¹ Vino kwashorokire muliyuva limwe lya Sabata, Yesus kwayendire mumundi wamukurona wava Farisayi akalye mboroto, ano ngli vantu navantje ndye tupu vana kunomena. ² Kwaku harukako tupu, murume wakudunda maghuru namaghoko ghendi mukonda yaghuvera, kwayimanine kumeho yaYesus. ³ Makura Yesus apura varongi vamatjangwa nava Farisayi weno ashi, ''Vya pulitira vyakuverura muntu muliyuva lya Sabata ndi, ndi Hawe?'' ⁴ Vavo kwamwena teyete. Makura Yesus akambeke maghoko ghendi papendi, mpopo tupu averura, ntani amu tantere aka yende. ⁵ Ghuye avapura weno ashi, ''Opo muna pongo weno are wakupira kupopera monendi, ndi hove yendi nkene shi yayo kuna were mulitope mbyo yina patamene mo muliyuva lya Sabata, waku pira kuyi ghupamo yitunde mo wangu - wangu?'' ⁶ Shimpe nka kwato ogho avhuliro kumu limburura. ⁷ Yesus opo adimburura weno ashi vantu ovo vayitire kushipito vavo kuna toghorora ntani kuna shungira pavipuna vyava kamakuto vyakumeho, ghuye avatantere shifanikito shaweno, ashi, ⁸ ''Nkene shi kuna kuyita ghuyende kushipito shankwara, kapi shi kuka shungire kuvipuna vyakumeho vyava kamakuto, mukondashi vaka makuto kuhulilira kuyatika pashilika dogoro vantu navantje vana yatika - tika kare kuna shungiri. ⁹ Opo ngaya tika nturaghumbo washilika ogho ayito vano vantu navantje vaye kushilika, ghuye ngaku tantera weno ashi, 'Ove tundapo ghutape livhango lyoye kwaghunyoye,' makura ove ngaghu kuyuvha ntjoni ghunene ntani ove ngava kutwara kuruku rwavantu navantje. ¹⁰ Ano ngoli nkene shi kuna kuyita, ghuyende kushilika shankwara ghuna hepa kuka shungira kuvipuna vyaku nyima yavantu, mposhi opo ngaya tika nturaghumbo washilika, ngaku tantera weno ashi, 'Muholi, shapuka yenda ghuka shungire kuvipuna vyakumeho.' Ove ngaghu kawana livhango lya mfumwa kumeho yavantu navantje ove ngaghu ka shungira kumwe navo kutafura. ¹¹ Mukondashi kehe ghuno waku kunene pita mwene ngava ka mudidipita, ntani waku kudidipita mwene ngava ka munenepita naku muyerura. ¹² Yesus kwatantera nka weno ghuno nturaghumbo ogho amu yitiro kushipito ashi, ''Nkene shi kuna kutura shilika nashipito shaku dyobwana ndya, kapi shi kuyita ko tupu vaholi, navantu vamulipata lyoye, nalikoro lyoye, navantu vamaparambo ghoye ntani navantu vavangagho, vaku vhura kutapa kukoye ngava vyute limona lyoye ngaghu wanenemo mfuto yoye. ¹³ Ano ngoli nkene shi kuna kutura po shilika nashipito, ghuna hepa kuyita ko vahepwe, navirema, navantu vavankundi ntani navantu vavatwiku, ¹⁴ makura ove nga ghuwana matungiko ntani nalirago lya linene, mukondashi vantu vaweno kwato vyaku vhura kutapa kukoye ntani kwato ovyo nga ghuwana kukwavo. Ove ngaghu kawana mfuto yoye kwaHompa Karunga, palivhumbuko lya vahungami.'' ¹⁵ Muntu ghumwe ogho ashungiliro kutafura kumwe naYesus opo ayuvire vino vyaweno, ghuye aghamba weno ashi, ''Muntu walirago ndyegho nga kalyo mboroto yamu ghuntungi waKarunga!'' ¹⁶ Ano ngoli Yesus kwamu limburura weno ashi, ''Murume ghumwe kwatulire naku wapayika shipito shashinene makura ayita vantu vavayingi vaye kushipito. ¹⁷ Opo vamana kutapa naku wapayika naku tura ndya pavitafura, ghuye atumu mukareli wendi aka yite vantu naku vatantera weno ashi, 'Weno tuyendenu ngoli kushipito, mukondashi ndya dinapu kuwapayika, weno pavitafura kare dina kara ntani dinapu kare kutapa.' ¹⁸ ''Vantu navantje kwashwena kuyenda kushipito kehe ghuno kwatapa konda yendi navinka vyendi. Muntu wakuhova kwaghamba weno ashi, 'Ame kwaghura lifuva, weno nahepa kuyenda nganu kalimone. Ame kapi nuvhura kumoneka.' ¹⁹ Ghumwe naye aghamba weno ashi, 'Ame kwaghura dyoko ntano navipururo vitano, weno