¹ Kuruku rwashirugho, Yesus navarongwa vendi kwashapukire vayende kudimukunda naku vitata vyaku kushuva-shuva vatware nakuronga nakuyuvita Mbudi yaRuhafo yakuhamena kughuntungi waKarunga. Ghuye kwayendire navarongwa vendi muronga navaviri, ² ntani navakamali vamwe ovo averulire kumpepo dadidona namaghuvera ghaku kushuva-shuva vavo mbo vano: Mariya Magdalena, ogho varupwitire mpepo dadidona ntano-na-mbiri; ³ naYohana, mukamali waKusa, lirenga lya likadi lya Herodesi; naSusana; ntani navakamali vamwe vavayingi, ovo, kava tapango mbatero yavimaliva namaghushwi ghaku kushuva-shuva kwaYesus navarongwa vendi. ⁴ Liyuva limwe mbunga yavantu kwayire vaponge palivhango limwe tupu, vavo kwatundire kuvitata vyaku kushuva-shuva vaye kwaYesus, makura ghuye kwava tantere nkango damuvishewe ashi: ⁵ ''Mukuni kwayendire aka kune mbuto. Nda ahokwera muku kuna mbuto mulivhu makura, mbuto yimwe ayi were kuntere yandyira makura vantu avayilyatanga nampadi davo, makura vidira avilipo yino mbuto avayimana po. ⁶ Ntani mbuto yimwe ayi were palivhu lya nkarawe, makura ayi tameke kukura wangu-wangu, ntani ayi kukuta nka wangu-wangu, mukonda kwakalire palivhu lya lisheshu ntani kapi yawanine mema. ⁷ Ntani mbuto yimwe ayi were mumiya, makura ayi kuru kumwe namiya navishwa makonda yampato yino mbuto ayi fu. ⁸ Ntani mbuto yimwe kwawera mulivhu lya liwa lya ndombe makura ayi kuru ayi kuvhara yitape muyangu waghuyingi wakupita kana palifere.'' Yesus opo amanine kughamba dino nkango, ayiyiri atantere vantu ashi, ''Kehe ghuno akaro namatwi ghakuyuvha, ayuvhe vino dina kutanta dino nkango.'' ⁹ Makura varongwa vendi avamupura avatantere ashi vinke dina kutanta dino nkango damuvishewe. ¹⁰ Yesus avatantere ashi, ''Ghukonentu nandunge dakuyiva naku kwata lighano nkango dakuhorama daghuntungi waKarunga kwavitapa tupu kukwenu, kuvantu vaku kukarera ame kughamba navo munkango damuvishewe, mposhi nampili ngava pahuke mantjo ngava mone, vavo kwato ovi ngava mona, ntani nampili ngava teye matwi ghavo ngava yuvhe dino nkango, ano ngoli kapi ngava yiva vakwate lighano ovyo datanta.' ¹¹ Dino nkango davishewe kwatanta weno ashi: Yino mbuto kuna kara nkango daKarunga. ¹² Yino mbuto oyo yaweliliro kuntere yandyira kutanta ashi vano vantu ovo vayuviro nkango daKarunga, makura mudyonaghuli aya kukwavo avashakana dino nkango ditunde mo mudimutjima davo nga vapire kukara nalipuro mposhi ngava pire kuyoghoka kundyo davo. ¹³ Yino mbuto yaweliliro pankarawe, kutanta ashi ovano vantu ovo vayuviro nkango daKarunga, makura avaditambura naruhafo. Ano ngoli vavo kapi vakalire nandandani daku ngena mulivhu; vavo kwakara tupu nalipuro mushirugho shashifupi tupu, makura shirugho shamasheteko nashirugho shamaghudito kapi vavhure kudidimika makura avashuvu nkango daKarunga ntani avatunda kulipuro. ¹⁴ Ntani mbuto oyo yaweliliro mumiya kutanta shi vantu ovo vayuviro nkango daKarunga, makura