¹ Yesusi navakashishongero vendi pepi nakutika muYerusalemu avaya muBatefage, Kundundu yaMaghuywe, makura Yesusi atumu vakashishongero vaviri, ² avatantereshi, '' Yendenu mumukunda wakukwamako, wangu-wangu kumukawana shidongi vana mangerere, nashidongighona shina karopo. Kavishuturenu makura mukaviyite kuno. ³ Ntjene mpwali ogho akaghambo kehe vino kwenu kuhamena kwavyo, kamutanterenu ashi,' Hompa anavishano' muntu ogho kwakavituma kumwe nanwe. ⁴ Navindye vino kwashorokire mukutikitamo ovyo vaghambire muporofete, ashi, '' ⁵ Tanterenu monakadi waSiyoni, mona, Hompa ghoye kuna kuya kukoye, kuna kudidipita anarondo pashidongi- shidongighona shashirume, shana shashidongi''. ⁶ Makura vakashishongero avayendi avakaruwana ovyo avanangwilire Yesusi. ⁷ Vakayita shidongi nashidongighona makura avatura vyuma vyavo pavyo, Yesusi ashungiri pavyuma. ⁸ Shingi shavo avayara vikoverero vyavo mushitaghura, vamwe avakateta dimutavi davitondo makura avaviyara mushitaghura. ⁹ Mbunga oyo yayendiro kumeho yaYesusi ntani novo vamukwamino avayiyili, '' Hosana mona Daviti! vamupande ogho anakuyo mulidina lyaHompa! Hosana kundaha-ndaha!'' ¹⁰ Opo ayire Yesusi muYerusalemu, mbara navintje mushushu nakughamba, '' Are ogho?'' '' ¹¹ Mbunga ayilimburura, Yesusi muporofete atundo kuNasareti yamuGalaleya.'' ¹² Makura Yesusi angene muntembeli. Atjida mo ovo vayiro vayaghulitire muntembeli, anataghura ntishe dovo vakutjindyiro maliva navipuna vyovo vaghulitiro vankuti. ¹³ Aghambashi, '' Vavitjanga, 'Ndyugho yande ngava yitwenya ndyugho yandapero' mbyo mwayitura yikare likwina lyavakawidi''. ¹⁴ Makura vitwiku ntani virema aviya kwendi muntembeli, makura avaverura. ¹⁵ Anongoli varutikurona ntani navatjangi matjangwa opo vamonine vininke vyakutetura ovi aruwanine, ntani avayuvhu vanuke kuna kuyighira muntembeli ashi, ''Hosiyana mona Daviti,'' avagarapa ghunene. ¹⁶ Avaghamba, '' Kuna kuviyuva ovyo vana kughamba?'' Yesusa aghamba ashi, Nhii! Anongoli kapi mwavarura, mutunwa twavanuke navakeke nawapayikira mo mapandero?'' ¹⁷ Makura Yesusi avashuvu atundumo mumbara ayendi kuBetani nko akaralire. ¹⁸ Ngura-ngura apa avyukire mumbara, ndjara ayimukwata. ¹⁹ Akenge shitondo shaghukuyu kuntere yashitaghura, ayende ko navimweshi akawanineko nkwandi mahako, ashitantere ashi;'' Narumweshi nka ngaghuyima nyango,'' shitondo shaghukuyu ashikukuta mpopo. ²⁰ Vakashishongero vendi apa vavimonine, avatetuka avaghamba, '' Weni omo shinatuvhu shitondo shaghukuyu weno?'' ²¹ Yesusi avalimburura, '' Ghushiri nakumutantera, ntjene mwakara namapuliro ntani mupire kutamangera, kapi ngamuruwana tupu ovyo vina shorokero shitondo shaghukuyu shino, anongoli kuvhura mutantere ndundu yino, ' Damuka ghuka were mulifuta; makura vyavyo kushoroka. ²² Kehe vino ngamuromba mundapero,mupure, ngamuviwana''. ²³ Apa ayire Yesusi muntembeli, Varutikurona ntani matimbi ghavantu avaya kwendi ghuye kuna kushonga, makura avaghamba, ''Nankondo munke waruwananga vivnke vino, ntani are akupo ghunankondo?'' ²⁴ Yesusi avalimbura nakughamba ashi, "Name kuni mupura lipuro limwe. Ntjene muntantera, kuni mutantera ghunankondo ogho narughanitanga vininke vino. ²⁵ Liyoyero lya Yohanesa-kuni lyatunda? ' Muliwiru ndi