¹ Vino kwashorokire liyuva limwe Yesus kwayendire kulivhango lya pentjendi aka raperere. Opo amanine kuraperera, ghumwe wavarongwa vendi kwayire kukwendi amu tantere weno ashi, ''Hompa, turonge ko natwe ngatu yive kuraperera yira momu aronga Yohanesi varongwa vendi.'' ² Yesus kwava tantera weno ashi, ''Nkene kuna kuraperera muna hepa kughamba weno ashi, Shetu wamu liwiru lidina lyenu lifumane. Ghuntungi wenu ghutuyere. Kupanga kwenu kutikemo pano palivhu yira muliwiru. ³ Tupenu ko ndya detu dakehe liyuva. ⁴ Tughupirenupo pandyo detu, yira momu twa ghupira ngapo natwe vandyo detu. Kapi shi mutu kengerere tu nenukire kundyo, nane mutu yoghore kughudona.'' ⁵ Yesus kwatantera varongwa vendi weno ashi, ''Nkene ghumwe wamu mbunga yenu, ayendi kumundi waghunyendi pakatji ka matiku, aka ghambe weno ashi, ⁶ 'Muholi ame kuna kara navagenda mumundi wande ovo vana tundo kughure, mpeko dimuntje ntatu damboroto, ame kapi nakara nandya mulipata lyande? ⁷ Makura ghunyoye nga ghambe munda yandyugho yendi weno ashi, 'Ame narara kapishi ghuyoterere mumundi wande. Ame napata mavero ghaku ndyugho yande, ntani vana vande vana rara mumbete weno ntani name narara mumbete nakara weno. Ame naku vhura shi kurambuka ruvede runo nu tape ndya kukoye.' ⁸ Ame kuna kumu tantera weno ashi, muntu waweno nkene kapi ana shana kurambuka atape ndya kukwenu, mukondashi anwe vaholi vendi, anwe kwato kushayeka muna hepa kutwikira ngoli naku shungida naku romba naku tininika kukwendi, anwe kwato kufa ntjoni daku ngongora naku romba ndya, dogoro nga rambuke nga tape mboroto dadiyingi dakupita kana pado muna rombo. ⁹ Ame kuna kumutantera weno ashi, romba naku shungida, ngava kupa; yenda ghuka shane, ngaghu kawana; ngongora, ngava gharura livero. ¹⁰ Muntu waku romba ngava mupa nga wana, muntu waku yenda aka shane ngaka wana; ntani muntu waku ngongora kulivero, ngava gharura livero nga ngene. ¹¹ Anwe vasha, mwakaro navana venu vavamati, nkene shi monoye kuna kuromba ntjwi yaku lya, ove kuvhura kudamuna liyoka lya ghushungu ghutape kukwendi alye ndi, mulivango lyaku tapa ntjwi kukwendi? ¹² Ntani, nkene mwanuke kuna kuromba lighuta kukoye, ove kuvhura kudamuna Nge waghushungu ghutape kukwendi ndi? ¹³ Vino kuna kutanta ashi, muntu nampili weni akara naghurunde waghunene kwayiva kutapa maghushwi ghamawa kuvana vendi, Shetu waMuliwiru naye ngoli ghuye kwayiva kutapa ma ghushwi ghamawa ghaku tunda kuMpepo yaKupongoka kwakehe ghuno waku romba naku shungida kukwendi?" ¹⁴ Liyuva limwe Yesus kwatjida mpepo yaghupuru-puru yi tunde mumuntu waku pira kughamba. Opo yarupuka mo mpepo yayidona mumwendi, ghuno murume washipuru-puru mpopo kwatameka kughamba, makura mbunga yavantu kwatetuka ghunene. ¹⁵ Ano ngoli vantu vamwe kwaghamba weno ashi, "Ghuye kutjida mo mpepo dadidona muvantu nankondo daBelisebulu, mukurona wampepo dadidona.'' ¹⁶ Vantu vamwe kwashanine kumu sheteka ashi nkwandi aruwane vitetu avaneyede shiyivito ashi ghuye vyaghushili kwatunda muliwiru. ¹⁷ Ano ngoli Yesus kwayivire ovi vyakaliro mumaghano ghavo, makura avatantere weno ashi, ''Kehe ghuno ghuntungi washirongo shaku kutavaghana