¹ Muruku rwaSabata, murughundja kutamba kuliyuva lyakuhova lyamushivike, Mariya Magdalena ntani naMariya ghumweya avaya vayakenge kumbira. ² Ano, kwakalire likinko lyalinene lyalivhu, muengeli waHompa atunda muliwiru, aya ntani ashindumune ko liwe litundeko, makura ashungiripo paliwe. ³ Limoneko lyendi kwakalire yira ruvadi, ntani vyuma vyendi vyavikenu yira ndaghu. ⁴ Vakungilimona aghu vawana ghoma ntani avakara yira vantu vakufa. ⁵ Muengeli atantere vakamali ashi, ''' Kapishi mutjire, naviyiva ashi Yesusi muna kushana, owo vapampalire. ⁶ Mwato muno, anavhumbuka, yira moomo aghambire. Yenu muyakenge livango opo karara Hompa. ⁷ Yendenu wangu mukatantere vakashishongero vendi, ' Anavhumbuka mumbira. Ghuye,kuna kuyenda kumeho yenu kuGaleleya. Oko kumu kamumona.'Kengenu, yira momo navimutantere.'' ⁸ Vakamali makura avatundu kumbira wangu-wangu nawoma ntani naruhafo rwarunene, makura avaduka vakatantere vakashishongero vendi. ⁹ Anongoli, Yesusi agwanekere navo aghamba ashi, '' Moro! Vakamali avaya, avakwata mpadi dendi ntani nakumukarera. ¹⁰ Makura Yesusi aghamba ashi, '' mwasha ntjira. Yendenu muka tantere vaghuni ngavayende kuGalilea. Oko nko vakamonena''. ¹¹ opo vayendire vakamali, anongoli, vakungilimona vamwe avayendi mumbara makura avatantere varutikurona vininke navintje ovyo vyashorokiro. ¹² Varuti vavanene apa vagwanekere namatimbi avakuyongo kovyovyashorokiro, atapa maliva ghamangi kuvakavita n nakuvatantera, '' ¹³ Tanterenu vamwe ashi, ' Vakashishongero vaYesusi vanaya matiku vanaya vaka rutu rwendi atwe tunarara'. ¹⁴ Ntjeneshi mbudi yino yikatike kwangughuru, kutu mushengawida nakughupa vinka kehe vino kukwenu.'' ¹⁵ Vakavita vaghupire maliva avaruwana yira momo vavanangwilire. Mbudi yino vyakuhaninine ghunene mukatji kava Yuda ntani kuna kutwikira nampili nalyana mutji. ¹⁶ Anongoli vakashishongero murongo naghumwe avayendi kuGaleleya, kundundu oko avanaghidire Yesusi. ¹⁷ Opo vamumonine, vamukarere, anongoli vamwe vakalire namashinganyeko. ¹⁸ Yesusi ayakukwavo ntani aghamba ashi, ''' Nkondo nadintje vaditapa damuliwiru nadapalivhu. ¹⁹ Mpongoli ashi yendenu mukaronge vakashishongero vamudimuhoko nadintje. Vayoghenu mulidina lyaShe, lyaMone, nalyaMpepo yaKupongoka. ²⁰ Varongenu vatikitemo vininke navintje ovyo namurawira. Kengenu, Ame ngani kara nanwe kehe pano, dogoro kughuhura waghudyuni.