¹ Shirugho shakudana liyuva lya shipito shaMboroto yaKupira Vifulito ndi yakupire Vishashita kwakalire papepi, ntani nka kulitwenya weno ashi Pasika ndi liyuva lya Mavhumbukiro. ² VaPirisiteli vavakurona ntani navarongi vamatjangwa kwashinine mpito nandyira ashi weni omo vavhura kudipaya Yesus, mukondashi vavo kwatjilire mbunga yavantu. ³ Makura Satana Munyengi angene mwaYudasi, Isakalyoto, ghumwe wavarongwa vendi murongo navaviri. ⁴ Yudasi kwayendire kuvakurona vava Pirisiteli ntani navakurona vavakavita aka ghambe navo ashi ndyira munke ngava yenda ngava kwate Yesus ntani weni omo nga vhura kuva kwafa. ⁵ Vavo kwakalire naruhafo nambili paku yuvha mbudi yaweno makura avatapa vimaliva kukwendi. ⁶ Makura Yadusi atambura vimaliva, ntani ashana mpito ashi weni omo avhura kumughupa Yesus atunde kumbunga yavantu amu tware muliyome. ⁷ Opo lya likiremo liyuva lya kudana shilika shaMboroto yaKupira vishashita, shilika shaMavhumbukiro shaku dyamba ndywighona. ⁸ Yesus kwatuma vaPeturusi naYohanesi, avatantere weno ashi, ''Yendenu muka wapayike ndya dapashilika shaMavhumbukiro, mposhi ngatu kadyobwane kumwe.'' ⁹ Vavo avamupura weno ashi, ''Ku livhango munke oku ghuna shana kukawapayika lyaku ka lyera shipito?'' ¹⁰ Ghuye avalimburura weno ashi, ''Tererenu nawa, ka yendenu opo muka ngena mushitata, kumu kagwanekera namurume ogho ana shimbo hupa yakuvheta mema. Anwe ka kwamenu ndye ghuno murume dogoro momo mumundi omo aka ngena. ¹¹ Makura anwe ngamu kapure nturaghumbo wamu mundi weno ashi, 'Murongi wetu kuna tutumu kukoye ntani kuna shana kuyiva weno ashi, ''Kuni nko oku yina kara ndyugho yavagenda oko ngaya lyera Shilika shaMavhumbukiro, kumwe navarongwa vendi?'' ¹² Ghuye ngaka muneyeda nkonda yayinene yapawiru yandyugho oyo vawapayika kare yakaro navipuna natafura dadiwa. Ka ngenenu momo ngamu kawapayike Shilika shaMavhumbukiro.'' ¹³ Makura vavo avayendi, ntani avakawana navintje vina karapo kare ntani vinapu kuwapayika yira momu tupu aghambire Yesus. Makura vavo avakawapayika ndya dapa Shilika shaMavhumbukiro. ¹⁴ Opo lya tikiremo liyuva lya kudyobwana Shilika, Ghuye ashungiri kumwe nava Apositoli vendi. ¹⁵ Makura avatantere weno ashi, ''Ame kwataterera ghunene shino Shilika shaMavhumbukiro mposhi nganu lye ndya kumwe nanwe kumeho nganu yende murunyando rwande. ¹⁶ Ame kuna kumu tantera weno ashi, ame kapi nka nganu vhura kulya ndya dogoro mpopo nga ghutikiliramo ghuntungi waHompa Karunga.'' ¹⁷ Makura Yesus aghupu nkinda yavinyu ayi kandayiki, ntani atapa mpandu kwaKarunga, aghamba weno ashi, ''Ghupenu yino nkinda, nwenumo namuvantje. ¹⁸ Ame kuna kumu tantera weno ashi, ame kapi nka nganu nwa vinyu yamandyembere dogoro mpopo ngaghu kayera ghuntungi waKarunga.'' ¹⁹ Ntani aghupu mboroto, ayi kandayiki ntani atapa mpandu kwaKarunga, makura abomona mboroto yikare namaruha ghamadidi, atapa valye, ntani aghamba weno ashi, ''Yino mboroto rutu rwande, oru nakutapa