¹ Mpopo tupu, palivhango kwaponga po mbunga mayovi namayovi ghavantu vavo kuna kukurondanga vavene nava vene, makura Yesus kwatantera varongwa vendi navantje weno ashi, "Karenu muna kotoka kuhingo yava Farisayi, vavo vavikupaki. ² Kwato shaku kuhorama osho ngashi piro kushoroka paghukenu, ntani kwato kehe shino shaku vanda kuvantu ngava pire kushiva. ³ Ntani kehe vino ngamu ghambera mumundema mbyo tupu kuyuvika paghukenu, ntani kehe vino ngamu ghamba ngamu ghoghotera mumatwi ghavantu munda yandyugho ngavi katika kumbunga ntani vantu navantje vapandye yandyugho navo ngava viyuvha. ⁴ Vakwetu, ame kuna kumutantera weno ashi, kwato kutjira vantu vakudipaya rutu tupu, nkene kuna mana kudipaya rutu kwato nka vyaku vhura kuruwana ko kwaruno rutu. ⁵ Ame kuna kumu rondora weno ashi muntu waku fana weni ogho ngamu vhura kutjira. Anwe muna hepa kutjira muntu waku ruwana vyaweno, waku dipaya rutu rwamuntu, ntani ghuye kwakara nankondo daku vhukumina rutu rwakufa mumundiro wanaruntje. Vakwetu, ame, kuna kumu tantera weno ashi, tjirenu muntu wakufana weno. ⁶ Ghayarenu weno ashi mandyunge matano kuvhura kugha ghura tupu kundando yasenda mbiri tupu? Ano ngoli kushipara shaKarunga kwato kuvhurama po lindyunge limwe pamandyunge maviri. ⁷ Karunga kwayiva nampili shivaro shahuki doye nadintje damu mutwe ghoye dapwa kuvarura. Anwe kapi shi mukare naghoma. Anwe kwakara namulyo waghunene waku pitakana mandyunge ghamayingi. ⁸ Ame kuna kumutantera nka weno ashi, kehe ghuno waku ghamba nga tantere vantu ashi ghuye murongwa wande, Mona Muntu naye ngaka ghamba naku tapa ghumbangi kumeho yava Engeli vaKarunga ashi ghuye mukareli wande, ⁹ ano ngoli kehe ghuno waku kanana lidina lyande kumeho yavantu name nganu kamu kanana naku mushwena kumeho yava Engeli vaKarunga ashi ghuye kapi shi mukareli wande. ¹⁰ Kehe ghuno waku shwaghura Mona Muntu, kuvhura kudongonona po ndyo dendi, ano ngoli waku shwaghura Mpepo yaKupongoka, kwato nka mpito yaku dongononapo ndyo dendi. ¹¹ Nkene shi ngava mukwata vamutware muSinagoge, kumpanguro, kumeho yaveta namatimbi ntani navapanguli, anwe kwato ovyo ngamu kudivikira vyaku hamena ashi weni omo ngamu ka ghamba kumeho yampanguro ngamu kupopere naghumwenu, ndipo ashi nkango munke odo muka twenya, ¹² Mpepo yaKupongoka ngayi tapa nkango kukwenu odo ngamu vhura kughamba paruvede ndoro.'' ¹³ Makura muntu ghumwe wamu mbunga apura Yesus weno ashi, ''Murongi, tantera mukurwande wamurume tuku tapere ghupingwa wavakurona vetu nuwane ko wande.'' ¹⁴ Yesus amu limburura weno ashi, ''Ove murume, ame kapi nakarerapo ashi waku mupangura ntani naku mutapera ghupingwa walimona lyenu?'' ¹⁵ Makura Yesus kwatantera mbunga yavantu ashi, ''Karenu muna kotoka ntani karenu ghure namadovo ghalimona naghushwi wamu ghudyuni, mukondashi monyo wamuntu kapi wakarerapo tupu muku pongeka limona lya liyingi lyamu ghudyuni." ¹⁶ Yesus kwava tantilire shifanikito