¹ Pa shirugho ntjosho, Sisara Augustus kwatjangire nakutapa veta yapatjangwa yitunde kulipangero lyendi ashi vana hepa kuvarura naku tjanga shivaro shavantu navantje vamu ghudyuni. ² Shino kwakalire shirugho shaku hova shakutjanga nakuvarura vantu vamughudyuni, paruvede runo Kirinus ghuye kwakalire ghughuru wamukunda mushirongo shaSiriya. ³ Kehe ghuno kwayendire avyuke kushitata shamvharera yendi aka kutjangite naku katapa lidina lyendi. ⁴ Makura Yosef naye ayendi avyuke kuGalileya, atunde kushitata shaNasareti, ayende kushirongo shaYudeya, kushitata shaHompa Dafiti, osho vatwenyanga ashi Betelehemu, mukondashi Dafiti kwatunda mulira lya ghuHompa mwaDafiti. ⁵ Ghuye kwayendi aka kutjangite naku katapa shivaro kumwe namukamali wendi wakuvandekera walidina Mariya, ghuye kwakalire namarutu maviri. ⁶ Shirugho shino vavo kuna kara mushitata shaBetelehemu, makura makwedi naruvede rwaMariya rwakushampuruka mukeke wendi naro runatikimo. ⁷ Ghuye ashampuruka mukeke waMumati, wambeli yendi, makura amu tura pamwaye naku mufikilira, amurangeke mushikumba shakulyera vimuna muhambo yavimuna, mukondashi ndyugho kwayulire vagenda ntani kapi mwahupire ndyugho dakurara. ⁸ Mushirongo kwakaliremo vashita vavo kuna kukunga vimuna mumafuva, muruvede rwamatiku. ⁹ Makura muEngeli waHompa amoneke kukwavo, ntani ghuyerere waHompa aghuteme papavo naku vakundurukida, vavo avakara naghoma waghunene. ¹⁰ Makura muEngeli avatantere ashi, ''Kapishi mutjire ntani kapishi mukare naghoma, mukondashi ame kuna yita kukwenu Mbudi yaRuhafo yiwa oyo ngayi yito ruhafo rwarunene kuvantu navantje. ¹¹ Muliyuva lya namuntji mushitata shaDafiti kuna shampuruka mo Muyogholi! Ghuye ndye Kirisitusi Hompa! ¹² Oshino ntjo shiyivito nakutapa kukwenu omo ngamu mudimburura: Yendenu mushitata shaBetelemu ngamu kawana mukeke vanadingiri pamakeshe mbyo vana murangeke pashikumba shakulyera vimuna. ¹³ Mpopo tupu akalire ghuno muEngeli makura apa moneke mbunga yavaEngeli vavayingi vamuliwiru, vavo kuna kutanga nakupanda nakushamberera Karunga, vavo kuna kughamba ashi, ¹⁴ ''Mfumwa naghuyerere kwaKarunga wamuliwiru-wiru, ntani, mpora namatungiko nalirago vikare palivhu mughudyuni naghuntje kuvantu vakupura mwaHompa.'' ¹⁵ Opo vatundirepo vaEngeli papavo vavyuke muliwiru, makura vashita vandywi avaghamba mukatji kavo ashi, ''Tushapukenu tuyende kuBetelehemu tukakenge vitetu ovino vina shoroko, kuhamena kwavino ana tuneyeda Hompa.'' ¹⁶ Makura avakwangura kuyenda vakatike, avakawana Mariya, naYosefu, ntani namukeke, ghuye kuna murangeke mushikumba shakulyera vimuna. ¹⁷ Opo vamanine kukenga mukeke, makura avatapa nakutantera navantje ovo vakaliropo mbudi yakuhamena ghuno mwanuke. ¹⁸ Vantu navantje ovo vayuviro yino mbudi oyo vaghambire vashita vavimuna, kwatetuka. ¹⁹ Ano ngoli Mariya kwakupulire nakughayara ghunene kuhamena navintje ovyo ayuvire, akara namakupuliro ghunene munda yamutjima wendi. ²⁰ Makura vashita vavimuna avavyuka kuvimuna vyavo, vavo