¹ Kuliyuva lyaku hova lyamu shivike kungura-ngura yayinene kwameneka vayende kumayendo, vatware maghadi ogho vawapayikire. ² Vavo kwaka wana liwe lina tunduko kumbira ntani mbira yina gharuka. ³ Makura avangene mo munda, ano ngoli kapi vaka wanine mo rutu rwaMuyogholi Yesus. ⁴ Vavo kwatukukire ghunene, oghu vatundu ntani kapi vayivire ashi vinke vavhura kuruwana, mpopo tupu, vakafumu vaviri avamoneke kuna yimana mpopo palivhango kuna dwata vyuma vyaku payima naku vembera yira shite. ⁵ Vano vagholikadi avakara naghoma waghunene makura avatongamene pangoro avavanyongama vipara vyavo palivhu, makura vano varume vaviri avaghamba vatantere weno vagholikadi ashi, ''Mukonda munke muna kushanena muntu wamuyumi ogho ana karo namonyo mumavhango ghaku vhumbika vantu vakufa? ⁶ Ghuye mwato muno, ana tundumo ana vhumbuka mumfa! Vhurukenu nkango dendi odo omu tantilire opo akalire namonyo mukatji kenu kuGalileya, ⁷ Ghuye kwaghambire weno ashi, Mona Muntu ngava ka mutapa mumaghoko ghava vantu vavarunde ngava ka mupamparere pashikurushe ngava ka mudipaye, ntani muliyuva lya ghutatu ngaka vhumbuka mumfa.'' ⁸ Makura vagholikadi avavhuruka nkango daYesus odo aghambire kukwavo ⁹ makura avayendi vatunde kumayendo vaka wane varongwa vendi murongo naghume avaka timwitira navintje ovyo vyashorokiro. ¹⁰ Vavo kwakalire Mariya Magadalena, naYohana, naMariya vawina vaYakopu, ntani vagholikadi vamwe ovo vakalire navo avakatanta yino mbudi kuva Apositoli. ¹¹ Ano ngoli oyino mbudi vayuvire vaApositoli yaku tunda kuvakamali, vavo kapi vavipulire. ¹² Makura Peturusi ashapuka aduka ayende kumbira, dogoro aka tika aka yimana, palivero lya mbira akenge munda, ghuye kwakenga mo tupu makeshe ana karomo, rutu rwendi mwato. Peturusi kwatetuka kwavino vyashorokiro, makura avyuka ayende kumundi wendi. ¹³ Liyuva ndyolyo, varongwa vaYesus vaviri kwayendire kumukunda walidina Emanusi, wagho kwakara shinema shakilo meta murongo kutunda kuYerusalemu. ¹⁴ Vavo kwatimutira mundyira yavo navintje ovyo vyashorokiro kwaYesus. ¹⁵ Ovino kwashorokire weno, vavo kuna kuyenda mundyira naku timutira navintje ovyo vyashorokiro kumwe naku kupura kwavi vyaweno, makura Yesus aya kukwavo ayendi navo. ¹⁶ Ano ngoli Karunga kwapata mantjo ghavo vapire kukenga naku dimburura ashi Kirisitusi mpwali mukatji kavo. ¹⁷ Makura Yesus avapura weno ashi, ''Anwe vantu vaviri vinke muna kutimutira mundyira yamu ruyendo rwenu?'' Makura vavo avayimana ndyikiti ntani kuna kara naliguvo mushipara. ¹⁸ Murume ghumwe, walidina Kiliyopasi, amu limburura weno ashi, ''Nkwandi ove tupu pentjoye muntu wamu Yerusalemu ogho apiro kuyuvha vishoroka vyavinene ovyo vyashoroko mushirongo shetu mumayuva ana kapito? ¹⁹ Yesus avapura weno ashi, ''Vishoroka munke? Vavo avamu limburura weno ashi, ''Vishoroka vyakuhamena kwaYesus