¹ Pa shirugho shino, vantu ovo vakaliro po palivhango kwatantilire Yesus mbudi yakuhamena kuvaGalileya ovo adipayire Pilatusi vavo muntembeli kuna kuraperera naku dyamba ndjambo makura avaghupu honde yavo avayirunga-runga kumwe nandjambo. ² Yesus avapura weno ashi, ''Ovano vantu vyashorokilire vino vyaweno ne vavo vandyoni ghunene kupitakana vantu vamu Galileya navantje mbyo vafire kumfa daweno ndi? ³ Hawe, kapi shi mo ngoli, ame kuna kumutantera weno ashi. Nkene shi kapi muku shighura mushayeke kuruwana ghurunde, nanwe shi mo ngoli ngamu fana, ngamu fa. ⁴ Ntani ovanya vantu murongo-na-vatano-na-vatatu ovo vafiro opo lya mbandukire litungo lya lire lya Shiroyamu avafere momo, anwe kuna kughayara ashi vavo ne vandyoni ghunene kupitakana vantu navantje vamu Yerusalemu mbyo vafire kumfa daweno ndi? ⁵ Hawe, kapi shi mo ngoli, ame kuna kumutantera weno ashi. Nkene shi kapi muna kushayeka kuruwana ghurunde, nanwe mo ngoli ngamu fana, ngamu fa.'' ⁶ Makura Yesus avatantere shino shifanikito ashi, ''Muntu ghumwe kwatapekire shitondo shaghukuyu mushikunino shendi shamandyembere makura aka vyuka ndi aya shimbeko nyango yaghukuyu ano ngoli kapi aya wanineko nyango. ⁷ Makura mwenya shikunino atantere muruwani wamu shikunino weno ashi, 'Kenga, ame kwayenda mbyo naka kara ghure wamwaka ntatu, weno kunaya ndi nuya shimbeko nyango kuno kushitondo shaghukuyu, ano ngoli kapi nawanako nyango. Weno tetapo shino shitondo shitundepo. Vinke tupu shihepekera livhu nalivhango?' ⁸ ''Makura muruwani wamu shikunino amu limburura weno naku ghamba ashi, 'Muhona, shuva tanko shino shitondo nga shikare po ghure wamwaka ghumwe tupu, ame nganu kayita rutoko nganu yatureko. ⁹ Ano ngoli nkene shi ngaku yima nyango mwaka waku kwamako, ndi, nawa tupu; ano ngoli nkene shi shimpe kwato nyango, ndi ntani ngatu shitetapo nga shitundepo!'''' ¹⁰ Liyuva limwe lya Sabata Yesus kwayendire aka ronge muSinagoge. ¹¹ Pano, palivhango kwakalirepo mukadi ghumwe wakuvera ogho akaliro nampepo yayidona murutu ghure wamwaka murongo na-ntano-na-ntantu. Ghuye kuyenda kuna kurumana kehe pano, kwato kuvhura kuyimana avyu kilire. ¹² Yesus opo akengire ghuno mukadi, makura amu yita ntani amu tantere weno ashi, ''Mukadi, manguruka, weno ghuna veruka ntani ghuvera ghuna tundu mo murutu roye.'' ¹³ Yesus makura akambeke maghoko papendi, mpopo tupu mukadi avyu kiliri kuyimana, makura atapa mpandu naku fumadeka Hompa Karunga. ¹⁴ Ano ngoli mukurona waSinagoge kwagarapa ghunene mukondashi Yesus kwaverulire mukadi muliyuva lya Sabata. Ghuno mpititi aghamba naku tantera mbunga weno ashi, ''Mu shivike kwakara mo mayuva matano-na-limwe ogho vapulitira vantu kuruwana. Muna hepa kuya kuSinagoge muya verure vantu mumayuva ghano, kapi shi muliyuva lya Sabata.''' ¹⁵ Makura Hompa amu limburura weno ashi, ''Anwe vantu vaku vikupaka! Opo muna kara weno, anwe naku vhura shi, kushutura hove yenu ndi shidongi shenu mushi tware kumukuro shikanwe ko mema muliyuva lya Sabata ndi? ¹⁶ Oghuno mukadi nane kapi shi naye mona Abrahamu, ogho amanga weno Satana ghure wamwaka murongo na-ntano-na-ntatu, ghuye ne naku vhura shi kumu mangurura naku mushutura muliyuva lino lya Sabata ndi?'' ¹⁷ Yesus opo amanine kughamba nkango daweno, vana nkore vendi navantje kwakufa ntjoni ghunene, ntani mbunga yavantu avakara naruhafo rwarunene kuviruwana navitetu vyendi vyavinene ovyo aruwanine. ¹⁸ Makura Yesus aghamba weno ashi, ''Ghuntungi wamu liwiru waHompa Karunga ne weni omo wafana ntani kughu fanikita nanke, Ame kuna kumutantera weno ashi wagho kwafana weno? ¹⁹ Ghuntungi waKarunga kwafana yira ntanga yambuto yayididi oyo vakunanga mulivhu mulifuva, makura ngayi kure dogoro nga yikare shitondo shashinene, shashire, shama mpava ghamanene, nadimutavi dadiyingi daku yungira ghunene ntani namahako ghamanene