¹ Liyuva limwe vantu vavayingi kwapongire nakukundurukida Yesus vaterere omo ana kuronga nkango daKarunga, ntani ghuye kwayimanine pepi nalidiva lya Genesareti. ² Ghuye amono mawato maviri kuna sheyama muliyenga kuntere yalidiva. Vashakangcongco ndi vakwati ndtjwi vavo vana tundumo muwato kuna kukusha makwe ghavo. ³ Makura Yesus aperama muwato ghumwe, waSimoni, amu tantere ashi atindike wato ghutunde paliyenga ghuyende mumema pakatji ka lidiva. Makura Yesus ashungiri muwato pakatji ka lidiva atwikiri kuronga mbunga yavantu ghuye kuna perama muwato. ⁴ Opo amanine kuronga, Yesus atantere Simon ashi, ''Perama muwato duwa ghuyende palitondo ntani damuna makwe ghoye teya ghukwate ntjwi.'' ⁵ Simoni amu limburura nakughamba ashi, ''Muhona, atwe kuna hugu ntjwi namakwe matiku naghantje, ano ngoli kwato ntjiwi oyo tuna kwatamo, nampili ngoli ame kuna kuruwana tupu yira momu ghuna kughamba nkango doye, ame kunu teya makwe mumema.'' ⁶ Simoni naghunyendi avaruwna yira momu avatantilire Yesus vateye makwe mumema, makura avakwata ntjwi dadinene dadiyingi, dogoro makwe ghavo aghatameke kutweka nakutaghuka. ⁷ Makura avayita vaghunyavo ovo vakaliro muwato wapeke, vaye kukwavo vava vatereko. Vavo avaya vakukwatite varondeke ntjwi mumawato maviri naghantje dogoro kwayura ghunene, mawato agha tameke kungena mema nakudama. ⁸ Ano ngoli Simoni Petrus, opo amonine vyaweno, atongamene pangoro dendi kumeho yaYesus, aghamba ashi, ''Tundapo kara ghure name, ame muntu wandyo, Hompa.'' ⁹ Ghuye kwatetukire, mukonda yantjwi dadiyingi dadinene odo vakwatire mulikwe, ntani navantu navantje ovo vakaliro naye kwatetukire ghunene. ¹⁰ Mukatji ka vantu kwakaliremo Yakopu naYohanes, vana rume vaSebediye, vavo kuruwana kumwe naSimoni. Makura Yesus atantere Simoni ashi, "Kapishi ghukare naghoma, kutunda pano ove nga ghukara mukwati wavantu.'' ¹¹ Opo vasheyekire mawato ghavo muliyenga, makura avashuvu navintje avakwama Yesus. ¹² Liyuva limwe Yesus kwakalire mushitata shimwe, kwakaliremo murume wakuvera vingondwe murutu naruntje. Opo amonine Yesus, aya kukwendi atongamene pangoro dendi kumeho yendi, ashungida kukwendi ashi, ''Hompa, verura ghuvera wande, mukondashi ove kuvhura kuverura ghuno ghuvera nkene tupu ghuna shana.'' ¹³ Makura Yesus ahonyonona lighoko lyendi amu kwata parutu, ghuye aghamba ashi, ''Ame kuna shana. Veruka.'' Mpopo tupu averuka ntani vingondwe kwatundamo murutu rwendi, akara kuna kushuka murutu naruntje. ¹⁴ Ghuye amu tantere ashi kwato kutantera ko kehe ghuno kuhamena kwavino, ano ngoli amu tantere ashi, ''Shapuka ghuyende, ghuka moneke kwamupirisiteli aka kumone omo ghuna fana, makura ghukatape ndjambo yaku neyeda ashi ghuna veruka ntani ghuna kushuka ghuna kene, katape ndjambo kutwara muveta daMosesi, ghuka kare ghumbangi ghoye kukwavo ashi ove kuna veruka.'' ¹⁵ Ano ngoli mbudi yakuhamena kwaYesus omo averulire ghuno murume ayi kuhana yinde kwaghure, makura mbunga yayinene yavantu avaya kukwendi vaya yuvhe marongo nankango dendi ntani nakuverura maghuvera ghaku kushuva-shuva muvantu navantje. ¹⁶ Ghuye kehe pano kayendanga kulivhango lya kughure mundurundu aka kare papentjendi aka raperere. ¹⁷ Liyuva limwe Yesus ghuye kuna kuronga, mbunga yavakafumu yava Farisayi navarongi vaveta kwayire avashungiri vaterere kumarongo ghendi, ntani vavo kwatundire kudimukunda daku kushuva-shuva damushirongo shaGalileya namuYudeya ntani nakushitata shaYerusalemu. Nkondo daHompa Karunga dakuverura maghuvera naghantje kwakalire papendi. ¹⁸ Yesus ghuye kuna kuronga, makura vakafumu vamwe kwayita muntu wakuvera shirema shamundambo, vavo kwamushimbira paghuro wendi, kwashanine vamutware kwaYesus munda yandyugho vaka murangeke kumeho yendi. ¹⁹ Ano ngoli kapi vawanine mpito yaku ngena vayende munda vamutware kwaYesus mukondashi mbunga yayinene kwayuliremo, makura avarondo pawiru yandyugho avatomona waranda vamutupike ayende munda, vavo kwasheghumuna