¹ Yesus naye ayendi kuNdundu yaMauywe nko aka ralire. ² Ngura-ngura yayinene liyuva lyaku kwamako ghuye ameneke nka ayende kuNtembeli, mbunga yavantu navo avaya kuNtembeli; makura ashungiri kumwe navo atameke kuva ronga. ³ Varongi matjangwa nava Falisayi avayita mukamali ogho vawanine avamu kwata ghuye kuna kushondera. Avamuyita kukwa Yesus avamutura mukatji ka vantu. ⁴ Vavo avamutantere ashi, ''Murongi, kuna wana ghuno mukamali ghuye kuna kuruwana vyarushonda mbyo tuna mukwata. ⁵ Kutwara muveta, yaMoses oyo atapa kukwetu mukadi waweno twa hepa kumu dipaya namawe; Kutwara mumoye vinke ghuna kughambako vyaku hamena kwaghuno mukadi waweno?'' ⁶ Vavo kwaghambire vino mpo shi vawanenepo mpito vamu rundire naku tapa undyoni kukwendi, makura Yesus anyongama atjange palivhu nanyara yendi. ⁷ Vavo shimpe avatwikiri kumu pura mapuro, makura ashapuka avatantere ashi, ''Renkenu kehe ghuno waku pira ndyo mukatji kenu, ndye ahova kutoghona liwe lyaku hova mwaghuno mukadi.'' ⁸ Yesus anyongama nka shimpe, atjanga palivhu nanyara yendi. ⁹ Vavo opo vayuvire dino nkango mudi mutjima davo, avatameke kutundapo ghumwe naghumwe, kwahova kutundapo mukurona dogoro aka hulilira mwanuke mukondashi navantje vandyoni. Makura Yesus ahuparapo pentjendi, kumwe namukadi oghu vatulire mukatji. ¹⁰ Yesus akankuka ayimana makura amu pura ashi, ''Mukadi, kuni nko vana kara ovo vana kurapoto? Nane kapi vana karapo vantu pano ovo vana kurapoto ashi vakupangure naku kutengeka?'' ¹¹ Ghuye aghamba ashi, ''Hawe weno kwato oghu ana karopo, Hompa.'' Yesus amu tantere ashi, ''Name shi kapi nuvhura kukupangura naku kupa undyoni. Weno kayende kapishi ngaghu kadyone nka.'' Kenga matjangwa ghaYohanes 7:53. Ntani matjangwa ghamwe kwato Yohanes 7:35-8:11] ¹² Yesus avatantere nka, ashi, ''Ame shite shaghukenu shamu udyuni; kehe ghuno waku kwama mumwande kapi nka ngayenda mumundema nane ngoli ghuye ngayenda mughukenu waliparu lya naruntje.'' ¹³ VaFalisiya avamutantere ashi, ''Ove kughamba ghutape umbangi wana ghumoye; ano ngoli umbangi ghoye kapi shi waushili.'' ¹⁴ Yesus avalimburura kumwe naku vatantera ashi, ''Nampili nutape umbangi kukwande naumwande, umbangi wande wagho waushili. Ame nayiva oku natunda ntani ame nayiva oku naku yenda, mbyovyo shi anwe kapi mwayiva oku natunda ntani noku naku yenda. ¹⁵ Anwe kupangura muntu kutwara omo ana kumoneka parutu; ame kwato oghu nupangura weno. ¹⁶ Nkene shi ame naku panguro, kupangura uhunga mukondashi kapi napanguranga pentjande, nane ngoli kumwe naVavava ovo vantumo. ¹⁷ Ushili, muveta yenu kwatjangamo ashi umbangi wavantu vaviri ngo waushili. ¹⁸ Ame kuna kutapa umbangi waku hamena kukwande naghu mwande, ntani Vavava ovo vantumo navo kutapa umbangi kukwande.'' ¹⁹ Vavo avamupura ashi, ''Kuni nko vana kara Vasho?'' Yesus avalimburura ashi, ''Anwe kapi mwandyiva me naVavava shi; ashi ndi mwandyiva me, ndi mwayiva naVavava navo.'' ²⁰ Ghuye kwaghambire dino nkango kuna kara mundyugho yaku pungura vimbangu vyavimaliva vyavi tapa munda yaNtembeli omo arongire vantu, kwato aghu