¹ Makura Yesusi atantere mbunga navakashishongero vendi. ² Aghambashi,'' Vatjangi vamatjangwa ntani navaFaraseyi vashungira pashipuna shaMosesi. ³ Mpongoli kehe vino vamurawira ashi muviruwane, viruwanenu ntani nakuvikengera. Anongoli kapishi muvahonene viruwana vyavo, vavo kughamba vininke anongoli nakuviruwanashi. ⁴ Nhii, vavo kumangayika dimudigho dadinene odo davaditopero kudishimba, makura vavo kuditura pavipepe vyavantu. Anongoli vavo kapi vaghonyonona munwe vaghudamune. ⁵ Vavo kuruwana vininke vavamonepo vantu. Vavo kuruwana maruvya ghanenepe, ntani kunenepita ghuhura dimushishi davo. ⁶ Vahora mavango ghalikuto pavipito navipuna vyaghunene musinagoge. ⁷ Ntani vahora moro dakuwapera pamavango ghakughulitira, ntani vavatwenye vantu ''Murongi'. ⁸ Anongoli anwe kapishi vamutwenyenge ashi 'Murongi', morwashi murongi ghumwe tupu mwakara naye, namuvantje muvakuru navamughuni. ⁹ Kwato muntu ogho muyitanga pano palivhu ashi vava, Shenu ghumwe tupu, muliwiru akara. ¹⁰ Narumweshi ngavamutwenya ashi 'Murongi', mwakara namurongi ghumwe tupu, Kristusi. ¹¹ Anongoli wamunenepo mukatjikenu akare muruwani wenu. ¹² Keho ghuno wakukunenepita mwene ngavakamukutikira, ntani wakukudidipita mwene ngavamukutikira. ¹³ Ani nane, vatjangi vamatjangwa navaFaraseyi,vavikuturo! Anwe kughara ghuntungi waliwiru vantu. Anwe nakungenamoshi naghumwenu, ntani anwe kapi muna kupulitira ovo vana shano kungena vavirughane. ¹⁴ Ani nane anwe, Varongi vamatjangwa navaFaraseyi, vavikupaki! Anwe kundyonaghura makende ghakundyugho, pashirugho osho anwe kuna kuraperera ndapero dadire. Anwe ngamu kawana mpanguro yenu yayinene. ¹⁵ Ani nane anwe, varongi matjangwa ntani navaFaraseyi, vavikupaki! Anwe kuvindakana lifuta nashirongo mukashighure ghumwe, pogho ghumwe, anwe kumumutura akare paruviri amupitakane anwe mukudyonaghuka. ¹⁶ '' Ani nane anwe, vapititili vavatwiku, anwe vakughamba ashi, '' Kehe ghuno wakughanena pantembeli, navimweshi. Anongoli kehe ghuno wakughanena pangorodo yakuntembeli, ndye anatikitomo mughano'. ¹⁷ Anwe magova vitwiku! Vini mbyopo vyavinenepo, ngorodo ndi ovyo vyarenkitango ngorodo yipongoke? ¹⁸ Anongoli, ' Kehe ghuno wakukuwana shidyambero, navimweshi. Anongoli kehe ghuno wakughanena paghushwi ogho ghuna karapo, ndye ana tikitomo mughano''. ¹⁹ Anwe vantu vavatwiku! vinke vyavinenepo, ghushwi ndi shidyambero osho sharenkitango ghushwi ghupongoke? ²⁰ Anongoli, wakughanena pashidyambero kughanena navintje vyakaropo. ²¹ Wakughanena pantembeli kughana nogho atungomo. ²² Ntani ogho wakughanena paliwiru kughanena pashipuna shaKarunga ntani nogho ashungiripo. ²³ Ani nane anwe, varongi matjangwa ntani VaFaraseyi, vakunenepeki! Anwe kutapa shighumurongo mushikesha mbuto nalividi, anongoli mwashuva mwahana kumana vyavinenepo dinakutanta veta-ghuhungami nkenda ntani namapuliro. Anongoli ruwanenu ovyo mwawapera kuruwana mwashavishuva ngoli. ²⁴ Anwe vapititili vavatwiku, anwe kudindako magculi anongoli kumina ngamero! ²⁵ '' Ani nane anwe, varongi matjangwa ntani VaFaraseyi, vavikupaki! Anwe kukenita nkinda navishisha pantunda, anongoli munda kwayura vyavakorokotji namadovo ghamumundinda. ²⁶ Anwe VaFaraseyi vavitwiku! Kenitenu nkinda navisha munda pamutango, mposhi pantunda napo pakene. ²⁷ '' Ani nane anwe, varongi matjangwa ntani vaFaraseyi, vavikupaki! Anwe kwafana yira mbira valimbaghura, yayokumoneka ghufughuli pantunda, anongoli munda mwayura vifupa vyavantu vakufa ntani nanyata nadindye. ²⁸ Mundyira yakukufana, anwe nka pantunda kumoneka muvahungami kuvantu, anongoli munda yenu kwayuramo ghuvikupaki ntani nakudira kutikitamo veta. ²⁹ '' Ani nane anwe, varongi matjangwa ntani navaFaraseyi, vavikupaki! Anwe kutunga mbira davaporofete nakulimbaghura mbira davahungami. ³⁰ Anwe kughamba ashi, '' Ndi atwetwaparukiro mumayuva ghavashetu, atwe ndi kapi twavahameni mulitetango muhonde davaporofete'. ³¹ Anwe kuna kungambipara ashi anwe vana vovo vadipaghiro vaporofete. ³² Nanwe nkashi tikitenuom ovyo vakalire vashenu. ³³ Anwe mayoka, vana vavambaroka, weni omo ngamushenduka mpanguro namudiro wanarundye? ³⁴ Mpongoli, kengenu, kuna kumutumina vaporofete ntani navantu vavakonentu ntani varongi vamatjangwa. Vamwe ngamuvadipagha ntani vamwe ngamuvapamparera kushikurushe, ntani vamwe ngamuvatjida mo musinagoge denu nakuvatjida-tjidira tunda mbara yenda mbara. ³⁵ Vitundwamo kuna kara papenu vyahonde davahungami navantje ovo munomughudyuni, kutunda kuhonde yaAbeli wamuhungami, dogoro kuhonde yaSakariya monaBerekiya, owo mwadipaghire pakatji kalivango lyakupongoka nashidyambero. ³⁶ Vyaghushiri nakumutantera, vininke navintje vino ngaviya paruvharo runo. ³⁷ '' Yerusalema, Yerusalema, wadipagha vaporofete nakutona mawe ovo vamutumina! Shirugho shakuhura kuni nganipongayi vana venu kumwe, yira momo lyapongekanga litende tutjiyo tjiyo munda yamavava ghalyo, anongoli anwe kapi mwavitambulireko! ³⁸ Kengenu, ndyugho denu maghoko-ghoko ngayikara. ³⁹ Kuna kumutantera, kapi ngamu nkenga kutunda pano dogoro ngamughambeshi, 'Vamupande ogho anakuyo mulidina lyaHompa'.