¹ Yesus opo amanine kuronga vantu, makura ashapuka ayende kushitata shaKaperenamu. ² Mushitata kwakaliremo mukurona wavakavita wavaka Roma, ghuye kwakalire namukareli wendi wamwanuke muviruwana ogho aholire ghunene, ghuye kwavelire ghunene, ghuvera waku mutwara kumfa. ³ Mukurona wava kavita opo ayuvire mbudi yakuhamena kwaYesus, makura atumuko matimbi ghava Yuda, vayende kwaYesus vaka muyite kukwendi ngaya verure mukareli wendi. ⁴ Opo vayatikire kwaYesus, avamushungida nakulilira kukwendi, ashi, ''Ghuno muntu kuna hepa ghunene mbatero yaku koye, ⁵ mukondashi ghuye kwahora ghunene vantu vamuhoko wetu ntani nashirongo shetu mbyo atu tungira Sinagoge yetu. ⁶ Makura Yesus ayendi navo kumundi wamukurona wavakavita. Tupu vakatikire papepi namundi, mukurona wavakavita atumuko mukareli wendi aka tantere Yesus ashi, ''Hompa, kapi nashana ghukurorore, ame kapi nahungama kushipara shoye ntani ove kapi wawapera kungena mulipata lyande. ⁷ Mukondashi ame kapi nahungama kushipara shoye, ghamba tupu nkango makura mukareli wande kwaveruka. ⁸ Mukondashi ame muntu waku kwama naku ruwana naku limburuka ntani naku tikitamo veta, ntani ame kwakara navakurona vande vakuwiru, ntani name nka kwakara navakavita vande vamunda yalipangero lyande ovo napangeranga vakwame veta dande. Nkene shi anu tantere ghumwe ashi, 'Kayende' ghuye ana hepa kukayenda ntani,' nkene anu tantere ghumwe ashi, 'Ya kuno kukwande,' ghuye ana hepa kuya kukwande ntani, nkene anu tantera ghumwe ashi, 'ruwana vino, 'ghuye ana hepa kuviruwana vitikemo ntani.'' ⁹ Yesus opo ayuvire vyaweno, ghuye kwatetuka ghunene, makura apiruka kumbunga oyo yamukwamino avatantere ashi, ''Ame kuna kumutantera weno ashi, ame kapi nawana mo muntu walipuro lya kuhura pano mushirongo shaIsirayeli nashintje waku fana yira ndyeghuno.'' ¹⁰ Ovano vakavita ovo vatumine makura avavyuka, opo vakatikire kumundi, avakawana muveli ana veruka wandyewa-ndyewa. ¹¹ Kutunda mpopo tupu mushirugho shashifupi, Yesus kwashapuka ayende kushitata shaNayini, navarongwa vendi ntani mbunga yayinene kwamukwama vayende naye. ¹² Tupu vakatika vangene mulivero lya shitata, vavo kwamona, vantu kuna shimbi shimpu vatware, ghuno muntu wakufa kwakalire mumati walimpowe (vawina kwakalire mufita vyendi), ntani mbunga yavantu vamushitata kwayendire namukadi wakufita. ¹³ Makura Hompa opo amona ghuno mukadi, amu fere nkenda yayinene makura amu tantere ashi, ''Kapi shi ghulire.'' ¹⁴ MakuraYesus akwa ngura kuyenda dogoro aka tika kwavo vashimbiro shimpu aka kwata pambete opo pakaliro shimpu, makura ovo vadamunino shimpu avayimana. Makura Yesus aghamba ashi, ''Mumati, ame kuna kukutantera ashi, rambuka.'' ¹⁵ Makura nakufa mpopo arambuka ashungiri ntani atameke kughamba, makura Yesus amu ghupu amu tapa kuvawina. ¹⁶ Vantu navantje kwakalire naghutjirwe, makura avatanga nakupanda Karunga, avaghamba ashi, ''Muporofete wamunene mpwali mukatji ketu'' ntani avaghamba nka ashi, ''Karunga kuna vhuruka ntani kuna kudingura vantu vendi.'' ¹⁷ Yino mbudi yakuhamena kwaYesus kwakuhanena mushirongo nashintje shaYudeya ntani naku dimukunda nadintje odo dakundurukido shirongo. ¹⁸ Varongwa vaYohanesi mukushi avaka tantera Yohanesi navintje ovyo vyashorokiro. ¹⁹ Makura Yohanesi ayita vano varongwa vendi vaviri avatumu vayende kwaHompa, vaka mupure ashi, ''Atwe kuna shana kuyiva ashi ove vatuma ogho twa taterera ndi, ndi shimpe mpwali wapeke ogho ngayo kunyima?'' ²⁰ Varongwa vaYohanesi avaya papepi naYesus, avaghamba nka ashi, ''Atwe Yohanesi mukushi ana tutumo tuye kukoye, tuya kupure ashi, 'Ove twa taterera nga ghuye kukwetu ndi, ndi shimpe tu taterereko wapeke ogho ngayo kunyima?''' ²¹ Mpopo tupu Yesus kwaverura vantu vavayingi ku maghuvera ghaku kushuva-shuva navikunkira vyavantu naku tjida mpepo dadidona muvantu, ntani kwaverura vantu vavatwiku vapahuke mantjo vatameke kumona. ²² Makura Yesus alimburura naku tantera varongwa vaYohanesi vano vaviri ashi, ''Opo mukatika, katanterenu Yohanesi vyakuhamena kwavino muna mono ntani navi muna yayuvhu ovyo vina shoroko. Vatwiku vana pahuka kuna kumona, vantu vavirema vana shapuka kuna kuyenda, vantu vavingondwe vana veruka, vantu vavipuru-puru kuna kughamba ntani kuna kuyuvha, vantu vakufa kuna kurambuka mumfa, ntani vantu vavahepwe kuna kuvayuvitira Mbudi yaRuhafo. ²³ Ntani ka tanterenu Yohanesi ashi Karunga nga tungika muntu wakuyuvha marongo ghendi nga pure ntani wakumona nakuyuvha viruwana vyendi nga pure naku limburuka, ghuye nga pire kutunda kukwendi.'' ²⁴ Opo vatundirepo vakayende varongwa vaYohanesi, makura Yesus atantere mbunga vyakuhamena kwaYohanesi ashi, ''Muntu wakufana weni mwayendilire mumburundu muka mumone? Rughu rwaku menga naku kankama naku kunyunganga kumpepo ndi? ²⁵ Muntu wakufana weni ogho mwayendilire muka mumone? Mukafumu wakudwata vyuma vyaghufughuli vyakuvembera ndi? Tererenu, vantu vakudwata nawa vyuma vyandiro vyaghufughuli vakutunga muruviya ne kwandi vahompa ovo vatungo mumbara. ²⁶ Anwe ne muntu munke ogho mwayendilire muka mumone? Anwe kwayendire muka mone muPorofete? Yi, ame kuna kumutantera ashi, Yohanesi kwapitakana vaPorofete navantje. ²⁷ Ghuno Yohanesi ndye vatjanga mumatjangwa ashi, ''Kengenu, Ame kuna kutuma mukareli wande nga yende kumeho yenu, ghuye nga kawapeke ndyira yenu.' ²⁸ Ame kuna kumutantera ghushili ashi, kwanavantje ovo vashampuruka vakamali, kwato wamunene wakupitakana paYohanesi mukushi. Muntu wamudidi wakupira likuto mughuntungi waKarunga ghuye kwakara namfumwa yayinene yakupitakana paYohanesi.'' ²⁹ (Vantu navantje opo vayuvire vino, kumwe nava futiti mutero, vavo kwapura mpopo mwaKarunga ashi ghuye kwahungama, mukondashi vavo kwava kusha muliyoyero lya Yohanesi mukushi. ³⁰ Ano ngoli vaFariseya navarongi matjangwa vavo kapi vavakusha muliyoyero lya Yohanesi mukushi, mukondashi vavo kapi vatambura shihoro nashitambo shaKarunga.) ³¹ Yesus aghamba ashi, ''Ovano vantu, varuvede rwantantani weno, kuvafanekita weni? Weni omo vana fana weno? ³² Vavo kuna fana yira vanuke vana pongo mumavhango ghakughulitira ngeshefa, mbyo vana shungiri kumwe tupu kuna kudanaghuka naku ghamba, weno ashi, 'Atwe kuna kumuyimbira ntjumo dakudana, ano ngoli anwe kapi muna kudana. Atwe mbyo tuna muyimbiri ntjumo damulitamu dakulira, ano ngoli anwe kapi muna kulira.' ³³ Nanwe mo muna fana weno, Yohanesi mukushi opo ayire kukwenu ghuye kapi ka lyanga ndya ntani kapi ka nwanga marovhu, anwe mbyo mwamunyenga ntani mbyo mwaghamba ashi, 'Ghuye kwamupangeranga mpepo dadidona.' ³⁴ Ano ngoli Mona Muntu ghuye kwaya kukwenu ghuye kulya ndya nakunwa marovhu, makura anwe mbyo mwamushwena naku munyenga ntani mbyo mwaghamba ashi, 'Kengenu, ghuno mukafumu kwakara namakurulya ntani namakurunwa, ntani ghuye kwaku kwata ghukwavo navafutiti mutero ntani navantu vandyo!' ³⁵ Vino kuna shoroka weno, mposhi ghukonentu waKarunga ghu moneke ntani ghukare