mundyira yaliparu lyavo, kwagwanekera navinka vyaliparu nalimona namaghuwa ghamuliparu ghamudyuni, makura kwadipaya nkango daKarunga kapi dawana livhango lya kuyima mbuto. ¹⁵ Ntani mbuto oyo yaweliliro mulivhu lya liwa lya ndombe, ovano vantu ovo vayuviro nkango daKarunga, avadi tambura nawa vadipungure munda yadimutjima davo daku kushuka avalimburuka nakudikwama nakuditura mushiruwana, dogoro avayangura mo muyangu waghuwa waghuyingi nalididimiko lya linene. ¹⁶ "Kwato muntu wakutweda ramba ayi ture pashisha shakutura ramba makura ayi ture munda yambete. Nane ngoli, ramba kwawapera kuyitura pantishe yitape ghukenu mundyugho kwakehe ghuno waku ngena mo. ¹⁷ Mukondashi kwato shakuvanda nga shipire kushoroka vashiyive vantu, ntani kwato shakuvanda nakuhorama nga shipire kushoroka paghukenu. ¹⁸ Tererenu nawa mukwate lighano dino nkango, kehe ghuno akaro naghushwi wangandi, ngava muwedererako kughushwi wendi, ntani kehe ghuno wakupira ghushwi kehe ghuno, nakehe ghuno ghushwi waghudidi ogho akara nagho ngava ghumu shakana naghuntje. ¹⁹ Liyuva limwe vawina navaghuni vendi Yesus kwayire kukwendi vamumone, ano ngoli mukonda yambunga yayinene yavantu ovo vamu kundurukidiro mukatji kapi vawanine mpito yakungena vayende kukwendi. ²⁰ Makura vantu avamu tantere ashi, ''Vanyoko navaghuni voye mpovali pandye, ove vana kushana vakumone.'' ²¹ Makura Yesus avalimburura naku vatantera ashi, ''Ame vanane navaghuni vande mbo vano vaku yuvha nkango daKarunga vadi limburuke nakuditura mushiruwana. ²² Liyuva limwe Yesus kwaperama muwato navarongwa vendi, makura avatantere ashi, ''Tuyendenu tu vindakane lidiva tuyende musheli munya yalikuru diva. Makura avaperama muwato vavindakane lidiva. ²³ Mundyira yakuduwa wato vavindakane mulidiva makura Yesus kwaporokera muturo arara. Makura likundungu lya mpepo yankondo kwayambuka mulidiva, mankumpi ghamanene kwayambura wato dogoro mema kwakuyura muwato, vantu ovo varondiro muwato kwakalire mushiponga shashinene. ²⁴ Makura varongwa vaYesus avayendi kukwendi vaka murambwite, kumwe naku ghamba ashi, ''Murongi! Murongi! Atwe kuna kukufera!'' Ghuye kwarambuka mpopo makura aharuka akave likundungu namankumpi, namema makura mpopo tupu lifuta nalintje kwakutura, kwamwena teyete. ²⁵ Makura ghuye avapura ashi, ''Lipuro lyenu ne kuni nko oku lina kara?'' Makura vavo avakara naghoma ntani aghu vatundu, kwakutetuka ghunene, avakupura vavene-na-vavene ashi, ''Muntu munke mwene ghuno, waku kava naku pangera mpepo namema, ntani navintje kulimburukwa kukwendi?'' ²⁶ Makura Yesus navarongwa vendi avatwikiri kuyenda dogoro avakatika avakasheyeka kushirongo shaGadara, osho shakuvyuko nalifuta lya Galileya. ²⁷ Yesus tupu atunda muwato alyate palivhu paghurundu, ghuye kwakugwanekera namurume ghumwe ogho atundiro mushitata, ghuye kwakara nampepo dadidona. Ghuno murume kwakara shirugho shashire kwato kudwata vyuma, ntani