kukwenu. Ntani muna hepa kuruwana vyaweno kehe pano ngamu mvhuruke.'' ²⁰ Opo vamanine kulya ndya damurarero, Yesus aghupu nkinda yavinyu, aghamba weno ashi, ''Yino nkinda kuna kara ligwanekero lya lipe lyamu honde yande, oyo ngayi tekero papenu. ²¹ Tererenu nawa mukwate lighano. Muntu ogho ngaka nturo muliyome naye tuna shungiri kumwe pano patafura. ²² Ovino vina hepa kushoroka ngoli kwaMona Muntu mposhi nkango damatjangwa ngadi tikiliremo yira momu tupu vadi tjanga kare. Ano ngoli lihudi lya linene kwamurume ogho nga nturo muliyome nganu yende mumaghoko ghava nankore vande!'' ²³ Vavo avatameke kukupura vavene navavene weno ashi are waku ruwana vyaweno mukatji kavo. ²⁴ Kuruku rwashirugho mukatji ka varongwa vendi kwatameka dimutangu dakuhamena kumbunga yavo mukondashi vavo kwashanine kuyiva weno ashi, are mukurona wakupitakana navantje mumbunga yavo. ²⁵ Yesus avatantere weno ashi, ''Vahompa vamu virongo vyavapwagani vavo kwashana kuneyeda vantu ashi vavo kwakara nankondo dakupangera vantu mushirongo, ntani nka vavo kukupa vavene mapundi vakare vampititi vaku ruwanena vantu ghuwa. ²⁶ Ano ngoli anwe kapi shi ngamu fane yira vano vampititi. Nane ngoli, muntu walipuna lya linene mukatji kenu akona kukudidipita nga kare yira mwanuke wamudidi, ntani muntu walipuna wakupititira vantu ana hepa kukara yira muntu tupu waku ruwanena vantu navantje. ²⁷ Kutwara mumwenu muntu munke walikuto po pavantu vano, wakushungira kutafura alye ndya, ndi muntu wakuwapayika ndya ayite kutafura? Anwe muna hepa kuyiva weno ashi muntu walikuto lya linene kapi shi waku shungira kutafura? Kengenu kuno kukwande ame mukurona wenu nampititi wenu, ntani nka ame naku mutapero dino ndya mulye kutafura. ²⁸ Ntani anwe ngamu karo kumwe name muvirugho vyande vyavidito vyamasheteko. ²⁹ Ame nganu ka tapa nkondo kukwenu dakupangera mughuntungi washirongo shande, yira momu tupu vatapa Vavava nkondo kukwande dakupangera mughuntungi waliwiru, ³⁰ anwe ngamu kalya nakunwa name kutafura yande mughuntungi wande, ntani nanwe ngamu ka shungira kulipuna lya ghu Hompa ngamu kapangure dimuhoko murongo nambiri dava Isirayeli. ³¹ ''Simoni, Simoni, terera, Satana kuna pura kwaKarunga ashi kuna shana aku sheteke, yira momu tupu vaturanga mahangu ghaku pira kushwaya parupare vaghapume nampumo vagaghunune mungu ghutundeko kumahangu. ³² Ano ngoli ame namana kare kukuraperera weno ashi, lipuro lyoye kapi shi nga liwe palivhu. Kuruku rwamasheteko ghoye, ghuna hepa kuya kuvaghunyoye nga ghuva korangede nakupameka lipuro lyavo.'' ³³ Peturusi atantere Yesus weno ashi, ''Hompa, Ame naku wapayikira kare mukuyenda nove naku ntje mudorongo ntani namu mfa.'' ³⁴ Yesus amu limburura weno ashi, ''Peturusi, Ame kuna kukutantera weno ashi, liyuva lino lyana muntji kumeho yakuyiya shikondomboro, ove ghuna kanana kare rukando rutatu ashi ove kapi wandyiva ame.'' ³⁵ Yesus kwapulire varongwa vendi weno ashi, ''Opo namu tumine