¹ "Ushili, vyaushili, naku mutantera ashi, kehe ghuno waku ngena muhambo yandywi ghuye ahana kupitira kulivero, ghuye avatuke ndi apitire palimpe lya hambo, muntu waweno muwidi ntani mudyonauli. ² Kehe ghuno waku ngenena kulivero ogho ndye mushita wandywi. ³ Mukungi wahambo ghuye kugharura livero angenemo mushita. Mushita wandywi kungenamo ghuye ayitemo ndywi dendi dirupukemo, ntani ndywi dendi dayiva liywi lya mushita ntani ghuye kudiyita pamadina ghado dirupukemo dimu kwame. ⁴ Nkene dina rupukamo ndywi dendi nadintje, makura ghuye kupita kumeho yandywi dado dimu kwame munyima, mukondashi ndywi dendi dayiva liywi lyendi. ⁵ Ndywi dendi naku kwama shi muntu wapeke ogho dapira kuyiva kuduka divyuke, mukondashi ndywi dendi kudimburura kuliywi.'' ⁶ Yesus kwava tantilire shino shifanikito, ano ngoli vavo kapi vakwatire lighano ovi avatantilire. ⁷ Yesus aghamba nka naku vatantera ashi, ''Ushili, vyaushili naku mutantera ashi, Ame mukungi livero lya hambo yandywi. ⁸ Navantje ovo vahoviro kupita kumeho yande vavo vanawidi ntani vadyonauli, ndywi mbyo dapilire kuva kwama naku limburukwa kukwavo. ⁹ Ame livero lya hambo. Kehe ghuno waku ngena apitire mumwande, ngaka yoghoka ngaka paruka; ghuye ngangenamo ntani nga rupukamo shimpe ngaka wana mo malyero naghulitiro. ¹⁰ Muwidi kwato ovyo aruwananga vyapeke nkwandi vyaku vaka naku dipaya kumwe naku dyonaura. Ame kwaya mposhi vavo vawane liparu namonyo waku tikiliramo. ¹¹ Ame mushita wamuwa. Mushita wamuwa kufera ndywi dendi. ¹² Muruwani waku kunga naku takamita ndywi kapishi ndye mushita wandywi ntani kapishi ndye adi weko ntani ndywi kapi shi dendi. Ghuye nkene shi kumona mambungu kuna kuya ghuye kushuva ndywi aka duke aka yende, makura mambungu ghadipaye naku papaura ndywi dogoro ghutanga wandywi ghuku hanauke. ¹³ Ghuye kuduka aka yende ashuve ndywi mukondashi ghuye muruwani tupu waku dikunga awane mfuto ntani ghuye kwato kupakera shinka dino ndywi. ¹⁴ Ame mushita wamuwa, ntani ame nayiva dande, ntani dande nado dandyiva. ¹⁵ Vavava vandyiva me, ntani ame nayiva Vavava, ntani ame kufera ndywi dande. ¹⁶ Ame nakara nka nandywi dimwe odo dakaro muhambo peke. Ame nahepa kuka di shimba nuya dipititira nado, mposhi nado ngadi yuvhe liywi lyande ngadi kare mushighunda shimwe tupu namushita ghumwe tupu. ¹⁷ Konda ndyoyino ndyo vahorera me Vavava ashi: Ame kwatapire monyo wande nu fe nukare ndjambo ntani mbyo naghu wana nka shimpe nukare namonyo. ¹⁸ Kwato waku vhura kughupa monyo wande ghutunde kukwande, nkwandi naghu mwande waku vhura kughu tapa. Ame nakara nankondo daku tapa monyo wande ghukare ndjambo, ntani ame nakara nankondo daku ghupa monyo wande ghu vyuke kukwande. Ovino mbyo viruwana ovi vatapa kukwande Vavava ovyo nganu vhura kutikitamo.'' ¹⁹ Opo vayuvire dino nkango vaYuda avatameke kuku kanana veve navene mukondashi maghano ghavo kapi ana kukuyenda kumwe kuhamena kukwendi. ²⁰ Vavayingi avaghamba ashi, ''Ghuye ana kara naMpepo yayidona ntani ghuye ana purumuka. Vinke