¹ Opo amanine kughamba Yesusi nkango dino, atantere vakashishongero vendi ashi ² ''Munayiva ashi kunyima yamayuva maviri Pashika ngayikare, makura Mona Muntu ngavamutape ngavamupamparere.'' ³ Makura mukurona wavaruti namatimbi vapongire kumwe mumbara yamukurona wavaruti, walidina Kayifasi. ⁴ Avakughu kumwe vamukwate Yesusi mukaholye-holye vamudipaghe. ⁵ Vavo kwaghambire ashi, Ngoli kapishi muruvede rwashilika, mposhi muyoyo kapishi ngaghu kare mukatji kavantu.'' ⁶ Shirugho shinya Yesusi ghuye muBetani mumundi waSimoni mukavingondwe, ⁷ vavo vana shungiri kushitafura, mukamali aya nalikende lyamahadi ghandiro ghunene, makura aghatere pamutwe wendi. ⁸ Ano vakashishongero vendi opo vavimonine vino, avagarapa avaghamba ashi, ''Vinke lina kutanta lino lihepeko? ⁹ Ndi tuna ghulita kumaliva ghamangi mposhi tuvitapere vahepwe.'' ¹⁰ Makura Yesusi, aviyivire, avatantere ashi, '' Vinke muna kumutindira ghuno mukamali? Ghuye anaruwana vininke vyaviwa kwande. ¹¹ Anwe kehe pano ngamukara navahepwe anongoli kapishi name ngamukara. ¹² Omo anantere maghadi ghano parutu rwande, ana viruwanene mukonda yalihoreko lyande. ¹³ Ghushiri nakumutantera, kehe kuno ngavayuvitira mbudi yino mughudyuni naghuntje, ovino anaruwana mukamali ghuno ngava vighamba vino kumavhurukiro ghendi. ¹⁴ Ghumwe wamurongo navaviri, ogho kavatwenyanga ashi Yudasi Isikariyoti, ayendi kumukurona wava ruti ¹⁵ akaghamba ashi, ''Vinke munashana kumpa, mposhi nighumu shorwere?,'' Avavihi vingcengce vyakutika kurontatu vyashiliveri avavimupa. ¹⁶ Shirugho shinya makura awana mpito yakuvashorwera. ¹⁷ Maliyuva lyakuhova lyamboroto yakumpira kushasheka vakashishongero avaya kwaYesusi avaghambashi, ''Kuni ghuna horo tuvhura kuwapayikira murarero waPashika?'' ¹⁸ Aghamba, '' Yendenu munkurumbara kwamukafumu ghumwe mukamutantere ashi, 'Murongi kuna ghamba ashi, ''Shiruho shande pepi. Ame kuni yatikitamo pashika mundyugho yoye kumwe navakashishongero vande.'' ¹⁹ Vakashishongero avaviruwana yira momu avatantilire Yesusi, avayendi vakawapayike murarero waPashika. ²⁰ Kungurova, ashungiri kumwe navakashishongero vendi murongo navaviri. ²¹ Vavo kuna kulya, aghamba ashi, ''Ghushiri nakumutantera ashi ghumwe wenu ndye ngantjororo.'' ²² Makura avivaguvita, kehe ghuno atameke kumupura, ''Walye kapishi Ame, Hompa.'' ²³ Alimburura, ''Ndyegho adivido livoko kumwe name mushisha ndye ngantjororo. ²⁴ Mona muntu ngavimushorokera, yira momo tupu vavitjanga. Ani nane lihudi kumuntu omo linapitili lishororo lyaMona Muntu! Hasha ndi kapi vamushampuruka ghuno murwana.'' ²⁵ Yudasi, ogho ngamuheto makura aghamba ashi, '' kapishi Ame, Murongi?'' Amutantere ashi, '' Ghuna vighamba naghumoye.'' ²⁶ Vavo kuna kulya, Yesusi aghupu mboroto,ayipandura, ayibamuna. Ayitapa kuvakashishongero vendi aghambashi, Ghupenu, lyenu. Oruno ndo rutu rwande.'' ²⁷ Aghupu nka nkinda makura atapa mpandu, ayitapa kuvakashishongero vendi aghambashi, ''Nwenu mo, namuvantje. ²⁸ Yino ndyo