¹ Yesusi arupuka mo muntembeli aka yende. Makura vakashishongero vendi avaya kukwendi avayamuneyeda matungo ghantembeli. ² Anongoli Yesusi avalimburura nakuvatantera ashi, "Ovino navintje munakumona? Kuna kumutantera ghushilri ashi, kwato nampili liwe limwe olyo ngalihupapo pantunda yamawe olyo ngava pira kuyungurura." ³ Kutundapo Yesusi ayendi aka shungire pandundu yamaghuywe, vakashishongero vendi avaya kukwendi mukaholya-holye avamupura Yesusi ashi, "Tutantere, shirugho munke ngavishoroka vyene vino? Viyivito munke ovyo ngavi neghedo ashi pepi ghunakara ntani tutantere viyivito ovyo ngavi neyedo ashi ghuhura waghudyuni pepi ghunakara?" ⁴ Yesusi avalimburura nakuvatantera ashi, "Karenu muna vangara mposhi kapishi ngava mupukite ngava mushuve muliyome. ⁵ Mbyovyoshi, vavangi ngavaya mulidina lyande. Vavo ngava yaghamba nakukukitaghukira ashi, Ame Kristusi,' mposhi ngava tware vantu vavangi muliyome." ⁶ Anwe ngamuyuvha vita namarapoto ghaku kutjoka-tjoka. Anwe karenu muna vangara kapishi ngamu kare naghoma, ovino navintje vina hepa kushoroka; anongoli shimpe kapishi ngoghuhura waghudyuni. ⁷ Mbyovyoshi dimuhoko ngadi kupiruka ntani virongo navyo ngavi kupiraghuka. Ngakukara lirumbu nalikankamo lyalivhu kumavango ghakuku shuva-shuva. ⁸ Ovino navintje mbyo ngavihovo pakutanga kwaghudito waghunene. ⁹ Ngava kwata nakamuhepeke mwamudona ntani ngava kamudipagha. Ngava munyenga mudimuhoko nadintje mukonda yalidina lyande. ¹⁰ Vavangi ngava puka vatunde mumapuliro, vavo ngava kamuropota nakukunyenga-nyenga vavene. ¹¹ Vaporofete vavimpempa vavangi ngavaya ovo ngava pukito vantu vavangi. ¹² Ghurunde ngaghu vhuka ghunene, shihoro shavantu vavangi ngashikara shinatende. ¹³ Anongoli ogho ngakaro nalididimiko dogoro kughuhura ndye ngaka paruko. ¹⁴ Anongoli yino Mbudi yaruhafo yaghuntungi waKarunga vanahepa kuyuvita mughudyuni mudima ngayikare ghumbangi kudimuhoko nadintje. Ntani ngakukakwama ghuhura waghudyuni. ¹⁵ "Ntaninka, opo ngamumona lidjonaghuko lyamashwaghu, ogho aghambire muporofete Daniyeli" (muvaruli atede), ¹⁶ "Makura ovo vakaro muYudeya ngamu dukire kundundu, ¹⁷ kehe ghuno ngakaro pawiru yandyugho kapishi nga vyuke akangene mundyugho akadamunemo keheshino, ¹⁸ ntani keheghuno ngakaro mulifuva kapishi ngavyuke ko kumundi akashimbe shuma shendi. ¹⁹ Nane kuvakamarutu maviri novo ngava yamweko vakeke mayuva ogho! ²⁰ Rapererenu ashi kapishi ngavishoroke pakufu ndi ashi muSabata. ²¹ Ngarukara runyado rwarudona,kapi rwashoroka kutunda kulishito lyaghudyuni dogoro weno, kwato, kapi ngavishoroka nka. ²² Nkwandi mayuva ogho vaghafupipita, ndi kudereko muntu ngakayovoko. Ngoli mukonda yavatovororwa mayuva ogho ngava ghafupipita. ²³ Nange ghumwe ngamutantere ashi, 'Kengenu, Kristusi ghuno! ndi po, 'Kristusi ghunya!' mwashavipura. ²⁴ VaKristusi navaPorofete vavimpempa ngavaya nakuya negheda viyivito navitetu, mposhi vamupukite, nange ngavawana mpito, nampili vatovororwa. ²⁵ Kengeun, ame kuna kumutantera vino kughuto