¹ Liyuva limwe Yesus ghuye kuna kuronga vantu muntembeli nakuyuvita Mbudi yaRuhafo, makura vaPirisiteli vavanene navarongi vamatjangwa kumwe namatimbi avaya kukwendi. ² Vavo avamupura weno, naku ghamba ashi, ''Kware wawana nkondo daku ruwana vyaweno, ntani are akupo lipulitiro lyaku ruwana vyaweno.'' ³ Yesus naye avalimburura naku vapura weno ashi, ''Ame kuna kumupura weno, anwe mutape lilimbururo kukwande. ⁴ Vyaku hamena likusho lya Yohanesi: Kuni nko oku lya tunda likusho lya Yohanes, muliwiru ndi kuvantu?" ⁵ Vavo avakuyongo naku kupura weno, ashi, ''Nkene kutu ghamba weno ashi, 'Kwa tunda muliwiru,' ghuye kwatupura nka weno ashi, 'Mukonda munke mwapira kupura mumwendi?' ⁶ Ntani nkene tupu kutughamba weno ashi, 'Kwa tunda kuvantu,' oyino mbunga yavantu yina pongo pano ndi kuvatudipaya namawe, mukondashi vavo kwayiva ntani kwapura weno ashi Yohanesi muPorofete waKarunga.'' ⁷ Makura vavo avamu limburura weno Yesus ashi kapi vayiva oku datunda nkondo dalipangero lya Yohanes mukushi. Yesus naye avalimburura weno ashi, ⁸ ''Nkene shi mo ngoli muna kughamba, name shi kapi naku mutantera ashi kuni nawana nkondo nalipangero lyaku ruwana vyaweno.'' ⁹ Yesus kwatantera vantu shifanikito shaweno ashi, ''Pakalire murume ghumwe ogho akaliro nashikunino shendi shavinyu ntani ghuye kalimanga mandyembere, makura atapa shikunino shendi kuvantu valimemo naku shitakamita, ghuye ayendi kushirongo shakughure kughugenda ntani aka karako shirugho shashire ghunene. ¹⁰ Opo shatikire shirugho shakuyangura mandyembere, mwenya shikunino atumuko mukareli wendi kuvantu vakulima mushikunino shendi, aka shimbeko muyanguwa wamandyembere mushikunino shendi. Ano ngoli vantu vakulima mushikunino shendi avakamu toghona ghuno murume, ntani avaka mutjida avyuke maghoko-ghoko. ¹¹ Kuruku rwashirugho mwenya shikunino atumuko nka mukareli wendi wapeke aka shimbeko muyangu, naye nka avaka mutoghona, naku mushwaghura ntani naku mufita ntjoni, vavo avaka mutjida avyuke maghoko-ghoko. ¹² Kuruku rwashirugho mwenya shikunino atumuko nka mukareli wendi waghutatu aka shimbeko muyangu, naye nka avaka mutoghona naku muremeka, ntani avaka mutjida. ¹³ Muweki washikunino shavinyu aku pura mwene weno ashi, 'Weni omo nuvhura kuruwana? Weno ame kuna kutumako monande ogho nahora ghunene. Ame nahuguvara ashi vavo opo ngava ka mumona ngava ka mufumadeka.' ¹⁴ ''Muweki washikunino atumuko monendi, makura vantu vakulima mushikunino opo vamu monine monendi, vavo avakupura naku ghamba weno, ashi, 'Oghuno ndye monendi wamwene ntani ndye nka nga karo mupingi washikunino. Weno tokwenu tudipaye monendi, makura atwe ngatu pinge shikunino nga shikare shetu.' ¹⁵ Vantu vakulima mushikunino avamukwata monendi avamutwara pandye yashikunino avakamu dipaya. Yesus makura apura mbunga yavantu weno ashi, ghuno muweki washikunino opo nga yatika kuvantu vaweno, vinke vyaku vhura kuruwana kuvantu vakufana weno? ¹⁶ Muweki shikunino nga ruwana vyaweno: Ghuye ngaya dipaya vano vantu navantje vakulima mushikunino, makura nga ghupe shikunino shendi nga