¹ Yesus opo aya pitire, ghuye amono murume oghu vashampuruka ghuye shitwiku. ² Varongwa vendi avamupura ashi, ''Murongi, are po mundyoni, ndye ghuno murume ndi vakurona vendi, ovyo vamu shampuruka ghuye shitwiku? ³ Yesus avalimburura ashi, "Ghuno murume kapishi mundyoni, ntani nava kurona vendi navo kwato, vino kwashoroka mpo ashi viruwana vyaKarunga vishorokere mumwendi. ⁴ Atwe tuna hepa kuruwana viruwana vyendi ogho antumo mpopano lina kara ko liyuva. Matiku kuna kuya kwato waku vhura kuruwana viruwana. ⁵ Shiruwo shino nakara mughudjuni, Ame shite shamu udyuni. ⁶ Opo amanine kughamba Yesus dino nkango, ghuye atipiri manyenye palivhu, arungu likare litata lyaku runga manyenye nalivhu, makura akwiti litata pamantjo ghendi. ⁷ Ghuye amu tantere ashi, ''Yenda, ghuka kukushe mulidiva lya Siroya'' (Kutanta ashi ''Ntumi''). Ghuno murume ayendi, aka kukusha, opo aka vyukire ghuye kuna kumona. ⁸ Vantu vamaparambo vendi kumwe navo vamu kengiro omo karombagheranga avaghamba ashi, ''Oghuno murume nane kapishi ndye kashungirago naku rombaghera vantu ndi?'' ⁹ Vantu vamwe avaghamba ashi, "Ndye ndyeghuno.'' Vamwe avaghamba ashi, ''Hawe, kapishi ndye kwaku fana tupu naye.'' Ghuye mwene aghamba ashi, ''Ame.'' ¹⁰ Vavo avamupura ashi, ''Weni omo ana pahuka mantjo ghoye?'' ¹¹ Ghuye alimburura ashi, ''Murume walidina Yesus ndye ana rungo litata lyaku vhonga livhu namanyenye mbyo ana liramba pamantjo ghande mbyo ana ntantere ashi, ''Yenda kulidiva lya Siloya ghuka kukushe.' Ame mbyo nayendi nuka kukushe makura mbyo napahuka mbyo naku kenga weno.'' ¹² Vavo avamupura ashi, ''Kuni nko oku ana kara weno ghuye?'' Ghuye avalimburura ashi, ''Walye, ame kapi nuyiva.'' ¹³ Vavo avamutwara ghuno murume akaliro shitwiku kuva Filisayi. ¹⁴ Liyuva lino kwakalire lya Sabata opo arungire Yesus litata akwite pamantjo ghendi makura ghuye apahuka. ¹⁵ VaFalisayi navo avamupura nka ashi weni omo ana pahuka mantjo ghendi avhure kukenga. Ghuye avatantere ashi, ''Ghuye kuna ramba litata pamantjo ghande, mbyo nayendi nuka kukushe mbyo napahuka mbyo naku kenga weno.'' ¹⁶ VaFalisayi vamwe avaghamba ashi, ''Ghuno murume waweno kapishi kwaKarunga atunda mukondashi ghuye kapi apongora naku fumadeka liyuva lya Sabata.'' Ntani vamwe avapura ashi, ''Murume wamundyoni weni omo avhura kuruwana vitetu vyaku tika pano?'' Makura avavareke kuku kanana vavene navene. ¹⁷ Vavo avapura nka mwene shitwiku ashi, ''Ove ne weni omo ghuna kumu ghayara, oghuno murume ana veruro mantjo ghoye ghapahuke?'' Murume washitwiku aghamba ashi, ''Ghuye muporofeta.'' ¹⁸ Ano ngoli vaYuda vavo kapi vapulire ashi ghuno murume kwakalire shitwiku makura mbyo ana pahuka weno kuna kumona, vavo avayita vakurona vendi ghuno murume apahukiro. ¹⁹ Vavo avapura vakurona vendi ashi, ''Oghuno ndye monenu oghu mwatanta ashi kwamu shampuruka shitwiku? Weno ne weni omo ana pahuka amone?'' ²⁰ Vakurona vendi avalimburura ashi, ''Atwe tuna yiva ashi ghuno ndye monetu ghuye kwamu shampuruka shitwiku. ²¹ Weni omo ana pahuka