muyende kuvirongo, anwe kwayenda tupu kwato kushimba ndjato, navimaliva, navihepwa, ntani nankaku, mpovili ovyo mwaka shanine muka pire kuviwana ndi? Vavo avalimburura weno ashi, ''Kwato.'' ³⁶ Makura Yesus avatantere weno ashi, ''Kutunda pano weno, kehe ghuno akaro nandjato, ana hepa kushimba, ntani kehe ghuno ana hepa kushimba ndjato navihepwa vyendi. Ntani kehe ghuno wakupira rufuro ana hepa kughulita lirwakani lyendi mposhi ngaka ghure ko rwendi. ³⁷ Ame kuna kumutantera weno ashi, navintje ovyo vatjanga mumatjangwa vyakuhamena kukwande vina hepa kushoroka nga vitikiliremo ntani.' Vantu kwaghamba weno ashi ame muntu ghumwe wavarunde.' Navintje ovyo vapumba navi vatjanga vyakuhamena kukwande kuna kushoroka ntani kuna kutikiliramo weno.'' ³⁸ Makura varongwa vendi avaghamba weno ashi, ''Hompa, kenga! Atwe tuna kara namarufuro maviri.'' Yesus avalimburura weno ashi, ''Shayekenu kughamba vyaweno.'' ³⁹ Makura Yesus ayendi arupuka mushitata, yira momo tupu aruwananga kehe pano, ayendi kuNdundu YaMaghuywe, varongwa vendi navo avamukwama. ⁴⁰ Opo vaka tikire kukwendi, Ghuye avatantere weno ashi, ''Rapererenu kwaKarunga mupire kungena mumasheteko.'' ⁴¹ Makura Yesus atundu po pavarongwa vendi ayendi aku nape shinema navo, makura atongamene pangoro araperere, ⁴² aghamba weno ashi, "Vava, nkene shi kuvhura, ghupa yino nkinda yi tundeko kukwande. Nampili ngoli vina wapa tupu, kapi shi vyashihoro shande, ove ruwana tupu ovyo ghuna shana shihoro shoye shitikiliremo.'' ⁴³ Makura muEngeli atundu muliwiru aya kukwendi, atapa mukumo naku munkondo peka. ⁴⁴ Ghuye kwayuvha kukora ghunene, ntani kwaraperera ngudu nankondo, dogoro kwashupa liyuywa dogoro liyuywa lyendi kwawera palivhu yira litembwe lya honde yayi yingi. ⁴⁵ Opo amanine kuraperera, ashapuka ayendi kuvarongwa vendi makura aka vawana vana rara ntani vana roroka, mukondashi vavo kwakalire naliguvo, ⁴⁶ Ghuye aghamba weno ashi, ''Vinke mwarara weno? Rambukenu muraperere kwaKarunga, mposhi kapi shi mungene mumasheteko.'' ⁴⁷ Ghuye shimpe kuna kughamba, mpopo tupu, mbunga kwamoneka, mulipititiro, lya Yudasi, ghumwe wavarongwa vendi murongo navaviri. Makura ghuye aya papepi naYesus amu ncumita, ⁴⁸ ano ngoli Yesus amu pura weno ashi, ''Yudasi ame ghuna kuncumita, ame Mona Muntu, ghuntware muliyome?'' ⁴⁹ Varongwa vendi ovo vakaliro naYesus opo vakengire vyaweno kuna kushoroko, vavo avaghamba weno ashi, ''Hompa, tuva toghone namarufuro ghetu ndi?'' ⁵⁰ Mpopo tupu ghumwe wavarongwa vendi aghupu rufuro rwendi atoghona naku tetako litwi lyaku rulyo kumutwe wamurume ghumwe wamu mbunga yavo mukareli wamupirisiteli wamukurona. ⁵¹ Yesus aghamba weno ashi, ''Shayeka kuruwana vyaweno!'' Makura akwata kulitwi lyendi, mpopo tupu amu verura. ⁵² Makura Yesus atantere vapirisiteli vavanene, navakungi vantembeli, ntani namatimbi ghava Yuda ovo vayiro kukwendi, ghuye aghamba weno ashi, ''Shino shitetu shashinene, anwe kunaya kukwande