ghuro wendi, mukatji ka mbunga, mpopo akalire Yesus vamuture kumeho yendi. ²⁰ Yesus opo amonine ashi vavo kuna kara nalipuro lya linene, Ghuye aghamba ashi, ''Mukafumu, ndyo doye vana dikughupiripo.'' ²¹ Makura varongi vamatjangwa navaFarisayi avatameke kukupura mapuro ghaweno, makura avaghamba ashi, ''Are mwene ghuno waku ghamba nkango daku shwaghura Karunga? Atwe twa yiva nawa-nawa ashi kwato wakughupapo naku dongonona ndyo davantu, nkwandi Karunga pantjendi ti ahuru?'' ²² Ano ngoli Yesus, ayivire ashi vinke vana kughayara mundunge davo, Ghuye avalimburura nakuvapura weno ashi, ''Mukonda munke muna kukupulira vyaweno mudimushima denu? ²³ Vinke vyaghurerupo kughamba, muku ghamba ashi, 'Ndyo doye vana dighupupo' ndi muku ghamba ashi, 'Shapuka yenda'? ²⁴ Mumone ghuno murume kuna veruka mpo ngoli shi anwe nga muyive ashi Mona Muntu kwakara nankondo pano palivhu daku ghupirapo vantu ndyo davo,''_ Makura ghuye atantere murume washirema ashi_ ''Ame kuna kukutantera weno, shapuka, damuna ghuro woye ntani ka yende kumundi wenu.'' ²⁵ Ghuno mukafumu mpopo averuka ntani ashapuka kumeho yavantu adamuna ghuro wendi opo aralire. Makura ayendi kumundi wendi, ghuye atapa mpandu nakutanga Karunga. ²⁶ Vantu navantje kwatetukire ntani navo avatapa mpandu nakutanga Karunga. Vavo kwakalire naghoma naghutjirwe waghunene, makura avaghamba ashi, ''Atwe tuna mono vitetu vyavinene namuntji.'' ²⁷ Kuruku rwavino vishorokwa, Yesus atundupo palivhango aka yenda makura amono mukafumu wakufutita mutero walidina Levi ghuye kuna shungiri mutende yakufutira mutero. Yesus amu tantere ashi, ''Shapuka nkwame ghukare murongwa wande.'' ²⁸ Makura Levi ashapuka amukwama Yesus, ghuye kwashuva navintje kunyima. ²⁹ Makura Levi awapayiki shipito shashinene mumundi wendi shaYesus navarongwa vendi. Vafutiti mutero vavayingi kwapongire ntani navantu vamwe vavayingi kwashungilire kutafura yakuyura kuna kulya kumwe ndya. ³⁰ Makura mbunga yavaFarisayi naVarongi matjangwa avatameke kushivana vatantere varongwa vaYesus, naku ghamba ashi, ''Mukonda munke muna kulyera ndya nakunwa kumwe naVafutiti mutero ntani navantu vandyo?'' ³¹ Makura Yesus avalimburura ashi, ''Vantu vandyewa-ndywa parutu kapi vahepa mupangi; vantu vakuvera mbo vaku shana kumona mupangi. ³² Mo ngoli, Ame kapi naya mukuya shana vantu vavahungami, nane ngoli ame kwaya kuvantu vandyo mposhi vakushighure vatunde kundyo.'' ³³ Vampititi vava Yuda kwatantere Yesus ashi, ''Varongwa vaYohanesi vavo kuraperera nakudililira kehe pano, ntani Varongwa vaVafarisayi navo kuruwana ndapero daweno. Ano ngoli Varongwa voye ove Yesus vavo kuhokwa tupu kulya nakunwa.'' ³⁴ Yesus avalimburura nakuvatantere ashi, ''Are wakutantera vantu vaku ponga pashipito shalikwareko ashi kapi shi vadyobwane ndya dapa shilika shankwara nkene shi mukwali ghuye mpwali mukatji kavo? ³⁵ Ano ngoli ruvede nga rutikamo opo nga tundamo mukwali mukatji kavo, mumayuva ngogho navo ngava raperera nakudililira.'' ³⁶ Makura Yesus avatantere nkango davishewe navifanikito vyaweno ashi. ''Kwato muntu waku taghura shivando shalikeshe lya lipe ature naku hondyera awapeke lirwakani lya likuru-kuru likare kuna wapa. Nkene shi aruwana vyaweno, ghuye nga dyonaghura lirwakani lya lipe nga litavaghuke, mukondashi shivando shalikeshe lyaku kurupa kwato kugwaneka ntani kwato kuwapera muku shitura palirwakani lya lipe. ³⁷ Kwato wakudunga marovhu ghamape apungure mushipapa shashikuru-kura. Nkene ngaghu ruwana vyaweno, marovhu ghamape nga ghatomona shipapa shashikuru-kuru, makura nga ghukombanita marovhu nga ghatekera palivhu ntani shipapa nasho nga shidyonaghuka. ³⁸ Ano ngoli nkene kuna kudunga marovhu ghamape ghuna hepa kugha tura mushipapa shashipe. ³⁹ Nkene shi ove muntu wakunwa nakumakera marovhu ghamakuru-kuru nwa tupu ngogho, kwato nka kushana kumakera kumarovhu ghamape makura nga ghughambe, ashi, 'Marovhu ghamakuru-kuru kutovara ghunene.'''