¹ Kuruku rwavino, Yesus atundupo ayendi musheli munya yalifuta lyaGalileya, olyo vatwenyanga ashi lifuta lyaTibeliyasi. ² Mbunga yayinene ayi mukwama mukondashi vavo vamonine vitetu vyavinene opo averulire vaveli. ³ Makura Yesus arondo kundundu aka shungira pawiru kumwe navarongwa vendi. ⁴ (Weno Paska, Shipito shava Yuda, pepi shakalire.) ⁵ Opo aka nkukire Yesus amono mbunga yayinene yavantu kuna kuya kwendi, makura ghuye apura Filipus ashi, ''Kuni nko tuvhura kuyenda tuka ghure mboroto davantu vaku hurapano navantje vagwaneke valye vakute?'' ⁶ (Ano ngoli Yesus kwaghambire vino asheteke Filipus, mukondashi ghuye aviyivire ashi vinke avhura kuruwana.) ⁷ Filipus alimburura ashi, ''Mboroto yimwe kukosha randa yimwe nampili ndi kuna kara nandjambi yakuruwanena mayuva mafere maviri shimpe naku vhurashi kugwaneka ashi kehe ghuno awaneko nampili kataghu.'' ⁸ Murongwa wendi ghumwe, walidina Adriyas, munya Simoni Peturusi, atantere Yesus ashi, ⁹ "Mpwali mwanuke wamumati ogho ana karo namboroto ntano darukokotwa ntani nantjwi mbiri, ano ngoli vinke divhura kukwafa kumbunga yayinene yaku hura pano?'' ¹⁰ Yesus aghamba ashi, ''Tanterenu vantu vashungire.'' Kulivhango aku vakalire vantu kwakaliremo mushoni waghuyingi waghure palivango nalintje. Makura vantu avashungiri mutu mbungaghona, shivaro shavakafumu tupu kwatikire kumayovi matano. ¹¹ Makura Yesus aghupu dimuntje damboroto atapa mpandu kwaKarunga, opo amanine makura adi tapa kuvarongwa vendi vatapere ovo vashungiliro. Nantjwi nado mushi kwavo, avatapere navantje vagwaneke. ¹² Vantu avali avakuta, opo vamanine Yesus atantere varongwa vendi ashi, ''Pongekenu ghufere-fere ogho ghuna hupopo naghuntje, mposhi kwato ovyo vikombanopo.'' ¹³ Vavo avapongayiki ghufere-fere wamboroto ntano davilya makura avayuda vikumba murongo naviviri kwavyo vyahupiroko opo vamanine kulya. ¹⁴ Makura, mbunga yavantu opo vamonine vino vitetu ovyo aruwaneni Yesus, avaghamba ashi, ''Vya ushili oghuno ndye muporofete ogho vatanta ngatuma Karunga ngaye muno mughudjuni.'' ¹⁵ Yesus ayivire ashi vinke vina karo mumaghano ghavo opo amonine ashi vavo kuna kuya kukwendi vamutininike akare Hompa wavo, ghuye atundupo ayende kuwiru yandundu akakare pentjendi. ¹⁶ Opo lyatokire liyuva kungurova, varongwa vendi avayendi vaghurumuke kulifuta. ¹⁷ Makura avakaperama muwato, avarutu vavindakane vayende kuKaperenimu. Makura akuya mundema waghunene pashirugho shino, Yesus ghuye shimpe kapi anaya tiki mukatji kavo. ¹⁸ Likundungu lyalinene alitameke kuyunga, namankumpi ghamanene aghayambuka mulifuta. ¹⁹ Opo vaduwire vayende ghure washinema shakutika kukilo metera ntano nayimwe, vavo avamono Yesus kuna kuyenda pantunda yamema kuna kuya pepi nawato, vavo aghu vatundu avakara naghoma waghunene. ²⁰ Ghuye avatantere ashi, ''Ame ghuno! Mwasha tjira.'' ²¹ Makura vavo avakara naruhafo ashi ndi vamurondeke muwato, mpopo tupu makura wato aghu katika oko wayendire. ²² Liyuva lyaku kwamako, mbunga kwakalire musheli munya yalifuta makura avadimburura ashi paliyenga pato mawato nkwandi ngoghu tupu varondire Yesus navarongwa vendi, ano ngoli varongwa vendi vayivire ashi Yesus kapi arondire muwato kumwe navo, pentjavo tupu vakaliromo. ²³ Ano ngoli, pakalire mawato ghamwe ogho atundiro kuTibeliyasi pepi