulire,kumwe navarongi vamatjangwa namatimbi, avaghamba, '' ⁴² Ayovolire vaghunyendi nakukuyovorashi mwene. Ndye Hompa waIsrayeli. Agcumpuke ko shakushikurushe, ndi kutupura mumwendi. ⁴³ Ghuye ahuguvara mwaKarunga, arenke Karunga amupopere, ntjene Karunga avishane kumumangurura. Ghuye kaghambangashi, ' Ame Mona Karunga.' ⁴⁴ Mundyira yakukufana vakawidi ovo vamupampalilire kumwe naye navo avamutuku. ⁴⁵ Kutunda muviri yantayimwe mundema wayire palivango nalintje dogoro viri yantane. ⁴⁶ Paviri yantane, Yesusi ayiyihire naliywi lyalinene, Eli, Eli, Lama Sabakatani?'' kutantashi, '' Karunga wande, Karunga wande, vinke oyvo ghuna ntjuvililira?'' ⁴⁷ Ovo vayimanino opo vaviyuvire, avaghambashi, '' Ghuye kuna kukugha Eliya.'' ⁴⁸ Mushikando ghumwe wavo aduka nakaghupa shikeshe, shangeno vhinyu yaghushashu, ashimanga ruvhu, amupa anwe. ⁴⁹ Vakuhupako navantje avaghamba ashi, '' Amushuvenu. Tukengeshi Eliya kwaya ayamuyovore'' ⁵⁰ Makura Yesusi ayiyiri nka naliywi lyalinene makura atapa mpepo yendi. ⁵¹ Makura, likeshe lyamuntembeli kwataghukire paviri kutundilira kuwiru dogoro palivhu, ghudyuni aghu kunyunganga, ntani mawe agha mwakaghuka mukatji. ⁵² Mbira kwagharukire, ntani marutu ghavantu vakupongoka avavaraliro kwava rambwitire. ⁵³ Vatundiremo mumbira kunyima yalivhumbuko lyendi, Kungena mumbara yakupongoka, vamonikire kuvavayingi. ⁵⁴ Opo vavo monine vakungi ovo vakengiliro Yesusi likinko lyalivhu novyo vyashorokiro,aghuva wana ghoma waghunene waghunene avaghambashi, '' Vyaghushiri ghuno Mona Karunga akaliro.'' ⁵⁵ Vakamali vavayingi ovo vakwaminoYesusi kutundilira kuGalileya ovo kavamupakera mbili kwayimanine kughure vakengere. ⁵⁶ Mukatji kavo Mariya Magdalena, Mariya vawina vaYakopu naYosefu,nanyokwa vana vaSebede. ⁵⁷ Pangurova, apanya mukafumu wangavo wakuArimateya, walidina Yosefu, ogho akalironka naye mukashishongero waYesusi. ⁵⁸ Ghuye ayendi kwaPilatusi akashungida rutu rwaYesusi.Pilatusi araghura varumupe. ⁵⁹ Y osefu aghupire rutu, akurudingira palikeshe lyalikenu, ⁶⁰ akarurangeka mumbira yendi yayipe oyo atjokolire muliwe. Makura ashindwimwiniko limuwe lyalinene kulivero lyantoko akayenda. ⁶¹ Mariya Magadalena naMariya ghumwe mpovakalire, kwakushekunine kushungira nantoko. ⁶² Liyuva lyakukwamako, liyuva olyo lyakaliro lyamuruku lyakukuwapayikira, Varutikurona navaFaraseyi avapongo kumwe naPilatusi. ⁶³ Avaghambashi, '' Mukalikuto, atwe kuna kuvhuruka ashi oghunya mupukiti opo akalire muyumi, ghuye aghambireshi, '' Kunyima yamayuva matatu ngani kavhumbuka nka,'' ⁶⁴ Mpo araghulire ashi ntoko vayitakamite dogoro mayuva matatu, vakashishongero vendi kuvhura vaye vayamuvakemo ngavatantere vantu ashi, ' Anavhumbuka kughufe,'kupukita kwakuhulilira ngakupitakana kwakuhova wakuhulilira ngaghu ditopa kupitakana wakutanga.'' ⁶⁵ Pilatusi avatantere, '' Kakungenu. Yendenu mukavirughane yira momo mwaviyivira.'' ⁶⁶ Makura avayendi vakakunge ntoko,kushindwimwinako liwe kuturako vakungi.