¹ Yesus kwayita varongwa vendi vanya murongo navaviri vaponge makura avapa nkondo nalipangero lya kutjida mpepo dadidona nadintje muvantu ntani nakuverura maghuvera naghantje ghaku kushuva-shuva muvantu. ² Makura ghuye avatumu vayende mughudyuni vaka yuvite Mbudi yaRuhafo yaghuntungi waKarunga ntani naku kaverura vaveli. ³ Ghuye kwatantera varongwa vendi ashi, ''Kwato kushimba kehe shino muruyendo yikare - mpango, nandjato yavimaliva, nandya, ntani kwato kushimba vikoverero viviri. ⁴ Nkene shi kuna ngene omo mumundi mbyo vana mutambura, muna hepa kukaramomo dogoro mpopo ngamu tundamo mushirongo nga muyende kulivhango lya peke. ⁵ Ano ngoli nkene shi kuna ngene omo mumundi makura kapi vana mutambura, muna hepa kutundamo omo mushitata, ntani muna hepa kuku kuku muna mbundu kumpadi denu yi tundeko mposhi ngayi ka kare ghumbangi wenu kukwavo ashi vavo kapi vamutambulire.'' ⁶ Makura varongwa vendi kwayenda vakuhanene kudimukunda nadintje damushirongo, vaka yuvite Mbundi yaRuhafo naku verura vaveli kumavhango naghantje. ⁷ Herodesi mupangeli wamu Galileya opo ayuvire navintje vino vyashorokiro, akara naghoma, mukondashi vantu vamwe kwamutantilire ashi Yohanesi ana ka vhumbuka mumfa, ⁸ ntani vamwe kwaghamba ashi muPorofete Eliya ana kavyuka, ntani vantu vamwe navo kwaghamba ashi ghumwe wava Porofete vakare ana moneke mukatji kavo. ⁹ Makura Herode aghamba ashi, ''Ame kwatetire Yohanes mutwe wendi mbyo namu dipayire. Are nka ghuno naku yuvha ana kuruwano vyaweno? Makura akambadara kuyenda aka mumone Yesus. ¹⁰ VaApositoli opo vaka vhukire muruyendo rwavo, kwatantera Yesus navintje ovyo vaka ruwanine. Makura Yesus atantere varongwa vendi vashapuke vayende kumwe, kushitata shaBeteseyida vaka kare kulivhango lya pentjavo. ¹¹ Makura mbunga yavantu opo vayuvire yino mbudi, navo avava kwama nkoku vayendire. Makura Yesus kwatambura yino mbunga yavantu navantje ntani avatantere naku varonga vyakuhamena ghuntungi waKarunga ntani kwaverura vaveli navantje ovo vakaliro namaghuvera ghaku kushuva-shuva. ¹² Ruvede runo liyuva kuna katoka, varongwa vaYesus kwayendire kukwendi vamu tantere ashi, ''Tantera vano vantu vayende vaka shane ndya namararo kudimukunda odo dakundurukido lino livhango, mukondashi lino livhango tuna kara livhango lya maghoko-ghoko. Yesus atantere varongwa vendi ashi, ''Vapenuko ndya valye.'' ¹³ Vavo kwamu limburura ashi, ''Atwe kuna kara tupu namboroto ntano nantjwi mbiri - atwe kapi tuvhura kughura ndya dambunga yavantu vakutika pano vagwaneke.'' ¹⁴ (Vavo kwaghambire vino mukondashi pano palivhango kwapongire po varume vakutika kumayovi matano.) Makura Yesus atantere varongwa vendi ashi, ''Tanterenu vano vantu vaponge vakare mutu-mbunga namutu-mbunga twa tusheshu, ntani mwakehe yino mbunga vakare mo vantu vakutika kudimurongo ntano.'' ¹⁵ Varongwa vendi avaruwana yira momu vava tantelire, ntani avatantere vantu navantje vashungire. ¹⁶ Yesus aghupu dino dimuntje ntano damboroto nantjwi mbiri, akankuka akenge kuliwiru, akanderere naku tungika dino ndya ntani atapa mpandu kwaVashe, makura abomona dino mboroto dikare dadididi, adi tapa kuvarongwa vendi, vavo vaka ditapere