kudyonaghukapo, ntani ghukare mundi nkene vantu vamulipata avakupiruka vaku rwanite-rwanite lino lipata kapi nga likarapo nga lihanaghuka po. ¹⁸ Nkene shi ghuntungi waSatana kwakutavaghana ntani kukurwanita wene nawene, weni omo ngaghu vhura kukarapo ghuno ghuntungi wendi? Anwe kuna kughamba weno ashi ame kutjida mpepo dadidona muvantu nankondo daBelisebulu. ¹⁹ Nkene shi ame kutjida mpepo dadidona muvantu nankondo daBelisebulu, ovano varongwa venu ne nkondo munke varuwanitanga vatjide mpepo dadidona muvantu? Mukonda yaweno, vavo mbo ngava ka mupanguro ngava kamupe ghundyoni. ²⁰ Ano ngoli nkene shi ame kutjida mpepo dadidona muvantu nanyara yaKarunga, anwe yivenu ashi ghuntungi waKarunga ghunaya tiki kukwenu. ²¹ Yesus kwaghamba nka weno ashi, "Nkene shi murume wankondo wavirwita vyankondo nga kunge mumundi wendi, kwato waku danena mo ntani kwato waku vaka limona lyendi, ²² ano ngoli nkene shi ghuno murume kuna mufundu, lino lipenda lya nkondo kupinga virwita vyendi vyankondo navintje ovyo ahuguvara vikare ghupingwa nalimona lyendi. ²³ Kehe ghuno wakupira kutambura viruwana vyande nga kare kuruha rwande, muntu waweno kwakulimba name ntani muna nkore wande, ntani kehe ghuno wakupira kuyita mbunga kukwande muntu waweno ghuye kukahanaghura vantu vatunde kukwande. ²⁴ Nkene shi mpepo yayidona kuna rupuka mumuntu, yayo kuyenda mumburundu yika renda-rende yika shana-shane ghuturo. Nkene shi kapi yina kawana ghuturo, makura yayo kughamba weno ashi, ''Ame kuna kuvyuka kumundi wande oko natunda.' ²⁵ Nkene shi mpepo yayidona yina ka vyuka pakuya tika, kuya wana ndyugho yayo kuna kara muporongwa yina kene ntani yina wapa nawa. ²⁶ Makura yino mpepo yayidona yayo kuka shimbako mpepo dapeke ntano-na-mbiri dadidona ghunene dakupitakana papado makura dado kungena kumwe mundyugho nga ditunge mo kumwe tupu. Makura ghukaro wendi wakuhulilira waghudona waghuno muntu, kukuwederera ghukare ghukaro waghudona ngudu kupitakana ghukaro wakuhova.'' ²⁷ Vino kwashorokire weno mpopo, Yesus ghuye kuna kughamba dino nkango daweno, makura mukadi ghumwe wamu mbunga kwaghamba weno naliywi lyaku dameka ghunene amu tantere ashi, "Mukadi oghu aku yamwekiro mashini ghaku lishwe lyendi kwakara nalirago lya linene.'' ²⁸ Ano ngoli Yesus kwalimburura weno ashi, ''Mughuhunga, ano ngoli vantu valirago lya linene mbovo vaku yuvha nkango daKarunga vadi limburuke naku ditikitamo.'' ²⁹ Vantu vavayingi kwaya kukwendi vaku pakerere nambunga yavantu ovo vakaliro palivahngo makura shivaro kwaku wederera ntani kwavhuka ghunene, makura Yesus kwatantera weno yino mbunga yavantu ashi, ''Anwe vantu muna karo mughudyuni paweno, anwe muna kuparuko muruvede runo, anwe ruvharo rwavantu vavarunde. Anwe kuna shana ashi nkwandi numu neyede shiyivito shaku tunda muliwiru ntani mupura ashi ame kwatunda muliwiru, ano ngoli ame kwato shiyivito nganu tapa kukwenu, nkwandi shiyivito shaku fana yira shiyito shaYona. ³⁰ Yona kwamu tumine kushirongo shaNinive ngaka tape mbudi kuvantu vamushirongo ntani nga kare shiyivito kuvantu vamushirongo shaNinive, nanwe mo ngoli Mona Muntu kwamutuma kuvantu vamu ghudyuni