avhuliro kumu kwata mukondashi shirugho shendi shimpe kapi shatikiremo. ²¹ Makura Yesus avatantere nka ashi, ''Ame kuna kuyenda ko; anwe ntani ngamu ntjana-ntjana dogoro ngamu fe nandyo denu. Oku naku yenda me, anwe naku vhura shi kuyenda ko.'' ²² VaYuda avaghamba ashi, ''Ghuye kuna shana aku dipaye mwene ndi? Mbyo ana kughambera ashi, 'Oku naku yenda anwe naku vhurashi kuyenda ko ndi'?'' ²³ Yesus avalimburura ashi,'' Anwe vapa ntunda yalivhu; Ame kwatunda muliwiru. Anwe vamuno mughudjuni; Ame kapishi wamuno mughudjuni. ²⁴ Mbyo, naku mutantera ashi anwe ngamu fera mundyo denu. Nkene kapi muna kupura mumwande ashi AME AME, anwe ngamu fera mundyo denu.'' ²⁵ Vavo avamupura ashi, ''Ove re mwene ve?'' Yesus avatantere ashi, ''Ovino naku mutantera weno mbyovi namu tantilire paku tameka. ²⁶ Ame kuvhura kumu pangura kuvi ninke vyavi viyingi ntani anwe ndi kumukara naundyoni kuvi ninke vyavi yingi. Ano ngoli, oghu antumo me ghuye kughamba ushili; ame mbyovyo nayuvhanga kukwendi ovyo aghambanga ghuye, name mbyo natanteranga vamu udyuni.'' ²⁷ Vavo kapi vakwatire lighano ashi ghuye kwava tantilire vyaku kuhamena kwaVashe. ²⁸ Yesus avatantere ashi, ''Opo ngamu muyerura Mona Muntu, ntani ngamu yiva ashi Ame Ame, ntani ame kwato ovyo ruwananga kunkondo dande. Ame kwaruwananga mbyovyo, vandonga Vavava. ²⁹ Oghu antumo kwakara name kehe pano, kapi antjuva nukare pentjande, mukondashi ame kuruwana mbyovyo ana panga ovyo vyamu yendo kumutjima.'' ³⁰ Yesus kwaghambire dino nkango kukwavo, makura vantu vavayingi avapura mumwendi. ³¹ Yesus atantere vaYuda ovo vapuliro nkango dendi ashi, ''Nkene ngamu kwaterera dino nkango damarongo ghande, anwe ndi ngamu kara varongwa vande vaushili; ³² anwe ndi ngamu kwata lighano ngamu yive ushili, makura ushili ngaghu mumangurure ngamu yoghoke.'' ³³ Vavo avamulimburura ashi, ''Atwe vana vaAbrahamu kapi twa kara rumwe vapika vavantu; weni omo ghughamba ashi, 'Ove ngaghu tumangurura ngatu yoghoke'?'' ³⁴ Yesus avalimburura ashi, ''Ushili, vyaushili, naku mutantera ashi, kehe ghuno waku tura ndyo ghuye kukara mupikawa ndyo. ³⁵ Mupika naku karerera moshi mumumundi namu likoro naruntje nanaruntje; ano ngoli mona ndye waku karerera mo naruntje nanaruntje. ³⁶ Mpo ashi, nkene Mona ana kushutura ghumanguruke ove ghuyowoke, vyaushili ove ngaghu manguruka ngaghu yoghoka. ³⁷ Ame nayiva ashi anwe valira lya Abrahamu; mbyo muna kushana kundipaya mukondashi kapi mwatambura nkango dande ntani marongo ghande mwato mumwenu. ³⁸ Ame kuna kumu tantera ghuna nkondo waVavava ogho vaneyeda kukwande, ano ngoli anwe kuruwana tupu ovyo vamuronga vakurona venu.'' ³⁹ Vavo avalimburura vamu tantere ashi, ''Atwe vana vaAbrahamu.'' Yesus avatantere ashi, ''Nkene shi anwe vana vaAbrahamu ndi kwaruwananga viruwana vyaAbrahamu. ⁴⁰ Weno, anwe kuna kushana mundipaye me, muntu nashororo nuneyede ushili kukwenu ogho nayuvha kwaKarunga. Abrahamu kapi aruwanine vyaku fana weno. ⁴¹ Anwe kuna kuruwana viruwana ovyo kava ruwananga vakurona venu.'' Vavo avamutantere ashi, ''Atwe kapi vatu