¹ Mumwaka wamurongo-na-mwaka-ntano daTiberius Sisara walipangero lyava Roma waku pangera mughudyuni - paruvede rwaPontius Pilatus ghuye kwakalire Ngughuru wamu Yudeya, Herodes kwakalire mupangeli wamu Galireya, ntani mughunya Herodes walidina Felepu kwakalire mupangeli washirongo shaItureya ntani nashirongo shaTirakonitisi, ntani Lusaniyasi ghuye kwakalire mupangeli washirongo shaAbulene, ² paruvede runo Anasi naKayiyafasi kwakalire vapirisiteli vavanene muYerusalemu - Karunga kwatapire Nkango dendi kwaYohanesi mona Sakariya ghuye kuna kara mumburundu. ³ Yohanes kwayenda kumaruha ghavirongo navintje ovyo vyakundurukido Yorodani, kwaronga naku yuvita Mbudi yaku tjindja ghukaro vakushighure mposhi vawane liyoyero lyamu mema lyaku dongononapo ndyo davo. ⁴ Mwaka dina kapito mumbapira yamuporofete Yesaya kwatjangamo ashi, ''Liywi lya ghumwe kuna kuyiyira mumburundu ashi, 'Wapayikenu ndyira yaHompa, kenitenu naku vyukilita ndyira yendi yikare yina vyukiliri. ⁵ Dimuramba nadintje ngava difutira dishetakane, ntani ndundu namadamenena ngava difutira nga dishetakane, ntani vitaghura vyakupenga-penga navyo ngava viwapeka vikare kuna wapa kuna vyukiliri, ntani mavhango nalivhu lya kudama-dama ngava lishetakanita ngava dikiramo vitaghura vyaviwa, ⁶ ntani navantje ngava kenga namantjo kuviruwana vyaKarunga omo nga yoghora vantu vendi vatunde mundyo.'' ⁷ Makura Yohanesi aghamba atantere mbunga yavantu ovo vayiro kukwendi avakushe mumema ashi, ''Anwe vana vamayoka ghavambaroka! Are ana mutantero nakumurondora nakumutjilita muduke muyekuno mushenduke nakutjira lishandu lya Hompa nampanguro yendi yaghugara yakumeho? ⁸ Kutunda paweno, yimenu ngoli nyango yaghuhunga yayiwa muneyede ashi mwatjindja ghukaro wenu, ntani kapishi mutameke kughayara ashi, ''Atwe kwatunda mulira lya Aburahamu nyakulyetu, 'ntani ame kuna kumutantera nakumurondora ashi Karunga kuvhura kutura ghano mawe ghana raro pano vakare vana vaAburahamu. ⁹ Pa weno, likuva lyapwa kare kurora lya kuteta ndandani davitondo. Kehe shino shitondo shakupira kuyima nyango yayiwa yaghuhunga, kushitetapo shitundepo makura kushivhukumina mumundiro.'' ¹⁰ Makura vantu vamwe ovo vakaliro mumbunga avamupura, ashi, ''Vinke ovyo tuvhura kuruwana?'' ¹¹ Ghuye avalimburura naku vatantera ashi, ''Nkeneshi ove kuna kara navikoverero viviri, damuna shikoverero shoye shimwe ghutape kwaghu ana karo rutu-rutu, ntani nkeneshi ove kuna kara nandya dadiyingi, damuna ghutapeko kwaghu wakupira ndya.'' ¹² Ntani vafutiti mutero vamwe navo avaya kukwendi avakushe muliyoyero lyamu mema, ntani navo avamupura ashi, ''Mushongi, vinke tuna hepa kuruwana?'' ¹³ Ghuye avatantere ashi, ''Kapishi kutininika vantu vafute vimaliva vyaviyingi vyakupitakana pavi lyaturapo lipangero lya vaRoma.'' ¹⁴ Ntani vakavita vamwe navo avaya kukwendi avamupura ashi, ''Atwe ne weni? Vinke tuna hepa kuruwana?'' Ghuye avatantere ashi, ''Shayekenu kushakana vimaliva vyavantu kunkondo, ntani shayekenu kurundira vantu ntani shayekenu kughamba vimpempa. Tamburenu shiringa yamfuto yenu oyo mwawananga ndyoyo yagwanapo.'' ¹⁵ Vantu kwataterera nankondo ashi Kirisitusi Muyogholi kuna kuya, vantu vavayingi kwakupulire munda yadimutjima davo kuhamena Yohanesi mukushi, ashi walye ndye ngakaro Kirisitusi Muyogholi. ¹⁶ Yohanesi mukushi avalimburura naku vatantera navantje ashi, ''Ame