¹ Pa ruvede runo vafutiti mutero ntani navantu vandyo vavayingi kwayire kwaYesus vaya terere kumarongo ghendi. ² Makura Farisayi navarongi vamatjangwa avatameke kughamba naku vhunguta weno, ashi, ''Oghuno murume kuna kutambura vantu vandyo ntani ghuye kuna kulya ndya kumwe navo.'' ³ Makura Yesus kwatantera vantu shifanikito shaweno ashi, ⁴ ''Opo muna kara anwe omo mumbunga yenu, nkene shi ove kwaweka Ndywi lifere, makura Ndywi yimwe yika kombane muwiya, kapi ngaghu shuva dino Ndywi dimurongo muvyu namuvyu, ove ngaghu yende ghuka shane yino Ndywi yimwe tupu oyo yina ka kombano muwiya dogoro ngaghu ka yiwane ndi? ⁵ Opo ngaghu kayi wana yino Ndywi yaku kombana, ove ngaghu ka yidamuna ngaghu yiku kambeke pamapepe ghoye ngaghu yitware kumundi ntani ove ngaghu kara naruhafo rwarunene. ⁶ Opo ngaya tika mumundi wendi, ghuye nga yenda ngaka yita vaholi vendi navantu vamaparambo vendi, ghuye ngava tantera weno ashi, 'Yenu kukwande tuya dyombwane kumwe, mukondashi Ndywi yande oyo yakombanino weno naka yiwana.' ⁷ Ame kuna kumu tantera weno ashi, vantu vamu liwiru navantje navo ngava kara naruhafo rwarunene, muku hafera muntu ghumwe tupu wandyo, nkene tupu kuna kushighura atjindye ghukaro wendi nga shayeke kuruwana ghurunde, kupitakana vantu dimurongo muvyu namuvyu vavahungami vaku pira kuhepa kushana kutjindja ghukaro. ⁸ Ndi po nkene shi mukamali kuna kara navisiliveli murongo vyamu waya-waya, makura siliveli yimwe tupu ngayi kombane po? Vinke nga vhura kuruwana mukadi? Ghuye nga tweda ramba yitape ghukenu mundyugho, ntani nga tameka kukwera mundyugho nayintje, nga shana-shane siliveli yendi dogoro nga yiwane? ⁹ Opo nga wana siliveli yendi, makura nga yita vaholi vendi navantu vamaparambo vendi, ngava tantere weno ashi, 'Yenu kukwande tuya dyombwane kumwe tupu, mukondashi siliveli yande oyo yakombanino, nayiwana.' ¹⁰ Ame kuna kumutantera nka, weno ashi, 'Mukatji ka mbunga yava Engeli vaKarunga navo ngava kara naruhafo rwarunene, nkene shi muntu ghumwe tupu wandyo kuna kushighura atjindye ghukaro wendi ashayeke kuruwana ghurunde.'' ¹¹ Ntani Yesus avatantere nka, weno ashi, ''Pa kalire murume ghumwe ogho akaliro navana vendi vavamati vaviri, ¹² monendi wamwanuke ayendi kwavashe aka ghamba weno ashi, 'Vava, mpenu ruha rwalimona lya ghupingwa wande.' Makura shavo aghupu limona lyendi ali gaghununa mukatji atapa kuvana vendi vaviri kehe ghuno awana ruha rwendi. ¹³ Kuruku rwamayuva ghama sheshu tupu, monendi wamwanuke aghupu limona lyendi nalintje makura ashapuka ayende kuvirongo vyaku ghure, nko aka tungire, makura ghuye aka hepeka limona lyendi nalintje. ¹⁴ Opo lya pwire limona lyendi nalintje makura mushirongo kwaya mo lirumbu lya linene, makura mumati akara muruhepo rwarunene. ¹⁵ Makura ayendi aka shane viruwana kwamuntu wamomo mushirongo, ghuye aka mutura akare muruwani waku tapa ndya kuvinguru vyendi. ¹⁶ Mumati kwakalire muruhepo rwarunene makura naye ashana kulya mutjeke-tjeke nandya davinguru, ano ngoli kwato ogho adi munukitiro. ¹⁷ Kuruku rwashirugho