¹ Yesusi kwamuyelilire vaFaraseyi navatjangi vamatjangwa vamuYerusalemu vayamupure ashi, ² ''Mukonda munke vakarera ashi vakashishongero voye kuvatuka kumpo davakurona? Vavo kapi vakukushanga kumavoko ghavo pakulya mboroto.'' ³ Makura alimburura ashi, ''Vinke mwatjorerang dimuragho daKarunga mukonda yampo yenu? ⁴ Karunga kwatanta ashi, 'Fumadeka vasho navanyoko, kehe ghuno wakughamba ghudona kuvahse navawina ogho ngafa.' ⁵ Anongoli mwatanta ashi, 'Kehe ghuno wakughamba kwavashe ndi ashi kwavawina, ''Kehe yino mbatero ghuwana kukwande ghushwi atapa Karunga,'' ⁶ Muntu wangoli kapi kwatohepero kufumadeka vashe,' mundyira yino watura nkango yaKarunga yipire mulyo mukonda yampo yenu. ⁷ Vakukunenepa anwe! Kapi mwayiva ashi Yesaya kwamuporofeta ashi, ⁸ Vantu vano kumfumadeka pangevo davo, anongoli dimutjima davo ghure dakara name. ⁹ Kunkarera muvipempa mukondashi kuronga yira marongo ghavo dimuragho vantu.'' ¹⁰ Makura ayita mbunga ayitantere ashi, ''Teghererenu nakukwata lighano- ¹¹ Kudereko osho shangenango mukanwa kamuntu makura shimunyateke. Anongoli, shakurupuka mukanwa, ntjo shakunyatekango muntu.'' ¹² Makura vakashishongero avaya vayatantere Yesusi ashi, ''Ghuna yiva ashi vaFaraseyi kapi vina vahafita opo vanayuvhu ruhambo runo?'' ¹³ Yesusi alimburura ashi, '' Kehe shimenwa osho vadira kukuna Vavava vamuliwiru ngava shidurapo. ¹⁴ Vashuvenu pentjavo, vampititi vavatwiku. nangeshi muntu wamutwiku apititire mutwiku ghunyendi, navantje kuwera mulikwina.'' ¹⁵ Peturusi alimburura ashi, ''Fwaturura shifanikoto shino.'' ¹⁶ Yesusi aghamba ashi, ''Noveshi shimpe kapi ghuna kuviyuva vino ndi? Ashi ¹⁷ kehe vino vyakungena mushipumba kuyenda mushipumba, ntani vakavirupwita mumakuvaterero? ¹⁸ Anongoli vininke vyakurupuka mukanwa kutundilira kumutjima. Ovyo mbyo ngoli vyanyatekango muntu. ¹⁹ Mbyovyoshi mumutjima mo mwatundango maghayaro ghamadona ghakudipagha, rushonda, ghukumbu, widi, vimpempa, nakushwaura ²⁰ Ovino mbyo vinke vyanyatekango muntu. Anongoli kulya namavoko gharudiro kapi vyanyatekanga muntu. ²¹ Kutunda opo Yesusi mpongoli ayendire kuviha vyavirongo kumbara yaTayire naSidoni. ²² Makura, mukamali wamuKanani ogho atundiro mumukunda ghunya. Ayiyiri nakughambashi, ''Mfere nkenda Hompa, Mona Daviti! Monakadi kuna kwamuhepeka mpepodona.'' ²³ Anongoli Yesusi kapi amulimbulire napili nkango. Vakashishongero vendi avamushungida nakughamba ashi, ''Mutjidepo, kuna kutuyoghoterera.'' ²⁴ Makura Yesus aghamba ashi, ''Ame kapi vantuma kwakehe ghuno, anongoli kundywi dakukombana damundyugho yaIsrael.'' ²⁵ Makura aya nyongeke mutwe wendi, kumwe nakughamba ashi, ''Hompa, mpopere.'' ²⁶ Ghuye alimburura ashi, ''Kapi vyahungama ashi muntu ghu ghupe mboroto yavanuke ghuyitape kumbwaghona.'' ²⁷ Mukamali aghamba, ''Nhii, Hompa, anongoli mbwaghona nado kuvhura dilye ghufeferwa vyakuwa kushitafura shamughona.'' ²⁸ Makura Yesusi amutantere ashi, ''Mukamali, mapuliro ghoye ghanene; renka ngoli vavikuruwanene yira momo ghuna vishanene.'' Makura monendi wamukadona averuka viri ndyoyinya. ²⁹ Yesusi makura atundupo akayenda pepi nalifuta lyaGaleleya. Makura akanduka pandundu akashungira. ³⁰ Mbunga yayinene ayiya kwendi. Yiyite virema, vitwiku, vipuru-puru viremavyamundambo, navamwe vavangi ovo vaveliro. Avavatapa kwaYesusi, avaverure. ³¹ Mbunga vyavatetukitire apa vamonine vipuru-puru kuna kughamba, virema kuna kuyenda, vatwiku kuna kumona. Avapanda Karunga waIsrael. ³² Yesusi ayita vakashishongero vendi nakuvatantera ashi, ''Nakara nankenda kumbunga mukondashi nakara navo ghure wamayuva matatu hana kulya ndya. Kapi nashana vatunde pano hana kulya vintu, kuvhura vapwililire mundyira.'' ³³ Vakashishongero avamutantere ashi, ''Kuni tuvhura kuwana ndya dakugwanapo mposhi tuvhure kutapa kumbunga yakutika pano. '' ³⁴ Yesusi avapura ashi, ''Mboroto ngashi munakara nado?'' avalimburura ashi, ''hambombali, ntani ntjwi dadisheshu tupu. ³⁵ Makura Yesusi atantere mbunga yishingire palivhu. ³⁶ Aghupu mboroto hambombali nantjwi, makura apa amanine kutapa mpandu, abomona mboroto atapa kuvakashishongero. Vakashishongero avatapere mbunga. ³⁷ Vantu navantje valire avakuta. Makura avapongayiki ndya odo dahupiroko, Visha hambombali vyayulireo vyandya odo dahupireko. ³⁸ Ovo valiroko kwatikire kushivaro shavantu mayovi mane, kuhupako vakamali navanuke. ³⁹ Makura Yesusi arenke vantu vakayende, ghuye akaronda muwato ayende kushirongo shapeke shalidina Magadani.