¹ Makura Yesus kwatantera varongwa vendi shifanikito shaweno ashi vavo vana hepa kuraperera kehe pano muvirugho navintje ntani kwato kudomba dimutjima vakare kuna dwapa, ² ghuye kwava tantera weno ashi, ''Mu shitata shimwe kwakaliremo mupanguli ghumwe waku pira kutjira Hompa Karunga ntani ghuye kapi afumadeka vantu. ³ Ntani mushitata kwakalire mo mukadi wakufita vyendi, ogho ka yendango kehe pano kwamupanguli aka ghambe weno ashi, 'Pangura ghuno ghudito wakaro mukatji ketu navantu ovo naku dyona navo.' ⁴ Kwapitapo shirugho shashire ghuno mupanguli kwashwena kuterera naku pangura ghuno ghudito, dogoro kunyima yamayuva ghangandi mupanguli kwakupura mwene weno ashi, 'Na mpili momu napira kutjira Hompa Karunga ntani kapi nafumadeka vantu, ⁵ ghuno mukadi wakufita vyendi kuna kuntininika ntani kuna kundyuvita kukora kumutjima, weno kuna kupangura ghudito wendi ngaghu tundepo, mposhi kapi shi ngaye kukwande kehe liyuva nga rorore monyo wande.''' ⁶ Makura Hompa avatantere weno ashi,'' Tererenu kwaghuno mupanguli wamudona omo ana kughamba. ⁷ Makura ne weni omo nga pira kupopera Karunga vantu vendi ovo atoghorora nkene shi vavo kuna kuraperera naku lira naku shungida kukwendi matiku namwi? Ghuye kwakara nalididimiko kuvantu vendi? ⁸ Ame kuna kumu tantera weno ashi ghuye nga kwangura kuruwanena ghuhunga vantu vendi. Nkene mo ngoli, opo ngaya tika Mona Muntu shirugho shaghuviri, vyaghushili ngaya wanamo vantu valipuro omuno mughudyuni ndi?'' ⁹ Makura Yesus kwatantera vantu shifanikito shaweno ovo vaku mono vavene ashi vavo kwahungama mbyo vadina naku shentja vaghunyavo, ghuye kwava tantera weno ashi, '' ¹⁰ Vakafumu vaviri kwayendire vakanduke KuYerusalemu muNtembeli vaka raperere - ghumwe muFarisayi ntani ghumwe mufutiti mutero. ¹¹ Murume wamu Farisayi kwashapuka ayimana makura araperere weno ashi, 'Hompa Karunga, ame kuna kukupandura ove mukondashi ame kapi nafana yira vano vantu vaweno - vawidi, varunde, varushonda - ntani kapi nafana yira ghuno mufutiti wamutero. ¹² Ntani ame kuraperera ndapero yaku dililira rukando ruviri mushivike. Ntani ame kutapa vitwa murongo vyaku tunda kulimona naku viwana mo vyande.' ¹³ Oghuno Mufutiti wamutero, ghuye kwayimanine kughure, ghuye kapi akankuka akenge kuliwiru, ano ngoli ghuye kwakukwata lighoko lyendi panturo yendi, aghamba weno ashi, 'Hompa Karunga, mfereko nkenda, dongononapo ndyo dande, ame muntu wamurunde.' ¹⁴ Makura Yesus kwaghamba weno ashi, mufutiti wamutero kwadongononapo ndyo dendi mukondashi ghuye kwaruwanine ghuhunga kushipara shaKarunga, kapi shi murume wamufarisayi, mukondashi kehe ghuno waku kuyerura mwene ngava mudidipita, ntani waku kudidipita mwene ngava ka muyerura.'' ¹⁵ Liyuva limwe vantu kwayita vanuke kwaYesus ashi ndi avakambeke maghoko naku vatungika, ano ngoli varongwa vendi opo vamonine vyaweno, avava shweneke naku vatjida. ¹⁶ Ano ngoli Yesus kwayita vanuke vavadidi vaye kukwendi, ntani aghamba weno ashi, ''Shuvenu vanuke vavadidi vaye kukwande, ntani kapi shi muva shweneke. Ghuntungi waKarunga kwahamena kukwavo. ¹⁷ Ame vyaghushili naku mutantera weno ashi, kehe ghuno waku pira kukudidi pita akare yira mwnanuke wamudidi, kapi ngaka ngena mo mughuntungi waKarunga.'' ¹⁸ Mukurona ghumwe wava Yuda kwapura Yesus weno, ashi, ''Murongi wamuwa, vinke nganu ruwana mposhi name nganu kawane monyo wanaruntje? '' ¹⁹ Yesus amu limburura weno ashi,'' Mukonda munke ghuna kughambera weno ashi ame murongi wamuwa? Kwato muntu wamuwa waku hungama, nkwandi Karunga ahuru. ²⁰ Yesus aghamba weno ashi, ove wayiva vipango vyaKarunga navintje vyaweno - kwato kushondera, kwato kudipaya muntu, kwato kuvaka, kwato kurundira muntu, fumadeka vasho navanyoko.'' ²¹ Murume atantere