¹ Pa kalire murume ghumwe walidina Lasarusi ghuye kwavelire. Ghuye kwakalire muBetani, mumukunda waMariya namunyendi Marita. ² Mariya oghu awavikiro Hompa namaghadi ghandiro ntani akokota mpadi dendi nahuki dendi, ghuye mpandja Lasarusi waku vera. ³ Vampandyi vendi avatumu mbudi kwaYesus, ashi, ''Hompa, kenga shi, oghu wahora kuna kuvera.'' ⁴ Yesus opo ayuvire yino mbudi, aghamba ashi, ''Ghuno uvera kapishi waku mutwara kumfa, nane ngoli mfumwa yaKarunga ntani naMona Karunga naye ngafumanenepo.'' ⁵ Yesus kwaholire Marita namunyendi wamukamali ntani naLasarus. ⁶ Opo ayuvire mbudi ashi Lasarusi kuna kuvera, Yesus akara momo nka shimpe ghure wamayuva maviri. ⁷ Kuruku rwashiruwo, ghuye atantere varongwa vendi ashi, ''Tuyendenuko nka kuYudeya.'' ⁸ Varongwa vendi avamutantere ashi, ''Murongi, pantantani tupu opo kava shana vaYuda vaku dipaye namawe, weno ghuna shana kuyendako nka?'' ⁹ Yesus avalimburura ashi, ''Nane muliyuva kapishi kwakaramo viri murongo nambiri mposhi kukare shite shaliyuva? Kehe ghuno waku yenda shirugho shamwi, naku vhura shi kupunduka, mukondashi ghuye kuyenda naku mona mughukenu wamuno mughudjuni. ¹⁰ Ano ngoli, waku yenda matiku, kuvhura kupunduka mukondashi mwato ghukenu mumwendi.'' ¹¹ Ghuye kwaghambire vino vininke avyukuruke naku vyukuruka, makura avatantere ashi, ''Ghunyetu Lasarusi ana rara, tuyendenuko nuka murambwite muturo.'' ¹² Varongwa vendi avaghamba ashi, ''Hompa nkeneshi kuna rara, kwaveruka tupu.'' ¹³ Ano ngoli Yesus kwatambire mfa dendi, vavo kwaghayalire ashi kuna rara apwiyumuke. ¹⁴ Makura Yesus avadukuliri ashi, ''Lasarusi ana dohoroka. ¹⁵ Ame nakara naruhafo, mukonda yenu, vina wapa ashi kapi nakara po ntani muka vhura kupura mumwande. Tuyendenuko kukwendi.'' ¹⁶ Tomas ogho kava twenyanga ashi wamapange, atantere varongwa vaghunyendi ashi, ''Natwe tuyendenu naye tuka fe kumwe naYesus.'' ¹⁷ Opo aya tikire Yesus, aya wana Lasarusighuye adohoroka kare ana kara mayuva mane muntoko. ¹⁸ Betani kwakara pepi naYerusalema, ghure wakutika kilometera ntatu. ¹⁹ VaYuda vavangi kwayire kwaMarita Mariya, vayava kwafe nakuva shengawida mukonda yamfa dampandjavo. ²⁰ Marita, opo ayuvire ashi Yesus kuna kuya, ayendi amukondawire, Mariya ghuye kwashungilire mundyugho. ²¹ Marita makura aghamba atantere Yesus ashi, ''Hompa, ashi ndi mpo kamukara, mpandjande ndi kapi kafu. ²² Nampili weno, ame nayiva ashi kehe shino ngaghu shungida kwaKarunga, ghuye ngavikupa.'' ²³ Yesus makura amutantere ashi. ''Mpandyoye ngaka vhumbuka.'' ²⁴ Marita alimburura ashi, ''Nayiva ashi ngaka vhumbuka kulivhumbuko lyaku mayuva ghaku ghuhura.'' ²⁵ Yesus alimburura ashi, ''Ame livhumbuko namonyo; kehe ghuno waku pura mumwande, nampili nga fe, ghuye ngaka paruka; ²⁶ Kehe ghuno ana karo namonyo ghuye apura mumwande ghuye kapi nga fa. Ghuna pura mumwande ndi?'' ²⁷ Ghuye alimburura ashi, ''Yi, Hompa, napura ashi ove Kristusi, Mona Karunga, Ogho vatanta nga vhuro kuya muno mughudjuni.'' ²⁸ Opo amanine kughamba vino, atundupo aka yenda akayite mukurwendi Mariya mukahore-hore. Ghuye amutantere ashi, ''Murongi mpwali ana yatiki ndye ana kukuyito. ²⁹ Tupu ayuvire vino, ashapuka wangu-wangu ayende kukwendi. ³⁰ Yesus ghuye shimpe kapi ana katika mumukunda kuna kara palivango opo vagwanikilire naMarita. ³¹ VaYuda, ovo vakaliro mundyugho kumwe naMariya vamu shengawide, opo vamumonine Mariya ana shapuka wangu-wangu arupuke, makura avamukwama, vavo kwaghayalire ashi kuna kuyenda kumayendo akalire. ³² Mariya opo aya tikire kulivango oku akalire Yesus