¹ Makura mbunga yavo yavantu navantje kwashapuka vamutware Yesus kwaPilatus. ² Vavo avatameke kumurundira, naku ghamba weno ashi, ''Oghuno murume kuna kupukita vantu vamu muhoko wetu, ghuye kuna kushweneka vantu vapire kufuta vimaliva vyamutero kwahompa Sisara, ntani Ghuye kuna ghamba nka weno ashi Ghuye ndye Kirisitus, Hompa. ³ Makura Pilatus amu pura, naku ghamba weno ashi, ''Ove Hompa wava Yuda ndi? Yesus amu limburura naku ghamba weno ashi, ''Ove ghuna kughambo vyaweno.'' ⁴ Makura Pilatus atantere vaPirisiteli vavakurona ntani nambunga yavantu weno ashi, ''Ame kapi nawana ghundyoni kehe ghuno kwaghuno murume.'' ⁵ Ano ngoli vavo kwatwikira kughamba varundire Yesus, naku ghamba weno ashi, ''Ghuno murume kuna kuyita ndyorongani kuvantu, ntani marongo ghendi kuna kuhanene mushirongo shaYudeya nashintje, ntani ana tameke nka kuyuvita Mbudi yaRuhafo muGalileya dogoro weno mbudi yendi yina yatiki kulivhango lyetu.'' ⁶ Pilatus opo ayuvire dino nkango, apura weno ashi oghuno murume ne muka Galileya ndi. ⁷ Pilatus opo adimburura ashi Yesus kwatunda kuGalileye makura amu tapa ntani amu tumu Yesus kwahompa Herodesi, pashirugho shino hompa Herodesi naye kwakalire muYerusalema mumayuva ngogho. ⁸ Herodesi opo amu monine Yesus, kwahafire ghunene, mukondashi ghuye kwataterera shirugho shashire naye ngamu mone. Ghuye kwamuyuvha tupu namatwi ntani kwashana nga kenge naye nkondo navitetu ovyo aruwananga. ⁹ Makura Herodesi apura Yesus mapuro ghamayingi, ano ngoli Ghuye kapi amu limburura. ¹⁰ VaPirisiteli vavakurona ntani navarongi vamatjangwa mpopo tupu kwashapuka nanyanya avayimana papepi naye, avaghamba naku murundira maghundyoni ghamayingi. ¹¹ Mpopo tupu Herodesi navakavita vendi avamutuku Yesus kumwe naku mushwaghura naku mushepa. Opo vamanine kumushepa makura avamudwateke marwakani ghandiro afane yira Hompa makura avamutumu avyuke kwaPilatusi. ¹² Kutunda tupu mpopo vaHerodesi ntani naPilatusi kwaku kwata ghukwavo vakare vantu namuholi wendi mwamunene, mukondashi ghure wamwaka dadiyingi vavo kwakara naghunkore waghunene pakatji kavo. ¹³ Makura Pilatusi ayita vaPirisiteli vavakurona navapangeli vavaYuda ntani nambunga yavantu vaponge palivhango limwe tupu ¹⁴ ghuye avatantere weno ashi, ''Anwe kuna yita ghuno murume kukwande ashi ghuye mundyoni ntani kuna kuyita ndyorongani kuvantu, tereranu, ame, kuna mupura mwene mposhi nuyive ghundyoni wendi kumeho yenu, ano ngoli ame kapi nawana ghundyoni kehe ghuno mwaghuno murume wakuhamena kwanavintje ovyo muna kughamba kumwe naku murundira. ¹⁵ Hawe, nampili Herodesi, naye kapi ana ka muwana ghundyoni mbyo ana mutumu avyuke kukwetu, terernu, oghuno murume kwato ghundyoni ogho aruwana waku mutwara kumfa. ¹⁶ Makura ame kuna kumutapa kuvakavita vamupe matengeko makura vamushuture atunde mumango.'' ¹⁷ Pilatusi kwaghambire vyaweno mukondashi ghuye kwakara nankondo dakushutura muna dorongo ghumwe tupu pashipito shaMaghumbukiro. ¹⁸ Ano ngoli mbunga yavantu nayintje kwayiyira kumwe tupu, naku ghamba weno ashi, ''Dipaya ghuno murume, ntani shutura Barabasi atunde mumango aye kuno kukwetu!'' ¹⁹ Barabasi kwakalire murume