waku Nasareti, wamuporofete, ogho ka ruwanango vitetu vyavinene naku ronga nkango daKarunga nankondo kuvantu navantje, ²⁰ makura vaPirisiteli vavakurona ntani navapangeli vetu vamu shirongo avamutapa kulipangero lyava Roma avamupangura naku mutwara kumfa vaka mupamparere pashikurushe. ²¹ Atwe kwakalire nalihuguvaro mumwendi ashi ghuye ndye nga yoghoro muhoko wetu waIsirayeli kuva nankore vetu. Weno, kapi shi mo vina kumoneka, namuntji kare liyuva lya ghutatu kutunda kumfa dendi. ²² Ntani nka, vagholikadi vamwe vamu mbunga yetu kuna yita vitetu kukwetu, namuntji ngura-ngura yayinene kuna meneke vayende kumbira yendi. ²³ Vavo kapi vana ka wana rutu rwendi mumbira, mbyo vana ka vyuka, ntani mbyo vana ghamba nka weno ashi, mundyira yavo yaku ka vyuka mbyo vana mono nka limoneko lya vaEngeli ovo vana ghambo kukwavo weno ashi, ghuye muyumi kuna kara namwonyo. ²⁴ Vakafumu vamwe vamu mbunga yetu navo mbyo vana yendiko kumbira yendi, mbyo vana kawana ko yira momu tupu vana tanta vagholikadi. Vavo kapi vana kamu kenga Yesus.'' ²⁵ Yesus avatantere weno ashi, ''Anwe varume vaviri kwakara nadimutjima dadikukutu ntani anwe kapi mwapura nkango nadintje odo vatjanga vaporofete vakare mumatjangwa daku hamena kwavino vina kushoroko weno! ²⁶ Ovino vina kushoroko weno vyapwa kare kutjanga ntani vina kara hepero kushoroka weno matjangwa ghatikiliremo yira momu vatjanga weno ashi, Kirisitusi ana hepa kukara murunyando rwaweno ntani ngava mudipaya, mposhi Ghuye ngaka wane naku ngena mughuntungi wendi ngaka wane ghuyerere wendi?'' ²⁷ Makura Yesus atameke kuvaronga nkango damu matjangwa nadintje kutamekera kwaMosesi dogoro naku vaporofete navantje, ashingonone naku vaneyeda navintje ovyo vatjanga mumatjangwa vyaku hamena kukwendi. ²⁸ Opo vatikire papepi naku tika kumukunda wavo, Yesus avatantere weno ashi ghuye kuna kupitakana ghuye kuna kuyenda kwaghure. ²⁹ Ovano varume vaviri avamushungida, naku ghamba weno ashi, ''Liyuva lina toko kare, yakuno tuyende kumwe mumundi wetu, weno mundema ghuna tiki kare.'' Makura Yesus ayendi kumwe navo aka rara mumundi wavo. ³⁰ Opo vashungilire, valye ndya kumwe tupu, Ghuye aghupu mboroto, ayi tungiki ntani atapa mpandu kwaHompa Karunga, ntani abomona mboroto yikare maruvambi ghamadidi, ayi tapa kukwavo. ³¹ Makura mpopo avapahuka mantjo ghavo, ntani avamu dimburura ashi Ghuye Yesus, makura Ghuye atundupo papavo adongonoka. ³² Makura vavo avaghamba vavene navene weno ashi, ''Opo tuna yendi mundyira kumwe naye ghuye kuna kuturonga nkango damu matjangwa atwe kuna kuyuvhu mbili mumutjima, ntani kuna kara naruhafo ano ngoli kapi tuna yiva ashi mukonda munke, kutunda mpopo vavo avaghamba weno ashi tuyendenu tuka tantereko vantu kwavino vina shoroko kukwetu?'' ³³ Mpopo tupu avapiruka vavyuke vayende kuYerusalemu. Vavo