¹ Muliyuva ndyo linya Yesusi kwarupukire mundyugho aka shungire kuntere yalifuta. ² Mbunga yayinene ayiyapongo yimukundurukide, makura aperama muwato ashingiri moomo shirugho ntjosho mbunga yayo yina yimana paliyenga. ³ Makura Yesusi avatantere vininke vyavingi muvifanikito ashi, ''Mukuni ghumwe kwayendire akakune. ⁴ akahokwere kukuna, mbuto yimwe ayiwere mundyira, makura vidira aviya aviyilipo nu. ⁵ Ano mbuto yimwe ayiwere pamawe, opo padiliro livhu lyadyuni. Nakadidishi kare kayimene, morwa livhu lyapo lisheshu ghunene. ⁶ Apa lyapuma liyuva ayipi ayikukuta mukondashi kudereko ndandani. ⁷ Ano mbuto yimwe ayiwere mumiya. Apa dakughalire miya avayimini po mbuto. ⁸ Ano mbuto yimwe ayiwere palivhu lyaliwa ayikuru ayiyita ntanga lifere, oyi yimwe dimurongo ntano namwe, ano oyi yimwe dimurongo ntatu. ⁹ Ogho akaro namatwi ghakuyuva, ayuvhe!'' ¹⁰ Makura vakashishongero avaya vaya pure Yesusi ashi, ''Morwa nke ghuna kughambera muvifanikito?'' ¹¹ Yesusi avalimburura nakughamba ashi, ''Mbyovyoshi anwe vavi mupa mukuyuvako mahoramo ghaghuntungi waliwiru, ano kwavono kapi vavivashorwera. ¹² Morwashi kehe uno akaro navintu, ngava vimuvhukitira, ano kogho apiro kukara navyo ngava vimughupa nampili novyo akara navyo kare. ¹³ Mbyongoli nakughambera muvifanikito: mbyovyoshi nampili vakare namantjo, vavo kapi vamonanga, ntani nampili vakare namatwi, vavo nakuyuvashi, ndi ashi vakwate lighano. ¹⁴ Kwavo nko lyatumbukira lipumbo lya Yesaya ash: 'Kumatwi ngamuyuvita anongoli kapi ngamuvikwata lighano; kumantjo ngamumonita anongoli kapi ngamuvimona. ¹⁵ Morwashi dimutjima damuhoko ghuno dakukuta, akare matwi ghado, kwakumbandera. Vavo kwaferera mantjo ghavo ashi vadire kumonitako, kumatwi vadire kuyuvitako, ano kudimutjima vadire kukwata lighano, vadire kukushighura nka, Ame ngani vaverure. ¹⁶ Anongoli mantjo ghenu haragopa mukondashi ghagho kumona, akare matwi ghenu nagho haragopa, morwa ghagho kuyuvha. ¹⁷ Ghushiri nakumutantera ashi, Vaporofete navahungami vavangi vaholire navo kumona ovyo muna kumona, ngoli kapi vavimonine, vavo nka kwaholire kuyuvha ovi munakuyuvha, anongoli kapi vaviyuvhire. ¹⁸ Teghererenu ngoli kushifanikito shadimi. ¹⁹ Ntjeneshi muntu ayuvhu nkango daghuntungi waliwiru, anongoli adire kudikwata lighano,wamudona ghuye kuya kuyashakanamo nkango odo vanakunu mumutjima wendi. Oyino ndyo ngoli mbuto vakunine mundyira. ²⁰ Mbuto oyo vakunine pamawe muntu wakuyuvha nkango, kare kayitamburako naruhafo, ²¹ anongoli ghuye muderemo ndandani mumwendi, ntani nka ghuye kapi akora. Nange apamoneke ghudito ndi mahepeko mukonda yankango, makura ghuye kuwa. ²² Mbuto oyo vakunine mumiya, muntu wakuyuvha nkango anongoli shinka shendi shavi vyaghudyuni ghuno novi vyalimona makura kudipagha mo nkango adire kuyita viyimwa vyaviwa. ²³ anongoli mbuto oyo vakunine palivhu lyaliwa, muntu wakuyuvha nkango makura ghuye kudikwata lighano. Ogho ndye ngoli ayimango, ayite ntanga lifere, pamwe murongo ntano nayimwe, ndi ashi dimurongo ntatu. ²⁴ Yesusi kwavatantilire nka shifanikito shimwe ashi: ''Ghuntungi waliwiru kwafana yira muntu ogho akunino mbuto yayiwa mulifuva lyendi. ²⁵ Ano vantu apa varalire, nkore yendi aya ayakunumo mushoni muvilya makura akayenda. ²⁶ makura mbuto apa yakulire yivare, mushoni nagho aghu monekemo. ²⁷ Vakareli mwenyalifuva makura avaya, avaya mutantere ashi, 'Mukalikuto, nani kapi wakunine mbuto yayiwa mulifuva lyoye? weni ngoli ntantani mushoni?' ²⁸ Makura ghuye avatantere ashi, 'Nkoreyande ndye aviruwano vino.' Vakareli avamupura ashi, 'Ghuna shana tuyende tuka vidure mo ndi?' ²⁹ Ghuye avatantere ashi, 'Hawee. apa mukadura mo mushoni, manashi mukadulilira navilya. ³⁰ Shuvenu tupu, vikure kumwe dogoro