¹ Yesus kwatantera weno varongwa vendi ashi, ''Vantu vavayingi ngava gwanekera namasheteko ghamayingi ghaku kushuva-shuva makura ngava punduka ngava ture ndyo, ano ngoli muntu ogho nga yito masheteko ghaweno kuvantu ngava punduke mo ngava ture ndyo, ghuye nga kara nalihudi lya linene kuviruwana vyendi vyaweno! ² Muntu waku fana weno hashako tupu nkene shi kumu manga namawe ghamanene muntingo yendi makura kukamu vhukumina mulifuta palitondo, nkene tupu arenkita muntu walipuro lya lididi nga punduke nga ture ndyo. ³ Wapekenu ma ghukaro ghenu. Nkene shi ghunyoye kuna tura ndyo, ghuna hepa ntani kumuharukira naku mushwenena kuruwana ghurunde, ano ngoli nkene shi ana tambura lipuko lyendi ghuye mbyo ana kushighura, ghuna hepa ntani kumu ghupirapo pandyo dendi. ⁴ Nkene shi ghunyoye kuna dyono kukoye rukando rutano naruviri muliyuya, ntani ghuye mbyo anaya kukoye ashungide lighupiropo lya ndyo dendi rukando rutano naruviri muliyuva, nga ghambe weno ashi, 'Ame nadyono kukoye hewa, ngupirepo pandyo dande, kapi nka nganu ruwana vyaweno, ove ghuna hepa ntani kumu ghupirapo pandyo dendi!'' ⁵ VaApositoli kwatantera Hompa weno ashi, ''Vhukita naku wederera lipuro lyetu. ⁶ Ano ngoli Hompa kwava tantera weno ashi, ''Nkene tupu ngamu kara nalipuro lyaku tika pantanga yayididi, anwe ngamu tantera shino shitondo shaghunyandi weno ashi, 'Tapurukapo pano tundapo, yenda ghuka mene mulifuta, shino shitondo ngashi limburuka kunkango denu. ⁷ Opo muna kara omo mumbunga yenu, nkene shi muruwani ghoye ntantani tupu ana kuya tika mumundi aka tunde kumafuva kuna kapurura ndi po kuna yendi murufo aka kunge ndywi doye muwiya, nkene shi ghuye anaya tiki mumundi weni omo ngaghu ghamba kukwendi? Kapi ngaghu ghamba weno ashi, 'Kwangura ko ghuye kuno wangu, ghuya shungira ghulye ndya doye dinapu kare kuwapayika'? ⁸ Nane ngoli, ove ghuna hepa kutantera muruwani ghoye weno ashi, 'Yenda ghuka dwateko vyuma vyavikenu ghutameke kuwapayika ndya dande damu rarero ame kuna shana kulya ndya dande naku nwa weno. Opo nu mana ntani nove ghughupa ndya doye ghutameka kulya nakunwa? ⁹ Kapi vyahungama vyaku tapa mpandu kwamukareli ghoye mukondashi ghuye kuruwana atikitamo shiruwana shendi, osho shamu tumbukiro? ¹⁰ Nampili natwe shi varongwa vendi mo ngoli, kapi twa hepa kuwana mpandu yaku viruwana vyetu, nane ngoli atwe kuruwana vino muku tutikitamo shitumbukira shetu osho vatapa kukwetu, ntani atwe kughamba weno ashi, 'Atwe vakareli vaHompa ntani kapi twa hepa mpandu yavantu mukonda yaviruwana vyetu. Atwe kuruwana vyaweno tutikitemo shiruwana shaHompa.'' ¹¹ Yesus navarongwa vendi mundyira vana kara kuna kuyenda kuYerusalemu, vavo kwapitire mukatji ka virongo viviri muSamariya naGalileya. ¹² Opo vangenine mumukunda ghumwe, vavo kwagwanekera navarume murongo vavingondwe. Vavo kwayimanine kughure naYesus, ¹³ makura avayiyiri naliywi lyaku dameka, vaghambe weno ashi, ''Hompa Yesus, tufere ko nkenda.'' ¹⁴ Yesus kwapiruka mpopo kwakenga kukwavo, ghuye kwava tantera weno ashi, ''Kayendenu muka moneke kuva Pirisiteli vaka mukenge." Vavo shimpe kuna kuyenda mundyira yavo mpopo tupu kwaveruka vana kushuka parutu. ¹⁵ Ano ngoli oghuno ghumwe po tupu amonine ashi ghuye kuna veruka ntani kuna kushuka parutu, mpopo tupu kwapiruka kwavyuka, ayende kwaYesus ghuye kuna kara naruhafo kwatameka kuyimba naku panda naku tanga ashamberere Hompa Karunga liywi lya linene. ¹⁶ Ghuye kwayenda dogoro aka kugandera kumpadi daYesus, aka tapa mpandu kukwendi. Ghuno murume kwatunda kuSamariya. ¹⁷ Makura Yesus avapura weno