nalivango oku valyelilire mboroto opo amanine Hompa kudi kandayika naku pandura Karunga. ²⁴ Mbunga yavantu opo vamonine ashi Yesus navarongwa vendi vana tundupo, makura avarondo muwato vayende kuKaperenimu vaka shane Yesus. ²⁵ Makura vavo avakamuwana musheli munya yalifuta, makura avamupura ashi, ''Murongi, ruvede munke ghunaya tiki kuno?'' ²⁶ Yesus avalimburura, kumwe naku vatantera ashi, ''Ushili, vyaushili naku mutantera ashi, anwe kapishi ame muna kushana, mukonda mbyovyo kamu mono vitetu ovyo kanu ruwana, nane ngoli mbyovyo kamuli mboroto dogoro kamu kuta. ²⁷ Walye mwaruwanenanga ndya daku pira kukarererapo, nane ngoli muna hepa kuruwanena ndya daku karererapo daliparu lya naruntje, ndya daweno ngadi tapa Mona Muntu kukwenu, mukondashi Karunga vashe kwamupa nkondo.'' ²⁸ Makura vavo avamupura ashi, "Vinke tuvhura kuruwana, mpo shi natwe ngatu ruwane viruwana vyaKarunga?'' ²⁹ Yesus alimburura naku vatantera ashi, "Ovino mbyo viruwana vyaKarunga ashi: Anwe muna hepa kupura mwaghu vatuma ntani namwaghu amu tumo.'' ³⁰ Vavo avamupura ashi, ''Vitetu munke ghuvhura kuruwana ghutu neyede mposhi walye kutu vhura kupura mumoye? Vinke ghuvhura kuruwana? ³¹ Vakurona vetu kwalire mana mumburundu, yira momu tupu vatjanga ashi, 'Ghuye kwatapire mboroto yamuliwiru kukwavo valye.'' ³² Yesus avatantere ashi, ''Ushili, vyaushili naku mutantera ashi, kapishi Moses ndye atapiro mboroto yakutunda kuliwiru, ano ngoli Vavava mbo vatapango mboroto yaushili kukwenu yaku tunda muliwiru. ³³ Mukondashi mboroto yaKarunga ndyeghu aghurumuko atunde muliwiru kwaya aya tape monyo mughudjuni.'' ³⁴ Makura vavo mupura ashi, ''Murongi, tupe ko natwe yino mboroto yaweno.'' ³⁵ Yesus avatantere ashi, ''Ame, ame mboroto yamonyo; kehe ghuno wakuya kukwande kapi nka ngakara nandjara, ntani kehe ghuno ngapuro mumwande kapi nka ngakara nalinota. ³⁶ Ame kuna kumutantera ashi anwe mwankenga, ano ngoli kapi mwapura mumwande. ³⁷ Kehe ghuno ogho vatapa kukwande Vavava ghuye ngaya kukwande, ntani kehe ghuno wakuya kukwande ame kapi nganu mutjida. ³⁸ Ame kwatunda muliwiru, kapi naya nganu yaruwane viruwana vyande naghu mwande, nane ngoli mukuya tikitamo shitambo shaghu antumo. ³⁹ Shino ntjo shihoro shendi ogho antumo, ntani ashi kwato nampili ghumwe ogho ngakombano po pavo atapa kukwande, nane ngoli nganu vhure kuva vhumbura muliyuva lyaku hulilira. ⁴⁰ Oshino ntjo shihoro shaVavava, ashi kehe ghuno nga mono Mona makura ngapure mumwendi ghuye ngawana monyo wanaruntje ntani ngaka vhumbuka kumwe name kuliyuva lyaku hulilira.'' ⁴¹ VaYuda makura avavhunguta vamu ghambe mwamudona mukondashi ghuye kwaghambire ashi, ''Ame mboroto oyo yatundo muliwiru.'' ⁴² Vavo avaghamba ashi, ''Nane kapishi Yesus mona Yosef ghuno, ame shi vashe navawina twava yiva? Weni omo avhura kughamba ghuye ashi, ''Ame kwatunda muliwiru'?'' ⁴³ Yesus avalimburura kumwe naku vatantera ashi,'' shayekenu kuvhunguta mukatji kenu. ⁴⁴ Kwato waku vhura kuya kukwande nkwandi Vavava ovo vantumo mbo vana mukoko aye kukwande, makura ame nganu kamu vhumbura kuliyuva lyaku hulilira. ⁴⁵ Vaporofete kwatjanga ashi, 'Hompa Karunga ghuye kuronga navantje.' Kehe ghuno waku yuvha marongo ghuye akuronge naku kwata lighano ghano marongo ghaku tunda kuVavava ghuye ana hepa kuya kukwande. ⁴⁶ Kwato