kuna kufumadeka nakutanga nakushamberera Karunga kuhamena kwanavintje ovyo vayuvire, navi vamonine ntani navi vyashorokiro, yira momu tupu vavi tapire nakuvighamba kukwavo. ²¹ Kuruku rwamayuva matano-na-matatu, mwanuke wamumati vana hepa kumuruwana vyavamba vamutete, ntani avamuruku lidina lyendi ashi Yesusi, lino lidina kwalitapire muEngeli ghuye mukeke shimpe kapi ana kara mulira lya vawina. ²² Opo atikiremo mayuva ghavo ghaku kara vana kushuruka, kutwara yira momu vatjanga muveta yaMoses, makura vakurona vendi avashapuka vatware mwanuke kuntembeli yaHompa kuYerusalemu vaka mutungike nakumutapa kushipara shaHompa. ²³ Veta yaHompa kwatanta ashi, ''Kehe ghuno mwanuke wamumati wambeli wakuhova kurupuka mulira lya vawina vana hepa kumutapa vamutungike nga kare waHompa.'' ²⁴ Ntani nka veta kwatanta ashi vakurona vamwanuke vana hepa kutapa naku dyamba ndjambo kutwara momu yatanta veta yaHompa ashi, ''Muna hepa kutapa mapato maviri ndi maputukuwa ghamadidi maviri.'' ²⁵ Momo, muYerusalemu kwakaliremo mukafumu walidina Simiyoni, mukafumu wamuhungami wakulimburuka nakufumadeka veta daHompa. Ghuye kwatatilire ghunene kwaKarunga nga tume muyogholi kumuhoko wava Isirayeli, ntani Mpepo yaKupongoka kwakalire papendi nakumupititira. ²⁶ Mpepo yaKupongoka kwamutantilire nakumuneyeda ashi ghuye kapi nga fa vamuvhumbike ghuye ahana kumona Kirisitus ogho nga karo Hompa naMuyogholi. ²⁷ Mpepo yaKupongoka kwatantera, Simiyoni ayende kuntembeli. Opo vayatikire vakurona vaYesus, mukeke vamutungike nakuruwana navintje yira momu vyakarapo pampo yavo napaveta, ²⁸ makura Simiyoni aghupu mukeke amu kwata mumaghoko ghendi makura aghamba nkango dakupandura nakutanga Karunga, ashi, ²⁹ ''Hompa Karunga weno pulitira ngoli mukareli ghoye ayende mundyira yambili, weno nkango doye dina tikilirimo kwanavintje ovyo waghamba. ³⁰ Mantjo ghande ana mono Muyogholi, ³¹ ogho watuma kukwetu nga yoghore vantu navantje: ³² Ogho nga yito shite naghukenu naghuyerere nga shorore Mbudi yaRuhafo yaghushili kuvaPagani ntani Ghuye nga yita mfumwa naghuyerere kumuhoko ghoye wava Isirayeli.'' ³³ Vashe navawina vamwanuke kwatetukire kwadino nkango aghambire Simiyoni kuhamena kwamwanuke. ³⁴ Makura Simiyoni akambeke lighoko lyendi atungiki mwanuke, makura atantere Mariya vawina vamwanuke ashi, ''Terera nawa, ghuno mwanuke nga renkita vantu vavayingi vamu Isirayeli nga vatunde kwaKarunga ntani nka vantu vavayingi ngava kushighure vavyuke kwaKarunga, ntani ghuye kwaya nga tape marondoro kuvantu ntani nga kare shiyivito kwanavantje, ano ngoli vavayingi ngava mukanana - ³⁵ ntani nka rufuro rwaghutwe nga rutomona munda yamutjima ghoye namumaghayaro ghoye ove vawina - mposhi nga vimoneke nakushoroka navintje ovyo vyavando munda yamutjima ghoye ntani navi vyavando munda yadimutjima davantu vavayingi ngavi shoroke nakumoneka paghukenu.'' ³⁶ Muporofete wamukadi walidina Ana naye mpo akalire. Lidina lya vashe vaAna mbo Faniwele ntani vavo kwatunda mulira