¹ Yesus opo aka nkukire, amono vantu vakuweka limona lya liyingi, kuna kutura vitapa vyavo mushimbangu shavitapa. ² Ntani ghuye amono nka mukamali wakufita vyendi naye kuna kutura vitapa mushimbangu ghuye kwatulire mo tupu randa dendi mbiri mushimbangu. ³ Yesus aghamba weno ashi, ''Vya ghushili naku mutantera, oghuno mukamali wakufita vyendi ntani ghuye muntu waruhepo kuna tapa vitapa vyaviyingi kupita kana vantu navantje. ⁴ Vantu valimona lya liyingi vavo kuna tapa tupu ghushwi waghudidi waku limona lyavo olyo vaweka. Ano ngoli oghuno mukadi wakufita vyendi, ntani ghuye mukadi waruhepo, kuna tapa limona lyandi nalintje nga wane ovyo ana hepa. ⁵ Makura vantu vamwe kwaghambire weno ashi ntembeli yavo yawapa nawa, ntani kwayitunga namawe ghaghufughuli ghakutunda kuvantu, ano ngoli Yesus ghuye aghamba weno ashi, ⁶ ''Oyino ntembeli muna kumona weno, mumayuva ghamasheshu tupu makura ngayi yungurukepo ngayi were palivhu ntani kwato liwe olyo nga lihuparopo likare pawiru yamawe.'' ⁷ Makura vavo avamu pura, weno ashi, ''Murongi, liyuva munke nga vishoroka vyaweno? Viyivito munke nga vikaroko vyakuneyeda ashi weno papepi ntani kuna kushana ngoli vishoroke? ⁸ Yesus avalimburura weno ashi, ''Takamitenu ntani karenu muna kotoka mposhi kapi shi ngava mukonge naku mupukita. Mukondashi vantu vavayingi ngava yera mulidina lyande, vavo ngava ghamba weno ashi, ''Kehe ghuno nga ghamba mwene ashi Ame Kirisitusi,' ntani nka ngava ghamba weno ashi, 'Weno ruvede kuna kutikamo.' Anwe Kapishi ngamu rupuke ko ntani kapishi ngamu vakwame. ⁹ Ntani nange shi ngamu yuvha vita nandyorongani yavantu, anwe kapishi ngamu kare naghoma, mukondashi ovino navintje vina hepa kushoroka ntani, kumeho yakushaya ghudyuni.'' ¹⁰ Makura Yesus avatantere weno ashi, ''Dimuhoko nadimuhoko ngadi kuhomokera, ntani virongo navirongo ngavi kurwanita. ¹¹ Kumavhango ghamayingi ngaku kara likinko livhu, ntani muvirongo vyaku kushuva-shuva ngamu kara lirumbu ntani namahamba ghamukaghu. Ntani kuliwiru ngaku kara viyivito vyavinene vyaku tjilita vyaku neyeda ashi vitetu vyavinene ntantani nga vishoroke. ¹² Ntani kumeho yakushoroka vino, anwe ngava mutoghona naku muhepeka, ntani ngava mutwara muSinagoge ngava kamu pangure naku mutura mudorongo, ntani ngava mutwara kumeho yava Hompa nava Ngughuru vamu virongo mukonda yalidina lyande. ¹³ Ovino mo nga vishoroka weno mposhi anwe ngamu wane mpito yakughamba nkango nga mutape ghumbangi wenu waghushili waku hamena kulidina lyande. ¹⁴ Mposhi anwe kapi shi ngamu kare naghoma munda yamutjima naku kupura ashi nkango munke ngamu kaghamba ngamu kupopera ntani anwe kwato hepero yaku kuwapayikira nkango odo ngamu ka ghamba, ¹⁵ ame ngamu tapa nkango kukwenu ntani naghukonentu waku ghamba mposhi vana nkore venu ngava pire kuwana ghundyoni mumwenu ntani kapi ngava mukanana ntani kapi ngamu kulimba navo. ¹⁶ Ntani vakurona venu nava ghunivenu nava kuruvenu ntani navantu valikoro lyenu mbo ngava mutwaro muliyome ntani ngava mutapa vamudipaye. ¹⁷ Vantu navantje ngava munyenga mukonda yalidina lyande. ¹⁸ Ano ngoli kwato nampili huki yimwe tupu yamu mutwe ghoye oyo nga yikombano mo. ¹⁹ Nkene nga ghuyenda mumasheteko ghamadito ove nga ghukare nalididimiko nalihuguvaro nalipuro mwaHompa Karunga ove nga ghupopera monyo waliparu lyoye. ²⁰ Nkene ngamu mona shitata shaYerusalemu kuna shikundurukida vana nkore