atameke kumona, atwe kapi tuyiva ntani muntu oghu ana pahuro mantjo ghendi, atwe naku viyivashi. Mupurenu mwene, ghuye mukurona. Kwamu tantera mwene.'' ²² Vakurona vendi kwaghambire vino, mukondashi vavo kwatjilire vaYuda. Mukondashi vaYuda vamanine kukuyuvha ashi kehe ghuno vamona kuna kughamba ashi ghuye ndye Kristus, ngava mutjida ngakare pandye yaSinagoge. ²³ Mukonda yino, vakurona vendi mbyo vaghambilire ashi, ''Ghuye mukurona, mupurenu mwene.'' ²⁴ Vavo makura avamuyita rwaghuviri ghuno murume akaliro mutwiku avamutantere ashi, "Tapa mfumwa ghutange Karunga. Weno atwe tuna yiva ushili ashi ghunya murume mundyoni.'' ²⁵ Murume oghu akalire mutwiku avalimburura ashi, ''Ame kapi nayiva ashi ghunya murume mundyoni.'' Shininke shimwe tupu osho nayiva shino ashi: Ame kwakalire mutwiku, ano ngoli ntantani kuna kumona.'' ²⁶ Vavo avamupura nka ashi, ''Weni omo ana kuruwana? Weni omo ana pahura mantjo ghoye?'' ²⁷ Ghuye avalimburura ashi, ''Yira momu tupu namu tantere kare, ano ngoli anwe kapi muna kupura! Mukonda munke muna kushanena nka ashi muvi yuvhe? Anwe kapi muna shana kukara varongwa vendi, ndi walye mo muna shana? ²⁸ Vavo avagarapa avamutuku makura avaghamba ashi, ''Nkwandi ove murongwa wendi, atwe varongi veta yaMoses. ²⁹ Atwe twa yiva ashi Karunga kaghambanga naMoses, ano ngoli atwe kapi tuna yiva ashi ghuno kuni nko atunda.'' ³⁰ Ghuno murume avalimburura kumwe naku ghamba ashi, ''Vino vitetu vyavinene, anwe mupire kuyiva oku atunda ghuno murume, ntani ghuye ana apahura mantjo ghande. ³¹ Ntani twayiva ashi Karunga kapi alimbururanga ndapero dava ndyoni, ano ngoli Karunga kulimburura, ndapero davantu vaku mukarera naku tikitamo vipango vyendi. ³² Vino shimpe kapi vyashoroka rumwe ashi muntu oghu vayita mutwiku kutunda wanuke vamu pahure mantjo. ³³ Nkeneshi ghuno murume kapishi kwaKarunga atunda, ghuye ndi kwato vyaku vhura kuruwana pamwene.'' ³⁴ Vavo avamulimburura naku mutantera ashi, ''Ove ne kwaku shampurukira mundyo, mbyo ghuna shana kutu ronga atwe?'' Makura avamutjidamo arupuke pandye. ³⁵ Makura Yesus ayuvhu yino mbudi ashi Vafarisayi vana ka tjidamo ghuno murume muSinagoge. Makura ghuye ayendi aka muwana amu pura ashi, ''Weno ghuna pura mwaMona Muntu ndi?'' ³⁶ Ghuye alimburura naku ghamba ashi, ''Are mwene ghuno, Hompa, ntantere mposhi nuvhure kupura mumwendi?'' ³⁷ Yesus amu tantere ashi, ''Ove ghuna mumono kare, ndyeghuno ana kughambo nove weno.'' ³⁸ Ghuye aghamba ashi, ''Hompa, ame napura,'' makura atongamene ngoro araperere kukwendi. ³⁹ Yesus aghamba ashi, ''Ame kwaya muno mughudjuni nuya pangure mposhi vatwiku vapahuke vatameke kumona ano ngoli ovo vakaro namantjo ghaku kenga vavo vakare vatwiku vapire kumona.'' ⁴⁰ VaFalisayi vamwe ovo vakaliro palivhango ovo vayuviro dino nkango dendi avamupura ashi, ''Atwe natwe ne tuva twiku ndi?'' ⁴¹ Yesus avatantere ashi, ''Nkeneshi anwe muvatwiku, kutanta shi anwe ndi kwato ndyo, ano ngoli anwe kuna kughamba ashi, 'Atwe kuna kumona,' Mbyo muna karerere shimpe mundyo denu.''