shiruwo shakuyangura, ntani ngani tantera vayunguli ashi, Hovenu tanko kupongaika mushoni, mughu mangayike vitungu, mughushore, makura vilya muvitware mushishete shande.''' ³¹ Yesusi avatantere nka shifanikito shimwe ashi: ''Ghuntungi waliwiru kwafana yira ntanga Ghuhoro oyo akunine mukafumu ghumwe mulifuva lyendi. ³² Mbuto yino ndyo yayididipo pantanga nadintje. Ano ngoli nange yinakuru kupitakana viyimwa navintje vyamushikunino, makura vidira kuya viya tunge vitunguru vyavyo kudimutavi.'' ³³ Yesusi avatantere nka shifanikito shimwe ashi: ''Ghuntungi waliwiru kwafana yira hingo oyo ahupire mukamali, ature mumahemere matatu ghaghutura, dogoro avifuru.'' ³⁴ Vininke navintje vino Yesusi kwavitantilire vantu muvifaniko. ³⁵ Kudereko oyvo avatantilire ghanashi mushifanikito, ashi ditikemo nkango odo aghambire muporofete ashi: ''Ame ngani yashura kanwa kande muvifanikito, ngani ghamba vininke oyvo vyahoramo kulishito lyaghudyuni.'' ³⁶ Yesusi atundu ashuvhu mbunga akayenda mundyugho. Vakashishongero kwendi avaghambashi: '' Tufatwilire shifanikito shamushoni wamulifuva.'' ³⁷ Makura Yesusi avalimburura ashi: 'Mona Muntu ndye mukuni wambunto yayiwa. ³⁸ Lifuva ne ngo ghudyuni ghuno. Mbuto yayiwa mbovo vahameno ghuntungi waliwiru. Anongoli mushoni mbovo vahameno kwaSatana. ³⁹ Mukankore ogho aya kunino mo mushoni, ndye ngoli mudyonaghuli, muyangu ghuhura waghudyuni, anongoli vayanguli mbo vaengeli. ⁴⁰ Anongoli, opo vapongayikanga mushoni vakaghuture mulikuru ndiro, mo nka ngoli ngavikara paghura waghudyuni. ⁴¹ Mona Muntu ngatuma vaengeli vendi, vaya pongayike vapukiti navanandyo mughudyuni. ⁴² Makura ngavavavukumine mumundiro wakutwera, omo ngava lira nakukukwetja mayegho. ⁴³ Makura vantu vavahungami ngavavembera yira shite shaliyuva mughuntungi washavo. Oghu akaro namatwi, ayuvhe. ⁴⁴ Ghuntungi waliwiru kwafana yira ghungawo ogho wahoramo mulifuva. Mukafumu kughuwana ntani kughuhoreka. Muruhafo rwendi kuyenda akaghulite navintje oyvo akara navyo, aya ghuliteko lifuva linya. ⁴⁵ Ntani nka,ghuntungi waliwiru kwafana yira mughuli ogho ashanango kughura mpako yayiwa. ⁴⁶ Nangeshi anawana ghushwi wamulyo po ghunene, makura kuyenda akaghulite navintje oyvo aweka, ayayighure. ⁴⁷ ''Waro nka shimpe, ghuntungi waliwiru kwafana yira likwe olyo teyire mulifuta, olyo lya kwatango kehe ntwyi. ⁴⁸ Nangeshi linayura, muhugi kulikokera paghurundu. Makura kushungira vatovorore dadiwa mushuma, anongoli dadidona kudifukumina kunya. ⁴⁹ Mongoli ngavikara kughughura waghudyuni. Vaengeli ngavaya mukuyatovorora vadona kuva hungami. ⁵⁰ Ngava vafukumina mumundiro wakutwera, omo mo ngava lira nakukukwetja mayegho. ⁵¹ ''Muna viyuvhu vininke navintje vino ndi?'' Vakashishongero avalimburura, ''Nhii.'' ⁵² Makura Yesusi avatantere ashi, ''Mpongolishi kehe ghuno mutjangi matjangwa ogho akaro mukashishongero mughuntungi waliwiru yira mwenya ndyugho, wakughupamo vininke vyavipe navi vyakare mughuntungi wendi.'' ⁵³ Apa amanine kughamba vifanikito ovyo, Yesusi makura atundupo akayenda. ⁵⁴ Makura Yesusi ayangene mushirongo shendi nakuya aronga vantu muSinagoge. Aviyita shitetu avaghamba ashi, ''Kuni awana ghukonentu wendi ghuno mukafumu ntani navino vitetu? ⁵⁵ Vaghuni vendi vavakamali nani kapishi kumwe twakara navo ndi? Kuni aviwana vininke navintje vino?'' ⁵⁶ Oghuno mukafumu nani kapishi mona mukakushongia vipirangi? Vawina nani kapishi vanya vatwenya ashi Mariya? Vaghuni vendi vavakafumu nani kapishi vaYames, Yosef, Simon, naYudas? ⁵⁷ Vyavangarapitire mukonda yendi. Anogoli Yesusi avatantere ashi, ''Muporofete kapi vamutambura mushirongo shamwene ndi ashi mulikoro lyamwene.'' ⁵⁸ Kapi ana ruwana vitetu vyavingi mukonda yakudira lipuro kwavo.