lya Asheri. Muporofete Ana kwaparukire liparu lya mughukurupe. Mugholikadi Ana kwaparukire tupu kumwe namukafumu wendi mwaka dakutika kuntano-na-mbiri makura adohoroka, ³⁷ makura ghuye kwakalire mukadi wakufita vyendi ntani kwakalire mughudike mwaka dimurongo ntano-na-ntatu-na-mwaka ne. Ghuye ka karanga muntembeli kehe pano ntani kuruwana muntembeli kehe liyuva ntani ghuye kuraperera kehe pano naku dililira matiku namwi. ³⁸ Paruvede ndoro Ana naye ayatiki muntembeli, makura atapa mpandu kwaKarunga kuhamena kwaghuno mwanuke, ntani atantere vantu navantje vakaliropo vyakuhamena ghuno mwanuke ogho vataterera nga yite liyoghoro muYerusalema. ³⁹ Vakurona vamwanuke opo vamanine kuruwana navintje yira momu tupu vyawapera kutwara muveta yaHompa, makura avavyuka kuGalileya, kushitata shavo shaNasareti. ⁴⁰ Ghuno mwanuke akuru parutu ntani akara nankondo ana pama, ntani akara nandunge naghukonentu waghuyingi, mukondashi Nkenda YaKarunga kwakalire papendi. ⁴¹ Kehe mwaka vakondi vendi kuyenda kuYerusalemu kushilika shakuvhuruka mfa nalivhumbuko ndi Paska. ⁴² Ghuno mwanuke opo akalire namwaka murongo-na-mwaka-mbiri, vakurona vendi avayendi nka kumwe naye kuYerusalemu paruvede rwakuvhuruka shilika shamfa nalivhumbuko. ⁴³ Opo shapwire shilika kuruku rwamayuva ghamasheshu tupu, vantu avatameke kuvyuka-vyuka kumandi ghavo. Ano ngoli mwanuke wamumati Yesus akara momo muYerusalemu ntani vakurona vendi kwato ovyo vayivireko. ⁴⁴ Vavo kwaghayalire ashi mwanuke kuna piti kumeho nambunga yavantu vakuhova ovo vapitiro kumeho, vavo kwayendire ghure waliyuva limwe lyaku yura. Vakurona vendi ntani vana kudimburura vashane mwanuke kumwe nakupura mumbunga yavantu valikoro navaholi. ⁴⁵ Vakuro vendi kapi vamuwanine mwanuke, makura avavyuka nka kuYerusalemu vaka mushane momo. ⁴⁶ Kuruku rwamayuva matatu ghaku mushana avamuwana muntembeli, kuna shungiri mukatji ka varongi matjangwa, ghuye kuna shungiri kuna kuterera kumarongo ntani kuna kupura mapuro. ⁴⁷ Vantu navantje ovo vamuyuviro kuna kughamba kwatetukire kuhamena ndunge naghukonentu wendi waku ghamba nakulimburura mapuro kuhamena kumatjangwa. ⁴⁸ Vakurona vendi opo vamumonine, kwatetuka. Makura vawina avaghamba kwendi ashi, ''Monande, mukonda munke ghuna kuruwanena vyaweno kukwetu? Terera, vasho ntani name ove tuna kushana-shana ntani tuna kara nashinka kukoye.'' ⁴⁹ Mwanuke alimburura kukwavo ashi, ''Mukonda munke muna kuntjana-ntjanena? Kapi mwayiva ashi ame kwaya kuviruwana ntani nahepa kuruwana viruwana vyava Vava? ⁵⁰ Ano ngoli vakurona vendi kapi vayivire nakukwata lighano dino nkango aghambire kukwavo. ⁵¹ Makura ayendi navakurona vendi vavyuke kukwavo kuNasareti ntani mwanuke alimburuka nakufumadeka vakurona vendi. Vawina vamwanuke kwakupura vininke vyaviyingi munda yamutjima wavo. ⁵² Makura mwanuke Yesus akuru parutu napa mutika ntani nka akuru pandunge akara naghukonentu waghuyingi, ntani Karunga amu horo ntani amu tungiki ntani vantu navo avamuhoro ghunene.