vantu, ovo vashungilire mutu-mbunga. ¹⁷ Vantu navantje kwalya ndya dogoro kwakuta ntani ndya dimwe kwahuparako, makura varongwa vendi kwapongeka ndya odo dahupiroko vavo kwayuda vikumba murongo naviviri vyamboroto. ¹⁸ Liyuva limwe Yesus kwayendire aka kare kulivhango lya pentjendi kuna kuraperera, makura varongwa vendi avaya kukwendi. Makura Yesus apura varongwa vendi ashi, ''Vano vantu weni omo vana kughamba ashi ame re lidina lyande?'' ¹⁹ Varongwa vendi kwalimburura ashi, ''Vamwe kuna kughamba ashi ove Yohanesi mukushi. Ntani vamwe ashi ove muPorofete Eliya, ntani vamwe ashi ove ghumwe wava Porofete vakare ogho ana ka vhumbuko kumfa.'' ²⁰ Makura ghuye apura varongwa vendi ashi, ''Anwe varongwa vande weni omo muna kughamba ame re lidina lyande?'' Peturusi amu limburura ashi, ''Ove Mesiya waKarunga.'' ²¹ Mpopo Yesus kwatapa marondoro kuvarongwa vendi ashi nakadidi shi kuvitantera kehe ghuno, ²² makura avatantere nka ashi, ''Mona Muntu nga kara murunyando ngava muhepeka ntani ngava mushwaghura naku mushwena Matimbi nava Pirisiteli vavanene navarongi vamatjangwa, ntani ngava mudipaya nga fe mfa dapa shilivindakano ngava muvhumbike makura muliyuva lya ghutatu ngaka vhumbuka kumfa.'' ²³ Makura Yesus atantere vantu navantje ashi, ''Kehe ghuno ana kushano kunkwama nga kare murongwa wande, nkwandi ana hepa kunyenga liparu lyendi ntani ghuye nga damune shilivindakano shendi kehe liyuva nga kwame mumwande. ²⁴ Mukondashi kehe ghuno wakuhora nakupopera liparu lyendi ngaka likombanita, ntani kehe ghuno waku kombanita liparu lyendi nga kare murongwa wande nga kwame mumwande nga popera liparu lyendi ntani nga kawana liparu lya naruntje. ²⁵ Vinke ngavi vhura kukwafa muntu nga weke nakuwana maghuwa naghantje ghamuno mughudyuni, ano ngoli kughuhura waruvede ngaka kombanite liparu lyendi namonyo wendi nga kayende mulidyonaghuko? ²⁶ Kehe ghuno waku yuvha nkango dande makura ngafe ntjoni mukupura mumwande ntani namu nkango dande, name Mona Muntu nganu kafa ntjoni kukwendi opo nganu katika mughuntungi wande ntani namughutungi waVavava ntani namu ghuntungi wava Engeli vakupongoka. ²⁷ Vyaghushili naku mutantera ashi, mpovali vamwe ovo vana karo pano paweno vavo kapi ngava fa vahana kumona ghuntungi waKarunga.'' ²⁸ Opo amanine kutantera varongwa vendi dino nkango, makura kuruku rwamayuva matano-na-matatu Yesus, kwatantera Peturusi, naYohanesi naYakopu vayende vakaronde kundundu yayire vaka raperere. ²⁹ Yesus ghuye kuna kuraperera kundundu, mpopo tupu makura kushipara shendi kwakutjindja, ntani vyuma vyendi navyo kwakutjindja, kuna kutema yira shite shaliyuva lya kuvembera nakupayima ghunene. ³⁰ Kwakuharukako tupu, varume vaviri vaPorofete vakare kuna yimana kumwe naye ntani kuna kughamba naye, Mosesi ntani naEliya, ³¹ vavo kwayimanine ntani kwakalire mughukenu wamughuyerere wendi, kuna kughamba naYesus vyaku hamena kuruyendo rwendi, rwakuyenda kuYerusalemu nashitambo shaku katikitiliramo nkango naviruwana vyaKarunga. ³² Peturusi ntani navarongwa vaghunyendi navo mpo vakalire vavo kuna rara muturo twa tunene, opo varambukire muturo, vavo kwamonako tupu navo kuna kara mughuyerere wendi ntani