kwato kurara mumundi ntani ghuye kararanga tupu mumayendo. ²⁸ Murume wampepo dodidona opo amonine Yesus, aliri nakudameka ntani aku gandere kumeho yendi aghamba naliywi lya linene ashi, ''Vinka ghuna shana kuruwana kukwande, ove Yesus, Mona Karunga wakuwiru-wiru? Ame Kuna kuku shungida naku kukanderera ashi, kapi shi ghundyuvite kukora.'' ²⁹ Mukondashi Yesus kwatantilire kare dino mpepo dadidona dirupukemo mwaghuno murume. Virugho navintje yino mpepo kungena mumwendi yi hepeke, ghuno murume kehe pano kava mupandekanga, kumaghuru naku maghoko, vamu kunge naku munomena, ano ngoli ghuye kundembura maghuketanga atunde mumango makura mpepo dadidona kumutwara ayende mumburundu. ³⁰ Makura Yesus apura ghuno murume ashi, ''Are lidina lyoye? Ghuye alimbura ashi, ''Ame mbunga yampepo dadidona,'' Mukondashi mpepo dadidona diyingi dangeno mo mumwendi. ³¹ Yino mbunga yampepo dadidona kwashungida kwaYesusi ashi kapishi adi tininike naku dituma diyende muvirongo vyamulikwina lyalinene lyalikurundema lyakuntji yavirongo vyava fe vyarunyando namahepeko. ³² Mpopo palivhango kwakalirepo ghutanga wavinguru vyavyo kuna kulyera kuntere yandundu. Yino mbunga yampepo dadidona kwashungida kwaYesus ayi tume yingene mughutanga wavinguru, makura Yesu ayi pulitiri yi kangene mughutanga wavinguru. ³³ Makura yino mbunga yampepo dadidona kwarupukamo mwamurume ayi kangena mughutanga wavinguru, kwakuharukako tupu ghutanga wavinguru navintje kuna kudukira viyende mumema mulikurudiva makura navintje avi fu kumema. ³⁴ Vakungi vinguru opo vamonine ovino vyashorokiro, kwaduka vayende vatware yino mbudi mushitata ntani yiku hanene mushirongo nashintje. ³⁵ Makura mbunga yavantu kwayenda vatunde mushitata vaka kenge ovyo vyashorokiro, makura avakatika avakawana Yesus ntani namurume ogho yarupukire mpepo yadidona. Murume kuna shungiri teyete kumpadi daYesus, kuna dwata nawa vyuma vyendi ntani kuna kara naghukaro waghuwa ntani kuna veruka wandyewa-ndyewa; vino kwatetukita vantu vamushirongo ntani kwava yitira ghoma naghutjirwe. ³⁶ Varume ovo vakaliropo ovo vamonino vino omu vyashorokire mbo vatapiro yino mbudi kumbunga yavantu ashi weni omo ana veruka ghuno murume wampepo dadidona. ³⁷ Makura vantu navantje vamu shirongo shaGadara nadimukunda damaparambo kwashungida Yesus atundemo mushirongo shavo ayende kwapeke, mukondashi vino kwayitire ghoma naghutjirwe kukwavo. Makura Yesus navarongwa vendi kwaperama muwato vavindakane lidiva vayende vavyuke. ³⁸ Ghuno murume ogho averukiro kumpepo dadidona kwashungida Yesus ashi ayende kumwe naye vamushimbe, ano ngoli Yesus amu tumu ayende kumundi ntani amu tantera nka ashi, ³⁹ ''Kayende kumundi wenu ntani katante nakutapa ghumbangi kwanavintje ovyo ana kuruwanene Karunga.'' Makura ghuno murume kwayenda mundyira yendi nayintje, kwatantera vantu naku yuvita Mbudi yaRuhafo mushitata nashintje kuhamena kwavyo vyashorokiro