kwatunda kuvantu?'' Avakuyongo mukatji kavo, nakughamba, Ntjene tughambe ashi, ' Kwatunda muliwiru; kwaghamba, ashi, Vinke ngoli mwadilire kumupura?' ²⁶ Anongoli ntjene tughambe, ashi, ''Kwatunda kuvantu', tunatjira mbunga mukonda ashi navantje vamutamburako Yohanes ashi muporofete.'' ²⁷ Makura avamulimburura Yesusi nakughambva ashi, Kapi twaviyiva.'' Naye aghamba, ''Nameshi kapi nimutantera ghunankondo naruwanitanga vininke vino. ²⁸ Anongoli vinke muna kughamba? Mukafumu akaro navana vendi vavamati vaviri. Ayendi kwaghu wakuhova ntani nakughamba, 'Monande, yenda ghukarughane namuntji mushikunino shavinyu.' ²⁹ Makura monendi alimburura nakughamba ashi, ' kapi niyendako; anongoli kunyima atjindyi ndunge dendi makura ayendi. '' ³⁰ Makura mukafumu ayendi kwamonendi waghuviri nakaghamba vyakukufana. Ghuye alimburura nakughamba, '' Kuniyenda, mukalikuto'', anongoli kapi ayendireko. ³¹ Are po pavana vano vaviri aruwanino mpangera yavashe? Avaghamba,'' wakuhova''. Yesusi aghamba, '' Vyaghushiri nakumutantera, vafutiti mutero ntani varushonda ngava kangena mughuntungi waKarunga kumeho yenu. ³² Yohanesi kwaya kwenu muntjira yaghuhungami, anongoli anwe kapi mwamupura. Anongoli vafutiti mutero ntani nava varushonda vavo vamupura. Ngoli anwe, nampili apa muna mono vino kapi munakushighura kunyima, ntani nakumupura. ³³ '' Teghererenu nka kushifanikito shimwe. Kwakalire mukafumu, mwenya livango. Ghuye awekere shipata shavhinyu, aturako ngumbu, atimimo shikameno vhinyu, adikilimo rushungu, ntani ayishesheda kuvana shikunino. ³⁴ Makura ayendi mushirongo shapeke. Apa rwatikiremo ruvede rwakuyangura nyango, ghuye atumu vakareli vamwe kuvana shikunino vakashimbe nyango dendi. ³⁵ Anongoli vano varuwani avaghupu vakareli vendi, avatoghonapo ghumwe, avadipaghapo ghumwe nka, ntani av toghonapo nka ghumwe wavo. ³⁶ Shimpe nka mwenya shikunino atumu vakareli vamwe, vavangi kupitakana vakuhova, anongoli vana varuwani avakavarughana mundyira yakukufana. ³⁷ Kunyima, munamwenya shikunino Mona wanaghumwendi, nakughamba, 'Kuva kafumadeka monande.' ³⁸ Anongoli vana varuwani avakenge monendi, avaghamba mukatji kavo, 'Ghuno ndye mupingi. Yenu, tokwenu tumudipaghe ntani tughupa ghupingwa.' ³⁹ Makura avamughupu, avamuvhukumine pandye yashikunino shavhinyu ntani avamudipagha. ⁴⁰ Makura opo ngaya mwenya shikunino, vinke aya ruwana kovanya varuwani?'' ⁴¹ Vavo avaghamba ashi, Ghuye ngaya dyonaghura vantu vavadona mundyira yayidona, ntani ghuye makura ngaya shesheda shikunino shavhinyu kuvaruwani vamwe, vantu ngava katapa muyangu pashiruvo shakuyangura.'' ⁴² Yesusi aghamba, '' Kapi mwavaruranga mumatjangwa', 'Liwe olyo vashwenine vatungi kwalitura likare mbango. Vino kwatundire kwaHompa, ntani vyavyo kumutetura ghunene mumantjo ghenu'? ⁴³ Mpongoli nakumutantera, ghuntungi waKarunga ngava ghumughupa anwe ngavaghutape kumuhoko ogho wayimango viyimwa. ⁴⁴ Kehe ghuno awero paliwe ngatjonaghuka papadidi. Anongoli kehe ghuno ngaliwera ngali mumyona.'' ⁴⁵ Varutikurona ntani VaFaraseyi apa vayuvire vifanikito vino, vavikwatire lighano ashi ghuye kwaghambire kuhamena kwavo. ⁴⁶ Avapapara vamukwate,avatjilira mbunga, mukonda vantu vamutambulireko ashi ghuye muporofete.