wamurunde ogho ayitiro ndyorongani mushirongo pakatji ka vantu nalipangero ntani ghuye kwakalire murudipayi vantu makura avamutura mudorongo. ²⁰ Ntani Pilatusi aghamba nka atantere mbunga, mukondashi ghuye kwashanine kushutura Yesus atunde mumango. ²¹ Ano ngoli mbunga yavantu kwatwikira kuyiyira naku ghamba weno ashi, ''Mupampare kushikurushe, mupampare kushukurushe.'' ²² Pilatusi apura mbunga rukando rwaghutatu weno ashi, '' Mukonda munke, ntani ghundyoni munke aruwana ghuno murume? Ame kapi nawana ghundyoni kehe ghuno mumwendi waku vhura kumudipaya ghuno murume. Ame kuna kumutapa vamutengeke, makura vamu shuture atunde mumango.'' ²³ Ano ngoli mbunga kwatwikira naku tininika vayiyire namaywi ghaku dameka ghunene ashi, vamu pamparere pashikurushe. Vavo kwaghamba naku yiyira nankondo vatininike Pilatusi dogoro atjindyi maghano ghendi. ²⁴ Makura Pilatusi naye aruwana mbyo vyo vashanine vantu navantje. ²⁵ Ghuye kwashutura muntu wamurunde ogho vashanine vantu navantje ogho vatulire mudorongo mukondashi ghuye kwayitire ndyorongani ntani kwadipaya vantu. Makura Pilatusi atapa Yesus mumaghoko ghavo vamu ruwane momu vana shana. ²⁶ Vakavita opo vatwalire Yesus arupuke, makura avakenge Simoni waku Kirene, kuna kutunda kushirongo shavo, avamukwata avamukambeke pamapepe ghendi shikurushe shaYesus ashimbe, makura Yesus amu kwama muruku rwendi. ²⁷ Mbunga yayinene yavantu, ntani vakamali ovo valiliro ngudu ntani navo vakaliro naliguvo ghunene, navantje kwamu kwamine muruku rwendi. ²⁸ Makura Yesus apiruka kuruku akenge kukwavo, aghamba weno ashi, ''Vanuke vavakadona vamu Yerusalemu, kapi shi mulire mukonda yarunyando rwande, nane ngoli lirenu mukonda yarunyando rwenu navana venu. ²⁹ Tererenu, mayuva kuna kuya vantu ngava ghamba weno ashi, 'Lirago lya linene kwavantu vangandye vaku pira kuyita vanuke, ntani vavo kapi vayamweka rumwe mukeke kumashwe ghavo.' ³⁰ Ntani vavo ngava tameka kughamba vatantere ndundu weno ashi, 'Ove ndundu wera papetu, ntani 'Ove ndundu tufikilire.' ³¹ Nkene shi vininke vyaweno kuna kushoroka kwashitondo shasho shimpe shina kara shashiteke namonyo namahako weno, weni omo ngavi kara ntani namo ngavi shoroka opo nga shikukuta shitondo?'' ³² Yesus kwamutwalire kumwe navarume vaviri, varume vavarunde naghukorotji, kwava twalire vaka vadipaye kumwe naYesus. ³³ Opo vakatikire kulivango olyo vatwenyanga ashi'' Livhango lya vifupa-fupa,'' makura avakamu pamparera kumwe navantu vaviri vavakorokotji - Ghuye akara pakatji ghumwe kurulyo rwendi ntani ghumwe kurumontjo rwendi. ³⁴ Makura Yesus aghamba weno ashi, ''Vava, vaghupirepo, kapi vana yiva ashi vinke vana kuruwana.'' Makura vavo avaruwana, fungu-fungu vaku shakanene vyuma vyendi, makura avatavaghura lirwakani lyendi kehe ghuno aghupeko ruha rwendi. ³⁵ Vantu kwayimanine papepi naye vamu kengere ntani vampititi vava Yuda kwamushepa naku mushwaghura, avaghamba weno ashi, ''Ghuye kwapopera monyo davaghunyendi. Weno murenkenu naye aku popere mwene, nkene shi vyaghushili ghuye ndye Kirisitusi, ogho atoghorora Hompa Karunga.'' ³⁶ Vakavita navo avamushwaghura, ntani avaya vayimane papepi