wakashoroka. ²⁶ Mpongoli, ntjeneshi avamutantere ashi, 'Kengenu, ghuye mumburundu anakara.' mwasha yenda mo mumburundu. Ndi ashi, 'Monenu, ghuye munda anakara,' mwasha vipura. ²⁷ Yira momo tupu rwavemanga ruvadi nakutwedera kutundilira kughupumeyuva dogoro kughutokero, omo mo ngoli ngalikara limoneko lyaMona Muntu. ²⁸ Kehe kuno vyakara vikorama vyakufa, makuvi nayo nko kwakuponga nkoko. ²⁹ Makura kunyima yarunyando oro liyuva ngali shovagana, kakwedi kapi ngaka tapa ghukenu wako, ntungwedi ngadiwa kuliwiru, ntani ghuna nkondo waliwiru ngaghu kunyunganga. ³⁰ Makura viyivito vyaMona Muntu ngavimoneka kuwiru, ntani dimuhoko nadintje dapandunda yalivhu ngadikara muruguvo. Ngava mumona Mona Muntu kuna kuya pamaremo muliwiru naghu nankondo nashikoda. ³¹ Ngatuma vaengeli vendi ngarushaghara rumbendo, makura ngava pongayike vatohoroli vendi kutundilira kumaruha mane yayunganga pepo, dogoro nkoko lyashayera liwiru. ³² ''Kushongerenuko shirongwa kushitondo shaghukuyu. Nange tupu ashi dimutavi adivareke kushokera nakukukumuka mahako, kare kaghuyiva ashi kurombo pepi. ³³ Nka waro, nangeshi amumono navintje vino, yivenu ashi pepi anakara, nalivero. ³⁴ Ghushiri nakumutantera ashi, ruvaro ghuno kapi ngaghupita dogoro vininke navintje vino ngavishoroke. ³⁵ Liwiru nalivhu ngavidongonoka po, anongoli nkango yande kapi kayidongonoka po. ³⁶ Vyakuhamena kuliyuva olyo viri kundereko ghumwe wakuviyuva, nampili vaengeli vamuliwiru,naMonashi, kwandi Vashe pentjendi. ³⁷ Yira momo tupu ghakalireko mumayuva ghaNowa, monka ngoli ngaya Mona Muntu. ³⁸ Mumayuva ghanya kumeho yaruhandyo kava lyanga nakunwa, nakukwara nakukukwareka dogoro liyuva olyo Nowa angenine mulimuwato, ³⁹ kapi vayivire vintu dogoro ruhandyo aruya ruyavakushepo- mo ngoli ngavikara muliyo lyaMona Muntu. ⁴⁰ Vakafumu vaviri ngavakara mulifuva- ghumwe ngava mughupa po, anoghumwe ngava mushuva po. ⁴¹ Vakamali vaviri ngava vakweya nalihina-ghumwe ngava mughupa po anoghumwe ngava mushuva po. ⁴² Mpongoli ashi karenu muna vangara, mbyovyoshi kapi muyiva liyuva olyo ngaya Hompa. ⁴³ Ngoli yive vino, muhona wamundi ashi ndi ayivire ashi ruvede munke aya muwidi, ndi akalire mulikeverero mposhi muwidi kapishi avhure kungena mo. ⁴⁴ Mpongoli ashi, nanwe vangarenu, Mona Muntu ngaya muviri ngaghu dira kutaterera. ⁴⁵ ''Are wakupuraogho akaro namukalire wakuvangara atuma akarerepo limona lyendi mughuhunga atape ndya pashiruvo shakuwapera? ⁴⁶ lirago shiri ogho mukareli ngaya wana mwenyavininke ghuye kuna kuruwana opo ngaya. ⁴⁷ Ghushiri nakumutantera mwenyavinke ngaya mutura apengre limona nalindye. ⁴⁸ Anongoli nangeshi mukareli wamudona aghamba mumutjima wendi ashi, 'Mwenyavininke kuna kukuranga,' ⁴⁹ makura atameke kutovona vaghunyendi, nakulya nakunwa navankorwi, ⁵⁰ makura mwenyavininke ghunya ngaya muliyuva olyo anadiri kutaterera naviri oyo anadili kuyiva. ⁵¹ Mwenyavininke ngayamutetaghura ghugcene-ghugcene nakumutura mulivango kumwe navovavikutura, oko ngava kaliro nakukukwetja mayegho.