¹ Ruvede runya Yesusi kwapitire mumafuva muliyuva lyaSabata. Vakashishongero vendi ndjara yava kwatire, makura avatameke atjoro dimutwe damahangu valye ntafu. ² Opo vavimonine vaFaraseyi, avamutantereshi: ''Kenga, Vakashishongero voye kuna kuruwana oyo vashweneka kuruwana muliyuva lyaSabata.'' ³ Yesusi avalimburura ashi, ''Kapi mwavarura olyo aruwanine Daviti, opo yamukwatire ndjara kumwe navantu vendi? ⁴ Ayendi mundyugho yaKarunga, akalya mboroto dandjambo, odo vashwenikire kulya kehe uno, nkwandi varuti tupu vadipulitilire. ⁵ Ndi walye kapi mwavarura muveta yaKarunga ashi, varuti vavatukire veta yaliyuva lyaSabata muntembeli anongoli kapishi vandyoni? ⁶ Anongoli ame kuna kumutantera ashi ogho apitakano ntembeli mpwali pano. ⁷ Ndi mwayiva ashi vinke dina kutanta nkango dino, 'Ame kwahora ghufenkenda, kapishi ndjambo,' ndi kapi muna kupangura vakupira ndyo. ⁸ Mbyovyoshi Mona Muntu ndye Hompa waSabata.'' ⁹ Yesusi atundupo makura akangena muSinagoge davo. ¹⁰ Anongoli, mwakalire mukafumu wakutuva livoko. VaFaraseyi apura Yesus, ''Vya pulitira kuverura muliyuva lyaSabata ndi?'' mposhi vamurunduire ashi kuna kundyona. ¹¹ Yesusi aghamba ashi, ''Are mukatji kenu,ogho, akaro nandywi yimwe tupu, nange ayiweri mulikwina, makura adire kuyighupa mo muliyuva lyaSabata? ¹² Are wamulyo,po, muntu ndi ndywi! Mpongolishi vyapulitira kuruwana ghuhunga muliyuva lya Sabata.'' ¹³ Yesusi atantere mukafumu, ''Ghonyonona livoko lyoye.'' Makura ghuye aghonyonona, livoko aliveruka, likare yira ghunyalyo. ¹⁴ vaFaraseyi makura avarupukamo vakakuyonge. Vakengurure ashi weni mo vamudipagha. ¹⁵ Yesusi,avinongononine, makura atundupo. Vantu vavayingi avamukwama,akavaverura navantje. ¹⁶ Makura avapampalikida ashi kapishi vavitantere vakuhupako, mposhi ditike mo nkango damuporofete Yesaya, aghambire ashi, ¹⁸ Kengashi, mukareli wande ogho natovorora; ogho nahora, ogho andyendo kumutjima. Nganitura Mpepo yande papendi, ngayuvite ghuhunga kuvakavirongopeke. ¹⁹ Kapi ngarwana ndi ayashure kanwa; ndi kehe ghuno ayuve liywi lyendi munkungwandyira. ²⁰ Kapi ngandyora ruvhu;kapi ngadimita muti wakukontora, dogoro ngapititire ghuhunga kulifundo, ²¹ dimuhoko nadintje ngadiwana lihuguvaro mulidina lyendi.'' ²² Makura mutwiku ntani nka shipurupuru, akaliro nampepodona, avamuyita kwaYesusi. Amuverura, makura atameke kughamba nakumona. ²³ Mbunga makura ayitetuka, ayighambashi, ''Nani ghuno mukafumu kapishi Mona Daviti?'' ²⁴ Anongoli vaFaraseyi apa vayuvire mbudi yavitetu, avaghambashi ghuno mukafumu kutjida mpepodona kupitira mwaBelisebu,hompa wampepo dadidona.'' ²⁵ Yesusi ayivire ovyo vana kughayara aghambashi." Kehe ghuno ghuntungi wakugaghunuko wene kukudyonaghura wene,kehe yino mbara ndi ndyugho yakutavaghano yene kapi ngayiyimana. ²⁶ Nangeshi Satan kutjida mo Satan,akutavaghano pamwene. Weni ngoli ghukara po ghuntungi wendi? ²⁷ Nangeshi ame mpepo dadidona kuna kuditjidamo nankondo daBelisebu, makura vana venu nankondo dare vaditjidanga mo? Nakonda yino kengururenu po naghumwenu. ²⁸ Ngoli nangeshi nankondo daKarunga natjidanga mo mpepo dadidona, yivenu ashi untungi waKarunga