¹ Yesus kuna kungena muYeriko avindakane mushitata. ² Mushitata, kwakaliremo murume ghumwe walidina Sakeusi. Ghuye kwakalire mukurona wavafutiti mutero ntani ghuye kwakalire ngagho yayinene. ³ Ghuye kwashanine naye amone Yesus omo afana, ano ngoli kapi avhulire kumu mona mukonda yambunga yavantu vavayingi, ntani ghuye kwakalire muntu wamufupi ghunene mumutika. ⁴ Makura ghuye aduka apite kumeho yambunga akaronda kushitondo shaGhukuyu mposhi amu mone, mukondashi ghuye kwayivire ashi Yesus kwaya pita mo mo mundyira. ⁵ Yesus opo aya tikilirepo palivhango, makura akankura akenge kuwiru makura amu tantere weno ashi, ''Sakeusi, kwangura dumpuka kushitaondo, namuntji kuna kuyenda nuka rare mumundi ghoye.'' ⁶ Sakeusi, adumpuka wangu-wangu amu tambura namaghoko maviri ntani naruhafo rwarunene. ⁷ Vantu navantje opo vamonine Yesus kuna kuruwana vyaweno, avatameke kuvhunguta naku ghamba weno, ashi, ''Kengenu ghuye kuna kuyenda aka dingure mumundi wamurume wandyo.'' ⁸ Makura Sakeusi ashapuka ayima atantere weno Hompa ashi, ''Hompa, Terera kuno, ame kuna kukutantera weno ashi ame kuna kutapa ghukahe walimona lyande kuvantu varuhepo, ntani kwakehe ghuno navaka navo nashakana limona lyavo, ame nganu tapa limona lyavo ntani nganu liwederera rukando rune.'' ⁹ Yesus amu tantere weno ashi, ''Namuntji Hompa Karunga kuna yoghora mundi ghoye naghuntje, mukondashi oghuno murume kuna neyeda shiyivito ashi naye mona Aburahamu. ¹⁰ Anwe yivenu weno ashi Ame Mona Muntu kwaya nganu shane nakuyoghora vantu vaKarunga ovo vakombano.'' ¹¹ Vantu vavo shimpe kuna kuterera kunkango odo aghambire Yesus, makura ghuye atwikiri kuva tantere shifanikito shaweno, mukondashi Yesus kwakalire papepi naku tika kuYerusalemu, vantu kwaghayalire weno ashi ghuntungi waKarunga papepi ghuna kara naku moneka ntani Ghuye nga kara Hompa namupangeli. ¹² Yesus kwava tantera weno ashi, ''Mona Hompa wamurume kwakalire nalikuto ghuye kwayendi kushirongo shaku ghure ngava kamu tungike nga kare Hompa waku pangera mushirongo. ¹³ Kumeho yaku shapuka ayende ghuye kwayita vakareli vendi murongo, atapa vimaliva vyangorodo murongo kwakehe ghuno avatantera weno ashi, 'Ruwanitenu vino vimaliva dogoro mpopo nganu ka vyuka.' ¹⁴ ''Vantu vavayingi vamu shirongo shendi kwamunyengire makura avatumuko vantu, vaka ghambe weno ashi, 'Atwe kapi tuna shana oghuno murume nga kare Hompa wetu namupangeli wetu.' ¹⁵ Ghuye avaka mutungika akara Hompa namupangeli ntani aka vyuka kushirongo shendi, makura ayita vakareli vendi ovo apire vimaliva vaviruwanite vaye kukwendi, aya mone viyeramo ashi kehe ghuno vingapi aturapo naku wanenapo ntani naku wedererapo. ¹⁶ ''Muntu wakuhova aya kukwendi aghamba weno, ashi, 'Hompa, vimaliva vyoye ovyo watapire kukwande ovino, ame kwayitirapo naku vivhukita rukando murongo.' ¹⁷ ''Hompa walikuto amu tantere weno ashi, 'Mpandu ove kwaruwana nawa, ntani ove mukareli waghuhunga.' Mokonda yaviruwana vyoye vyaghuhunga