Yesus weno ashi,'' Ame kwalimburuka naku tikitamo vino vipango navintje kutunda kuwanuke wande.'' ²² Yesus opo ayuvire nkango dendi daweno, ghuye amu tantere weno ashi, ''Ove ghuna hepa kuruwana shininke shimwe osho wapira kuruwana. Yenda ghuka ghulite limona lyoye nalintje ovyo waweka makura ghuka tapera vimaliva kuvantu vavahepwe, mposhi ove ngaghu kawana limona lya kupongoka lyamu ghuntungi wamu liwiru - makura ove nga ghuye ngaghu nkwame ngaghu kare murongwa wande.'' ²³ Ano ngoli ghuno murume opo ayuvire nkango daweno, ghuye kwaguva ghunene, mukondashi ghuye kwaweka limona lya liyingi ghunene. ²⁴ Yesus opo amonine ghuno murume kuna guvu ghunene makura aghamba weno ashi, "Vantu vakuweka limona lya liyingi ghudito ghunene kukangena mughuntungi waKarunga wamu liwiru! ²⁵ Ngamero ghureru kungena yipite mulintjo lya ntonga, kupita kana muku renka ashi muntu wamungagho ngaka ngene mughuntungi waKarunga wamu liwiru.'' ²⁶ Makura vantu ovo vayuviro dino nkango daYesus avamupura weno ashi, ''Nkene shi mo ngoli are ngaka wano lino liparu lya naruntje?'' ²⁷ Makura Yesus avalimburura weno ashi, ''Vininke vyaghudito kuvantu, kwaKarunga vininke vyavireru.'' ²⁸ Peturus amu tantere weno ashi, ''Vhuruka weno ashi, atwe kwashuva vininke vyetu navintje mposhi tuku kwame ove ntani tukare varongwa voye.'' ²⁹ Makura Yesus avatantere weno ashi, ''Vya ghushili, naku mutantera weno ashi kwato waku shuva lipata lyendi, namukamali wendi, navaghuni vendi navakuru vendi, navakurona vendi ntani navana vendi, mukonda yaku yuvita mbudi yaghuntungi waKarunga, ³⁰ vavo ngava kapire kuwana mo limona lya liyingi lyaku pitakana olyo vashuva mughudyuni, ntani vavo ngava kawana liparu lya naruntje lyamu ghudyuni wakumeho.'' ³¹ Yesus makura atantere varongwa vendi murongo nava viri vayende kulivhango lya pentjavo, ghuye aka vatantere weno ashi, ''Tererenu, atwe kuna kukanduka weno tuyende kuYerusalemu, mposhi nkango nadintje odo vatjanga vaPorofete vakare daku hamena kwaMona Muntu ngadi katikiliremo. ³² Vana nkore vendi ngava ka mutapa mumaghoko ghava pagani, vavo ngava ka muhepeke, naku mushwaghura, ntani naku mutipira manyenye. ³³ Opo ngava mana kumushepura nangora, makura ngava mudipaye, ano ngoli kuliyuva lya ghutatu ngaka vhumbuka mumfa.'' ³⁴ Ano ngoli varongwa vendi kapi vakwatire lighano kwadino nkango odo aghambire kukwavo, mukondashi odino nkango kwakalire damu vishewe ntani kwakalire dina horama kukwavo, vavo kapi vayuvire vakwate lighano kwavyo aghambire kukwavo. ³⁵ Yesus opo aya tikire pepi naYeriko, murume ghumwe washitwiku kwashungilire kuntere yashitaghura arombe vimaliva, ³⁶ opo ayuvire mbunga yavantu kuna kupita mushitaghura, ghuye apura weno ashi, vinke vina kushoroko. ³⁷ Vantu avamutantere weno ashi, Yesus wamu Nasareti ana kupito. ³⁸ Makura murume washitwiku ayiyiri nalitwi lyaku dameka weno, ashi, ''Yesus, Mona Dafiti, mfereko nkenda.'' ³⁹ Makura vantu ovo vapitiro kumeho avatantere ghuno murume washitwiku ashi, mweneko shayeka kughamba. Ano ngoli ghuye aghamba naliywi lyaku dameka ghunene ayiyira weno ashi, ''Mona Dafiti, mfereko nkenda.'' ⁴⁰ Makura Yesus ayimana ntani atantere vantu vamu yite murume washitwiku kukwendi. Opo aya tikire papepi ghuno murume washitwiku, makura Yesus amu pura weno ashi, ⁴¹ "Vinke ghuna shana ovyo nu ruwanena kukoye?'' Ghuye alimburura weno ashi, ''Hompa, ame kuna shana kupahuka nakenge.'' ⁴² Yesus amu tantere weno ashi, ''Pahuka kenga. Lipuro lyoye lina kuverura.'' ⁴³ Mpopo tupu marume washitwiku apahuka atameke kukenga, mpopo akwama naye Yesus, ntani atapa mpandu naku fumadeka Karunga. Makura vantu navantje, ovo vakaliropo palivhango, opo vamonine vyaweno, navo avapanda naku fumadeka Karunga.