nga kare shiyivito kukwenu anwe vantu muna kuparuko paruvede runo rwantantani. ³¹ Hompa wamukadi kwatundire Kumbindakano yavirongo ayende mundyira yaku ghure aka mone, naku yuvha ntani naku terera kughukonentu waSolomoni waku ghamba naku ruwana ntani naku pangura mpanguro, ano ngoli paweno anwe vantu muna karo pano weno anwe kuna kuyuvha naku terera naku kenga muntu wamunene waku pitakana paSolomoni ghuye mpwali kuna kara weno mukatjikenu, ano ngoli anwe kapi muna kuterera kunkango dendi odi ana kughamba, shirugho kuna kuya ntani papepi shina kara makura Hompa Karunga ngaka pangura vantu navantje vamu ghudyuni, ghuno hompa wamukadi ngaka yimana kumeho yenu anwe vantu muna karo pano weno anwe muna kuparuko pantunda yalivhu weno ghuye ngaka tapa ghumbangi waku hamena viruwana vyenu vyavi kukutu dimutjima mposhi ngava kamupe mpanguro yayidito yaku mutwara kundyo. ³² Ntani vantu vamu shirongo shaNinive kwashayeka kuruwna ghurunde mbyo vaku shighura vatjindye ghukaro wavo opo ayendire mo Yona aka tape marondoro mushirongo shavo ntani aka yuvita Mbudi yaRuhafo, ano ngoli paweno muntu wamunene waku pitakana Yona mpwali mukatji kenu ntani ghuye kuna kumuyuvitira Mbudi yaRuhafo ano ngoli anwe kapi muna kuyitambura ntani kapi muna kukushighura ghukaro mushayeke kuruwana ghurunde, tererenu, shirugho kuna kuya ntani papepi shina kara, Hompa Karunga ngaka pangura vantu navantje vamu ghudyuni, ntani vantu vamu shirongo shaNinine ngava kayimana kumeho yenu, ngava katape ghumbangi wakuhamena kuviruwana vyenu vyavikukutu dimutjima mposhi ngamu kawane mpanguro yayidito yaku mutwara mundyo. ³³ Kwato muntu, waku hamweka ramba, makura kuyihoreka munda yambete ndipo ayi fikilire munda yashikumba, nane ngoli ghuna hepa kuyitura pawiru yashitafura, mposhi yitape ghukenu mundyugho nayintje, kwakehe ghuno wakungena mo. ³⁴ Mantjo ghoye kwakara ngo ramba yaku rutu roye. Nkene shi mantjo ghoye kwawapa ntani kumona nawa, kutanta ashi rutu roye naruntje kukara kuna yura ramba mposhi rukare kuna kutema ramba rutape ghukenu. Ano ngoli nkene shi mantjo ghoye kwavipa ntani kwato kukenga nawa, kutanta ashi rutu roye naruntje kwato ramba ntani kukara mumundema. ³⁵ Mpo ngoli shi, kara ghuna kotoka mposhi yino ramba yina karo murutu roye kapi shi ngayi dime makura rutu roye nga rukare mumundema. ³⁶ Ano ngoli nkene shi rutu roye naruntje kuna kara naramba kumaruha naghantje, nampili rutu roye naruntje ngaru kara mughukenu, ntani kwato ruha rwakukara mumundema, kutanta shi rutu roye naruntje kukara mughukenu yira ramba yina kutemeno parutu roye rumoneke nawa naruntje. ³⁷ Tupu amana kughamba Yesus dino nkango, muFarisayi ghumwe kwatantera Yesus vayende kumwe kumundi wendi vakalye ndya mulipata lyendi, Yesus makura ashapuka avayendi kumwe vakalye ndya. ³⁸ Ghuno muFarisayi kwatetuka pakumona Yesus kuna kulya ndya ghuye ahana kuhova kuku kusha kumaghoko. ³⁹ Hompa Yesus kwatantera ghuno murume weno ashi, ''Anwe vaFarisayi kukusha tupu nkinda navisha vyaku lyera ndya pantunda tupu, ano ngoli munda yadimutjima denu kwayura nyata yamakurulya ntani naghurunde. ⁴⁰ Anwe vantu vavagova! Karunga