¹ Ruvede runya, Herod wanguvhuru apa ayuvhire mbudi yakughamena kwaYesusi. ² Atantere vakareli vendi, ''Oghuno ndye Yohanesi muyoyi; ana kavhumbuka kughufe. Dino nkondo dinakuruwano mumwendi.'' ³ Herodesi kwakwatire Yohanesi, amumanga, nakumutura mudorongo mukonda yaHerodisia, mukamali waFilipu mughunyendi wamukafumu. ⁴ Yohanesi kwamutantilire ashi, ''Kapi vyapulitira mukurenka ashi ghuye akare mukamali ghoye.'' ⁵ Herodesi ndi amudipayire, ngoli atjilire vantu mukondashi vamukutikilire ashi muporofete. ⁶ Anongoli shipito shali shampuruko lyaHerodesi, mona Herodesia wamukamali kwadanine avihafita Herodesi. ⁷ Mukonda yavi, amutwenyidilire ashi kwamupa kehe vino amuromba. ⁸ Kuru avamutantilire vawina, aghamba ashi, ''Ntulirenu pano, mutwe waYohanesi muyoyi.'' ⁹ Hompa vyamuguvitire ghunene kulirawiro lyendi, anongoli mukonda yovo akalire navo kushilyero, mpo apangire tupu vavimuruwanene. ¹⁰ Makura atumu vaka mutete Yohanes mutwe momo mudongoro. ¹¹ Makura mutwe wendi avakaghuyita parupasa avaya ghutapa kwamukadona, makura aghutwara kwavawina. ¹² Vakashishongero vendi avaya, vayashimbe shimpu, vakahoreke. Kunyima yovino avayendi, vakatantere Yesusi. ¹³ Yesusi opo akaviyuvire vino, makura arondo muwato ayende kulivango lyamaporeya. Mbunga apa yaviyuvire, avamukwama parupadi kutundilira mumbara. ¹⁴ Apa aya sheyikire Yesusi amono mbunga. Avafere nkenda makura averura vaveli vavo. ¹⁵ Ngurova ndyo yinya, vakashishongero vendi avaya kukwendi nakughamba ashi, ''Livango lino lyamburundu, ntani nka liyuva linapiti kare. Tuma ngoli mbunga yino, vayende mudimukunda vakaghure ndya dana ghumwavo.'' ¹⁶ Ngoli Yesusi avatantere ashi, ''Kapishi hepero vavo vatundepo pano, anwe vapenu tupu ndya valye.'' ¹⁷ Avamutantere ashi, ''Tuna kara tupu namboroto ntano nantjwi mbiri.'' ¹⁸ Yesusi avantere ashi, ''Viyitenu kuno.'' ¹⁹ Makura Yesus atantere mbunga yishingire pamushoni. Aghupu mboroto dinya ntano nantjwi mbiri. Akenge kuwiru, makura atapa mpandu, abomona mboroto makura atapa kuvakashishongero, vakashishongero makura avatapere mbunga mudima. ²⁰ Navantje valire avakuta. Makura avatura pamwe tupu viruhupwa vyandya-murongo mbiri yavikumba vyayulire. ²¹ Ovo valiro kwakalire mayovi matano ghavakafumu, kughupako vakamali navanuke. ²² Shirugho ntjoshinya tupu atantere vakashishongero varonde muwato vamukwame vayende kwapeke, makra atantere mbunga yikayende. ²³ Munyima yakutantera mbunga yikayende, makura ayendi kundundu akaraperere. Ngurova yinya kwakalireko pentjendi. ²⁴ Ngoli wato wawo aghupupu kumankumbi, morwa mpepo kwayungire shirugho shinya. ²⁵ Kungurangura yayinene muviri yaghune avakondawiri, ghuye shirugho osho kuna kuyenda palifuta. ²⁶ Anongoli vakashishongero apa vamumonine kuna kuyenda palifuta, vyavatukukitire kumwe nakughamba ashi, ''Ghurumba,'' avatakuma naghoma. ²⁷ Anongoli Yesusi aghamba mpopo nakuvatantera ashi, ''Pamenu! Ame! Mwashatjira.'' ²⁸ Peturusi amu limburura nakughamba ashi, ''Hompa, nange ashi ove, ndenke name niyende pamema.'' ²⁹ Makura Yesusi amutantere ashi, ''Yiya.'' Peturusi makura atundumo muwato ayende pamema atambe kwaYesusi. ³⁰ Anongoli Peturusi apamonine mpepo yankondo, aghumuwana woma. Atameke kudama, ayiyiri nakughamba ashi, ''Hompa, mpopere!'' ³¹ Yesusi makura aghonyonona lihoko lyendi, akwata Peturusi, nakughamba ashi, ''Ove wamapuliro ghamadidi, vinke ghuna shinganyekere?'' ³² Makura Yesusi naPeturusi avarondo muwato, makura mpepo ayikutura. ³³ Makura vakashishongero muwato avapanda Yesusi nakughamba ashi, '' Ghushiri ove Mona Karunga.'' ³⁴ Opo varutire, avayasheyeke paliyenga lyaGenesareti. ³⁵ Makura vantu vamushirongo shinya apa vadimbulilire Yesusi, avatumu mbudi mumukunda naghuntje, makura avamuyitiri kehe ghuno akaliro naghuvera. ³⁶ Avamukanderere ashi ndi nampili kughughuhura walirwakani lyendi vanakwata, makura shingi shavo ovo vakwatiroko vaverukire.