vharera murushonda muvishwa; atwe twa kara naShetu ghumwe tupu: Karunga.'' ⁴² Yesus avatantere ashi, ''Nkene Karunga ndye Shenu, ndi mwakara nashihoro name, ame kwatunda kwaKarunga mbyo naya muno mughudjuni; ntani ame kapi naya pana ghumwande tupu, nane ngoli ghuye ndye antumo. ⁴³ Muna yiva ashi vinke ovyo muna kupira kukwata lighano dino nkango dande? Mukondashi anwe kapi mwatambura marongo ghande. ⁴⁴ Anwe kwatunda mwashenu, Satana, mbyo mwahora kukwama madogho ghashenu. Ghuye mudipayi kutunda tupu paku tanga shirugho, ghuye kapi akara naushili mukondashi mumwendi mwato ushili. Ntani ghuye kughamba vipempa, ntani ghuye kukwama vimpempa vyamwene mukondashi ghuye muna vipempa ntani ghuye ndye vashe vavipempa. ⁴⁵ Mbyovyo shi, ame kumu tantera ushili, ano ngoli anwe naku purashi mumwande. ⁴⁶ Opo muna kara weno kuna shana ashapukepo ghumwe aghaya neye undyoni wande? Nkene shi ame kuna kughamba vyaushili, konda munke muvhura kutapa ashi ovi muna kupira kupura mumwande? ⁴⁷ Kehe ghuno ahameno kwaKarunga ghuye kuyuvha atambure naku limburukwa kunkango daKarunga; ovyo mwapira kutambura naku limburukwa kunkango dendi mukondashi anwe kapi mwahamena kwaKarunga.'' ⁴⁸ VaYuda avalimburura naku mutantera ashi, ''Atwe nane mughushili tuna kara opo twa ghamba ashi ove muSamariya ntani wakara nampepo yayidona?'' ⁴⁹ Yesus avalimburura ashi, ''Ame kapi nakara nampepo yayidona, nane ngoli ame kwafumadeka Vavava, makura anwe mbyo muna kuntjwaura. ⁵⁰ Ame kapi naku shana ghuyerere namfumwa yana umwande; nane ngoli mpwali ogho ana kuyi shano ghuye ndye waku pangura. ⁵¹ Ushili, vyaushili, naku mutantera ashi, kehe ghuno waku tambura akwame marongo ghande, ghuye kapi nga kenga mfa.'' ⁵² VaYuda avamutantere ashi,'' Weno atwe tuna viyiva ngoli ashi ove kuna kara nampepo yayidona. Abrahamu nava Porofete vakaliroko navantje vafa; ove mbyo ghuna kughamba ashi, 'Kehe ghuno waku pura mumoye ntani ghuye akwame marongo ghoye, ghuye kapi nga makera mfa.' ⁵³ Ove kapi wapitakana shetu Abrahamu ano ngoli afa, nampili ndi noveshi? Vaporofete vakare navo nka vafa. Ovene weni ghuna kukughayara ntani pani mpo ghuna shana kukutura? ⁵⁴ Yesus alimburura ashi, ''Nkene shi ame kukufumadeka naumwande, kutanta ashi mfumwa yande kwato mulyo; ame ne Vavava mbo vamfumadeko - oghu mwatwenyanga ashi Karunga wenu. ⁵⁵ Anwe kapi mwayiva Vavava, ano ngoli ame nava yiva. Ame nkene kunu ghamba ashi, 'Ame kapi namu yiva Karunga,' Name kunu fana yira anwe, muna vimpempa. Nane ngoli, Ame namu yiva mbyo nakwamanga naku limburukwa naku tikitamo nkango dendi nadintje. ⁵⁶ Shenu Abrahamu kwakalire naruhafo ashi ngakenge lino liyuva lyande; ghuye makura alikenge akara naruhafo rwarunene.'' ⁵⁷ VaYuda avamutantere ashi, ''Ove mwaka doye shimpe kapi datika kudimurongo ntano, Ove kuna kughamba ashi wakenga Abrahamu?'' ⁵⁸ Yesus avatantere ashi, ''Ushili, vyaushili naku mutantera ashi, kumeho vashampuruke Abrahamu, Ame mponulipo kare.'' ⁵⁹ Makura vavo avadamuna mawe ashi vamu vhukume vamu dipaye, Yesus avanda makura arupukamo muNtembeli.