¹ Kuruku rwashirugho, Hompa wetu Yesus kwatoghorora vantu vamwe vakutika kudimurongo ntano-na-mbiri, makura avatantere ashi vantu vakare vaviri-vaviri muruyendo, makura vapite kumeho vayende kuvirongo naku dimukunda ntani naku mavhango naghantje oko ashanine kuyenda Yesus. ² Makura Yesus kwava tantera ashi, ''Muyangu ghuna vhuka ghunene, ano ngoli varuwani vasheshu.'' Mpo ngoli ashi raperernu mushungide kwaHompa mwenya muyangu nga wederere shivaro shava ruwani ngava kare vavayingi ngava tume mulifuva vayende vaka wapeke naku yangura muyangu wamu lifuva lyendi. ³ Shapukenu ntani kayendenu. Kengenu, ame kuna kumutuma yira ndywighona dina kuyendo mukatji ka mambungu. ⁴ Anwe kwato kushimba ndjato yavimaliva, ntani anwe kwato kushimba ndjato yamuruyendo, ntani anwe kwato kushimba rupando rwankaku ntani anwe kwato kumorora muntu mundyira namuruyendo rwenu. ⁵ Ntani kehe muno mumundi ngamu ka ngena, pakuhova muna hepa kughamba weno ashi, 'Mbili yaHompa yikare muno mumundi!' ⁶ Nkene shi vantu vamu mundi vana mutambura, vavo ngava wana yino mbili yaHompa yakutunda kukwenu ntani nka yino mbili nga yikara mumundi naghuntje, ano ngoli nkene shi vantu vamo mumundi kapi vana kumutambura, yino mbili yenu nga yivyuka kukwenu naghumwenu. ⁷ Anwe muna hepa kukara momo mumundi nkene shi vantu vana mutambura, dogoro mpopo ngamu shapuka mutundemo omo mumushirongo, ntani anwe muna hepa kulya kehe dino ndya vana muyumbura ntani nakunwa kehe vino vana mupa vamu mundi, ntani kehe ghuno muruwani kwahepa kulya ndjambi yakutunda muliyuywa lyendi. Ntani anwe kwato kuyendaghura kumandi ghapeke tunda mundi, yenda mundi. ⁸ Nkene shi kuna ngene mushitata, makura vantu vana mutambura, muna hepa kulya kehe dino ndya vana tapa kukwenu ⁹ ntani muna hepa kuverura vaveli navantje ovo muna kawana mo mumundi. Ntani muna hepa kutantera vantu ashi, 'Ghuntungi waKarunga papepi nanwe ghuna kara.' ¹⁰ Ano ngoli nkene shi anwe kuna ngene mushitata makura vantu vamo kapi vana kumutambura, muna hepa kuyenda mupitakane nandyira yenu ntani muna hepa kughamba weno ashi, ¹¹ 'Atwe kuna kuku kumuna mbundu yaku mpadi detu yitunde ko ntani yikare momuno mushitata shenu, yayo nga yikare marondoro kukwenu! Anwe yivenu vino ashi: Ghuntungi waKarunga papepi ghuna kara nanwe.' ¹² Ame kuna kumutantera weno ashi muliyuva lyaku hulilira lya mpanguro yenu vantu vamu shitata shenu ngava kawana mpangura yayinene yayidito naghupyakadi nametengeko ghamanene, ghaku pitakana mpanguro yavantu vavarunde vamu shitata shaSodomu. ¹³ Lihudi lya linene kukwenu, anwe vantu mwatungo mushitata shaKorasini namu Betesayida! Mukondashi anwe kwashwena kuku shighura mutjindye ghukaro wenu mushayeke kuruwana ghurunde, vino viruwana vyavinene navitetu ovyo vyashorokiro mushirongo shenu, ashi ndi kwaviruwana vishorokere mushirongo shavantu vavarunde muTirusi namu Sidoni, vavo ndi vaku shighura kare vashayeke kuruwana ghurunde, vadwate ntjako daku tavaghuka vashungire mumutwitwi varaperere naku shungida kwaHompa adongononepo ndyo davo. ¹⁴ Mpanguro namatengeko ghenu ngagha ka kara ghaghudito ghunene kupitakana mpanguro yavantu vavarunde vamu shirongo shaTirusi naSidoni. ¹⁵ Ntani anwe, vantu vamu shirongo shaKaperenimu, kwakunene pita ntani anwe kukughayara ashi ngamu ka ngena mughuntungi wamu liwiru? Ani hawe, anwe tupu kuyenda kushirongo shavafe shakuntji