¹ Ntani Yesus atantere nka varongwa vendi weno ashi, ''Pa kalire murume ghumwe wamungagho ogho akaliro nalirenga lyendi, makura vantu avaka rapota lirenga kwamuhona wendi ashi lino lirenga lyoye kuna kuhepeka naku hanaghura limona lyoye. ² Makura muhona ayita lirenga lyendi kumbara naku lipura weno ashi, 'Vinke nka ovino naku yuvha vyaku hamena kukoye? Kutunda pano pongeka ntani varura limona lyande nalintje olyo natapa kukoye, mukondashi ove kapi nka ngaghu kara mukungi walimona lyande.' ³ ''Lirenga kwakupura weno ashi, 'Weni omo nu ruwana, nkene shi muhona wande kuna kuntjida muviruwana vyande? Ame kwato nkondo daku lima mulifuva ntani ntjoni mukurombaghera ndya kuvantu. ⁴ Weno ame nayiva ashi weni omo nganu ruwana, kumeho yaku renka ashi muhona wande ngaka ntjide mo muviruwana vyande, mposhi vantu kapi shi ngava ka ntjide mumandi ghavo.' ⁵ Makura lirenga kwayita vantu navantje ovo vakaro namakongo ghamuhona wendi, ghumwe-ghumwe, naku vapura weno ashi, 'Makongo ghaku hura kuni ogho walya kwamuhona wande?' ⁶ Ghuye kwalimburura weno ashi, 'Makende ghamaghadi lifere.'' Lirenga mpopo kwamutantera weno ashi,' Ghupa wangu mbapira yoye yamakongo, dongononapo oyo ndando yina karomo ntani tjangamo makende dimurongo ntano.' ⁷ Ntani lirenga kwayenda aka pura waku kwamako weno ashi,' Makongo ghaku tika kuni walya kwamuhona wande?' ''Ghuye kwalimburura weno ashi, 'Ntjako darukokotwa lifere.' Ghuye kwamutantere weno ashi,' Ghupa mbapira yoye yamakongo, tjanga mo ntjako dimurongo ntano nantatu.' ⁸ Makura muhona wendi opo ayuvire yino mbudi kwapandayika lirenga lyendi lya vimpempa namandungwa-ndungwa mukondashi lyalyo kwaruwanine nandunge. Ame kuna kumutantera weno ashi, vantu vamu ghudyuni kwakara nandunge daku ruwana navantu vamu ghudyuni, kupitakana vantu vavahungami ovo vakaro ramba yamuno mughudyuni. ⁹ Ame kuna kumu tantera weno ashi, ruwanitenu limona lyenu lya kupire kuhunga lya muno mughudyuni mposhi ngamu wane vantu ngava kare navaholi venu vamuno mughudyuni, mpo ngoli ashi opo nga lipwa limona lyenu vaholi venu navo ngava ka mutambure mumandi ghavo ghamu liparu lya naruntje-na naruntje. ¹⁰ Kehe ghuno waku huguvara nalimona lya lisheshu, ghuye kuvhura tupu nka kumu huguvara nalimona lya liyingi, ntani muntu waku pira kuhuguvara nalimona lya lisheshu, ghuye kwato kumu huguvara nampili nga wane limona lya liyingi. ¹¹ Nkene shi ove kwato lihuguvaro lyaku ruwanita limona lya muno mughudyuni lyaku pira mutompo, are waku kuhuguvara ashi nga kupe nove nga ghukare nalimona lyoye lya kupongoka lyaku karererapo? ¹² Nkene shi ove kapi wayiva kupakera mbili limona lya vantu, kuni nga tunda muntu ogho ngaku huguvaro ashi nga kupe limona nove nga ghukare naghushwi? ¹³ Kwato muntu waku kara navahona vendi vaviri, mukondashi ghuye nga horapo ghumwe ntani nga nyenga po ghunyendi, ndi po ghuye nga pakera shinka nambili yayinene kwaghumwe ntani ghunyendi kapi ngamu pakera mbili nashinka. Nanwe nka shi naku vhura shi kushana naku karera Hompa Karunga ntani nalimona.'' ¹⁴ Ano ngoli vaFarisayi, kwaholire ghunene vimaliva, opo vayuvire vyaweno, vavo kwamu shepa ghunene. ¹⁵ Yesus avatantere weno ashi,'' Anwe kwahora kumoneka kuvantu ashi kwahungama, ano ngoli Karunga kwayiva ntani kukenga navintje vyamu munda yamu dimutjima denu. Anwe yivenu vino ashi kehe vino vapandayikanga navi vafumadeka ghunene vantu ashi kwakara namulyo, Hompa Karunga kwavinyenga ghunene. ¹⁶ Veta odo atapire Hompa Karunga kwaMoses nava