mushiruwana mposhi vana vendi vakuhungama valimburuke nakughutikitamo. ³⁶ Liyuva limwe muntu ghumwe wavaFarisayi kwayita Yesus vakalye kumwe naye ndya. Makura Yesus ayendi aka ngena mulipata lyamu Fariseyi aka shungira kutafura valye kukumwe ndya. ³⁷ Momo, mushitata kwakalire mo mukadi ghumwe washikumbu ogho vayivire navantje ashi mukadi wandyo. Opo ayuvire mukadi ashi Yesus mpwali mumundi wamuFariseyi kuna kulya ndya, makura yendi nangwavero yendi yamaghadi Alabasta ghakunuka rupekwa. ³⁸ Yesus ghuye kuna shungiri kutafura kuna kulya ndya makura mukadi aya kukwendi ayimana kunyima yendi, makura atongamene kumpadi dendi, atameke kulira, aghupu maruntjodi ghendi akushu kumpadi daYesus, ntani akokota kumpadi dendi, nahuki daku mutwe wendi ntani ancumita nakanwa kumpadi dendi makura aghupu maghadi ghakunuka lidumba lya liwa, awaveke naku kwiti kumpadi dendi. ³⁹ Ghuno muFariseyi ayitiro Yesus kumundi wendi opo amonine vyaweno, ghuye akupura munda yamutjima wendi, naku ghamba ashi, ''Nkene shi ghuno murume muporofete waghushili, ndi ana yiva ashi mukadi munke ghuno ana kukwato kumpadi dendi, mukondashi ghuno mukadi muna ndyo.'' ⁴⁰ Makura Yesus alimburura naku ghamba weno ashi, ''Simoni, ame kuna shana kukuronga ko nkango daghukonentu.'' Simoni aghamba ashi, ''Murongi, Ghamba tupu!'' ⁴¹ Yesus amu tantere shifanikito ashi, ''Muntu ghumwe kwaruwananga ngeshefa yakutapa vimaliva kuvantu vakorote: Ghuye kwatapire vimaliva vyamakongo kuvantu vaviri. Ghumwe kwaghupire makongo ghaku tika kundjambi yaku ruwanena mayuva mafere matano ntani ghumwe kwaghupa makongo ghaku tika kundjambi yaku ruwanena mayuva dimurongo ntano. ⁴² Ovano vantu vaviri navantje kapi vavhulire kufuta vavyute makongo ghavo, makura ghuno muntu wakutapa makongo ghavimaliva adongonona po makongo ghavano vantu vaviri naghantje. Pa katji kavano vantu vaviri, ghunindye po waku kara naruhafo rwarunene wakuhora ghunene ghuno muntu wakutapa makongo?'' ⁴³ Makura Simoni alimburura ashi, ''Ame mukutwara mumwande kwandi ndyegho wamakongo ghamayingi.'' Makura Yesus amu limburura ashi, ''Ove kuna limburura mughuhunga.'' ⁴⁴ Makura Yesusi apiruka akenge kwamukadi ntani atantere Simon ashi, ''Ove kuna kumona ovi ana kuruwana ghuno mukadi ndi. Ame kunaya mbyo nangene mulipata lyoye. Ove kapi ghuna tapa mema kukwande nuku kushe kumpadi dande, ano ngoli ghuno mukadi kuna ghoreke mpadi dande namaruntjodi ghendi, kenga ovi ana kuruwana, kuna kukusha mpadi dande namaruntjodi ghendi mbyo ana kukokota kumpadi nahuki dendi damu mutwe. ⁴⁵ Kutunda tupu opo nangene mulipata lyoye ove kapi ghuna morora naku ncumita, kenga ghuno mukadi kutunda tupu opo anaya tiki shimpe kapi ana shayeke kuncumita kumpadi dande. ⁴⁶ Ove kapi ghuna kwiti naku waveka maghadi kumpadi dande, ano ngoli kenga ghuno mukadi kuna kukwita naku waveka maghadi ghandiro ghakunuka rupekwa kumpadi dande. ⁴⁷ Ame kuna kumutantera weno ashi, ndyo daghuno mukadi, dadiyingi, weno kuna didongonona po - ghuye mbyo ana kara nashihoro shashinene kukwande. Muntu wandyo dadisheshu odo vana dongonona po kukara nashihoro shashididi.'' ⁴⁸ Makura Yesus atantere ghuno mukadi ashi, ''Ndyo doye kuna didongonona po." ⁴⁹ Vantu ovo vakaliro kumwe naye kutafura avatameke kukupura ashi, ''Muntu munke mwene ghuno waku dongonona po nandyo davantu ndo dino.'' ⁵⁰ Ntani Yesus atantere nka ghuno mukadi ashi, ''Lipuro lyoye lya linene lina kuparura. Yenda mumbili yaHompa.''