ghamayingi, makura vidira vyakuwiru nga vitunge mo vitunguru vyakughutira maghuta nandyugho dakurara muma mpava namu dimutavi dashitondo. ²⁰ Yesus aghamba nka shimpe weno ashi, ''Ghuntungi wamu liwiru waKarunga ne kughu fanikita nanke? ²¹ Ghuntungi wamu liwiru kwafana yira hingo ndi vifulito vyavisheshu tupu vyaku tura mughutura wakuduva vikuki mposhi ghukare vifulito vyaku yingipita viduva dogoro kuyuda lihemere lya linene." ²² Makura Yesus kwatwikira naruyendo rwendi rwakuyenda kuYerusalemu ntani ghuye kwapita mudi mukunda namudoropa daku kushuva-shuva aronge vantu. ²³ Makura muntu ghumwe amu pura weno ashi, ''Hompa, weno kuna kumoneka ashi vantu vavasheshu tupu ngava vhuro kupura ovo ngava paruko mo ndi?'' Yesus kwamu limburura weno ashi, ²⁴ ''Vya ghushili naku kutantera ashi, kondja ntani kambadara mposhi nga ghungene ghupitire mulivero lya lididi dogoro ngaghu gwaneke mo ghungene munda, mukonda shi, vantu vavayingi ngava kutininika ashi ndi navo ngava pitiremo mulivero lya lididi, ano ngoli kapi ngava gwaneka mo ntani kapi ngava ngena mo munda. ²⁵ Opo ngaya tika nturaghumbo wamu mundi nga shapuka ngaka pateko kulivero, makura anwe ngamu kara pandye yalivero ngamu ngongore kulivero naku yiyira ntani nakughamba weno ashi, 'Hompa, Hompa, tupaturure tungene munda.' ''Ghuye ngamu limburura kumwe naku mutantera weno ashi, 'Ame kapi naku mupaturura mukondashi ame kapi namuyiva ntani kapi nayiva ko oku mwatunda.' ²⁶ "Makura anwe ngamu ghamba weno ashi, 'Atwe kumwe tupu katu lyanga ndya ntani naku nwa kumwe nove kumeho yoye opo kaghu yuvitanga naku ronga Mbudi yaRuhafo mudoropa detu.' ²⁷ ''Ano ngoli ghuye ngamu limburura weno ashi, 'Ame kuna kumutantera weno ashi, 'Ame kapi namuyiva ntani kapi nayiva ko oku muna kutunda. Tundenupo pano palivhango, anwe vantu vavarunde!' ²⁸ Anwe nga mukalira naku kukwetja mayegho opo ngamu kamona Aburahamu, naIsaki, naYakopu, ntani navaporofete navantje vavo kuna kara mughuntungi waKarunga, ano ngoli anwe kuna muvhukumine mukare pandye. ²⁹ Vantu vavayingi ngava tunda kumaruha naghantje kughupumeyuva, naku ghutokero, naku ghumboyera, ntani naku ghucuma, vavo ngava ka shungira kutafura ngava ka dyobwane mughuntungi waKarunga. ³⁰ Anwe yivenu vino vyaweno ashi, vantu vaku pira mfumwa namakuto mbo ngava ka karo na mfumwa kumapundi ghamanene, ntani vantu ovo vana karo namfumwa kumapundi ghamanene paweno, vavo mbo ngava ka karo vakuhulilira mughuntungi waKarunga. ³¹ Kunyima yashirugho shashifupi tupu, vaFarisayi vamwe avaya kwaYesus avamutantere weno ashi, ''Yenda ghutundepo pano palivhango mukondashi Herodesi ove ana kushana - shana aku dipaye.'' ³² Yesus alimburura weno ashi, ''Yendenu muka mutantere ogho mbwawa weno ashi, 'Kenga, ame kuna kuruwana viruwana vyande liyuva lya namuntji nayona ntani ame nganu verura vantu naku tjida mpepo dadidona muvantu navantje naku ruwana vitetu vyavinene, dogoro muliyuva lya ghutatu ame ntani nganu mana naku tikitamo viruwana vyande navintje.' ³³ Ovino vina hepa kutikamo ntani, ame kuna kutwikira naruyendo rwande namuntji nayona napinduko, mukondashi kapi vapulitira kudipayera muPorofete waKarunga pandye yashitata shaYerusalemu. ³⁴ Yerusalemu, Yerusalemu, ove kwadipaya vaPorofete vaKarunga vakare ntani ove kwadipaya namawe vantu ovo vatuma vayuvite mbudi kukoye. Rukando rungapi naya kukoye ashi ndi nganu popere vantu vamu shitata shoye yira momu yapoperanga nkuku vitjiyo-tjiyo vivande mavava, ano ngoli ove kapi walimburukwa. ³⁵ Kenga, weno Karunga kapi nka nga popera ndyugho yoye. Ame kuna kukutantera weno ashi, kutunda pano weno ove kapi nka ngaghu nkenga wangu dogoro mpopo nga shitikamo shirugho opo nganu ka vyuka rukando rwaghuviri ntani ngaghu ghamba weno ashi, 'Muntu walirago ndyeghu waku yenda mulidina lya Hompa ntani namu nkondo daHompa Karunga.'''