¹ Kutunda pano Yesus kayendauranga muGalileya, ano ngoli ghuye kapi ashanine kuyenda kuYudeya mukondashi vaYuda kwamu shana-shanine ashi vamu dipaye. ² Pa shirugho shino shipito shavaYuda shandyugho daghuvando kwakalire papepi kuna kutikamo. ³ Vaghuni vendi vava kafumu avaghamba ashi, ''Tundamo muno mulivhango ghuyende kuYudeya, navarongwa voye mposhi navo ngava kamone viruwana vyoye ovyo waruwananga. ⁴ Mukondashi naku ruwana shi viruwana muka hore-hore nkene shi kuna shana ashi navantje vavimone. Ruwana viruwana vyoye, ghuvi shorore mughudjuni mposhi vakuyive.'' ⁵ Mukondashi nampili vaghuni vendi kapi vapulire mumwendi. ⁶ Makura Yesus avatantere ashi, ''Shirugho shande shimpe kapi shina tikimo, ntani anwe shirugho kumu wapera kehe pano. ⁷ Anwe udyuni kapi wamu nyenga, ano ngoli wagho ame wanyenga mukondashi ame kutapa umbangi waviruwana vyamo vyavidona. ⁸ Anwe yendenu tupu kushipito; Ame kapi naku yenda ko kuno kushipito mukondashi shirugho shande shimpe kapi shina tikimo.'' ⁹ Opo amana kughamba dino nkango, ghuye akara muGalileya. ¹⁰ Ano ngoli opo vayendire vaghuni vendi vana piti kushipito, makura Yesus naye ayendi, papentjendi muka hore-hore kwato agho amu monino. ¹¹ Makura vaYuda avamushana-shana pashipito vayive ashi, ''Ghuye kuni nko ana kara?'' ¹² Mbunga yavantu kwakuyongire unene kuhamena kukwendi. Vamwe avaghamba ashi, ''Ghuye muntu wamuwa.'' Ano ngoli vano vamwe avaghamba ashi, ''Hawe, ghuye waku pukita vantu vavayingi.'' ¹³ Vavo kwakalire naghoma kuvaYuda kapi vaghambire vino ashi kehe ghuno avi yuvhe. ¹⁴ Pa pakatji ka kudana shipito shaghuvando, Yesus arondo ayende muNtembeli makura aka tameka kuronga. ¹⁵ VaYuda avatetuka unene kumarongo ghendi vavo avaghamba ashi, ''Weni ntani kuni nko oku awana ghukonentu waku hura pano? Ghuye kapi akara namakushongo kehe ghano.'' ¹⁶ Yesus avalimburura kumwe naku vatantera ashi, ''Oghano marongo kapishi ghande, nane ngoli kwatunda kwandyegho antumo. ¹⁷ Kehe ghuno ana shano kutikitamo shihoro shaKarunga, ghuye ana hepa kuyiva ghano marongo, nkene shi ushili kwatunda kwaKarunga, ndi walye ghande tupu naghu mwande naronganga. ¹⁸ Kehe ghuno waku ruwana vyamwene ghuye kushana mfumwa yamwene, ano ngoli ntumi ghuye kuruwana tupu shitumbukira shaghu amu tumo, mukareli waku fana weno waushili, ntani mumwendi mwato udona. ¹⁹ Moses nane kapi atapa veta kukwenu? Ano ngoli anwe kapi mwatikitangamo ovyo yatanta veta. Vinke muna kushanena kundipaya?'' ²⁰ Mbunga yavantu avalimburura ashi, ''Ove ghuna kara nampepo yaghupurumuki. Twenya madina ghavo vana shano kukudipaya?'' ²¹ Yesus alimburura kumwe naku ghamba ashi, ''Ame kwaruwana shiruwana shimwe tupu, anwe namu vantje mbyo mwatetuka. ²² Moses kwatapa veta ashi muna hepa kuruwana vamba vanuke vavamati (Vamba yavamati kapishi kwaMoses yatunda, nane ngoli kuva nyakulyenu), mukonda yaveta yavamba vanyakulyenu kava ruwananga vamba kuvamati nampili muliyuva lya Sabata. ²³ Nkene shi muntu kuvhura kumu ruwana vyavamba muliyuva lya Sabata mpo ashi mupire kudyona kuveta yaMoses, mukonda munke mukarera naghugara kukwande ashi ame kuverura vantu muliyuva lya Sabata? ²⁴ Kapishi kupangura muntu mwamu dona, nane ngoli kupangura muntu paveta nauhunga.'' ²⁵ Vantu vamwe vamu Yerusalemu avaghamba ashi, ''Nane kapi shi ndyeghuno ndye vana shana kudipaya? ²⁶ Kengenu, ghuye ghuno kuna kughamba mumbunga, ano ngoli kwato ogho ana kumu kanano. Kuvhura vikare ashi vano vampititi navapangeli vana muyiva ashi ghuye ndye Kristus, Mesaya. ²⁷ Ano ngoli naku vhura shi vikare ashi ghuye Kristus mukondashi ghuno twa yiva oko atunda. Opo ngaya Kristus, kwato