varume vaviri kuna yimana kumwe naYesus. ³³ Tupu vatundirepo vano varume vaviri vakayende, makura Peturus atantere Yesus ashi, ''Hompa, nawa ghunene nkene tupu atwe ngatu kare mpo pano. Makura atwe ngatu tunge po ndyugho ntatu, ndyugho yimwe yoye, yimwe yaMoses, ntani yimwe yaEliya.'' (Ano ngoli Peturusi kapi ayivire ashi vinke ana kughamba.) ³⁴ Ghuye shimpe kuna kughamba vino, makura liremo lya lishovagani kwaya papavo ntani kwava fikilira vakare mumundema, vavo kwakara naghoma waghunene opo vakaramo munda yamundunduma waliremo. ³⁵ Makura liywi kwatunda munda yaliremo, kuna kughamba ashi, ''Ghuno ndye Monande, ogho nahora ghunene ogho natoghorora; tererenu kukwendi.'' ³⁶ Tupu lya manine kughamba lino liywi, kwakuharukako tupu Yesus kuna yimana po pentjendi. Varongwa vendi kwamwena teyete ghure wamayuva ghangandi kwato ogho vatanterako vyakuhamena kwavyo vakamonine kundundu. ³⁷ Liyuva lyaku kwamako, vavo kwatundire kundundu vaghurumuke, makura mbunga yavantu kwayenda vagwanekere naYesus. ³⁸ Kwakuharukako tupu, murume kwatunda mumbunga kuna kughamba naliywi lyaku dameka ashi, ''Murongi, ame kuna kushungida kukoye, fera nkenda ntani popera monande, ghuye kwamuyita tupu pentjendi ahuru. ³⁹ Mukenge tupu, mpepo dadidona kwangena murutu rwendi makura kehe pano kumu manga murutu rwendi naruntje dogoro kutakuma nakulira; ntani kumu mbirumuna aku dinge rutu rwendi naruntje makura kutameka kuruka ntutu yi tunde mukanwa kendi. Yino mpepo kapi yarupukanga yi tundemo murutu rwendi, ano ngoli nkene shi kuna kushana yi rupuke mo murutu rwendi yina hepa kumupuma yi mutoghone naku mugandera palivhu dogoro kuremana ghunene. ⁴⁰ Ame mbyo namuyita monande kuvarongwa voye ndi vatjidemo yino mpepo yi tundemo murutu rwendi, ano ngoli kapi vana kuvhura. ⁴¹ Yesus kwaghamba atantere varongwa vendi ashi, ''Anwe vantu varuvharo rwakupira lipuro ntani anwe kwakara naghukaro waghudona, dogoro shirugho shaku tika kuni nko ngamu kara name ntani nga mupura? Muyitenu ogho mwanuke kuno kukwande.'' ⁴² Mundyira yaku muyita mwanuke kwaYesus, yino mpepo yayidona kwamu manga naku munyunga-nyunga yimu mbirumune dogoro kwamugandera palivhu. Mpopo Yesus kwaharukira mpepo yayidona yi tundemo mumwendi makura averura mwanuke, ntani amu tapa kwavashe. ⁴³ Vantu navantje kwatetuka pakumona nkondo daKarunga dadinene. Vantu vavo shimpe kuna kukupura vyaku hamena kuvitetu ovyo aruwanine Yesus, makura ghuye kwatantera varongwa vendi ashi, ⁴⁴ ''Turerenu nawa muyuvhe dino nkango mposhi mukwate lighano kwadino nkango naku ghamba kukwenu ashi: Mona Muntu ntantani ngava ka mutape mumaghoko ghavantu ngava ka mutware muliyome.'' ⁴⁵ Ano ngoli varongwa vendi kwayuvhire dino nkango aghambire, ano ngoli kapi vakwatire lighano ovi dina kutanta odino nkango. Karunga kwahoreka dino nkango dikare mulihoramo mposhi vantu ngava pire kuyiva ovyo datanta dino nkango, vavo ngava pire kuyiva naku kwata lighano ovi dina kutanta, makura varongwa vendi kwakalire naghoma muku mupura Yesus avatantere ovi dina kutanta dino nkango. ⁴⁶ Kuruku rwashirugho, varongwa vendi avatameke kughamba vaku kanane mukatji ka mbunga yavo ashi are nga karopo