honde yande yaligwaniko lyalipe olyo lyatekero vavayingi kulidongwenenopo lyandyo. ²⁹ Ano kuna kumutanterashi, Ame kapi ngani nwa nka kushiyimwa shavinyu shino, dogoro liyuva olyo Ngani kanwa shashipe kumwe nanwe mughuntungi wavaVava.'' ³⁰ Avayimbi rushumo, makura avayendi Kundundu yaMaghuywe. ³¹ Makura Yesusi avatantere ashi, ''Namuvantje kumukuhana kungurova mukonda yande, vatjangwa ashi, 'Ame nganitovona mushita makura ndwyi nashivhunda ngashikughana.' ³² Anongoli kunyima yakuvhumbuka, nganipita kughuto wenu kuGalileya.'' ³³ Makura Peturusi aghamba ashi, ''Nampili navantje vakukomberere, ame kapi nikushuva.'' ³⁴ Yesusi amutantere ashi, ''Ghushiri nakukutantera, kumatiku ghano, kumeho yakuyiya shikondomboro, kughu kankanana rukando rutatu.'' ³⁵ Peturusi aghamba ashi, ''Nampili kuna fu nove, kapi ngani kukanana.'' Vakashishongero navantje avaghamba vininke vyakukufana. ³⁶ Makura Yesusi ayendi navo kulivango limwe vana kutwenya ashi Getisemane makura atantere vakashishongero vendi ashi, ''Shungirenu pano shirugho nakuyenda nikarapere.'' ³⁷ Makura ayendi naPeturusi ntani navana vavakafumu vaSebede makura ruguvo naghudito aghumuwana. ³⁸ Makura avatantere ashi, ''Monyo wande ghunaguvu shiri ghunene, kutwara kumfa. Karenu pano nakurungarara name.'' ³⁹ Ashweneko kadidi, akunyongamene, araperere. Aghamba ashi, Vava, nangeshi vinapulitiri, renkenu nkinda yino yinkunduruke. Anongoli, kapishi muvihima vyande, nani ngoli muvihima vyoye.'' ⁴⁰ Aya kuvakashishongero vendi kuyavawana vanarara, makura aghamba, Peturusi, ''Anwe, nakuvhurashi kudcunya kumwe name muviri yimwe tupu? ⁴¹ Vangarenu nakuraperera mposhi mupire kuwira mumasheteko. Mpepo yinahimi, anongoli rutu kudereko nkondo.'' ⁴² Ayendi nka shikando shaghuviri akaraperere. Aghamba ashi, Vava, ntjeneshi runyando oru kapi rupita dogoro rungwane, renka rungwane momu ghuna vishanene. ⁴³ Akavyuka kuyavawana nka vanarara, morwashi mantjo ghudito kughapahura. ⁴⁴ Shimpe avashuvu nka ayendi akarapere rukando rwautatu, mukaghamba vininke vimwe tupu vyakukufana. ⁴⁵ Makura akavyuka kuvakashishongero vendi ayavatantere ashi, ''Shimpe ndakamurarere mupwiyumuke? Kengenu, viri yinatiki, Mona Muntu kuna muhete mumahoko ghava nandyo. ⁴⁶ Shapukenu, tuyende. Kengenu, oghu ana kungulito pepi ana kara.'' ⁴⁷ Ghuye shimpe kuna kughamba, Yudasi, ghumwe wavakashishpongero, ayatiki. Mbunga yayinene ayi mukwama kutundilira kwamukurona wava ruti namatimbi. Vavo avayanamarufuro namahonga. ⁴⁸ Makura mukafumu oghu aghulitiro Yesusi avapashiyivito, aghamba ashi, ''Ogho nicumita ndye ndyegho. Mukwatenu.'' ⁴⁹ Makura aya wangu-wangu kwaYesusi aghamba ashi, ''Moro, Murongi!'' makura amucumita. ⁵⁰ Yesusi amutantere ashi, ''muholi, ruwana ovyo ghuna yere.'' Makura akambeke livoko paYesusi, avamukwata. ⁵¹ Makura, ghumwe ogho akaliro naYesusi apweyemo rufuro makura ateteko litwi lyamukareli wamurutikurona,alitunduko. ⁵² Makura Yesusi amutantere ashi, ''Tura rufuro roye oku