ghumwe ogho amono Vavava, nkwandi ndyeghu atundo kwaKarunga - ndye tupu amono Vavava. ⁴⁷ Ushili, vyaushili naku mutantera ashi, kehe ghuno waku pura mumwande ngawana monyo wanaruntje. ⁴⁸ Ame mboroto yamonyo. ⁴⁹ Vakurona venu vakare kava lyanga mana mumburundu, ano ngoli vafa. ⁵⁰ Yino ndyo mboroto yatundo muliwiru, mposhi kehe ghuno muntu waku lyako kapi nga fa. ⁵¹ Ame mboroto yamonyo oyo yatundo muliwiru. Kehe ghuno waku lya kwayino mboroto, ngakara namonyo wanaruntje. Mboroto oyo nganu tapa kwaghuno udyuni ngaghu kare namonyo mfa darutu rwande.'' ⁵² VaYuda ovo vakaliropo avagarapa unene makura avaku kanana vene nava vene, kumwe nakugha ashi, ''Ghuno muntu weni omo avhura kutupa rutu rwendi ashi tu lye?'' ⁵³ Makura Yesus avatantere ashi, ''Ushili, vyaushili naku mutantera ashi, nkene kapi ngamu lya rutu rwaMona Muntu ntani naku nwa honde yendi, anwe kapi ngamu kara namonyo wanaruntje. ⁵⁴ Kehe ghuno wakulya rutu rwande nakunwa honde yande ngakara namonyo wanaruntje, ntani ame nganu kamu vhumbura kughu fe kuliyuva lyaku hulilira. ⁵⁵ Mukondashi nyama yarutu rwande ndo ndya daushili, ntani honde yande mbyo vikunwa vyaushili. ⁵⁶ Kehe ghuno waku lya nyama yarutu rwande nakunwa honde yande ngakara mumwande, ntani name nganu kara mumwendi. ⁵⁷ Yira momu vantuma Vavava vamonyo, makura mbyo nakara namonyo mukonda yaVavava, ntani nakehe ghuno wakulya rutu rwande, naye ngakara namonyo mukonda yande. ⁵⁸ Yino ndyo mboroto oyo yatundo muliwiru, kapi yafana yira ndyoyi valire vakurona venu mbyo vafa. Kehe ghuno wakulya yino mboroto ngakara namonyo wanaruntje.'' ⁵⁹ Yesus kwaghambire dino nkango ghuye muSinagoge kuna kuronga vantu mushitata shaKaperenimu. ⁶⁰ Makura varongwa vendi vavayingi opo vayuvire vino avaghamba ashi, ''Dino nkango daudito; Are waku vhura kudi yuvha ghuye adi tambure?'' ⁶¹ Yesus ayivire munda yamutjima wendi ashi varongwa vendi kuna kuvhunguta kwadino nkango, makura aghamba ashi, ''Dino nkango dande ne kuna mugarapita ndi? ⁶² Vinke ngamu vhura kughamba opo ngamu kenga Mona Muntu kuna kuronda ayende muliwiru oko ahovire kukara? ⁶³ Mpepo ndyo yakutura monyo murutu; rutu papentjaro kwato mulyo. Odino nkango namu tanteranga ndyo mpepo yamonyo, yaku tapa monyo murutu. ⁶⁴ Nampili ngoli shimpe mpovali vamwe mukatji kenu vakupira kupura.'' Kutunda tupu paku tameka Yesus ayivire vakupira kupura ntani naghu ngaka muturo muliyome. ⁶⁵ Ghuye aghamba ashi, "Mbyo naku mutantere ashi kwato wakuya kukwande ngawane monyo wanaruntje nkwandi Vavava vana muyito kukwande. ⁶⁶ Mukonda yambyovino, varongwa vendi vavayingi avamushuvu kapi nka vashanine kuyenda naye. ⁶⁷ Yesus apura vano varongwa vendi murongo navaviri ashi, ''Nanwe kuna shana muyende muntjuve ndi, kuvhura tupu?'' ⁶⁸ Simoni Peturus amu limburura ashi, "Hompa kware tuvhura kuyenda? Ove wakara nankango damonyo wanaruntje, ⁶⁹ atwe twa pura mbyo twa huguvara mumoye ashi Ove Mupongoki waKarunga.'' Matjangwa ghamwe kwatanta ashi, "Ove Kristus, Mupongoki wawa Karunga. ⁷⁰ Yesus avalimburura ashi, ''Nane kapishi ame namu toghororo, namu vantje murongo navaviri ndi, ano ngoli ghumwe mukatji kenu ne mudyonauli?'' ⁷¹ Ghuye kwatambire Yudas mona Simoni Isikalyoti, mukondashi ndye aka tuliro Yesus muliyome, ghumwe wavarongwa vendi vano murongo navaviri.