ogho ngayivo ashi kuni atunda.'' ²⁸ Yesus ghuye kuna kuronga muNtembeli, makura aghamba naliywi lyaku dameka unene kumwe nakughamba ashi, ''Anwe namuvantje kughamba ashi mwandyiva me ntani mwayiva oko natunda. Ano ngoli ame kapi naya pana ghumwande, nane ngoli oghu antumo kwakara naumbangi waushili, ntani anwe kapi mwamuyiva. ²⁹ Ame nayiva ogho antumo mukonda kukwendi natunda ntani ndye antumo.'' ³⁰ Vavo mpo vashanine vamu kwate, ano ngoli kwato ogho avhuliro kumu kundama mukondashi shirugho shendi shimpe kapi shatikiremo. ³¹ Ano ngoli vantu vavayingi avapura mumwendi, makura avaghamba ashi, ''Opo ngaya Kristus, kuvhura naye ngaya ruwane vitetu vyaviyingi kupitakana vyaghuno murume ndi? ³² Vafalisayi vayuvire omo vavhungutire vantu vyaku hamena kwaYesus, makura vaPristeli vavanene navaFalisayi avatumu vaporosi vaka mukwate. ³³ Yesus avatantere ashi, ''Ame nganu kara shirugho shashifupi tupu mukatji kenu, makura nganu vyuke kwandyeghu antumo. ³⁴ Anwe ngamu ntjana-ntjana ano ngoli kapi ngamu vhura kungwana; ntani oko nganu yenda, anwe naku vhura shi kuyendako.'' ³⁵ Makura vaYuda avakupura vene-na-vene ashi, ''Kuninko oku ana kushana kuyenda ghuno muntu oku ngatu pira kumu wana? Ndi walye kuna shana kuyenda kuva Yuda ovo vatungo muvirongo vyava Gereka makura ngaka ronge vaGereka? ³⁶ Ndi vinke dina kutanta dino nkango ana ghamba ashi, ''Anwe ngamu ntjana-ntjana ano ngoli kapi ngamu vhura kungwana; ntani oko nganu yenda, anwe nakuvhura shi kuyendako'?'' ³⁷ Muliyuva lya kuhulilira, kwakalire liyuva lya linene lya shipito, makura Yesus ashapuka ayiyiri unene, kumwe naku ghamba ashi, "Nkene shi mpwali ogho ana kuyuvho linota, mupenu mpito aye kukwande aya nwe. ³⁸ Yira momu tupu atanta matjanwa ashi, kehe ghuno waku pura mumwande, mumutjima wendi ngamu pupa dimukuro damema ghamonyo waliparu lya naruntje.'' ³⁹ Ghuye kwaghambire dino nkango atambe Mpepo, oyo ngava wana vaku pura mumwendi; shirugho shino Mpepo yayo shimpe kapi vana yitapa mukondashi Yesus shimpe kapi vana muyererepeke. ⁴⁰ Mbunga, opo yayuvire dino nkango, avaghamba ashi, ''Oghuno muporofete waushili.'' ⁴¹ Ntani vamwe avaghamba ashi, ''Oghuno shili ndye Kristus.'' Ntani vano vamwe navo avaghamba nka ashi, ''Vya ushili Kristus kuvhura ngatunde muGalileya ndi? ⁴² Matjangwa nane kapi shi kwaghamba ashi, Kristus ngatunda mulira lya Dafiti mushitata shaBetelehemu, omu atungire Dafiti?'' ⁴³ Vantu mumbunga avakara namaghano ghaku kushuva-shuva avatameke kukukanana mukonda yendi. ⁴⁴ Ntani vano vamwe kwashanine vamu kwate, ano ngoli kwato ghumwe avhuliro kukwata lighoko parutu rwendi. ⁴⁵ Makura Vaporosi navakareli avavyuka kuva Pristeli vavanene nava Falisayi, vavo avavapura ashi, ''Vinke muna piri kamu yita kuno?'' ⁴⁶ Vaporosi avalimburura ashi, ''Kwato muntu ghumwe waku ghamba yira ghuno murume.'' ⁴⁷ Makura vaFalisayi avalimburura ashi,'' Nanwe nka kare kava kamu pukita ndi? ⁴⁸ Mpwali ko ghumwe wavakurona vava Yuda, ndi wavaFaliseya ogho apuro mumwendi ndi? ⁴⁹ Yino mbunga yavantu kapi vayiva marongo ghaveta detu, mbyo vava finga.'' ⁵⁰ Ghunyavo Nikodemusi (mukurona wavaFalisayi, ogho ayendiro kwaYesus pamu hovo) aghamba ashi, ⁵¹ "Veta yetu yapulitira kupangura muntu vahana kuyuvha kukwendi mwene ashi undyoni munke ana ruwana ndi?'' ⁵² Vavo avalimburura naku mutantera ashi, ''Nove nka wavo ghumwe watundo kuGalileya ndi? Varura ushane ntani kona-kona matjangwa naghantje kughu wana ashi kwato muporofete waku vhura kutunda muGalileya.'' ⁵³ [Mpopo tupu mbunga yavantu avaku gaunuka kehe ghuno ayendi kumundi wendi. Matjangwa ghamwe kwato yino velise: Yohanesi 7:53 - 8:11.