¹ YesusI akughu vakashishongero vendi murongo navaviri kumwe nakuvapa nkondo kupitakana mpepo dakunyata, kuditjidamo dirupuke, nakuverura kehe rudi rwmaghuvera ghakukushuva-shuva. ² Aghano ngo madina ghavapositoli murongo navaviri. Wakuhova, Simoni (ogho kava kughanga nka ashi Peturusi), ntani mughunyendi Andiriyasi; Yakopo mona Sebede; ntani namughunyendi Yohanesi ; ³ Filipusi, ntani Baritolomeusi; Tomasi; naMateusi mufutiti mutero; Yakopo mona Alufeusi, naTadeusi; ⁴ Simoni washinka; ntani Yudasi Isikaliyoti ogho amushoroliro. ⁵ Avanomurongo navaviri Yesusi avatumu. Avarondo ashi, '' Kapishi muyende kulivango vatunga vahedana, ntani kapishi muka ngene mumbara yavaSamaritani. ⁶ Yendenu tupu kuntjwi dakukombana mumundi wava Israyeli; ⁷ ntani omu muna kuyenda, yuvitenu nakughamba ashi, ' ghuntungi waliwiru papepi ghuna kara.' ⁸ Verurenu vakuvera, rambwitenu vafe, kakushurenu vakavingondwe, ntani katjidenu mpepo dadidona. Mahoko-hoko muna viwana, kavi tapenu mahoko-hoko. ⁹ Kapishi mushimbe kehe ngorodo, ndi siliveli, ndi ngoporo mutundjato twenu. ¹⁰ Kapishi mushimbe ndjato damuruyendo rwenu, ndi vikoverero viviri ndi vicapa, ndi viruwanita, muruwani kuparukira muviruwa vyendi. ¹¹ Kehe mbara ndi mukunda mukakenga, kashanenu mo wamuwa, kakare naye dogoro ngamu kavyuke. ¹² Apa mukangena mumundi, mororenu. ¹³ Ntjene mumundi muwa, mpora yenu yikare papavo. ano ngoli ntjeneshi kapishi yiwa, mpora yenu muyikuvyutire naghumwenu. ¹⁴ Kovo ngavakamudiro kamutambura ndi kutegherera kunkango denu. Apa ngamutunda mumundi ogho ndi mbara, kukukumunenu mbundu yitunde kumpadi denu. ¹⁵ Vyaghushiri nakumutantera, ngavi kapitakana livango lya Sodomu naGomora muliyuva lyampanguro koyino mbara. ¹⁶ '' Kengenu, ame kuna kumutuma yira ndywi mukatji kamambungu, mposhi karenu muna kotokenu yira mayoka ntani nongopenu yira vankuti. ¹⁷ Vangarenu muvantu! vavo ngava mutapa kundango, ntani ngava mutjida mushinagoge davo. ¹⁸ Makura ngava mutwara kumeho yavapangeli navaHompa mukonda rwande, ngaghukare ghumbangi kuva Hedana. ¹⁹ Apa ngava mukwata, kapishi mgamukupakere shinka kuhamena weni ndi vinke ovyo mukaghamba, ovyo ngamughamba ngava vimupa paviri ndyoyo. ²⁰ Morwa kapishi anwe ngamu kaghambo, anongoli Mpepo yaShenu ndye ngaghambo mumwenu. ²¹ Mukurwamuntu ngaheta mughanyendi vamudipaghe, ntani shamuntu monendi. Vana nganyenga nakukulimba nava kurona vavo nakuvatokwera kumfa. ²² Ngava munyenga kehe ghuno mukonda yalidina lyande. Anongoli kehe ghuno ngadidimiko dogoro kughuhura, ogho muntu ngaka yovoka. ²³ Nange ngava muhepeka mbara yino, tjwayukirenu yakukwamako, vyashiri nakumutantera, kapi ngamu mana kundi yenda mbara damuIsrayeli Mona Muntu hana kuya. ²⁴ '' Mukashishongero kapi apitakana mushongi wendi, ndi shipika pawiru yantilyendi. ²⁵ Vyawapa mukashishongero ashi ghuye akare yira mushongi wendi, ntani shipika yira ntilyendi. Ntjene vavo ngavayite ntilya Belisebuli, ghudona munke wamadina munke ngavatwenya varangweka vendi! ²⁶ Mpongolishi mwasha vatjira, morwashi kwato osho shavando ngashi diro kushoroka, ntani osho shavando ngavadira kuyiva. ²⁷ Kehe vino nakumutantera mumundema, kavighambenu mwi-mbarangandja, ntani kehe vino nakumuvovotera mumatwi, kaviyiyirenu pamutuya wandyugho. ²⁸ Mwasha tjira ovo vadipaghango rutu anongoli vavo nakudipaghashi monyo. Anongoli tjirenu ogho kuvhura kudyonaghura navintje monyo narutu mumundiro wanarundye. ²⁹ Nani kapishi mandyunge maviri kughaghulita kukancencere kamwe tupu? Anongoli kwato limwe lyawerango palivhu Shenu ghana kuliyiva. ³⁰ Nampili huki dakumutwe ghoye dapwa kudivarura. ³¹ Mwasha tjire. Anwe mulyo kupitakana mandyunge ghamangi. ³² Mpongolishi kehe ghuno wakuntongonona ame kumeho yavantu, name nka ngani kamutongonona kumeho yaVavava wamuliwi. ³³ Ano ngoli oghu antjwenango kumeho yavantu, name ngani kamushwena kumeho yaVavava vamuliwi. ³⁴ '' Kapishi mughayare ashi ame kwayita mpora pano palivhu. Ame kapi nayita mpora, anongoli mutangu. ³⁵ Kutura ghunkore pakatji kamwanuke wamukafumu navashe, ntani ghunkore pakatji kamwanuke wamukadona navawina, ntani ghunkore pakatji kamuntu nangumweyendi. ³⁶ Muntu vankore vendi valikoro lyendi. ³⁷ Ogho ahoro vashe ndi vawina kupitakana ame kwato shikwafo kwande; oghu ahoro monendi wamukafumu ndi monendi wamukadona kupitakana ame kapi aka nashikwafo kwande. ³⁸ Wakudira kudamuna shikurushe shendi akwamwe kwato shikwafo kwande. ³⁹ Kehe ghuno wakuruva liparu lyendi ngali kombanita. Anongoli wakulikombanita liparu lyendi morwa rwande ngali wana. ⁴⁰ '' Ogho ngamutamburo ame anatambura, ntani oghu atamburango ame kutambura ogho antumo. ⁴¹ Oghu atamburango muporofete mulidina lyamuporofete ngakawana matungiko ghamuporofete, ntani ogho atamburango muntu wamuhungami mulidina lyamuntu wamuhungami ngakawana mashwero ghamuntu wamuhungami. ⁴² Kehe ghuno wakutapa kwaghumwe wavano vavadidi nkinda yamema ghamatenda mulidina lyamukashishongero, vyashiri nakumutantera, ghuye kapi ngakopanita futo yendi.''