mukondi wamunene wakupitakana vaghunyandi navantje. ⁴⁷ Yesus, kwayivire ovyo vyakaliro munda yadimutjima davo namu maghayaro ghavo, makura ghuye ayita mwanuke amu yimiki mulivhango lyendi kumeho yendi, ⁴⁸ ghuye avatantere ashi, ''Kehe ghuno waku tambura ghuno mwanuke wamudidi mukonda yalidina lyande, ghuye ame tupu ana kutambura; ntani kehe ghuno waku ntambura me, ghuye kuna tambura nka nandyegho antumo ame. Yivenu ashi Kehe ghuno wamudidi ghunene wakupira likuto mukatji kenu, ghuye ndye walikutopo lya linene lya kupita kana navantje kushipara shaHompa Karunga.'' ⁴⁹ Yohanesi atantere Yesus ashi, ''Hompa, atwe tuna kuwana murume kuna kutjida mpepo dadidona mulidina lyoye atwe mbyo tuna mutantere ashayeke, mukondashi ghuye kapi shi ghumwe wamu mbunga yetu.'' ⁵⁰ Makura Yesus kwatantera varongwa vendi ashi, ''Kapi shi kushayekita muntu waku ruwana vyaweno,'' ''Mukondashi kehe ghuno waku ruwana viruwana vyaghuhunga vyakupira kukurwanita naviruwna vyenu, naye kukwenu ahamena.'' ⁵¹ Mayuva ghendi kuna kukwangura ntani kuna kutika papepi makura Karunga ngamu ghupemo nga tunde mo muno mughudyuni, Yesus kwatokora ntani kwashapuka ayende kuYerusalemu. ⁵² Ghuye kwatuma vakareli vendi vapite kumeho yendi, vayende vakangene mumukunda waSamariya vaka wapayike navintje. ⁵³ Ano ngoli vantu vamu Samariya kwashwenine kumutambura Yesus mushirongo shavo mukondashi vavo kwayivire nawa-nawa ashi ghuye kuna kupita mo tupu mushirongo shavo, kuna kuyenda kuYerusalemu. ⁵⁴ Vano varongwa vendi vaYakopu naYohanesi opo vayuvire vyaweno, vavo kwaghamba ashi, ''Hompa, ove kuna shana atwe tu shungide kwaKarunga atume mundiro ghutunde muliwiru ghuva shore naku vadyonaghurapo vano vantu ndi?'' ⁵⁵ Yesus kwapiruka aharukire vano varogwa vendi, ⁵⁶ vavo avakatwikira vakayende kumukunda waku kwamako. ⁵⁷ Yesus navarongwa vendi vavo kuna kuyenda muruyendo rwavo, murume ghumwe, kwatantera Yesus ashi, ''Kehe kuno nga ghuyenda, name nko nganu yenda ntani ove nganu kwama.'' ⁵⁸ Yesus amu limburura ashi, ''Vikashama vyava mbwawa kwakara namakwina oko vararanga, ntani vidira vyakutuka muwiru navyo kwakara navitunguru omo vyararanga, ano ngoli Mona Muntu kapi akara nalivhango ntani nandyugho yakurara apwiyumuke.'' ⁵⁹ Makura Yesus ayendi ntani aneye muntu wapeke amu tantera ashi, ''Ove yakuno kukwande ghu nkwame.'' Ghuno muntu kwalimburura naku tantera Yesus ashi, ''Hompa, mpulitire tanko nu vyuke, nuyende nganu ka vhumbike vavava vana dohoroka.'' ⁶⁰ Yesus amu tantere ashi, ''Shuva vantu vakufa ngava vhumbike vafe vavo. Ano ngoli ove, kuna kukutuma ghuyende ghuka yuvite Mbudi yaRuhafo yaghuntungi waKarunga kumavhango ghapapepi nakughure. ⁶¹ Ntani muntu ghumwe kwaghamba atantere Yesus ashi, ''Hompa, ame kuna shana kuyenda nove nuku kwame, makura mpulitire tanko nuvyuke nuka tantere naku rekera vantu vamu mundi wande.'' ⁶² Yesus amu tantere ashi, ''Kwato muntu wakutwa shipururo mulivhu atameke kupurura mulifuva lyendi, makura nga shayeke tanko nga piruke akenge fora dakuruku rwashipururo ashi weni omo dina fana, muntu wakufana weno kapi awapera ntani kapi ahungama muku ruwanena ghuntungi waKarunga naghuntungi wamu liwiru.