muna kuterera kukwendi?'' ²¹ Vamwe avaghamba ashi, ''Odino kapi shi ndo nkango aghambanga-muntu wampepo yayidona. Mpepo yayidona shili kuvhura kupahura mantjo ghava twiku ndi?'' ²² Ruvede runo kwakalire shiruwo shaku dana shipito shaUpongoki waNtembeli yamuYerusalemu. ²³ Shirugho shino shakufu, makura Yesus ayendaura munda yaNtembeli mumbaraka yaSolomoni. ²⁴ Makura vaYuda avaya kukwendi avamukundurukida avamupura ashi, ''Dogoro shirugho shaku tika pani ghuna kushana ashi atwe tutamangere kuhamena kukoye? Nkeneshi ove Kristus, ghamba ghudukure tutantere.'' ²⁵ Yesus avalimburura ashi, ''Ame namu tantere, ano ngoli anwe kapi muna kushana kupura mumwande. Viruwana vino naku ruwana mulidina lya Vavava, kutapa umbangi waku hamena kukwande. ²⁶ Ano ngoli anwe shimpe kapi muna kupura mumwande mukondashi anwe kapishi ndywi dande. ²⁷ Ndywi dande kuyuva liywi lyande; ntani Ame nayiva dande, ntani dande kukwama mumwande. ²⁸ Ame kutapa monyo wanaruntje kukwado; ntani dado kapi nka ngadi vhura kufa, ntani kwato kehe ghuno waku vhura kudi ghupa ditunde mumaghoko ghande. ²⁹ Vavava, ovo vatapo dino ndywi kukwande, vapitakana navantje, ntani kwato ghumwe waku vhura kudi shakana ditunde muma ghoko ghaVavava. ³⁰ Name naVavava ghumwe tupu.'' ³¹ Makura vaYuda avadamuna mawe nka ashi vamu dipaye. ³² Yesus avatantere ashi, ''Ame kwamu neyeda viruwana vyaviwa vyavi yingi ovyo varuwananga Vavava kupitira mumwande. Pavino viruwana, shinintjo po osho muna kushanena po kundipayera namawe?'' ³³ VaYuda avalimburura ashi, ''Atwe kapi tuna kuku dipaya mukonda yaviruwana vyaviwa, nane ngoli ghuna shwaghura Karunga, mukondashi ove, muntu tupu wapa nyama, mbyo ghuna kutura ashi ghushetakane kumwe naKarunga.'' ³⁴ Yesus avalimburura ashi, ''Nane kapi vatjanga mo muveta yenu ashi, 'Ame Karunga kwatanta ashi, ''Anwe vaKarunga'''? ³⁵ Nkene shi ghuye kwava twenyine ashi vavo vaKarunga, ovo vatambuliro nkango daKarunga, (matjangwa naku vhura shi kugha dongonona naku ghatjindja), ³⁶ anwe weni omo mughamba kukwande ame mupongoki oghu vatuma Vavava nuyende mughudjuni ashi, 'Ame kuna kushwaura Karunga,' mbyovyo namu tantere ashi, 'Ame Mona Karunga'? ³⁷ Nkene shi ame kapi naruwananga viruwana vyaVavava, kapishi mupure naku huguvara mumwande. ³⁸ Ano ngoli nkeneshi ame kwaruwananga viruwana vyaVavava, nampili kapi muna pura naku huguvara mumwande, anwe purenu mukonda yaviruwana ovi mwamona namantjo, mpo ashi muyiva naku kwata lighano ashi Vavava mpovali mumwande mo vakara ntani name kwakara muVavava.'' ³⁹ Vavo avashana nka shimpe ashi vamu kwate, ghuye avashenduka atundupo aka yenda. ⁴⁰ Ghuye atundupo aka ruta mukuro waYorodani aka yenda musheli, kulivango oku kayoyeranga Yohanes mukushi paku hoverera, ghuye aka kara nkoko. ⁴¹ Vantu vavayingi avaya kukwendi avamutantere ashi, ''Yohanes kapi karuwananga vitetu nampili shimwe tupu, ano ngoli navintje ovyo aghambire vyaku hamena ghuno murume vyaushili.'' ⁴² Vantu vavayingi ovo vakaliropo avapura mumwendi mpopo.''