¹ Muruku rwalishampurukiro lyaYesusi muBetelehemu yamuYudeya mumayuva ghahompa Herodesi, vakafumu vavakonentu vakughupumeyuva vayatikire muYerusalemu avaghambashi, ² ''Kuninko oko kavamushampurukiri hompa wavaYuda? Atwe twamonine ntungwedi yendi kughupumeyuva mbyo tunaya tuyamutongamene ''. ³ Hompa Herodesi ayuvire vino, ghuye vyamupighanine, nanavantje vamuYerusalemu. ⁴ Herodesi ayitire kumwe vavakurona vavaruti navantje navarongi vamatjangwa ghavantu, ghuye avapurashi ''kuninko ngava mushampurukira Kristusi? ⁵ ''Vavo avaghamba ashi, ''MuBetelhemu yamuYudeya, vino mbyo vatjanga vaporofete, ⁶ Anongoli ove, Betelehemu, mushirongo shaYudeya, kapishi ove wamudidi po mukashi kavapangeli vamuYuda, mumoye mongamutundo ghumwe ogho pangero, vantu vande Israyeli. ⁷ Makura Herodesi avayita mukaholya-holya vakafumu vavakonentu vakughupumeyuva mukuyavapura ashi shiruvo munke vamonine ntungwedi. ⁸ Ghuye avatumu vavo kuBetelehemu, aghambashi, ''Yendenu mukapupide nawa mwanukeghona. Apa mukamuwana, ngamkandyitire vitundwamo mposhi name nganikamutongamene. ⁹ Muruku rwakuvanategherere kwahompa, Vavo avayendi mundyira yavo, ntani ntungwedi oyo vamonine kughupumeyuva yayendire kughuto wavo dogoro ayikayimana teghete opo akalire mwanukeghona. ¹⁰ Opo vamonine ntungwedi, avahafa ghunene. ¹¹ Vavo avayendi mundyugho avamono mwanukeghona navawina Mariya. Avamutongamene. Vavo arongorora maghungavo ghavo avamupa maghushwi ghangorodo, vitutumikida, ntani mahadi ghakunuka rupekwa. ¹² Karunga avarondora mundyodi mukupira kuvyuka kwaHerodesi, Mpo vavyukire kushirongo shavo nandyira nayopeke ¹³ Opo vatundirepo, muengeli waHompa amoneke Yosefu. Mundyugho aghambashi, ''Shapuka, ghupa mwanuke navawina, mutjilire kuEgipite. Ngamukakare nkoko dogoro nganimutantere, Herodesi ngashana mwanukeghona ashi ngamudyonaurepo.'' ¹⁴ Matiku ngogho Yosefu arambuka aghupu mwanukeghona navawina vayendire kuEgipite. ¹⁵ Ghuye akakalire nkoko dogoro mfa daHerodesi. Vino vyatikitiremo ovyo aghambire hompa mwamuporofete, ''Pandye yaEgipite nakuwire monande. ¹⁶ Makura Herodes, opo amonine ashi vanamukongo vakafumu vavakonentu, agarapire ngudu. Ghuye arawili vadipaghe vanuke vavamati navantje ovo vakaliro muBetelehemu nadimukunda dakundurukido ovo vakaliro pamwaka mbiri nakuntji, kutwara kushiruvo osho atatilire vakafumu vavakonentu. ¹⁷ Makura vyatikiremo ovyo aghambire mwamuporofeteYeremiya, ¹⁸ ''Liywi kunakushahara muRama, malirankali naruguvo rwarunene, Rakere kuna kulilira vana vendi, ntani ghuye ashwena mukumushengawida, mbyoyoshi vana vendi navantje vanafu.'' ¹⁹ Opo afire Herodesi, makura, muengeli waHompa amonekere Yosefu mundyodi muEgipite aghambashi, ²⁰ ''Shapuka ghupa mwanuke navawina muyende kushirongo shaIsrayeli, ovo vashanino kudipagha mwanuke vafa.'' ²¹ Yosefu arambuka, aghupu mwanuke navawina, ntani vayire kushirongo shaIsrayeli. ²² Opo ayuvire ashi Arukelausi kuna kupangera muYudeya mulivango lyavashe Herodesi, ghuye atjilire mukuyendako. Karunga anamurondora mudyodi, ghuye ayendi kushirongo shaGaleleya ²³ akatungire mumbara vatwenyanga Nasareti. Vino vyatikitiremo ovyo vaghambilire muvaporofete, ngavamutwenya ashi muNasareti.