¹ Makura Yesus, ghuye kuna yura Mpepo yaKupongoka, atundu kumukuro waYorodani aka yenda Mpepo ayi mupititiri yi mutware mumburundu, ² oko aka gwanekilire namunyengi Satana aka kara mumasheteko ghure wamayuva dimurongo ne. Mumayuva naghantje ghano ghuye kwato ovyo alire, makura kughuhura wamayuva dimurongo ne, ayi mukwata ndjara. ³ Munyengi Satana aghamba kukwendi ashi, ''Nkene shi ghushili ove Mona Karunga, tantera lino liwe likutjindye likare mboroto yakulya.'' ⁴ Yesus amu limburura ashi, ''Matjangwa kwatanta ashi, 'Muntu nakuparukashi tupu kumboroto pentjayo. ⁵ Makura munyengi Satana apititiri atwara Yesus aka ronda kundundu yayire ghunene aka muneyeda maghuntungi namaghushwi ghamughudyuni naghuntje paruvede rwarufupi tupu. ⁶ Munyengi Satana aghamba amu tantere ashi, ''Ame kunu tapa nkondo kukoye dakupangera ghudyuni nalimona nalintje, namfumwa naghukonentu ogho nakara nagho wakupangera navintje, ntani ame kwakara nankondo dakutapa lipangero kwakehe ghuno nashana. ⁷ Nkene tupu, ove kughu tongamena pangoro doye ntani ghunyongamene mutwe ghoye ghuraperere naku shungida kukwande, lino limona nalintje ndi lyoye ngali karo.'' ⁸ Waro nka Yesus amu limburura nka kumwe naku mutantera ashi, ''Matjangwa kwatanta ashi, 'Tongamena nakukarera Hompa Karunga ghoye, tupu pentjendi ahuru. ⁹ Shimpe nka munyengi Satana atwara Yesus ayende kuYerusalemu makura aka murondeka aka yimana pawiru-wiru yalitungo lya ntembeli, makura amu tantere ashi, ''Nkene shi ghushili ove Mona Karunga, vatuka ghutunde pano pawiru ghuyende palivhu. ¹⁰ Mukondashi matjangwa kwatanta ashi, 'Ghuye nga tuma naku tantera vaEngeli vendi ngava kupopere naku kukunga,' ¹¹ ntani, Vavo ngava kukaghura ngava kukwate mumaghoko ghavo, mposhi nga ghupire kupunduka mpadi doye muliwe.'' ¹² Yesus amu limburura, naku mutantera ashi, ''Matjangwa kwatanta ashi, 'Nakadidi ntani kapishi kusheteka Hompa Karunga ghoye.''" ¹³ Munyengi Satana opo amanine kusheteka Yesus, makura amu shuvu atundupo papendi aka yenda tanko aka taterera dogoro shirugho shakukwamako. ¹⁴ Kutunda pano makura Yesus avyuka kushirongo shaGalileya ghuye kuna yura nkondo dakutunda kuMpepo, mbudi yakuhamena kukwendi kwakuhanena yiyende virongo navintje ovyo vyava kundurukido. ¹⁵ Ghuye makura atameke kuronga vantu muSinagoge davo ntani navantje vayuviro marongo ghendi kwatetukire nakutapa mpandu. ¹⁶ Makura Yesus ayendi kuNasareti, oku akulira, kutwara mumpo yavo, muliyuva lya Sabata naye ayendi aka ngena muSinagoge, makura ashapuka ayimana kumeho avarure matjangwa nakudameka. ¹⁷ Makura muruwani ghumwe wamu Sinagoge atapa mbapira yamuporofete Yesaya kukwendi. Yesus aghupu mbapira makura afikura palipepa opo vatjanga dino nkango ashi: ¹⁸ ''Mpepo yaHompa mpoyili mumwande, mukondashi ghuye kwangwaveka mbyo atungika nganu yuvite Mbudi yaRuhafo yayiwa kuvantu varuhepo. Ghuye kwantuma nganu yuvite Mbudi YaRufafo kuvantu vamudorongo mposhi ngava shutuke ngava manguruke ngava tunde mumango ntani naku verura vatwiku ngava pahuke vatameke kumona, ntani naku shutura vapika vatunde mughupika namumango namumahepeko, ¹⁹ ntani nakutantera vantu vayive ashi ghuno mwaka ngo atoghorora Hompa ntani Ghuye nga fera nkenda naku yita mpora naku neyeda shihoro naghuwa kuvantu vendi.'' ²⁰ Makura afiki yino mbapira, ayi tapa yivyuke kwamuruwani wamu ntembeli, ghuye ayendi aka shungira. Mantjo ghavantu navantje vakaliro muSinagoge tupu vana kukenga nakunwika kukwendi. ²¹ Makura ghuye aghamba nakuvatantera ashi, ''Odino nkango odo vatjanga muno mumatjangwa odino muna yuvhu namuntji weno dina tikilirimo ngoli.'' ²² Kehe ghuno akaliromo muntembeli ogho ayuviro omo ana kughamba nakuronga kwatetukire kunkango namarongo ghaghukonentu ogho arupukiro mukanwa kendi, ano ngoli vantu vamwe ovo vakaliromo avapura ashi, ''Nane kapishi ndye mona Yosefu ghuno ndi?'' ²³ Ghuye avatantere ashi, ''Ame ghushili nakughamba kukwenu ashi anwe nga mughamba dino nkango davishewe kukwande dakutanta ashi, 'Ove ndokotora ndi nganga, kuverure naghumoye. Vitetu naviruwana vyavinene ovyo twa yuvha waruwana muKaperenumu, ghuna