¹ Yesusi aghamba kukwavo nka mushifanikito, kughamba ashi, '' ² Ghuntungi waliwiru kwafana yira Hompa awapayikiro shipito shankwara shamonendi wamukafumu. ³ Ghuye atumu vakareli vendi vakayite ovo vakughire vaye kushipito shankwara, anongoli vavo kapi vayire ko. ⁴ Ntani nka hompa atumu vakareli vamwe, aghamba, ' katanterenu varekerwa, '' kengenu, ame nawapayikire murarero wande. Hove yande ntani nangombe dakuneta vana didipagha kare, ntani vinke navintje vinawapa. Yenu kushipito shankwara.'' ⁵ Anongoli vavo kapi vavi pakilirembili makura avayendi nandyira yavo, ghumwe kumuraka yendi, ntani nka kunangeshefa yendi. ⁶ Vamwe avakwata vakareli vahompa, nakuvatekura mulishwaghu, ntani nakuvadipagha. ⁷ Hompa agarapa, makura ghuye atumu vakavita vendi ntani vavo avadipagha varudipaghi, ntani mumbara shavo avavashwakerere. ⁸ Makura ghuye aghamba kuvakareli vendi, ' Shipito shankwara shina wapa, anongoli ovo varekwera mboshina dilikuwapera. ⁹ Mpongoli ashi yendenu kumahanga-ndyira mukayite vantu vavangi kushipito shankwara ntjene muna vawana. ¹⁰ ' Vakareli avayendi ndyira odo ntani avapongayiki vantu navantje vawanine, navantje vavadona ntani vavawa. Makura mundyugho yashipito shankwara ashi yura navagenda. ¹¹ Anongoli hompa opo ayire munda kukenga vagenda, ghuye amono mukafumu kunya ogho adiliro kudwata vikoverero vyankwara. ¹² Hompa aghamba kukwendi, '' muholi, weni omo ghuna yangene mo muno wahana vikoverero vyankwara?' Anongoli mukafumu kwato ovyo atwenya. ¹³ Makura hompa aghamba kuvakareli, ' mumangenu mukafumu ghuno kumahoko nakumaghuru, makura mumuvhukumine pandye mumundema, kunya nko ngava kalira nakukukwetja mayegho. ' ¹⁴ Vantu vavangi kwavayita, anongoli vasheshu vatovorora.'' ¹⁵ Makura vaFaraseyi avayendi vakaghayare ashi weni omo vakwata Yesusi muvighamba vyendi. ¹⁶ Makura avatumu kukwendi vakashishongero vavo, kumwe navakwaHerodesa. Avaghamba kwaYesusi, '' Mushongi, atwe twayiva ashi ove wahungama, ntani ashi ove kushonga ndyira yaKarunga yaghushiri. Ove kapi wapakereanga mbili maghano ghaghumwe, ntani ove kapi wakenganga vipa vyavantu. ¹⁷ Makura tutantere, Vinke ghuna kughayara? Vyapulitira kufuta mutero kwaKayisara ndi hawe?'' ¹⁸ Anongoli Yesusi akwata lighano ghudona wavo ntani aghamba, Vinke muna kuntjetekera ame, anwe vakuvilipa? ¹⁹ Neghedenu shindcendce shamutero. '' Makura avayita shiringa kukwendi. ²⁰ Yesusi aghamba kukwavo, '' Shipa nalidina lyare lino? ²¹ Avaghamba ashi, Kayisara.'' Makura Yesusi avatantere, '' tapenu kwaKayisara vivinke vyaKayisara, kwaKarunga vivinke vyaKarunga.'' ²² Apa vavo vaviyuvhire vino, avatetuka. Makura ghuye avamushuvhu nakukayenda. ²³ Muliyuva ndyolyo vaSadukayi vamwe, avavaghambiro ashi kwato livhumbuko, avaya kukwendi. Avamupura, ²⁴ nakughamba,'' Mushongi, Mosesi aghambire, '' ntjene mukafumu anadohoroka, kwato Vanuke, mughunyendi akona kukwara mukamali wendi ayitire vanuke mwamukurwendi.' ²⁵ Kwakalire ntambiri mughukurwa. Wakuhova akwara adohoroka. Kapi ashuvire vana, ghuye ashuvhu mukamali wendi kwamughunyendi. ²⁶ Makura ghunyendi waghuviri aruwana vyakukufana, waghutatu, mundyira yaghunyendi dogoro waghuntambiri. ²⁷ Kunyima yanavantje, mukamali adohoroka naye. ²⁸ Weno mulivhumbuko, mukamali ware ngaka karopo pavano ntambiri? Vavo navantje vamukwalire.'' ²⁹ Anongoli Yesusi alimburura nakughamba, '' Anwe mwapuka mukondashi anwe kapi mwayiva matjangwa ndi po ngondo daKarunga. ³⁰ Mulivhumbuko vavo kapi ngava kakwara ndi ngava kavape munkwara. Vavo ngava kakara yira vaengeli muliwiru. ³¹ Anongoli kuhamena livhumbuko lyavafe, kapi mwavivarura oyvo aghamba Karunga, ashi, ³² Ame Karunga waAburahamu,waIsaki naKarunga waYakopu'? Karunga kapishi Karunga wavafe, anongoli wavayumi.' ³³ Opo yaviyuvire mbunga vino,avatetuka kurushongitito rwendi, ³⁴ Anongoli vaFaraseyi vayuvire ashi Yesusi anamwenekida vaSadukayi, avakupongayiki vavene kumwe. ³⁵ Ghumwe wavo, akurongiro waveta, amupura lipuro mukumusheteka- '' ³⁶ Murongi, yinindyopo veta yayinene mudimuragho?'' ³⁷ Yesusi aghamba ashi, '' Hora Hompa Karunga ghoye namutjima ghoye naghuntje, namonyo ghoye naghuntje, ntani nandunge doye nadintje.'' ³⁸ Ghuno ngo muragho wakahuroko ntani wakuhova. ³⁹ Ntani muragho waghuviri-Hora vakamaparambo voye yira naghumoye. ⁴⁰ Padino dimuragho mbiri modawera veta mudima navaporofete.'' ⁴¹ VaFaraseyi vavo ndakavapongera kumwe, Yesusi avapura lipuro. ⁴² Aghamba, '' Vinke muna kughayara kuhamena Kristusi? Ghuye ne mona re?'' avamutantere ashi, '' mona Daviti.'' ⁴³ Yesusi avatantere ashi, '' weni Daviti mumpepo kumutwenya ashi Hompa, aghambire, ⁴⁴ ''Hompa ghamba kwaHompa wande, '' Shungira kurulyo rwalivoko lyande, dogoro ame ngani ture vanankore voye kumpadi doye?'' ⁴⁵ Makura ntjeneshi Daviti kutwenya Kristusa ' Hompa,' weni ngoli akara ashi mona Daviti?'' ⁴⁶ Kwato ogho avhuliro kumulimburura nampili nkango, ntani kwato muntu aghayaliro ashi amupure nka mapuro kutunda liyuva linya.