shaweno, ashi, ''Mulifuva lya murume ghumwe wamungagho kwamenamo mbuto yamuyangu waghuyingi ghunene, ¹⁷ makura ghuye aku pura munda yamutjima wendi, weno ashi, 'Weni omo nganu vhura kuruwana, ame kapi nakara nashishete shashinene shakutura muyangu wambuto yande?' ¹⁸ Makura ghuye aghamba weno ashi, 'Ame nganu ruwana weno. Ame nganu yungurura vishete vyande navintje makura nganu virambakane kumwe tupu nganu tunge po shishete shashinene shimwe tupu, nganu turemo muyangu wambuto yayande nayintje ntani nalimona lyande nalintje. ¹⁹ Makura nganu tantere monyo wande weno ashi, ''Monyo wande, ove kuna kara namuyangu waghuyingi ghunene ogho ghuna pungura nga ghukare mwaka namwaka dadiyingi. Weno pwiyumuka ngoli, nakulya, nakunwa ntani ove kara ngoli muruhafo namuruviya rwarunene.''' ²⁰ Ano ngoli Karunga amu tantere weno ashi, 'Ove murume wamugova, weno kumatiku ghana muntji monyo ghoye kuna kughughupamo murutu roye, olino limona wapungura weno, are nga lipingo?' ²¹ Ovino mbyo nga vishoroko kuvantu vakupongeka nakupungura limona lyapa livhu, limona lya weno kwato mulyo kwaKarunga.'' ²² Makura Yesus atantere varongwa vendi weno ashi, ''Ame kuna kumutantera weno ashi, anwe kapishi ngamu kupakere shinka shaku hamena kumonyo denu, ashi vinke nga mulya ngamu paruke; ndi ntani nka ashi vinke nga mudwateka, pamarutu ghenu. ²³ Mukondashi monyo ghoye kwakara namulyo waku pitaka ndya, ntani rutu naro kwakara namulyo waku pitakana vidwata! ²⁴ Kengenu shi kwavino vidira vyamakorova, vyavyo kwato kukuna mbuto ntani kwato kuyangura muyangu. Ntani vyavyo kwato ndyugho yakupungura ndya ntani kwato vishete, ano ngoli Karunga mwene ndye waku virera. Anwe kwakara namulyo waghunene waku pitakan vidira! ²⁵ Are ghumwe mukatji kenu waku kara navinka ntani namakupuro ghamayingi ghamunda yamutjima wendi, waku vhura kuwederera ko kumayuva ghaliparu lyendi? ²⁶ Nkene shi anwe kwato kuruwana vino vyavireru, mukonda munke mukarera nashinka shashinene kwavi vyaku hupako? ²⁷ Kengenu ntani ghayarenu dino dimucuko - omo dakuranga. Dado kwato kuruwana ntani kwato kuhondja vyuma ano ngoli dado kuwapa naku fughura ghunene. Ame kuna kumu tantera weno ashi, nampili Hompa Salomoni ogho kadwatango marwakani ghaghufughuli kapi ashetakana kumwe naghufughuli wadimucuko daku mushoni. ²⁸ Nkene shi Karunga kuwapeka weno dimucuko daku mushoni wamu mafuva, ghukare kuna wapa ghukare po tupu shirugho shashifupi namuntji nayona tupu, makura ngava ghu vhukumine mumundiro, anwe kwakara namulyo waghunene kushipara shaKarunga ntani ghuye nga mudwateka ngamu wape nawa nga mupitakane dimucuko daku mushoni, anwe vantu kwakara nalipuro lya lisheshu? ²⁹ Kapi shi ngamu kare nashinka shaku kupura ashi vinke nga mulya ntani ovi nga munwa, anwe kapi shi kukupakera shinka kuvininke vyaweno. ³⁰ Mukondashi vantu vamughudyuni mbo vaku shana naku kupakera shinka kuvininke vyaweno, ano ngoli anwe Shenu wamu liwiru