¹ Apa amanine kughamba Yesusi dino nkango,atundumo muGalileya aya kuruha mukunda rwaYudeya oro rwakaliro kunyima yamukuro waYorodani. ² Mbunga yayinene ayi mukwama, avaverwiri nkokunya. ³ VaFalisayi ayare kwendi, vaya musheteke, avaghamba, '' Vyapulitira mukafumu akombe mukamali wendi mukehe yino konda ndi?'' ⁴ Yesusi alimburura nakughambashi, '' Kapi mwavarura ashi ogho avashito kutundilira kwavashita mukafumu namukamali ndi? ⁵ Ogho avashito naye kwaghamba, Nakonda yino mukafumu ngashuva vashe navawina akakupakerere namukamali wendi,vantu vano vaviri ngavakara rutu rumwe tupu'. ⁶ Vavo kapishi vaviri nka, anongoli rutu rumwe. Mpongoli ovyo agwanikita Karungu kumwe, kapishi pakare ghumwe avigaghununo ⁷ Vavo avaghamba kwendi, '' Mukonda munke Mosesi aturawiranga ashi tutape mbapira yamashweneno ntani vamutuma mukamali ayende?'' ⁸ Ghuye aghambashi, Morwa yadimutjima denu dakukuto, Mosesi mbyo kamupulitiranga mukombe vakamali venu, anongoli kukakuru kapishi mundyira yino vyakalire. ⁹ Kuna kumutantera anwe kehe ghuno wakukomba mukamali wendi pahana konda yarushonda, akwareko wapeke, anashondere; ntani mukafumu wakukwara mukamali ogho vakomba naye anashondere''. ¹⁰ Vakashishongero avaghamba kwaYesusi, '' Ntjneshi mo ngoli vyakuhamena mukafumu namukamali wendi, hasha tupu viwa nakukwarashi''. ¹¹ Anongoli Yesusi aghambashi, '' Kapishi kehe ghuno kwatambura vighamba vino, anongoli nkwandi mbovo tupu vavipa. ¹² Mpovali vapiro kuwapera kukwara morwa ngoli vakutunda mumara ghavanyokwavo, ntani mpovali vamwe ovo vaviruwana vantu, ntani mpovali vamwe vakuruwano naghumwavo mukonda yaghuntungi waliwiru. Kehe ghuno wakuvhura kutambura makurongo ghano, aghatambure.'' ¹³ Makura vanuke vamwe avavayita kwendi mposhi ayavakambeke mavoko ghandi pavo ntani nakuraperera, anongoli vakashishongero avavatungumukiri. ¹⁴ Anongoli Yesusi aghamba, Pulitirenu vanuke vavadidi, kapishi muvashweneke kuya kwande, ghuntungi waliwiru kwavo wahamena kwavakufana yira mbovo ''. ¹⁵ Akambeke mavoko ghendi pavanuke, makura atundupo panya. ¹⁶ Makura, mukafumu aya kwaYesusi aghambashi,'' Murongi, shininke munke shashiwa niruwana ngani wane monyo wanaruntje?'' ¹⁷ Yesusi aghambashi, '' Vinke ghuna kumpulira kuhamena vinke vyaviwa?Ghumwe tupu wamuwa, anongoli ntjene ghunashana kangena muliparu, tikitamo dimuragho.'' ¹⁸ Mukafumu aghamba kwendi, '' Dimuragho munke?'' Yesusi aghamba, '' Ngasha ghudipagha, ngasha ghushondera, ngasha ghukuvaka, ngasha ghungambiparera vipempa, ¹⁹ Fumadeka vasho navanyoko, ntani hora ghunyoye yira moomo wakuhora naghumoye''. ²⁰ Mukafumughona aghamba kwendi ashi, vininke navintje vino kwavitikitangamo. Vinke nka ovyo napumbwa? ²¹ Yesusi aghamba kwendi, '' Ntjene washana kutikiliramo, yenda, ghukaghulite limona lyoye,katape kuvahutu, ngaghukawana limona lyoye muwiru; kaye, yaghunkwame.'' ²² Anongoli mukafumughona apa ayuvire ovyo aghambire Yesusi, atundupo ghuye anaguvhu, ghuye kwakalire nalimona lyalingi. ²³ Yesusi aghamba kuvakashishongero vendi, '' Vyaghushiri nakumutantera, ghudito shiri muntu wangawo kangena mughuntungi waliwiru. ²⁴ Kuna kumutanterashi, vyarerupa kwangamero apite mulintjo lyantonga kupitakana muntu wangawo nakangeneshi mughuntungi waliwiru.'' ²⁵ Vakashishongero vendi apa vaviyuvire, vatetukire ghunene avaghamba, '' Are ngoli ngaparuko?'' ²⁶ Yesusi avakenge aghamba, '' Kuvantu vino ghudito, anongoli kwaKarunga vininke navintje ghureru''. ²⁷ Makura Peturusi alimburura nakughamba kwendi, '' Kenga, twashuva navintje tukukwame. Vinke ngoli ngatuwana po?'' ²⁸ Yesusi avatantere ghushiri nakumutantera,'' mughudyuni waghupe Mona Muntu ngaka shungira pashipuna shaghuHompa washikoda, anwe mwankwamo nanwe ngamu kashungira pavipuna vyaghuHompa ronambiri, ngamukapangure muhoko ronambiri ghavaIsrayeli. ²⁹ Kehe ghuno ashuvo mundi, vakuruvendi, vamughuni, vashe, vawina, vana, ndi shirongo mulidina lyande ngakawana vikando lifere limwe rwakuyendamo ngakapinga liparu lyanaruntje. ³⁰ Anongoli vangi vakuhovo ngavakahulilira,vakuhulilira ngavakakara vakuhova.