makura mumati kwavhuruka naku ghamba, weno ashi, 'Vavava kwakara navaruwani vavayingi ghunene ntani nka vavo kehe liyuva kulya ndya vakute, ano ngoli ame ghuno nafano weno, kuna kufa kundjara! ¹⁸ Ame kuna kushapuka weno nganu tundemo muno mushirongo nganu vyuke kuva vava, ame nganu kava tantera weno ashi, 'Vava, ame kwadyona kukwenu ntani naku kwaKarunga wamuliwiru. ¹⁹ Ame kapi nka nahungama ashi nganu kare, monoye; weno renka tupu ngoli name nganu kare ghumwe wavaruwani voye.''' ²⁰ Makura mwanuke wamumati kwashapuka mpopo atundemo mushirongo avyuke kuvashe. Mumati ghuye shimpe kughure ana kara, vashe avamu mono kuna kuya, vavo kwamu fera nkenda ghunene, ntani avaduka vayende kwamonendi avakamu kwata namaghoko maviri kumwe naku mucumita pashipara shendi vamu shamberere. ²¹ Mumati atantere vashe weno ashi, 'Vava, ame kwadyona kukwenu ntani naku kwaKarunga wamuliwiru. Ame kapi nahungama nka ashi nganu kare monoye.' ²² "Ano ngoli vashe kwatantera varuwani vendi weno ashi, 'Kwangurenu mukayite lirwakani lya lipe, mumudwateke, ntani mudwatekenu linga kunyara yendi, ntani mudwatekenu nkanu kumpadi dendi. ²³ Ntani kayitenu ntana yaku kulyera yaku neta muya yidipaye. Mposhi ngatu dane shipito shendi shaku dyombwana! ²⁴ Mukondashi monande ogho afiro, weno ana moneke kuna kuparuka. Ntani monande kwakombanine, weno ana moneke.' Makura avatura shipito shendi vadyobwane. ²⁵ ''Ano ngoli monendi wamukondi ghuye kwayenda muwiya aka ruwane. Opo aya tikire papepi namundi, ghuye kwayuvha tupu vantu mumundi kuna kuyimba ntjumo vadane. ²⁶ Makura ghuye kwayita muruwani wavashe ghumwe amu pura weno ashi vinke vina kushoroko mo mumundi wetu. ²⁷ Muruwani alimburura weno ashi, 'Mu ghunyoye wamwanuke ogho akombanino weno ana kavyuka mpwali mumundi, makura vasho mbyo vana dipaya ntana yaku kulyera yakuneta vadane shipito mukondashi ghuye kuna ka vyuka kumundi wandyewa-ndyewa.' ²⁸ ''Monendi wamukondi kwagarapa ghunene opo ayuvha vyaweno ntani nka kapi ashanine kungenamo mumundi, makura vashe avarupuka avaya kukwendi vamu shengawide. ²⁹ Monendi wamukondi kwatantera weno vashe ashi, 'Terera, ame kwakuruwanena mwaka dadiyingi ghunene, ntani kapi navaka kehe shino mumundi ghoye ntani ame kwalimburukwa kuveta doye nadintje, ano ngoli ove kwato osho watapa kukwande, nampili shimpendye ashi ndi name nudyobwane shipito nava ghunyande, ³⁰ ano ngoli monoye ogho atjwayuko kare-kare mumundi ghuye mbyo aka hepeka naku dyonaghura limona lyendi kuvakadi varukeshe, weno mbyo ana ka vyuka kumundi, ove mbyo ghuna dipaya ntana yaku kulyera yakuneta ghudane shipito shendi.' ³¹ ''Vashe kwalimburura monendi naku mutantere weno ashi, 'Monande, ove kwakara mumundi wande ntani ove kwakara name, ntani limona lyande nalintje olyo naweka ne lyoye tupu. ³² Vyaweno vina hungama ntani vina wapa tupu mukuturapo shilika shamu ghunyoye wamumati mposhi tudyobwane nakupembura kumwe, mukondashi mughunyoye kwafire, ano ngoli weno ana kara namonyo kuna kuparuka; ntani ghuye kwakombanine, ano ngoli weno ana moneke.''