naye, makura avamupa vinyu yaghulyungu-lyungu anwe, ³⁷ ntani avaghamba weno ashi, '' Nkene shi ove Hompa wava Yuda, popera monyo ghoye.'' ³⁸ Ntani vavo kwatura shiyivito na shineyedito shendi opo vatjanga weno ashi, ''OGHUNO NDYE HOMPA WA VA YUDA.'' ³⁹ Muntu ghumwe wavano vantu vavakorokotji ogho vapampalilire pashikurushe ashwaghura Yesus aghamba weno ashi, ''Nkene shi vyaghushili ove Kirisitus? Popera monyo ghoye ntani natwe ghupopere monyo detu.'' ⁴⁰ Ano ngoli muntu ghumwe wavano vakorokotji vaviri aharukiri ghunyendi, aghamba weno ashi, ''Nane ove kapi watjira naku fumadeka Hompa Karunga, kwavyo ana kumpangura vaku tware kumfa mukonda yaviruwana vyoye vyaghurunde ndi? ⁴¹ Atwe tuvaviri kuna kuwana matengeko ghamfa detu, kutwara muviruwana vyetu vyaghurunde. Ano ngoli oghuno murume kwato ghundyoni naghudona ogho aruwana.'' ⁴² Makura ghuno murume aghamba weno ashi, ''Yesus, ka mvhuruke ko opo ngaghu katika mughuntungi ghoye.'' ⁴³ Yesus amu tantere weno ashi, ''Ame vyaghushili naku kutantera weno ghuvi yive ashi, namuntji weno ove kughu ka kara name muParadisa.'' ⁴⁴ Ovino kwashorokire kushitenguko paviha vyaviri yaghutatu, makura mushirongo amu kara mundema waghunene dogoro ghure waghukahe waviri yaghutatu ⁴⁵ shite kapi shakalireko kuliyuva. Makura likeshe lya munda yantembeli kwataghuka mukatji. ⁴⁶ Opo vyashorokire vyaweno Yesus kwalira naliywi lyaku dameka, aghamba weno ashi, "Vava, ame kuna kutapa mpepo yande mumaghoko ghoye. Tupu amana kughamba nkango daweno monyo wendi aghurupukamo. ⁴⁷ Mukurona wavakavita lifere opo amona vyaweno kuna kushoroka, ghuye atongamene atapa mpandu naku fumadeka Hompa karunga, ntani aghamba weno ashi, ''Vya ghushili oghuno murume wamuhungami.'' ⁴⁸ Mbunga yavantu ovo vayiro kumwe naye opo vakengire namantjo ovyo vyashorokiro, opo vavyukire kwayuvha kukora munturo ntani kwatameka kukutoghona munturo. ⁴⁹ Ntani vantu navantje ovo vamu yiviro, ntani navakamali ovo vamu kwamino vaku tunda kuGalileya, vavo kwayimana kughure kwamwena teyete, vakengere navintje ovyo vina kushoroko. ⁵⁰ Mpopo tupu, palivhango kwakalire po murume walidina Yosefu, murume ghumwe wava yenditi vadoropa. Ghuye kwakalire murume wamuwa ntani wamuhungami. ⁵¹ Ghuye kapi aku yendire naku tambura maturopo namatokoro naviruwana vyava ghunyendi vayenditi vadoropa. Yosefu kwatunda kudoropa yaAramatiya, ntani ghuye kwataterera naku shana ghuntungi waKarunga. ⁵² Ghuno murume ayendi, kwaPilatusi, aka pure lipulitiro aka ghupe rutu rwaYesus aka vhumbike. ⁵³ Makura aka ghupa rutu rwendi rutunde pashikurushe, makura adingiri shimpu pamakeshe, aka vhumbika shimpu muntoko yaku tjokora muliwe, muliyendo lya lipe omu vapira shimpe kuvhumbika muntu. ⁵⁴ Oruno ruvede kwakalire Liyuva lyaku kuwapayikira, liyuva lya Sabata lyaku pwiyumuka. ⁵⁵ Vagholikadi ovo vakwamino Yesus vatunde kuGalileya navo avayendi vaka kenge kumayendo oku vaka vhumbikire rutu rwendi. ⁵⁶ Makura vagholikadi avayendi vaka shimbe naku wapayika maghadi ghalidumba lyaku nuka rupekwa vaka waveke rutu rwaYesus. Makura muliyuva lya Sabata kwato kuruwana vavo kwapwiyumuka kutwara muveta yampo yavo.