vyaku kunga nakupakera mbili limona lya lisheshu, ame nganu tapa nkondo kukoye dakupangera vitata vyaviyingi vyaku pitakana murongo.' ¹⁸ ''Muntu waghuviri naye aya, aghamba weno ashi, 'Hompa, vimaliva vyoye ovyo watapire kukwande ovino, ame kwavi wederera naku vivhukita rukando rutano.' ¹⁹ ''Hompa walikuto amu tantere weno ashi, 'Mpandu ove kwaruwana nawa, ame nganu tapa kukoye nkondo dakupangera vitata vyaviyingi vyaku pitakana pavitano.' ²⁰ ''Muntu waghutatu naye akwa mako, aghamba weno ashi, 'Hompa, vimaliva vyoye navintje ovyo watapire kukwande ovino, ame kwavimanga palikeshe mbyo navihoreka naku vipungura nawa, ²¹ mukondashi ame kwakara naghoma kukoye, ove muntu wamudito nkene tupu kuna kombanita shoye. Ove kwahora kushakana limona lya vantu olyo wapira kuruwanena, ntani naku vaka muyangu wavantu ogho wapira kushupira liyuywa. ²² Hompa walikuto amu tantere weno ashi, 'Kutwara munkango doye odo ghuna ghamba dakufana weno, ame kuna kukutantera kumwe naku kupa ghundyoni waweno ashi, ove mukareli waghurunde. Nkene shi ove kwayiva nawa-nawa ashi limona lyande kapi lya yendanga palivhu, ntani nkene shi ove wayiva nawa-nawa ashi ame kushakana limona kuvantu, ntani nkene shi ove wayiva nawa-nawa ashi ame kwawananga limona kuvantu olyo napira kushupira liyuywa. ²³ Mukonda munke wapira kutapa vimaliva vyande vaviture mumbanga, mpo shi opo nganu kavyuka ame nganuya wanenemo ntjontjo yaku vhukita kuvimaliva vyande?' ²⁴ Makura Hompa walikuto atantere vantu ovo vayimanino palivhango ashi, 'Mushakanenu vimaliva vendi navintje, muvitape kwamukareli ogho ana karo navimaliva vyaviyingi ovyo vavhukita rukando murongo.' ²⁵ Vantu navantje avaghamba weno vatantere Hompa, ashi, 'Hompa, kengururapo nawa, ghuye kuna kara kare navimaliva vyaviyingi ovyo vavhukita rukando murongo.' ²⁶ '''Hompa avatantere weno ashi, kehe ghuno akaro nalimona lya liyingi shimpe ngava ka wedererako kulimona lyendi, ntani kwakehe ghuno apiro kuweka limona, ghuye ngava kamu shakana nakehe shino akara nasho. ²⁷ Ntani kuhamena vana nkore vande, ovo vapiro kushana kukara munda yalipangero lyande naghu Hompa wande, vakwatenu muva yite kukwande ntani vadipayenu kumeho yande navantje ame kuna kuva kenga namantjo.'' ²⁸ Yesus opo amanine kughamba nkango daweno, makura atwikiri naruyendo rwendi, ntani apiti kumeho yavarongwa vendi akanduke kuYerusalemu. ²⁹ Opo vaka tikire papepi nadino dimukunda odo vatwenyanga ashi Betifagi naBetani, papepi nandundu oyo vatwenyanga ashi Ndundu yaMaghuywe, Yesus atumu varongwa vendi vaviri, ³⁰ avatantere weno ashi, ''Yendenu kumukunda wakumeho waku kwamako. Tupu mukangenamo mumukunda, kumu kawana shidongighona osho vapira kuronda rumwe. Makura muka shishuture muka shiyite kuno kukwande. ³¹ Kehe ghuno aka mupura weno ashi, 'Vinke muna kushishutulira shidongi ntani kuni muna kushitwara? kamu tanterenu weno ashi, 'Hompa kuna shihepa.''' ³² Varongwa vendi vaviri ovo atumine kwayenda