vavakavita, yivenu ashi ngoli papepi shina kara nakudyonaghuka. ²¹ Pa ruvede runo vantu ovo vatungo muYudeya ngava tjwayuke vadukire kundundu, ntani ovo ngava karo mushitata paruvede runo ngava rupukemo wangu ngava tundemo, ntani ovo ngava karo pandye yashitata kapi shi ngava ngenemo nka mushitata. ²² Shirugho shino Hompa Karunga nga tengeka shino shitata, ovino vyaweno nga vishoroka mposhi nkango damu matjangwa nga ditikiliremo. ²³ Lihudi lya linene kuvantu ovo ngava karo namarutu maviri ntani navo ngava karo navakeke mumayuva ghaweno! Mukondashi mushirongo ngamu kara shiponga namaghupyakadi, ntani Hompa Karunga nga garapa ntani nga neyeda lishandu lyendi kuvantu. ²⁴ Vantu vavayingi ngava vadipaya vana nkore nalighonga, ntani vantu vavayinga ngava vakwata ngava vatware mughupika kuvirongo vyaku kushuva-shuva mughudyuni, ntani shitata shaYerusalemu ngava shilyatangera vapagani nashintje dogoro ruvede rwavapagani nga rutikiliremo. ²⁵ ''Pa ruvede runo viyivito ngavi kara kuliyuva, naku ka kwedi, naku ntungwedi, ntani napa ntunda yalivhu. Ntani vantu vamu ghudyuni ngava kara vana piyagana, ntani ngava kara naghoma pakuyuvha mema namankumpi ghamu lifuta kuna kundunduma. ²⁶ Vantu vamu ghudyuni ngava pwilira kughoma opo ngava yuvha ovyo vina kuyo mughudyuni. Nantungwedi daku liwiru nado ngadi kunyunganga ngadi tunda pamavega ghado. ²⁷ Makura vantu navantje ngava kenga Mona Muntu kuna kuya paliremo nankondo naghuyerere wendi. ²⁸ Opo ngamu mona virugho vyavidito kuna kutameka kushoroka, anwe ngamu shapuke ngamu yimane rwi ntani ngamu kankuke dimutwe denu ngamu kenge kuliwiru, mukondashi liyoghoko lyenu kuna kuya papepi lina kara.'' ²⁹ Makura Yesus avatantere shishewe shaweno ashi, ''Ghayarenu ntani kengenu kushitondo shaghukuyu, ntani naku vitondo navintje. ³⁰ Nkene tupu kuna kutameka kutemuna mahako ghamape ghamateke naku shoka dimutavi daditeke kuvitondo, anwe muna yiva kare ashi shirugho shakwenye papepi shina kara. ³¹ Mo ngoli nga vishoroka, nkene tupu ngamu mona vininke vyaweno kuna kushoroka, yivenu ashi ghuntungi waKarunga papepi ghuna kara. ³² Vyaghushili ame kuna kumutantera weno ashi, anwe vantu varuvharo runo rwantantani anwe muna kuparuko weno kapi nga mukatika ko kughuhura waghudyuni makura vininke navintje vino vyaweno nga vishoroke nga vitikiliromo. ³³ Ntani nka liwiru nalivhu navintje ngavi kashaya naku tundapo, ano ngoli dino nkango dande naku ghamba weno kwato shikomona osho ngashi katundoko. ³⁴ ''Anwe takamitenu ntani karenu muna kotoka, mpo shi kapi shi ngamu hokwe kuruwana vipito naghunkorwe ntani navinka vyaliparu, makura opo nga litikamo lino liyuva anwe ngamu kare muna kuvhuruma makura nga mufa mo mushiraha. ³⁵ Ovino nga vishoroka kwakehe ghuno pantunda yalivhu, ntani anwe kwato ovyo ngamu yivako ntani kapi ngamu kuwapayikira, mukondashi kwato ogho ayivo shirugho. ³⁶ Karenu muna kotoka virugho navintje, ntani muna hepa kuraperera virugho navintje mposhi ngamu kare nankondo ngamu funde nakuparuka nakupita muvirugho vyavidito vyaku fana weno, mposhi anwe ngamu ka yimane kumeho yaMona Muntu.'' ³⁷ Kehe liyuva Yesus karonganga vantu muntembeli, ntani kehe pano kuruvede rwamatiku ghuye kurupukamo mushitata ayende aka kare kuNdundu yaMaghuywe matiku naghantje. ³⁸ Kehe liyuva ruvede rwangura-ngura vantu navantje kumeneka vayende kuntembeli vaka terere kumarongo ghendi.