shitape kuvantu vapeke.'' Mbunga yavantu opo vayuvire vyaweno, vavo avaghamba ashi, ''Vininke vyaku fana weno nakadidi shi kuvipulitira vishoroke!'' ¹⁷ Makura Yesus anwiki akenga kukwavo, ntani aghamba weno ashi, ''Vinke datanta dino nkango vatjanga mumatjangwa weno ashi: 'Liwe olyo vashwena vatungi vandyugho ndyo liwe ngali ka karo lya mulyo ghunene kundyugho oyo vatunga? ¹⁸ Kehe ghuno nga pundukomo muliwe nga werapo paliwe nga remana naku tjokaghuka, ntani kehe ghuno nga liwera lino liwe nga limudyama naku mumyona nga mbandaghuke.'' ¹⁹ Varongi vamatjangwa nava Pirisiteli vavanene kwashanine vamutoghone mpopo pashirugho, mukondashi vavo vayivire ashi ghuye kwaghambire dino nkango damu vishewe kukwavo ashi vavo vantu vavarunde. Vavo kwashanine vamukwate makura vatjilire mbunga yavantu. ²⁰ Makura vavo avamukwama naku munomena vayive ashi kuni nko ana kara naku ana kuyenda, ntani avatumu vantu vamwe vayende kukwendi vaka kukitaghukire ashi vavo vantu vavahungami, ano ngoli vavo kwashanine vawane mpito yaku muwana ghundyoni wakuhamena kunkango dendi, mposhi vamukwate vamu tware kuveta kwangughuru ngava ka mupangure. ²¹ Vano vantu vaku kukitaghukira makura avamupura weno Yesus ashi, ''Murongi, atwe twa yiva ashi ove kughamba nakuronga nkango daghuhunga, ntani ove kwato kukenga kulipuna naku likuto lya muntu, nane ngoli ove kuronga tupu ndyira yaKarunga yaghuhunga naghushili. ²² Tutantere ndyira yaghuhunga yakuhamena kwavino, vino vyaweno ghushili vyakara paveta ntani vavipulitira ashi atwe vantu vamushirongo tufutange mutero kwaHompa Sisa, Hompa walipangero lya Varoma ndi, ndi hawe?'' ²³ Ano ngoli Yesus kwayivire ovi vyakaliro mumaghano ghavo ashi vavo kwashanine vamuture mughudito nava Yuda ovo vapiro kushana kufuta mutero ntani nalipangero lya Varoma lya kufutita metero, makura Yesus avapura weno ashi, ²⁴ ''Yitenu kukwande muneyede shiringa yashincencere oyo muna kara nayo. Ntanterenu ashi lifano lyare vafanekapo ntani nalidina lyare vatjanga po pano pashiringa? ²⁵ Makura Yesus avatantere weno ashi, ''Tapenu kwaHompa Sisa, Hompa walipangero lya Varoma ovyo vyahameno kukwendi, ntani anwe tapenu kwaHompa Karunga ovyo vyahameno kukwendi.'' ²⁶ Ovano vantu vaku kukitaghukira kwatetukire ghunene kuli limbururo lya ghukonentu lya Yesus olyo atapire kukwavo, vavo kapi vavhulire kumuwana ghundyoni kehe ghuno kumeho yambunga, ntani vantu navantje kwatetuka ntani kwamwena teyete. ²⁷ Kuruku rwashirugho vaSadukayi vamwe kwayire kwaYesus, vavo kwapura weno ashi, kwato livhumbuko lya vafe, ²⁸ vavo kwashanine kuyuvha kwaYesus makura avamupura weno, ashi, ''Murongi, muveta yaMoses kwatjanga mo weno ashi nkene tupu murume waku kwara kuna fu, ashuve mukamali wendi, kwato mwanuke, mughunyendi wamurume ana hepa kughupa mukamali wamukurwendi amu kware, nga yitire po vanuke ngava kare vana vamulira lya mukurwendi. ²⁹ Makura murume ghumwe kwayitire vana vanuke vana vendi vavarume vatano navaviri vaku tunda mulira lyendi, monendi wambeli akwara mukamali, ntani adohoroka ahana kuyitirapo mwanuke