munda yalivhu. ¹⁶ Yesus kwatantera varongwa vendi ashi, Kehe ghuno waku terera naku tambura nkango denu, ghuye kuna kuterera naku tambura nkango dande, ntani waku pira kuterera naku tambura nkango denu, ghuye kuna shwena kuterera naku tambura nkango dande, ntani waku pira kuterera naku tambura nkango dande, ghuye kuna shwena kuterera naku tambura nkango daKarunga ogho antumo ame.'' ¹⁷ Ovano vantu dimurongo ntano-na-mbiri ovo atoghorolire Yesus kwaka vyuka naruhafo rwarunene, vavo kwaghamba weno ashi, ''Hompa, nampepo dadidona nadintje kuna ka limburuka kukwetu ditunde muvantu pakuraperera munkondo damu lidina lyoye ntani namu lipangero lyoye.'' ¹⁸ Makura Yesus avatantere weno ashi, ''Opo muna ruwana vyaweno, ame kuna mono Satana kuna kukarumuka kuliwiru awere palivhu yira maruvadi. ¹⁹ Kengenu, ame kuna tapa nkondo kukwenu dakulyata mayoka navange vaghushungu padimutwe davo, ntani nka ame kuna tapa kukwenu nkondo dadinene dakupitakana muna nkore wenu Satana, ntani kwato shimwe kehe shino shakuvhura kumufunda naku muremeka. ²⁰ Anwe karenu naruhafo mukonda shi, mpepo dadidona kuna ka limburuka kulipangero lyenu, ntani nka karenu naruhafo rwarunene rwakupitakana pano mukondashi madina ghenu kuna ghatjanga mumbapira yamonyo yamu liwiru.'' ²¹ Pa ruvede runo Yesus kwakalire naruhafo rwarunene rwakutunda kuMpepo yaKupongoka, makura aghamba weno ashi, ''Vava Hompa wande, Ame kuna kutapa mpandu kukwenu, Ove Hompa walishito nalintje, liwiru nalivhu, ntani ove kwahoreka vino navintje kuvantu vaghukonentu vanandunge vaku kuronga vapire kuyiva naku kwata lighano vyaweno, ano ngoli ove mbyo wavishorora naku vineyeda vantu vakupira makurongo, ovo vapuro naku tambura ghushili ghoye mbyo vakara yira vanuke vavadidi. Mundyira, Vava, vino mo ngoli mwavishanena mukondashi vyaweno kuyita ruhafo kumutjima ghoye. ²² Yesus kwatantera varongwa vendi ashi, "Vavava kwatapa navintje vikare mulipangero lyande ntani kwato ghumwe wakuyiva Mona nkwandi Vavava tupu ti, ntani kwato wakuyiva Vavava nkwandi Mona tupu ti, ntani kuvantu ovo atoghorora Mona kwava neyeda naku vashorwera navintje kukwavo mposhi ngava muyive.'' ²³ Yesus kwakalire kumwe navarongwa vendi kulivhango lya pentjavo makura apiruka kukwavo avatantere weno ashi, ''Anwe vantu valirago navantu ovo vatoghorora ntani navantu ovo vatungika mbyo muna kumona vino vyaweno vishoroke mukatjikenu muruvede rwenu yira momu vina kushoroka paweno kumeho yenu. ²⁴ Ame kuna kumutantera nkango daghushili ashi, vaPorofete nava Hompa vakare vavayingi navo kwashanine kumona ovino viruwana ovi muna kumona anwe paweno ovi vina kushoroko kukumeho yenu paweno, ano ngoli vavo kapi vavhulire kuvimona ntani kapi vyashorokire muruvede rwavo, ntani navo kwashanine ghunene kuyuvha odino nkango odo muna kuyuvha anwe paweno, ano ngoli vavo kapi vavhulire kuyuvha dino nkango daweno.'' ²⁵ Mpopo tupu, ghumwe wavarongi matjangwa kwashapuka ayimana kwashanine kusheteke Yesus, ghuye kwapura mapuro ghaghudito ghaweno, ashi, ''Murongi, vinke ovyo nahepa kuruwana mposhi name nganu kawane monyo wanaruntje?'' ²⁶ Yesus amu pura weno ashi, ''Ove wavarura matjangwa ntani wayiva veta nadimuragho daMoses? Vinke dina kutanta veta nadimuragho daHompa?'' ²⁷ Ghuye kwalimburura weno ashi, ''Hora Hompa Karunga ghoye namutjima ghoye naghuntje, namonyo ghoye naghuntje, nankondo doye