kwayiva kare ashi anwe muna vihepa vyaweno. ³¹ Pamuhovo anwe shanenu ghuntungi waKarunga, ntani nga muwana navintje ovyo muna hepa. ³² Kapi shi mukare naghoma anwe mbungaghona yaHompa, mukondashi Shenu kuna shana kutapa ghuntungi wendi nalipangero lyendi kukwenu. ³³ Weno ghupa limona lyoye nga ghutape kuvahepwe. Makura ove ngaghu ruwanene limona lyaku pira kudyonaghuka - limona lyamu liwiru lyaku pira kupwa, ntani muwidi naku vhura shi kutjora avake mo, ntani lino limona kwato kulikana kuvampuku. ³⁴ Kehe kuno wapungura naku wahoreka limona lyoye, nkoko nko wakara mutjima ghoye. ³⁵ ''Dwatenu marwakani ghenu ntani mangenu nkama denu mumbunda dikore ntani tikitenu mo viruwna vyenu ntani hamwekenu ramba denu dikare kuna kutwera, ³⁶ karenu yira vantu ovo vana kutaterero muhona wavo ogho ana kutundo kushipito shalikwareko, tupu ngaya tika nga ngongore kulivero, makura anwe ngamu gharure livero mpopo ghuye nga ngene mo. ³⁷ Lirago lya linene kwavantu ovo ngaya wana muhona nkene shi vavo kuna kuruwana viruwana vyendi. Ame kuna kumutantera vyaghushili ashi, muhona ngaka dwata lirwakani nankama yendi yamu mbunda, ghuye nga tantera vakareli vendi vashungire kutafura makura ngava wapayikire ndya ngava dyobwane kumwe naye. ³⁸ Nkene shi muhona ngaya tika pakatji kamatiku paviri yamurongo naghuviri, ndi kumakya tiku paviri yaghutatu kungura-ngura yayinene, makura ngaya wane vakareli vendi kuna kuruwana viruwana vyendi ntani vana kuwapayikiri kuna kumu taterera, vano vakareli vendi vaweno kwakara nalirango ntani muhona nga kara naruhafo rwarunene kukwavo. ³⁹ Anwe yivenu vino ashi, nturaghumbo wamundi kapi ayiva shirugho osho ngaya muwidi nga tjore mumundi wendi, ghuye ndi nga kunga mundi wendi nga pire kungenamo nga vakemo. ⁴⁰ Nanwe mushikwavo, karenu muna kuwapayiki, mukondashi kapi muna yiva shirugho naviri osho ngaya Mona Muntu.'' ⁴¹ Makura Peturusi amu pura weno ashi, ''Hompa, ove kuna kughamba shino shanikito kukwetu tupu, ndi kwavantu navantje?'' ⁴² Hompa amu limburura weno ashi, ''Ame kuna kughamba kwalirenga lyaku limburukwa lya ghukonentu olyo nga katura muhona ngali ka kare mpititi mulipangero lyendi, lyaku tapera ndya mushirongo kuvantu vendi opo nga shitika mo shirugho? ⁴³ Muntu walirago ndyegho ngaya wana muhona wendi ghuye kuna kuruwana, ghuye ngaka wana mfuto yendi. ⁴⁴ Vyaghushili, ame kuna kumutantera weno ashi ghuye ndye ngava katura mulipangero lyaku kunga limona lyamu shirongo shendi. ⁴⁵ Ano ngoli nkene shi oghuno mukareli kuna kughayara weno munda yamutjima wendi ashi, 'Muhona wande kapi ngaka vyuka wangu,' makura ghuye nga tameke kutoghona varuwani vaghunyendi vavarume navakamali ntani nga hokwe tupu kulya naku nwa marovhu nga kare nkorwi, ⁴⁶ makura Muhona wendi ngaya tike ndyo lyo liyuva paruvede naviri oyo nga pira kumu taterera ghuye kwato ovyo ana yivako makura muhona wendi ngamu wane kuna kuruwana vyaweno, ghuye nga