opo amu monine, makura atongamene ngoro kushipara shendi aghamba ashi, ''Hompa, ndi mpo kaghu kara, mukurwande ndi kapi ka fu.'' ³³ Yesus opo amu monine kuna kulira, navaYuda ovo ayire navo kuna kulira, makura akara naliguvo mumutjima ntani aghu mupwaga; ³⁴ ghuye aghamba ashi, ''Kuni kamumu vhumbiki?'' Vavo avaghamba ashi, ''Hompa, tuyende ghuka kengeko.'' ³⁵ Yesus makura aliri. ³⁶ VaYuda makura avaghamba ashi, ''Kengenu omo ahora Lasarus!'' ³⁷ Vamwe avaghamba ashi, ''Meshi ndye kapahuro mantjo ghava twiku, ana hepa kurambwita ghuno murume naye kapishi nga fe?'' ³⁸ Yesus shimpe, kuna kara naghugara mumutjima, makura ashapuka ayende kumayendo. Kwakalire liyendo lyaku tjokora rupako avagharako liwe kulivero. ³⁹ Yesus aghamba ashi, ''Tunditenuko lino liwe.'' Marita, mpandja nakufa Lasarus, oghu adohorokiro, atantere Yesus ashi, ''Hompa, lino liyuva lya namuntji opano tuna kara weno, rutu rwendi runa ghoro kuna kunuka, mukondashi lino liyuva lya ghune ana kukaramo muntoko.'' ⁴⁰ Yesus amutantere ashi, ''Ame shi naku tantere ashi, nkene ghuna pura mumwande, kughu mona ghuyerere waKarunga?'' ⁴¹ Vavo avaghupuko liwe. Yesus akankuka akenge kuliwiru, aghamba ashi, '''Vava, kuna kumu pandura, mukondashi anwe kuyuvha ndapero yande kehe pano. ⁴² Ame nayiva ashi ove kuyuvha nkango dande kehe pano, mukonda yavantu vano vana karo pano mbyo naku ghambera vyaweno, mpo ashi vavo vapure mumwande ashi ove wantumo.'' ⁴³ Opo amanine kughamba vino, ayiyiri naliywi lyaku dameka ashi, ''Lasarus, rupukamo!'' ⁴⁴ Nakufa makura arupukamo; maghuru namaghoko ghendi shimpe nda vaghadingilira pamakeshe, ntani shipara shendi vana shidingi nalikeshe. Yesus avatantere ashi, ''Mudingununenu aka yende.'' ⁴⁵ VaYuda vavayingi ovo vayiro kwaMariya opo vamonine ovino aruwanine Yesus, makura avapura mwendi. ⁴⁶ Ano ngoli vamwe avayendi kuva Falisayi vaka vatantere ovyo aruwanine Yesus. ⁴⁷ Vapristeli vavanene nava Falisayi avatura shigongi shamatimbi vakuyonge ashi, ''Weni omo tumuruwana ghuno? Ghuno murume kuna kuruwana vitetu vyavi yingi unene. ⁴⁸ Nkene kutu mukengerera weno, navantje ndi kuva pura mumwendi; makura vaRoma ngavaya vaya dyonaure Ntembeli namu hoko wetu.'' ⁴⁹ Ano ngoli, murume ghumwe mukatji kavo, walidina Kayifas, ogho akaliro mupristeli wamunene mumwaka ngogho, ghuye avatantere ashi, ''Anwe kwato ovyo mwayiva. ⁵⁰ Kapi muna kughayara ashi hashako tupu nkene muntu ghumwe afere muhoko naghuntje ngaupire kukadyonauka.'' ⁵¹ Vino kapi avi ghambilire pamwene. Nane ngoli ghuye kwakalire mupristeli wamunene mumwaka ngogho, ghuye kwapumbire ashi Yesus ngayafera dimuhoko; ⁵² ngoli kapishi dimuhoko tupu, nane ngoli kumwe naku yapongeka vana vaKarunga ovo vaku hanauko mposhi ngava ture pamwe tupu. ⁵³ Kutunda ndyolyo liyuva avavareke kukuyonga ashi weni omo ngava mudipaya Yesus. ⁵⁴ Yesus kapi nka avhulire kukara mukatji kava Yuda, makura ayendi kumukunda ogho waku kundamo pepi namburundu kushitata osho vatwenyanga ashi Efurayimi. Nko aka kalire navarongwa vendi. ⁵⁵ Shilika shaPaska yavaYuda kwakalire papepi, makura vantu vavangi mushirongo avakanduka vayende kuYerusalemu yayo Paska shimpe kapi yina tiki vakaku wapayike vakare vana kushuka. ⁵⁶ Makura vavo avatameke kushana Yesus, vavo avayimana muNtembeli kumwe naku kupuraghera ashi, ''Weni omo muna kughayara kuhamena kukwendi? Ghuye kapi ngaya ko kushipito ndi?'' ⁵⁷ Makura vaPristeli vavanene nava Falisayi avatapa mbudi ashi ndi kehe ghuno ana yivo oku ana kara Yesus, ayende aka rapote kukwavo vavhure kumu kwata.