pamukamali wendi, ³⁰ mughunyendi waghuviri wamurume akwara mukamali wamukurwendi ndi nga yitirepo mwanuke naye adohoroka kwato kuyitira po mwanuke. ³¹ Waghutatu naye amu kwara ntani adohoroka kwato kuyitirapo mwanuke, dogoro navantje mulira lyavo vatano navaviri kwamu kwara mukamali ntani navantje kwapwa kudohoroka kwato wakuyitira po mwanuke. ³² Kuruku rwashirugho mukamali naye adohoroka. ³³ Nkene shi vyaghushili vantu ngava ka vhumbuka kughufe, are po ogho ngaka kwaro ghuno mukamali? Nkene shi vano varume vatano navaviri navantje mulira lyavo kwakwalire ghuno mukamali ghumwe.'' ³⁴ Yesus avalimburura weno ashi, ''Vantu vamuno mughudyuni kukwara ntani kutapa vana vavo vavakamali vavakware. ³⁵ Ano ngoli vantu vamu ghudyuni wakumeho ovo ngava kawano livhumbuko lya kughufe vavo ngava kangena muliwiru ntani kwato nka kukwara ntani kwato kutapa vana vavo vavakamali kunkwara. ³⁶ Ntani vavo kwato nka kufa, mukondashi ngava kara yira vaEngeli ntani ngava kara vana vaKarunga, mukondashi vavo kwavhumbuka kughufe mbyo vawana liparu lya lipe. ³⁷ Moses kwatjanga aneyede vantu, ashi weni Karunga omo kavhumburanga vantu kughufe, atwe twa mona ovyo vyashorokiro mushishwa shaku twera mundiro waku pira kuveva, Moses kwatu neyeda ashi vantu ovo atoghorora Karunga nampili vafa kare vavo shimpe kuna kukarera naku raperera kwaKarunga, kwaKarunga waAbrahamu naKarunga waIsaka ntani naKarunga waYakopu. ³⁸ Ghuye kapi shi Karunga wavantu vakufa, nane ngoli Karunga wavantu vamonyo ovo vana kuparuko weno, mposhi natwe ngatu ka paruke kumwe naye ngatu katape mfumwa kukwendi. ³⁹ Varongwa vamwe vamatjangwa avamu limburura weno, ashi, ''Murongi, ove kuna limburura mughuhunga.'' ⁴⁰ Kutunda po kwato nka ogho amu puliro mapuro ghaku musheteka. ⁴¹ Yesus avatantere weno ashi, ''Weni omo mughamba ashi Kirisitusi Mesaya ne Mona Hompa Dafiti? ⁴² Nkene shi Hompa Dafiti mwene kwaghamba weno mumbapira yaMapisarome ashi, ⁴³ 'Hompa kwatantera Hompa wande weno ashi, 'Shungira kulipuna lyaku rulyo rwande, dogoro nganu mane kufunda vana nkore voye nganu vature kuntji yampadi doye ngava kare ghulyatero wampadi doye.' ⁴⁴ Nkene shi Hompa Dafiti naye kwatwenyine Kirisitusi Mesaya ashi, 'Hompa wendi,' weni nka omo vikara ashi ghuye mona David kwatunda mulira lya Dafiti, nane ngoli ghuye kwapita kana lira lya Dafiti?'' ⁴⁵ Mbunga yavantu vavo shimpe kuna kuterera kukwendi makura ghuye atantere varongwa vendi weno ashi, ⁴⁶ ''Karenu muna kotoka, ntani kapi shi mukare yira varongi vamatjangwa, vakudwata marwakani ghamare mumbunga vamoneke ashi vavo vaka makuto ntani kwahora kumorora vantu kumavhango ghangeshefa vavayarere vipuna vashungire kumeho yavantu ntani nka vavo kwahora kushungira kumeho yavantu muSinagoge ntani kwahora kushungira kumeho yavantu pavipuna vyavakamakuto pavipito napavilika. ⁴⁷ Vavo kushakana kehe pano limona lya mumandi ghavakamali vakufita vavya vavo, ntani vavo kuraperera ndapero dadire ghunene nkene shi kuna kuraperera mumbunga. Varume vakufana weno ngava kawana mpanguro yavo yaghudito ghunene.''