ashi, ''Nane kapi shi vantu murongo ovo vana veruko? Ovano vantu muvyu ne kuni nko vana kara? ¹⁸ Kuna kumoneka ashi ndye ghuno tupu muntunda virongo, ndye tupu ana ka vyuko aya tape mpandu naku fumadeka Hompa Karunga?'' ¹⁹ Yesus amu tantere weno ashi, ''Shapuka ghuka yende. Lipuro lyoye lina kuverura." ²⁰ Liyuva limwe vaFarisayi vamwe kwayendire kwaYesus vaka mupura weno ashi ruvede munke nga ghuya ghuntungi waKarunga, Yesus kwalimburura naku vatantera weno ashi, ''Ghuntungi waKarunga opo nga ghuya kapi ngaghu moneka kuvantu ashi weno ghunaya tiki. ²¹ Vantu kapi ngava ghukenga ngava ghambe weno ashi, 'Kengenu kuno, mpo ghuli pano! ntani, 'Mpo ghuli kunya!' Tererenu nawa, ghuntungi waKarunga mpoghuli kare mumwenu.'' ²² Yesus kwatantera varongwa vendi weno ashi, ''Mayuva kuna kuya ntani papepi ana kara opo ngamu shana ashi ndi mukare kumwe name ntani ndi ngamu kenge Mona Muntu, ano ngoli kapi nga vishoroka. ²³ Vantu ngava mutantera weno ashi, 'Tererenu kuno, Mona Muntu mpwali kunya!' Tererenu kuno, Mona Muntu mpwali kuno! Opo ngava ghamba vyaweno kapi shi ngamu vipure ntani kapi shi ngamu yendeko, ²⁴ mukondashi nkene shi ruvadi kuna tema kuliwiru kuruha rumwe tupu, maruha naghantje ghaku liwiru kutema kukara mughukenu dogoro nkoko lya katwa liwiru, ntani vantu navantje kukara mushite sharuvadi, mo ngoli nga vishoroka: opo nga moneka Mona Muntu rukando rwaghuviri muliyuva lyaku hulilira, kehe ghuno ngamu kenga namantjo ghendi. ²⁵ Kumeho yaku shoroka vyaweno, ghuye nga gwanekera narunyando dogoro vantu vamu ghudyuni navantje ngava tunde kukwendi. ²⁶ Kumeho nga moneka Mona Muntu rukando rwaghuviri ngavi shoroka yira momu tupu vyakalire mumayuva ghaNowa. ²⁷ Vantu ngava hokwa kulya, nakunwa, nankwara ntani naku dana vipito vyankwara, dogoro mpopo lya tikamo liyuva lya Nowa nalikoro lyendi vakaronde muwato waghunene - kuruku ntani ngoli runa kuya ruhandyo rwamema ghamayingi makura kwadipaya vantu navantje. ²⁸ Ntani nka, yira momu tupu vyashorokire muruvede rwaLote mushirongo shaSodomu - vantu vavo kuna kudyobwana, nakunwa, naku ghura, naku ghulita, naku tapeka ntani naku tunga ndyugho. ²⁹ Muliyuva lino Lote kwatundamo mushirongo shaSodomu, makura mundiro wakuroka namawe ntani namungwa kwatunda muliwiru ntani kwaroka dogoro kwadyonaghura shitata nashintje. ³⁰ Mo ngoli nga vishoroka ntani mo nga vikara opo nga moneka Mona Muntu shikando shaghuviri vantu ngava kara kwato ovi vana yivako ntani ngava kuvhurama. ³¹ Opo nga litikamo lino liyuva kehe ghuno nga karo pawiru napandye yandyugho kapi shi nga yende mo munda yandyugho ngaka shimbemo kehe shino, ntani navo ngava yendo vakalime kulifuva kapi shi ngava ka vyuke ko kumundi ashi ngavaya shimbeko kehe shino. ³² Vhurukenu ovi vyashorokiro kwamukamali waLote. ³³ Kehe ghuno waku popera monyo wendi ngaghu kombanita, ntani kehe ghuno waku tapa naku kombanita monyo wendi ngaghu pungura ntani ngaka paruka. ³⁴ Ame kuna kumu tantera weno ashi, vantu vaviri ngava rara paghuro ghumwe tupu. Muntu ghumwe ngava mughupapo ngava mutwara, ntani ghumwe nga huparapo.'' ³⁵ Vakamali vaviri nga vatwa mahangu mushinu shimwe tupu. Ghumwe ngava mughupapo ngava mutwara, ntani ghumwe nga huparapo.'' ³⁶ Ntani vantu vaviri ngava kara mulifuva; ghumwe ngava mutwara ntani ghumwe nga kara." ³⁷ Varongwa vendi avamupura weno ashi, ''Kuni nko oku ngavi shorokera vyaweno, Hompa?'' Yesus kwava limburura weno ashi, ''Kehe kuno ngaku karo lirambo lya shikorama shakufa, kutanta ashi vidira vyamakuvi nkoko nko ngavi ponga nga vilye nyama.''