kwakawana varongwa vendi murongo naghumwe kuna pongo kumwe ntani navantu ovo vakaliro navo, ³⁴ makura mbunga kwatantera varume vaviri weno ashi, "Ghushili Hompa ana vhumbuka, ghuye kuna moneke kwaSimoni." ³⁵ Makura ovano varume vaviri navo avatimutiri navintje ovyo vyashorokiro mundyira yavo, ntani namu avaneyedire naku mukenga Yesus kuna kubomona mboroto. ³⁶ Vavo shimpe kuna kughamba vyaweno, mpopo tupu Yesus ayimana mukatji kavo, Ghuye avatantere weno ashi, ''Mbili yaHompa yikare nanwe.'' ³⁷ Vavo kwatukuka ntani kwakara naghoma, vavo kwaghayara ashi mpepo tupu vana kukenga. ³⁸ Yesus avapura weno ashi, ''Mukonda munke muna karere muliguvo? Mukonda munke muna kutamangera munda yadimutjima denu vyaku hamena kulivhumbuko lyande? ³⁹ Kengenu mumaghoko ghande namu mpadi dande, Ame ghuno. Kwatenu parutu rwande yuvhe omo runa fana. Mposhi anwe muyive ashi mpepo kwato rutu navifupa, rwaku fana yira runo rwande.'' ⁴⁰ Opo amanine kughamba navo, makura avaneyeda vito vyamu maghoko ghendi ntani namu mpadi dendi. ⁴¹ Vavo kwatetuka ntani kwakalire naruhafo rwarunene, vavo kapi vapulire ashi ghuye kuna vhumbuka mumfa. Makura Yesus avapura weno ashi, ''Muna kara ko nandja dakulya ndi?'' ⁴² Vavo avamupa ko ruha rwantjwi yakuyota, ⁴³ Ghuye aghupu alye kumeho yavo. ⁴⁴ Makura Ghuye avatantere weno ashi, ''Opo nakalire nanwe pakutanga, ame kwamu tantilire weno ashi nkango nadintje odo vatjanga mumatjangwa ghaMosesa nava Porofete ntani namu Mapisalome dina hepa kutikilira mo nadintje.'' ⁴⁵ Makura Yesus apaturura ndunge davo, mposhi vayuvhe naku yiva ntani naku kwata lighano nkango damu matjangwa. ⁴⁶ Ghuye avatantere weno ashi, ''Matjangwa kwatanta weno ashi, Kirisitusi nga kara murunyando ngava mudipaya ntani kuliyuva lya ghutatu ngaka vhumbuka kumfa. ⁴⁷ Makura anwe muna hepa kuyuvita yino Mbudi yaRuhafo yalikushighuro nalidongononopo lya ndyo kupitira mulidina lya Yesus Kirisitus ntani yino mbudi yina hepa kuyenda kudimuhoko nadintje, kutamekera kuYerusalemu. ⁴⁸ Anwe muna hepa kutapa ghumbangi kuvantu wakuhamena kwanavintje ovyo mwakenga namantjo navi mwayuvha namatwi navi aruwana ntani navi vyashoroko navintje. ⁴⁹ Tererenu, Ame nganu tuma Mpepo yaKupongoka oyo vamu twenyedera Vavava. Kutunda pano anwe karenu mushitata dogoro Karunga nga tume Mpepo yaKupongoka ngamu wane nkondo murutu.'' ⁵⁰ Kuruku rwashirugho Yesus arupuka navarongwa vendi vatunde mushitata vayende pepi namukunda waBetaniya. Makura Yesus ayerura maghoko ghendi akambeke naku tungika varongwa vendi ⁵¹ Ghuye shimpe kuna kukambeka naku tungika varonwa vendi, makura avamudamuna atunde papavo arondo muliwiru. ⁵² Opo vamana kutongamena naku raperera kukwendi makura avavyuka kuYerusalemu naruhafo rwarunene. ⁵³ Kehe liyuva vavo kava yendanga muntembeli vaka raperere, naku tanga Hompa Karunga.