hepa kuviruwana nka muno mushitata shoye omo watunga.''' ²⁴ Ano ngoli ghuye aghamba nakuvatantera ashi, ''Ame kuna kumutantera ghushili ashi, kwato muporofete ogho vatambura vamufumadeka ntani kwato mbudi yendi oyo vatambura vantu vamushirongo shendi shamvharera. ²⁵ Ntani nka ame kuna kumutantera ghushili ashi vakamali vakufita vavyavo vayingi vakaliromo mushirongo shaIsirayeli paruvede rwamuporofete Eliya, liwiru kwapatire likare ghure wamwaka ntatu namakwedi matano-ghumwe kwato kuroka mvhura ntani vantu kwakalire murukukutu namulirumbu lya linene mushirongo. ²⁶ Ntani nka muporofete Eliya kapi vamutumine ayende kwakehe ghuno mukatji kavo vatungo mushorongo shaIsirayeli, nane ngoli muporofete kwamutumine ayende kushitata shapeke shaSarefati mushirongo shaSidoni, ayende kwamufita vyendi ogho atungiro mo. ²⁷ Ntani paruvede rwamuporofete Elisha vantu vavavirema vayingi vatungiro mo mushirongo shaIsirayeli, ano ngoli kwato nampili ghumwe oghu vaverulire mo muno mushirongo, nkwandi Nayamani tupu pentjendi waku shirongo shaSiriya.'' ²⁸ Vantu navantje ovo vakaliro muSinagoge kwagarapire ghunene opo vayuvire dino nkango. ²⁹ Vavo kwashapuka, avamukwata vamurupwite pandye yashitata, vamutware kundundu vakaronde pawiru yandundu yayire ghunene, nashitambo vaka muvhukumine palivhu vaka mudipaye. ³⁰ Makura ghuye atundu mumaghoko ghavo apiti mukatji ka mbunga yavo ayende kulivhango lya peke. ³¹ Liyuva limwe ghuye kwayendire kuKaperenumu, kushitata shamuGalileya, makura muliyuva lya Sabata aka tameka kurongo muSinagoge yavo. ³² Vantu kwatetukire kumarongo ghendi, mokonda shi ghuye kuronga mukumo ntani nankondo. ³³ Pa ruvede runo muSinagoge kwakalire mo murume ghumwe ogho akaliro nampepo dadidona, makura ghuye kwaghamba naliywi lya kudameka ashi, ³⁴ "Oho! Vinke ghuna shana kuruwana kukwetu, ove Yesus waku Nasareti? Kunaya ghutu dyonaghure po ndi? Ame nakuyiva ashi overe - ove Mupongoki kwatunda kwaKarunga!'' ³⁵ Yesus aharuka amwenikida yino mpepo yakunyata, ayi tantere ashi, ''Mwenako kapi shi ghughambe! Rupuka tundamo mumwendi!'' Makura mpepo yayidona ayi muvhukuma aku gandere palivhu mukatji ka vantu, ntani yarupukamo mumwendi, kapi nka yamuhepikire yi muruwane mwamudona. ³⁶ Vantu navantje ovo vakaliropo kwatetukire ghunene, ntani navantje mbyo tupu vana kughambaghura. Vavo avakupura mukatji kavo kumwe nakughamba ashi, ''Nkango munke dino daweno? Ghuye kughamba nkango dankondo damukumo dakupangera mpepo dadidona ditunde muvantu.'' ³⁷ Makura mbudi yakuhamena kukwendi ayi kuhana yiyende kuvirongo navintje vyamaparambo ovyo vyava kundurukido. ³⁸ Makura Yesus arupukamo muSinagoge ayendi aka ngena mumundi waSimoni. Vangumweyi vaSimoni vavo kuna rara kuna kuvera ghunene lishakima, makura vantu ovo vakaliromo mumundi avamu shungida Yesus averure muveli. ³⁹ Yesus ashapuka ayendi papepi namuveli makura atjidamo ghuvera walishakima ghutundemo mumwendi, makura lihamba ali rupukamo. Mpopo tupu muveli averuka ashapuka atameke kuva wapayikira ndya valye. ⁴⁰ Liyuva shimpe kapi lina toko, vantu kwayita vaveli vavayingi vakuvera mahamba namaghuvera ghaku kushuva-shuva vaye kwaYesus. Ghuye akambeke maghoko pakehe ghuno wakuvera dogoro navantje kwaveruka. ⁴¹ Ghuye kwapangera mpepo dadidona dirupuke ditundemo muvantu vavayingi, ntani pakurupuka muvantu dino mpepo dadidona kwatakuma nakughamba ashi, ''Ove Mona Karunga!'' Yesus kwaharukira nakutantera mpepo dadidona ashi kapishi dighambe ditantere vantu vyakuhamena kukwendi, mukondashi mpepo dadidona kwamuyivire ashi ghuye Kirisitus. ⁴² Liyuva lyaku kwamako kuruvede rwangura-ngura, Yesus kwashapuka ayende kulivhango lya mumburundu aka kare papentjendi. Mbunga yavantu kwayenda vashane Yesus dogoro avamuwana avakatika kulivhango oko akalire. Mbunga kapi yashanine kutunda kukwendi. ⁴³ Yesus avatantere ashi, ''Ame nahepa kuyenda nuyuvite Mbudi yaRuhafo yaghuntungi waKarunga kuvantu navantje ntani nakuvitata navintje, oshino ntjo shitambo osho vantumina nuye mughudyuni.'' ⁴⁴ Makura atwikiri kuronga nakuyuvita Mbudi yaRuhafo muSinagoge dadiyingi muvitata vyamu Yudeya.