nadintje, nandunge doye nadintje, ntani hora ghunyoye yira momu waku hora naghumoye.'' ²⁸ Yesus amu tantera weno ashi, ''Ove kuna limburura mughuhunga. Viruwane vyaweno nga vitikemo ove ngaghu kawana monyo wanaruntje.'' ²⁹ Ano ngoli, ghuno murume kwashanine awane mpito, yaku pura Yesus weno ashi, ''Oghuno ghunyande are lidina lyendi ntani kuni nko ana kara?'' ³⁰ Yesus kwamu limburura naku mutantera weno ashi, ''Murume ghumwe kwayendire muruyendo atunde kuYerusalemu ayende kuYeriko. Mundyira yendi kwagwanekera namatjotji navantu vaghukorokotji vawidi wamashaka, vavo kwamu shakana limona lyendi nalintje, ntani kwamu toghona, dogoro kushana kumudipaya, ntani kwamu shuva kuna rara kuna kufa. ³¹ MuPirisiteli ghumwe wamu Yuda naye kwapitire ayende momo mushitaghura, opo amonine murume kuna rara, ghuye kwavindakana apitire musheli munya yashitaghura, kwamu shuva mpopo. ³² Mushikavo nka, muPirisiteli wamu Levi waku ruwana muntembeli yaHompa naye, kwapitire momo mushitaghura, opo atikire papepi amono murume kuna rara kuna kufa, naye kwavindakana apitire musheli munya yashitaghura, kwamushuva mpopo. ³³ Ntani murume waku Samariya, naye kwayenda apite momo mushitaghura, makura awana murume kuna rara kushana kufa. Opo amu monine ghuye kuna rara kushana kufa, kwamu fera nkenda ghunene. ³⁴ Ghuye kwayenda kukwendi makura amu rambwita naku muku kumuna mbundu, amupa mutondo anwe, amu kwiti maghadi parutu rwendi ntani adingi makeshe pavironda vyendi vi veruke wangu. Makura amu rondeke pashidongi shendi amu twara kumundi wendi lyendi, aka muvede naku mupanga. ³⁵ Liyuva lyaku kwamako ghuye kwaghupa vimaliva vyandjambi yaku ruwanena mayuva maviri atapa kwamu ruwani wamu mundi, ntani amu tantere weno ashi, 'Panga ghuno muveli ntani mupakera mbili dogoro nga veruke, nkene shi mfuto ngayi pitakana payino shiringa natapa, ame nganuya futa mfuto yaku hupako nayintje, opo nganu ka vyuka.' ³⁶ Yesus kwaghamba ashi, kutwara mumoye pakatji ka vano vantu vatatu ghunindye po waku hora ghunyendi kutwara muviruwana vyaviwa kwaghuno muntu ashanino kufa?'' ³⁷ Murongi wamatjangwa kwalimburura weno ashi, ''Ndyegho amu popiliro naku mufera nkenda amu pange averuke.'' Yesus kwamutantera weno ashi, ''Yenda nove ghuka ruwane vyaweno.'' ³⁸ Yesus navarongwa vendi kwayenda muruyendo, opo vaka ngenine mumukunda ghumwe wapepi naYerusalemu, mukadi walidina Marita kwava tambura mulipata lyendi. ³⁹ Ghuye kwakalire namu ghunyendi wamwanuke wamukadona walidina Mariya, ogho ashungiliro mulivhango lya Yesus papepi nampadi dendi, ghuye aterere kunkango dendi namarongo ghendi. ⁴⁰ Marita ghuye kwakalire nashinka shaku viyaghuka kulidiko aterekere naku wapayika ndya davagenda. Marita kwayenda kwaYesus amu tantere weno ashi, ''Hompa, ove kapi ghuna kumfera ko nkenda ashi munyande wamukadona kuna ntjuvu pentjande nu ruwane viruwana vyamu lipata ndi? Mutantere aye kuno kukwande tuya ruwane kumwe viruwna vyamu lipata.'' ⁴¹ Ano ngoli Hompa kwamu limburura naku mutantera weno ashi, ''Marita, Marita, ove kuna kara navinka vyaviyingi mbyo ghuna kara namaghudito ghamayingi, ⁴² ano ngoli shininke shimwe tupu shakaro nahepero, shaku terera kunkango dande naku marongo ghande. Mariya kuna toghorora po ruha rwamulyo ghunene, rwakuwana matungiko ghakutunda kunkango dakupongoka mukondashi kwato waku vhura kumu shakana matungiko ghaweno.''