mupangura naku tengeka ghuno mukareli wendi ntani ngamu tjida nga tunde mo mulipundi ghuye nga turemo muntu wamurunde. ⁴⁷ Mukareli waweno, kwayiva shiruwana shendi nashitumbukira shendi osho atapa muhona wendi kukwendi, makura ghuye kapi ashi ruwana shitikemo, ghuye ngava kamu shepura ngoreka dadiyingi ghunene! ⁴⁸ Ano ngoli mukareli waku pira kuyiva shitumbukira shendi makura nga ruwane lipuko naye ngava kamu shepura ngoreka dadisheshu tupu. Kwakehe ghuno vatapa maghushwi ghamayingi, ana hepa kuruwana ghunene nga wederere ghushwi wendi ghuvhuke, ntani kwakehe ghuno atapa limona lya liyingi, naye ngava kamu pura ngaka tape limona lya liyingi. ⁴⁹ ''Ame kwayita kaparwa kaku shora mundiro mughudyuni, ntani ame kwashana ashi ndi kumeho nganu yatike muno mughudyuni mundiro ndi watameka kare kutwera. ⁵⁰ Ame ntantani ngava nkushe muliyoyero lya runyando, ntani ame ngoli nganu twikira kukara murunyando namu ghupyakadi dogoro nganu tikitiliremo shiruwana shande! ⁵¹ Anwe kuna kughayara ashi ame kwayita mpora mughudyuni? Hawe, ame kapi nayita mpora mughudyuni, nane ngoli ame kwayita makunyengo muvantu ngava kugaghunuke. ⁵² Kutunda pano vantu vatano vaku tunga mumundi ghumwe tupu ngava kugaghunuka - vano vatatu ngava kara kumwe tupu ntani vano vaviri navo ngava kara kumwe tupu, ntani ovano vantu vatatu ngava kunyenga navano vantu vaviri, ntani vano vantu vaviri ngava kunyenga navano vantu vatatu. ⁵³ Vantu ngava kunyenga-nyenga, vasha ngava nyenga vana vavo vavarume, ntani vana vavarume navo nga nyenga vashavo, ntani nyokwa muntu ngaku nyenga navana vendi vavakadi, ntani vanuke vavakadi navo ngava nyenga nyokwavo, ntani vangumweyi vamuntu ngava kunyenga navakadi vavana vavo vavarume. ⁵⁴ Yesus kwatantera nka waro mbunga yavantu ashi, ''Anwe nkene shi kumona maremo kuna kutunda kuruha rwaku ghutokero, anwe kughamba weno ashi, 'Mvhura papepi yina kara kusha yiroke; makura vina hepa kushoroka ngoli. ⁵⁵ Nkene shi kuna kumona mpepo kuna kuyunga yitunde kughurundu yivinda kane, anwe kughamba weno ashi, 'Yona ngaku kara mwi waku shora; makura vina hepa kushoroka vikare ngoli. ⁵⁶ Anwe vantu kwavi kupaka, mwayiva viyivito navintje vyamu ghudyuni vyampepo namaremo ghaku liwiru ntani anwe kupumba nawa-nawa mughive ovi ngavi shoroko liyuva lyaku kwamako, makura ne weni-weni omo mupira kuyiva vino virugho naruvede oru muna kuparukapa weno ntani mupire kuyiva ashi vinke ana kuruwana Karunga paweno? ⁵⁷ Mukonda munke muna kupira kutokora muruwane ghuhunga paruvede runo muna wana paweno? ⁵⁸ Sheteka kushungida kwaghunyoye ogho mwaku dyona naye muvhure kukughupirapo anwe shimpe kapi muna kamoneka kumeho yampanguro kumbara, nkene ngava kutwara kumpanguro ngava ka kuwane ghundyoni, ngava ka kutapa kuvapolisa vaveta, vapolisa vaveta ngava ka kupaterera mudorongo. ⁵⁹ Ame kuna kukutantera weno ashi, ove kapi ngaghu ka tundamo dogoro ngaghu kafute ndyo doye nadintje.''