¹ Paruvede ndoro vakashishongero avaya kwaYesusi nakughamba, '' Are wamunenepo mughuntungi wamuliwiru?'' ² Yesusi ayita mwanuke wamudidi, kumutura mukatji kavo, ³ mukura aghamba, '' Vyashiri nakumutantera, nkwandi ngamukutjindye nakukara yira mwanuke wamudidi, ndi kapi ngamu kangena mughuntungi wamuliwiru. ⁴ Mposhi, kehe ghuno wakukudidipita mwene yira ghuno mwanuke wamudidi ghuye ndye wamunenepo mughuntungi wamuliwiru. ⁵ Kehe ghuno wakutambura mwanuke wamudidi yira ghuno mulidina lyande ame anatambura. ⁶ Anongoli kehe ghuno wakurenkita ghumwe wavano vavadidi vapuro mwande adyone, hashako tupu kukwendi kumumangerera limuwe lyalimunene muntingo yendi, kumuvhukumina mulitondo lyalifuta akadame. ⁷ '' Ani nane ghudyuni ghuno mukonda yamapukito! Vyakara hepero ashi ogho mapukito aya!ani nane muntu omo apitiranga ogho mapukito! ⁸ Ntjene lihoko lyoye ndi lighuru lyoye kuna kukurenkita ghupuke, liteteko makura ghulivhukume litunde koye. Hashako tupu ngene muliparu navito ndi naghurema kupitakana kavivhukumina mumundiro wanaruntje ghukara mahoko maviri ndi maghuru maviri. ⁹ Ntjene lintjo lyoye kuna kukurenkita ghupuke, lidokoremo nakulivhukuma likutunde. Hasha kangena muliparu nalintjo limwe kupitakana kukuvhukumina mumundiro namantjo naghantje. ¹⁰ Kenga kapishi ghushentje ghumwe wavano vavadidi. ¹¹ Ame kunakumutantera ashi vaengeli vavo muwiru kwanungurukira kushipara shaVavava ovo vakaro muwiru. ¹² Weni ghuna kughayara?Kehe ghuno akara nandywi lifere limwe, makura yimwe yikombanepo, kapi ngashuva odi dimurongomuvyu -nantano namuvyu.ayenda aka shane yimwe yinya yina kombano? ¹³ Ntjene ana kayiwana, vyashiri ame nakughamba kukwenu, ghuye ngahafa ghunene kupitakana po dinya dimurongontane- nantane odo dadiro kukombana. ¹⁴ Muntjira yakukufana, kapishi vipanga yaShenu wamuliwiru ashi ghumwe wavano vavadidi ngavakakombane. ¹⁵ '' Ntjene ghunyoye ana kudyono, yenda ghukamunyikayike pamuvaviri. Ntjene akakutegherere, ghuna mupopere. ¹⁶ Anongoli ntjene kapi anakutegherere, shimbako ghumwe ndi vaviri kumwe nove mposhi tunwa twaviri ndi vatutatu kungambipara kehe nkango yakuvhura kutokora. ¹⁷ Ntjene anashwena kukutegherera kukwavo, tantera ghudito ghuno kunkirishe. Ntjene anashwena kutegherera kunkirishe, muturenu akare yira muhedana ndi mufutiti mutero. ¹⁸ Vyashiri nakumutantera,kehe vino vininke ngamumanga palivhu muliwiru namo ngavavimanga, ntani kehe vino ngamushutura palivhu namuliwiru ngavavishutura. ¹⁹ Ame kuna kumutantera, ntjene vaviri muna kuyuvhu palivhu kuhamena kehe vino muromba, ngava vimuruwanena Vavava vakaro muwiru. ²⁰ Pakuponga vaviri ndi vatatu mulidina lyande, name mponilili pavo''. ²¹ Makura Peturusi aya amupura Yesusi, '' Hompa, rungapi andyona mughunyande nimughupire po? ²² Yesusi amulimburura ashi, ''' Ame kapi nakutantera vikando ntambiri, anongoli dogoro dimurongo ntambiri kuyendamo nantambiri. ²³ Mposhi ghuntungi wamuliwiru kwaghufanikitanga kwaHompa ashanino kuyivilita makongo ghendi kuva kareli vendi. ²⁴ Apa atamikire kuvarura, mukareli ghumwe oghu amukorotiro mayovi murongo maliva. ²⁵ Ano ngoli pashirugho osho ghuye kapi akalire novyo afuta, muhona wendi amurawiri mukumughulita, kumwe namukamali wendi ntani vana vendi navantje novyo akalire navyo, ntani amana kufuta makongo ghendi. ²⁶ Makura mukareli aghu, kutongamena kumeho yendi, aghamba, '' Muhona, kudidimikire tupu, ame ngani kufuta navintje.' ²⁷ Makura muhona wamukareli, ano ghuye ayimuwana nkenda, amushuvu nakumughupirapo makongo ghendi. ²⁸ Anongoli ogho mukareli ayendi akawane mukareli ghunyendi, ogho amukorotiro lifere limwe lyamaliva. Ghuye amukwata pamulighu nakughamba, ' mfute ovyo wankorota'. '' ²⁹ Anongoli ghunyendi amushungida, nakughamba, ' Kudidimikire, Nganikufuta '. ³⁰ Anongoli mukareli wakuhova ashwena. Anongoli akamuvhukumina mudorongo dogoro ngamufute ovyo amukorota. ³¹ Opo vavimonine ghunyendi ovyo vyashorokiro, vavo avaguvhu ghunene. Avaya avayatantere muhona navintje ovyo vyashorokiro. ³² '' Makura mukareli ghunya, amuyita muhona, nakumutantera, ' Ove mukareli wamudona, Ame kani kughupiripo makongo naghantje mukondashi ove washungidire. ³³ Nani ove nakuferashi nkenda ghunyoye, yira momo kani kufere Ame nkenda? ³⁴ Muhona wendi agarapa makura amutapa kuvahepeki dogoro ngamane kufuta makongo naghantje. ³⁵ v NaVavava vamuliwiru mongoli ngavakamuruwana ntjeneshi anwe kapi muna kughupirapo vaghunyenu kutundilira kudimutjima denu.