ntani avakawana shidongighona yira momu tupu avatantilire Yesus. ³³ Opo vatameka kushutura shidongoghona, muweki washidongi naye ayatiki, avapura weno ashi, 'Vinke muna kushutulira shino shidongighona?'' ³⁴ Varongwa vendi vaviri avalimburura weno ashi, ''Hompa kuna shihepa.'' ³⁵ Vavo avatwara shidongighona kwaYesus, opo vakatikire avakatura ndjako pamughongo washidongighona mposhi Yesus ashungirepo. ³⁶ Yesus kuna rondo ntani kuna kuyendera pashidongighona, vantu kuna piti kumeho vayare naku tura vyuma mundyira apitiremo. ³⁷ Opo vakatikire papepi nalivhango lya Ndundu daMaghuywe vaghurumuke, mbunga yayinene yavantu navarongwa vendi avatameke kushamberera nakufumadeka naku pandura Karunga namaywi ghankondo ghakudameka ghunene mukonda yavitetu vyavinene ovyo vakengire ovyo aruwanine, ³⁸ vavo avaghamba weno ashi, ''Karunga atungike Hompa wetu wakuya mulidina lya Hompa Karunga! Mpora yamuliwiru yaKarunga yikare papetu atwe vantu vendi, mposhi vantu navantje ngava tape mpandu nakufumadeka Karunga wamuliwiru-wiru!'' ³⁹ VaFarisayi vamwe ovo vakaliro mumbunga yavantu kwatantilire Yesus weno ashi, ''Murongi, tantera varongwa voye vashayeke kuyimba vamwene teyete.'' ⁴⁰ Yesus kwava limburura naku vatantera weno ashi, ''Ame kuna kumutantera weno, nkene tupu vashayeka kuyimba vano vantu vamweneko teyete, oghano mawe kughatameka kuyimba naku tapa mpandu naku fumadeka lidina lyande.'' ⁴¹ Yesus opo aka tikire papepi naYerusalemu makura akenge shitata, atameke kulira, ⁴² aghamba weno ashi, ''Ame kuna shana ashi anwe vantu, ngamu yive shirugho naruvede naliyuva lya weno, lyaku yita mpora yaKarunga kukwenu! Ano ngoli paweno mpora yaKarunga vana yihoreke kushipara shenu. ⁴³ Shirugho kuna kuya ntani papepi shina kara vana nkore venu ngava tima likwina lya kudama ngava kundurukide shitata shenu nashintje vavo ngava kare likuma lya nkondo ngava mukundurukide nga mukare mukatji makura ngava muhomokere kumaruha naghantje ngava mudipaye naku mumyona. ⁴⁴ Vana nkore venu ngava mudipaya naku mumyona naku mulyatangera palivhu, namuvantje vakurona navana venu. Opo ngava mana kumudipaya naku mumyona vana nkore venu kwato liwe olyo ngava shuvapo likare pawiru yamawe, odino nkango dina hepa kutikamo ntani vyaweno vina hepa kushoroka, mukondashi anwe kapi mwayivire shirugho shashiwa osho ayire Hompa Karunga kukwenu ndi amuyoghore.'' ⁴⁵ Yesus kwangena muYerusalemu makura aka ngena muntembeli aka wanamo vantu vakughulita ngeshefa makura aka vatjida vatundemo, ⁴⁶ ghuye aghamba weno ashi, ''Matjangwa kwatanta ashi, 'Ndyugho yande, nga yikara ndyugho yandapero,' anwe mbyo mwayitura yikare ghuvando wavantu vawidi.'' ⁴⁷ Kehe liyuva Yesus ka ronganga vantu muntembeli. Makura vaPirisiteli vavanene navarongi vamatjangwa ntani namatimbi ghamuhoko wava Yuda, kwashashine vamudipaye Yesus, ⁴⁸ ano ngoli kapi vawanine mpito yaku ruwana vyaweno mukondashi vantu navantje kwayire kukwendi vaya terere marongo ghendi.