Porofete kwadi yuvita shirugho nashintje dogoro kwaya shayera paYohanesi muyoyi. Kutunda papendi, makura Mbudi yaRuhafo yaghuntungi waKarunga ndyo vana kuyuvita dogoro weno, makura vantu navantje mbyo vana kukondja naku duka nankondo ashi navo vangene mo. ¹⁷ Ano ngoli liwiru nalivhu ngavi ka tundapo naghureru, ano ngoli kuveta yaKarunga kwato nkango nashikomona osho ngashi ka tundoko dahana kutikiliramo nadintje. ¹⁸ Kehe ghuno waku shwena mukamali wendi nga yende ngaka kware mukamali wapeke ghuye kuna kushondera ntani kuna dyono, ntani kehe ghuno waku kwara mukamali ogho ashuva mukafumu wendi naye kuna kushondera ntani kuna dyono. ¹⁹ ''Ntani pakalire murume ghumwe wamungagho ghuye ka dwatanga marwakani ghamakenu ghaku vembera ghandiro ntani ghuye ka karanga naruhafo kehe liyuva ntani ka parukanga nawa kehe liyuva ghuye mbyo aku tumba ghunene mukondashi ghuye kwaweka limona lya liyingi. ²⁰ Ntani pakalire murume ghumwe wamuhepwe lidina lyendi Lasarusi ghuye ka shungiranga naku rara kehe liyuva palivero lya ghuno muntu wamu ngagho, ntani ghuye kwakalire navimburu murutu rwendi naruntje, ²¹ ghuye ka fanga ndjara ntani ka shananga kehe pano kulya ndya dakuwa kutafura yamungagho. Nampili mbwa nado kadi yanga diya peshe vimburu vyaparutu rwendi. ²² Opo shatikamo shirugho ghuno murume wamuhepwe afu makura vaEngeli avaya mushimbi avamutwara aka shungire mulivhango lya Aburahamu. Ntani murume wamu ngagho naye afu ghuye avamu vhumbiki, ²³ murume wamungagho weno kuna kara mushirongo shavafe, mushirongo sharunyando naghupyakadi, makura akankuka shipara, mantjo ghendi agha kenge Aburahamu kuna kara kughure ntani Lasarusi kuna shungiri mulivango lyendi. ²⁴ Ghuye kwalira naku yiyira naku ghamba weno ashi, 'Vava Aburahamu, mfere ko nkenda, tumako Las arus, aye kuno adove nyara yendi mumema ature paruraka rwande, mukondashi ame kuna kara mumundiro, kuna kupya.' ²⁵ ''Ano ngoli Aburahamu amu tantere weno ashi, 'Monande, vhuruka ashi ove kwaparukira nawa opo wakalire namonyo, ntani Lasarusi kwaparukire liparu lya lidona. Ano ngoli paweno Lasarusi kuna kuya pwiyumuka okuno ana kara weno, makura ove mbyo ghuna kumona ghudito naghupyakadi. ²⁶ Ntani nka kughupako navintje vyaweno, Hompa Karunga kwaturapo limpompa lya linene pakatji ketu lyaku kara weno ashi, atwe vaku ruha runo nampili kuna shana ashi tuvindakane tuye kukwenu, kwato kupita ntani naku vhura shi ntani nanwe nka mushikwavo kwato kuvindakana muye kuno kukwetu.' ²⁷ ''Murume wamungagho aghamba weno ashi, 'Vava Aburahamu, ame kuna kushungida naku kanderera kukoye, tuma Lasarusi ayende kumundi wava vava - ²⁸ mukondashi ame kwakara navaghuni vande vatano vavarume - mposhi ngaka vatantere kumwe naku varondora, mposhi ngava pire kuya kuno kushirongo sharunyando naghupyakadi.' ²⁹ ''Ano ngoli Aburahamu amu limburura weno ashi, 'Vavo kwakara nankango daHompa ntani veta daKarunga odo atjanga Moses ntani nava Porofete vakare; vana hepa kudi yuvha vadi limburuke naku ditikitamo.' ³⁰ "Ano ngoli murume wamungagho kwalimburura weno ashi, 'Hawe kapi shi mo ngoli, Vava Aburahamu, nkwandi nga tunde ghumwe kuno kushirongo shavafe ngaka vatantere naku varondora, ndi ntani ngava yuvha mposhi ngava kushighure.'' ³¹ Ano ngoli Aburahamu amu limburura weno ashi, 'Nkene shi kapi vana kuyuvha naku limburuka kunkango naveta odo atjanga Moses nava Porofete vakare, nampili muntu nga tunde kuno kushirongo shava fe kapi ngava kamu terera ntani kapi ngava tjindja ghukaro wavo.'''