navikwata navitwa ntani namarufuro, yira kunaya kwamuwidi? ⁵³ Opo kanu karanga nanwe kehe liyuva muntembeli, kapi mwankwatire nukare mudorongo. Ano ngoli ame nayiva ashi oruno ruvede rwenu, ruwanitenu lipangero nankondo denu damu mundema.'' ⁵⁴ Makura avamukwata, avamutwara kumundi wamu Pirisiteli wamukurona. Makura Peturusi naye akwama ko, ntani kwakalire kughure navo. ⁵⁵ Makura vantu avavankeda mundiro munda yambara avashungiri vaku kangumune, Peturusi naye aya ashungiri kumwe navo. ⁵⁶ Muruwani ghumwe wamukadi akenge Peturusi kuna shungiri kushite shamundiro, makura amu kengurura ghunene, ntani aghamba weno ashi, ''Oghuno murume naye ghumwe wavantu vendi.'' ⁵⁷ Ano ngoli Peturusi aka nana, aghamba weno ashi, ''Ove mukadi, Ame kapi namuyiva ogho murume.'' ⁵⁸ Kuruku rwashirugho shashifupi tupu muntu wapeke naye akenge kwaPeturusi, ntani aghamba weno ashi, ''Nove ghumwe wavantu vendi.'' Ano ngoli Peturusi alimburura weno ashi, ''Ove murume, ame kapi shi ghumwe wavantu vendi.'' ⁵⁹ Kuruku rwaghure wavili murume ghumwe amu dimburura ntani aghamba naliywi lya kudameka weno ashi, ''Ghushili oghuno murume naye ghumwe wavantu vendi ntani kumwe kava karanga, naye muGalileya.'' ⁶⁰ Peturusi aghamba weno ashi, ''Ove murume, ame kapi nayiva ashi vinke ghuna kughamba.'' Mpopo tupu ghuye shimpe kuna kughamba, makura shikondomboro kwayiya. ⁶¹ Makura Hompa Yesus apiruka, akenge kwaPeturusi, makura Peturusi avhuruka nkango daHompa, odo aghambire kwendi weno ashi, ''Ku matiku ghana muntji kumeho yaku yiya shikondomboro ove ghuna kanana rukando rutatu ashi kapi wandyiva ame.'' ⁶² Makura Peturusi arupukamo mumbara ayende pandye aka lira ghunene. ⁶³ Makura varume ovo vakungiro Yesus avamushwaghura naku mutoghona. ⁶⁴ Vavo avamufikiliri mulikeshe ntani avamupura weno, ashi, ''Pumba atwe kuna shana tuyive ashi ove muporofete! Tutantere ashi are pakatji ketu oghu ana kutoghono?'' ⁶⁵ Ntani nka vavo avaghamba nkango dadidona kwaYesus, naku mushwaghura. ⁶⁶ Liyuva lyaku kwamako kungura-ngura yayinene, vampititi navakurona vavaYuda, kumwe navaPirisiteli vavakurona ntani navarongi vamatjangwa avapongo kumwe tupu. Makura yino mbunga yavo avatokora kutwara Yesus kumpanguro ⁶⁷ ntani vavo avaka ghamba weno ashi, ''Nkene shi ove Kirisitusi, ghamba tutantere.'' Ghuye avalimburura weno ashi, ''Nkene shi kunu mutantera ashi Ame, anwe kapi muvipura, ⁶⁸ ntani nka nkene shi kunu mupura lipuro, anwe kapi mutapa lilimbururo. ⁶⁹ Ntani kutunda pano weno, Ame Mona Muntu nganu kashungira kurulyo rwaShipuna shaHompa Karunga mupangeli waghudyuni wankondo nadintje.'' ⁷⁰ Vavo navantje avamupura nka weno ashi, ''Kutwara munkango doye odo ghuna kughamba ovene Mona Karunga ndi?'' Yesus avalimburura weno ashi, ''Anwe muna kughambo ashi Ame Mona Karunga.'' ⁷¹ Vavo avaghamba weno ashi, ''Weno kwato nka hepero yaku ka shana ghumbangi wapeke? Natuvantje tuna yuvhu nkango dendi daku tunda mukanwa kwendi mwene.''