kuna kuyenda nuka deghure hove dande. Kapi nuvhura kumoneka.' ²⁰ ''Ntani murume ghumwe naye kwaghamba weno ashi, 'Ame ntantani tupu kanu wana lipata namugholikadi nankwara, ame kapi nuvhura kumoneka.' ²¹ ''Makura muruwani aka vyuka aya tantere muhona wendi navintje ovyo vaka ghambire. Makura muhona agarapa ghunene ntani atantere muruwani wendi weno ashi, 'Kwangura weno kayende mundyira namu vitaghura vyamu shitata kayite vantu navantje vahepwe, navirema, navatwiku ntani navantu vavankundi.' ²² ''Muruwani atantere muhona wendi weno ashi, 'Muhona, ovino ghuna kughamba tuna viruwana kare, ano ngoli shimpe mavhango mayingi ana huparoko.' ²³ ''Muhona atantere nka mukareli wendi weno ashi, 'Kayende kudimukunda daku ghure dadi didi namu ndyira daku ghure dadi didi naku makwina ghaku ghure ghamadidi ntani naku mavhango ghaku ghure naghantje kayite vantu navantje, vaya ghupe ghano mavhango nandyugho ntani nankonda dino damuporongwa. ²⁴ Ame kuna kumutantera weno ashi, ovano vantu vahovire kuyita kushipito navantje, kwato ogho nga makeroko kuno kundja dashipito shande.'' ²⁵ Shirugho shino mbunga yayinene kuna kuyenda yi kwame Yesus, makura ghuye apiruka atantere mbunga weno ashi, ²⁶ ''Kwato muntu wakuya kukwande ghuye nga pire kunyenga vashe, navawina, namukamali wendi, navana vendi, namughunyendi ndi mukurwendi, ntani nka ghuye kuna hepa kukara nashihoro shashinene shaku kwande ntani ana hepa kunyenga liparu lya mwene, ntani nga vhura kukara murongwa wande. ²⁷ Kehe ghuno wakupira kudamuna shikuruse shendi mwene, muntu waweno kapi alimburuka kunkango dande ntani ghuye naku vhura shi kukara murongwa wande. ²⁸ Muntu nkene shi kuna kushana kutunga litungo lyalire lya linene, shakuhova ghuna hepa tanko kushungira ghukona - kone vihepwa navintje ovyo ghuna hepa kugwanitapo dogoro navintje vikarepo ntani vina tikiliremo, ove ghuna yiva nawa-nawa ashi viruwanita navintje vina tikilirimo ntani ghuna yina nka ashi lino litungo nga lipwa kudika. ²⁹ Nkene shi, kapi ghuna kuruwana vyaweno, tupu nga ghutameka kutunga kuntji litateko ashi ndi litungo liyimane litameke kukura mpopo tupu viruwanita vyoye navintje kare kavipupo ove wahana kumana kudika litungo lyoye nalintje, makura vantu navantje opo ngava mona vyaweno vavo ngava kushepa, ³⁰ naku kughamba mwamudona weno ashi, 'Kengenu oghuno murume ghuye kwatateka tupu kutunga litungo lyendi ano ngoli vina muvhuru muku tunga nga mane litungo lyendi.' ³¹ Ntani nka Hompa, nkene shi kuna kuyenda kuvita aka rwe na Hompa ghunyendi, pakuhova ana hepa kukuwapayika: kushungira namatimbi navakurona vavakavita ntani navatapi maghano vendi vakona - kone naku wapayika navintje ntani vayive ashi shino shivaro shava kavita vendi vano mayovi murongo ne vavo kuvhura kurwanita ngava funde shivaro shavakavita vakutika kumayovi dimurongo mbiri kumwe naHompa wavo ndi? ³² Ano ngoli nkene shi Hompa kuna yiva ashi kapi nga vhura kufunda vita vyaweno, ghuye kuna hepa kuruwana vino, tupu nga mona ashi vana nkore vendi shimpe kughure vana kara ana hepa kutumako vantu vendi vayende kukwavo vakaghambe naku turapo mbili. ³³ Nanwe mo ngoli, kehe ghuno wakupira kushuva limona lyendi, ghuye naku vhura shi kukara murongwa wande. ³⁴ Mungwa ghuwa ntani wawapa kare, ano ngoli nkene shi mungwa kuna hamupara, kughu ruwana weni mposhi ngaghu kare shimpe nankondo yira momu wahovire kukara pakuhova? ³⁵ Mungwa waweno kwato nka mulyo ntani kwato nka hepero yaku ghutura mulivhu namu lifuva ashi ghukare yira rutoko. Hasha tupu kughu vhukuma. Kehe ghuno akaro namatwi ghakuyuvha, ayuvhe naku kwata lighano.''