kuna kumukusha tupu mumema, ano ngoli mpwali ghumwe ogho ana kuyo kuruku rwande ghuye kwakara nankondo dadinene dakupitakana papande, ntani ame kapi nahungama kushutura rughodi rwaku nkaku dendi. Ghuye kuna kuya nga mukushe naMpepo yaKupongoka ntani namu Mundiro. ¹⁷ Ghuye kuna kwaterere shidyamito mulighoko lyendi ntani natjipa yakugaghununa mungu namahangu namantorwa ntani ghuye kupungura mahangu namantorwa mushishete. Ntani ghuye kuvhukumina mungu navirwenge vipwe mumundiro wakutwera ghunene wakupira kuveva.'' ¹⁸ Ntani Yohanesi kwatapa makorangedo ghankondo kuvantu vakushighure vatjindye ghukaro wavo, ntani Yohanesi ayuvita Mbudi YaRufaho yayiwa kuvantu. ¹⁹ Ntani Yohanesi kwatantilire Hompa Herodesi mupangeli washirongo vyakuhamena Herodesiya mukamali wana kufa mukurwendi Filipu ashi, nakuwapashi ghuye kukwara Herodisiya mukamali wana kufa mukurwendi Filipu, yino ndyo yayinene, ntani ghuye kwaruwanine viruwana vyaghurunde kushipara shaKarunga ghuye shimpe kuna kuparuka, ²⁰ ntani ghuye kwawederera ko kundyo dendi paku tantera vakavita vendi vakwate Yohanesi vamuture mudogorongo. ²¹ Paruvede runo, Yohanesi shimpe kapi vana mutura mudorongo, vantu navantje kwayendire kukwendi vavakushe liyoyero lyamu mema, ntani Yesusi naye kwayendire kukwendi vamukushe mumema, makura araperere, ghuye shimpe kuna kuraperera, liwiru alipaturuka likare kuna gharuka, ²² makura Mpepo yaKupongoka ayi sheghumuka papendi mushishwi shaliputukuwa, makura liywi ali tundu muliwiru kuna kughamba ashi, ''Ove Monande ogho nahora ghunene. Ame kuna kara naruhafo kukoye. ²³ Makura Yesus kwatamikire viruwana vyendi, Ghuye kuna kara namwaka dimurongo ntatu. Ghuye monarume waYosef, Yosef monarume waHeli, ²⁴ Heli monarume waMatati, Matati monarume waLevi, Levi monarume waMeleki, Meleki monarume waYanayi, Yanayi monarume waYosef. ²⁵ Yosef monarume waMatatiyasi, Matatiyasi monarume waAmosi, Amosi monarume waNahumu, Nahumu monarume waEsili, Esili monarume waNagayi, Nagayi monarume waMayati, ²⁶ Mayati monarume waMatatiyasi, Matatiyasi monarume waSemeyini, Semeyini monarume waYoseki, Yoseki monarume waYoda. ²⁷ Yoda monarume waYoyanana, monarume waReyesa, monarume waSerubabeli, monarume waSalatiyeli, monarume waNeri, ²⁸ monarume waMeleki, monarume waAdi, monarume waKosamu, monarume waElumadamu, monarume waEre, ²⁹ monarume waYoshwa, monarume waEliyaseri, monarume waYorimu, monarume waMatati, monarume waLevi. ³⁰ Levi kwakalire monarume waSimeon, Monarume waYudah, monarume waYosef, monarume waYonam, monarume waEliakim, ³¹ monarume waMelea, monarume waMena, monarume waMatata, monarume waDavid, ³² monarume waYesi monarume waObed, monarume waBowasi, monarume waSalmon, monarume waNashshon. ³³ Ntani Nashoni monarume waAmenadabu, monarume waAduminu, monarume waAruni, monarume waHeshironi, monarume waPeresi, monarume waYuda, ³⁴ monarume waYacobu, monarume waIsaki, monarume waAburahamu, monarume waTera, monarume waNahoru, ³⁵ monarume waSerugu, monarume waReghu, monarume waPelegu, monarume waEberu, monarume Shela. ³⁶ Shela kwakalire monarume waKayinani, monarume waArufasadu, monarume waShemu, monarume waNowa, monarume waLameki, ³⁷ monarume waMetusela, monarume waEnoku, monarume waYaredu, monarume waMahalalele, monarume waKayinani, ³⁸ monarume waEnosi, monarume waSetu, monarume waAdamu, monarume waKarunga.