ogho aruwano pantunda yavisha ndye nka shimpe aruwano namunda yavisha? ⁴¹ Tapenu kuvahepwe ovyo muna tura vikare munda yavisha, mposhi anwe ngamu kare muna kushuka munda ntani napa ntunda. ⁴² Lihudi lya linene kukwenu anwe vaFarisayi, anwe kutapa vitapa-murongo vyalimona lyenu kwaHompa Karunga lyaku tunda kumuyangu wanyango nalividi lyamu vipata namu mafuva ghenu, ano ngoli anwe kapi mwakara nashihoro naKarunga ntani kapi mwafera nga nkenda vantu vaghunyenu. Muna hepa kuruwana vino: kuhora Karunga ntani naku ruwana ghuhunga, ntani naku ruwana mulimburuke nakutikitamo navintje, ovyo aturapo Hompa Karunga. ⁴³ Lihundi lya linene kukwenu anwe vaFarisayi, mukondashi anwe kwahora kushungira kumeho yavantu pavipuna vyavantu vakamakuto muSinogoge denu mposhi shi vantu vamu kenge ntani vamu morore naku mukunda naku mufumadeka kumavhango ghangeshefa. ⁴⁴ Lihudi lya linene kukwenu, mukondashi anwe kuna fana yira mayendo ogho vapira kutura liwe lyapa mbira narugumbo vikare viyivito kuvantu, vapire kuvindakanapo ntani naku lyatapo po pamayendo makura vakare kuna nyata pampepo." ⁴⁵ Ghumwe wavarongi vamatjangwa kwapura Yesus weno ashi, "Murongi, odo nkango ghuna kughamba kukwetu daweno, atwe ghuna kutuka." ⁴⁶ Yesus kwava tantera weno ashi, ''Lihudi lya linene kukwenu, anwe varongwa vamatjangwa! Mukondashi anwe kutapa mudigho waghudito kuvantu vadamune pamapepe ghavo, ano ngoli anwe vavene kwato kukwata ko mudamune, nampili kadidi nanyara yimwe. ⁴⁷ Lihudi lya linene kukwenu, mukondashi anwe kutunga mawe ghakare pantoko davaporofete, ovo vadipayire vakurona venu. ⁴⁸ Anwe kuruwana vyaweno mposhi mukare vambangi vaku hamena kuviruwana vyavakurona venu ashi, vavo vyaghushili kwadipaya vano vaporofete vakare, anwe mbyo mwatunga mawe pantoko davo mutape ghumbangi ashi anwe mwavadipayo. ⁴⁹ Mukonda yaweno, Hompa Karunga kwakara naghukonentu, mbyo atanta weno ashi, ''Ame nganu tuma vaPorofeto nava Apositoli kukwavo ngava ka varonge nkango dande, ano ngoli vavo ngava ka vahepeka ntani vamwe ngava ka vadipaya.' ⁵⁰ Runo ruvharo rwavantu vana karo weno mughudyuni, ngava kafuta honde yava Porofete vaKarunga navantje ovo vadipaya, kuhonde yavo nayintje oyo yangeno mulivhu, kutunda kulishito lya ghundyuni, ghundyoni wava kurona vavo ngava ka ghutapa kukwavo, ⁵¹ kutamekera kuhonde yaAbeli dogoro naku honde yaSakariya, ogho vadipayilire munda yaNtembeli kushidyambero shakupongoka. Yivenu vino, Ame kuna kumutantera weno ashi, runo ruvharo rwavantu ngamu kawana matengekero ntani nga mukafuta honde yava Porofete vaHompa navantje. ⁵² Lihudi lya linene kukwenu anwe varongi vamatjangwa, mukondashi anwe kwashakana vantu tjapi yaghukonentu; ntani nanwe shi kapi ngamu kangena mughuntungi waKarunga, ntani nka anwe mbyo muna kuditopita ndyira yavantu ovo vana kushano kukangena mughuntungi waKarunga.'' ⁵³ Opo atundire po Yesus, varongi vamatjangwa ntani nava Farisayi kwakalire nanyanya kukwendi avaghamba vaku kanane kuhamena vininke vyaviyingi vyaku kushuva-shuva, ⁵⁴ vavo kwashanine vamu wane ghuntjoni mposhi vamurundire mapuko ghamayingi ghaku kutunda kumarongo ghendi mwene.