runa mulivango rwalyo, kehe ghuno wakuruwanita narufuro ngadyonaghuka kurufuro. ⁵³ Kapi ghuna yiva ashi kuvhura nitantere vaVava,vantumine ghakupitakana murongo navaviri dambunga yavaengeli ndi? ⁵⁴ Weni ngoli atikamo matjangwa, ovino vyakona kushoroka?'' ⁵⁵ 'Makura apura mbunga ashi, ''Munaya namarufuro namahonga muyankwate yira mukawidi? Kehe pano kanishingaranga muntembeli nironge, kapi mwankwatire. ⁵⁶ Anongoli navintje vino vinashoroka mposhi matjangwa ghava porofete ghatikiliremo.'' Makura vakashishongero navantje avamushuvu vakaduke. ⁵⁷ Ovo vakwatiro Yesusi avamutwara kwaKayifasi mukurona wavaruti, oko vapongire valirongi vamatjangwa namatimbi. ⁵⁸ Anongoli Peturusi amukwamine kughurere kulirapa lyamurutikurona. Makura angene munda akashungira kumwe navakungi akengere ovyo vishoroko. ⁵⁹ Mukurona wavaruti nava ndango avashana ghumbangi wakupira ghushiri wakuhamena Yesusi mposhi vamudipaye. ⁶⁰ Anongoli kapi vaghuwanine kehe ghuno mpangi, nampili momo vambangi ghakupira ghushiri vaghatapire ⁶¹ nakughamba ashi, ''Mukafumu ghuno anaghamba ashi, 'Ngani yungurura ntembeli yaKarunga makura nganiyidikurure mumayuva matatu.'' ⁶² Mukurona wavaruti ashapuka nakughambashi, ''Kapi ghunakara nalilimbururo ndi? Kovino vana kungampipara vyakuhamena koye?'' ⁶³ Anongoli Yesusi kapi akumbulireko. Mukurona wavaruti aghamba ashi, '' Ame kuna kughana paKarunga wakuparuka, tutantere ntjeshi ove Kristusi, Mona Karunga.'' ⁶⁴ Yesusi amulimburura ashi, '' Ghuna vighamba naghumoye. Anongoli Ame kuna kukutantera ashi, kutunda pano Mona Muntu ngaghumumona anashungiri kurulyo rwankondo, ntani kuna kuya pamaremo ghamuwiru.'' ⁶⁵ Makura mukurona wavaruti ataghura vyuma aghambashi, ''Ghuye kuna kughamba lishwaghuro! Vinke nka ovyo tushanena vambangi? Kengenu, munavikuyuviri naghumwenu lishwaghuro. ⁶⁶ Vinke muna kughayara?'' Avalimburura ashi, ''Ghuye dina muwapere mfa.'' ⁶⁷ Makura avamutipiri mushipara kumwe nakumutoghona nangomi davo, avamukapura, ⁶⁸ nakughamba ashi, '' Tuporofetere, ove Kristusi. Are ogho ana kutovono?'' ⁶⁹ Peturusi ghuye ana shungiri pandye yalirapa, makura mukareli wamukamali aya kukwendi aghambashi, ''Ove nove kumwe wakalire naYesusi wamuGalileya.'' ⁷⁰ Anongoli ghuye akanana kumeho yavo navantje, nakughamba ashi, ''Kapi niyiva ashi vinke ghuna kughamba.'' ⁷¹ Apa ayendire pandye yalivero, mukareli ghumwe wamukamali amumonine makura aghamba kovo vakaliropo, ''Mukafumu ghuno ghumwe waYesusi wamuNasareti.'' ⁷² Shimpe akanana nakughana, ''Kapi namuyiva Ame ghuno murwana!'' ⁷³ Kuruku rwakarugho tupu ovo vayimanino avaya kwaPeturusi,avaghamba ashi, ''Ghushiri ove ghumwe wavo, omo waghambanga vyene kuna kukunegha.'' ⁷⁴ Makura atameke kufinga nakughana, ''Ame kapi namuyiva ogho mukafumu,''Mpopo tupu shikondomboro ashiyiyi. ⁷⁵ Makura Peturusi avhuruka nkango daYesusi ovyo amutantilire ashi, ''Kumeho yakuyiya shikondomboro ngaghu nkanana rukando rutatu.'' Makura arupuka pandye akalira ghunene.