ghuna yapapenu. ²⁹ Weni omo angena muntu mundyugho yalipenda akavake mo vininke vyendi hana tanko kumanga lipenda olyo? Ntani angena akavake mo vininke vyendi mundyugho. ³⁰ Kehe uno adiro kuhamena kukwande akulimba name, ano kehe uno wakudira kupongayika kumwe name, kuhanaghura po. ³¹ Mpongoli nakumutantera ashi, kehe ndyo nalishwaghuro vantu kuvhura kuvaghupira po, anongoli kushwaghura Mpepo kwato lidongonwenopo. ³² Kehe uno wakughamba nkango yayidona kwaMona muntu, ngava mughupirapo. Anongoli kehe ghuno wakughamba nkango yayidona kuMpepo Mupongoki, ogho kwato kumu ghupirapo, muno mughudyuni ghuno, ndi ogho ngaghukayoko. ³³ Wapeka shitondo shiwape nanyango yasho yiwape,murenke shitondo shidonape nanyango yasho yidona, shitondo kushiyivira kunyango dasho. ³⁴ Anwe vana vavambaroka,anwe vadona, weni ngoli omu mughamba vyaviwa? ovyo vyayuro mumutjima mbyo kughamba ³⁵ Muntu wamuwa kushorora vyaviwa vyamughungawo wendi waghuwa, anongoli muntu wamudona kushorora vyavidona vyamughungawo wendi vyavidona. ³⁶ Ame kuna kumutantera ashi muliyuva lyampanguro vantu ngava katapa ghumbangi kunkango vakitika kughamba. ³⁷ Mbyovyoshi kunkango doye nko ngava kuhungikira, ano kunkango doye nko ngava kupangwira''. ³⁸ Vamwe vatjangi vamatjangwa navaFaraseyi avatantere Yesusi ashi, ''murongi, atwe tunashana tumone shitetu shakutuda koye.'' ³⁹ Yesus makura avalimburura ashi: ''Anwe vadona naruvaro rwaghukumbu kuna shana shitetu. Kwato shitetu shakumupa nkwandi muPorofete Yona. ⁴⁰ Yira momo akalire Yona mayuva matatu namatiku matatu mulira lyantjwi yayinene,naMona muntu ngakara mayuva matatu namatiku matatu muntjima- ntjima yaghudyuni. ⁴¹ Vantu vamuNinive ngava kayimana kumpanguro naruvaro runo ngavakarupangure. Morwa ashi vavo kwakushighulire kuliyuvito lya Yona, kenga, ogho apitakano Yona mpwali pano. ⁴² Hompakadi wakughucuma ngashapuka muliyuva lyampanguro ngakapangure ruvaro runo. Ghuye kwatundilira kughuhura waghudyuni aka teherere kughukonentu waSolomoni, kengenu,ogho apitakano Solomoni mpwali pano. ⁴³ Nangeshi mpepo yayidona ayi tundu mo mwamuntu, yayo kurenda-renda mushirongo shamburundu, yishane shane ghuturo, nangeshi kapi yina kawana ghuturo. ⁴⁴ Makura yayo kutata ashi, 'Kuna kuvyuka kundyugho yande oyo natundire.' Pakuvyuka,kuyawana ndyugho muporongwa -vanayikwere yinakene yina kara mughuhunga. ⁴⁵ Makura yayo kuvyuka yikashimbeko nka mpepo dimwe ntano nambiri dadidona kupita kana yene,dado kungena ditunge mo. Viruwana vyakuhulilira vyamurwana ogho kukara vyavidona kupita kana vyakuhova. Mo ngavikara naruvaro runo. ⁴⁶ Yesusi ndaka hokorwe atantere mbunga, vawina navaghuni vendi vavo vanayimana pandye, vanashana kughamba naye. ⁴⁷ Muntu ghumwe amutantere ashi: '' kenga,Vanyoko navaghuni voye vana yimana pandye,vana shana kughamba nove.'' ⁴⁸ Yesusi amulimburura atantere ogho amutantiliro, '' Are vanane vare vaghuni vande?'' ⁴⁹ Makura aghonyonona lihoko lyendi aneghe vakashishongero vendi aghamba ashi "Kenga, Vanane navaghuni vande! ⁵⁰ Kehe ghuno wakuruwana viruwana vyaVavava vamuliwiru, ndye mughunyande, ndye mpandjande, mbo Vanane mbovo.''