ntani namu amu verulire Yesus. ⁴⁰ Yesus navarongwa vendi avavyuka avakayenda dogoro avakatika, mbunga yavantu kwava taterera nankondo vavatambure naruhafo, mukondashi vantu vavayingi kwashanine kuva mona. ⁴¹ Kwakuharukako tupu murume ghumwe walidina lya Yayirus, ghumwe wavakurona vaSinagoge, kwaya tupu kwawera kumpadi daYesus, amu shungida vayende kumwe kumundi wendi ⁴² mukondashi monendi wamukadona ahuru, wamwaka murongo namwaka mbiri, kwavelire ntani kwakalire pepi namfa. Mbunga yayinene kwakundurukida Yesus, ntani kwamukwama vayende kumwe naye. ⁴³ Ntani mumbunga yavantu kwakalire mo mukadi wakuvera wakupita honde ghure wamwaka murongo namwaka mbiri, ghuye kwamana limona lyendi nalintje kughuvera wendi, ano ngoli kwato kuveruka. ⁴⁴ Ghuno mukadi kwashupura Yesus kuruku rwendi dogoro aka tika aka kwata kulirwakani lyendi, mpopo tupu ghuvera wendi wakupita honde kwashaya ntani kwaveruka. ⁴⁵ Makura Yesus apura ashi, ''Are ana kwato parutu rwande?'' Vantu navantje kwakanana, makura Peturusi aghamba ashi, ''Murongi, kenga yino mbunga yavantu vavo kuna kukurombera kehe ghuno kuna shana kukwata parutu roye ntani vavo kuna kukundurukida vana kutura mukatji vakwate parutu roye.'' ⁴⁶ Ano ngoli Yesus aghamba ashi, ''Mpwali ogho ana kwato parutu rwande, mukondashi ame kuna yuvhu nkondo kuna kurupuka ditunde murutu rwande.'' ⁴⁷ Ghuno mukadi kwadimburura ashi kapi nka ana kuvhura kuvanda mumbunga, makura aduka ayende kwaYesus aka kugandera kumeho yendi ghuye kuna kukankama. Ghuye kwatantera mbunga yayo kuna kuterera ashi, ghuye kwavera mbyo ana kwatere kulirwakani lya Yesus, makura mbyo ana veruka mpopo. ⁴⁸ Makura Yesus amu tantere ashi, ''Monande wamukadi, lipuro lyoye lina kuverura. Weno kayende nambili yaHompa.'' ⁴⁹ Yesus ghuye shimpe kuna kughamba namukadi, murume ghumwe kwatunda kumundi waYayirus kuSinagoge atape mbudi ashi, ''Monoye wamukadona ana dohoroko kumundi. Kwato nka ovyo ghu hepekera ghuno Murongi. ⁵⁰ Yesus opo ayuvire yino mbudi, atantere Yayirus ashi, ''Kapi shi ghukare naghoma, kara nalipuro, monoye nga paruka nga kara namonyo.'' ⁵¹ Yesus opo aya tikire pandye yamundi, kwatantera vantu navantje varupuke mo mumundi vakare pandye yamundi, vahupare mo tupu vaPeturusi naYohanesi naYokopu, ntani navashe navawina vamukadona. ⁵² Vantu vavayingi kwakalire naliguvo ntani kuna kulira ghunene mukonda yamfa damukadona, makura Yesus aghamba ashi, ''Kapi shi mulire, mukadona kapi ana fu kuna rara tupu.'' ⁵³ Vavo kwamushepa Yesus, mukondashi vayivire ashi mukadona kuna dohoroka. ⁵⁴ Makura Yesus akwata kulighoko lya mukadona, aghamba naliywi lyaku dameka ashi, ''Mukodona, rambuka!'' ⁵⁵ Makura mpepo namonyo wendi aghu vyukirimo, murutu rwendi makura arambuka. Yesus atantere vakurona vendi vamupeko ndya alye. ⁵⁶ Vakurona vamwanuke kwatetuka ghunene, makura Yesus avatantere ashi kapi shi vavitante kuvantu ovino vyashorokiro.