¹ Shimpe mayuva matano nalimwe ghana huparoko kumeho shitike shilika shaPaska, Yesus ayendi kuBetani, oko akalire Lasarus, ogho avhumbulire Yesus mumfa. ² Makura avamuyumbura ndya damurarero, Marta adiwapayiki, ntani ghuye kwashungilire kutafura kumwe naYesus. ³ Makura Mariya aghupu likende lyamaghadi ghamawa ghandiro, awaveke mpadi daYesus kumwe nakudi kokota nahuki dendi. Ndyuwo nayintje kwayulire lidumba lyaliwa lyamaghadi. ⁴ Yudas Isikalyoto, ghumwe wavarongwa vendi, ogho akamutuliro muliyome, aghamba ashi, ⁵ ''Ghano maghadi vinke vana pili tupu kukaghaghulita kumaliva ghakutika randa mafere matatu mposhi vakatape kuva hepwe?'' ⁶ Ghuye kwaghambire vino, kapishi mukonda ashi walye ghuye kupakera mbili vahepwe, nane ngoli ghuye kwakalire munawidi. Ghuye ndye kashimbango Ndyato yavimaliva ntani ghuye kavakanga ovyo kavaturangamo. ⁷ Yesus aghamba ashi,'' Mushuve ghuye kuna virughanene awapayike liyuva lya livhumbiko lyande. ⁸ Vahepwe navo ngamukara kehe pano. Ano ngoli kapi ngamukara name kehe pano.'' ⁹ Mbunga yayinene yavaYuda kwayuvire ashi Yesus mpwali nkoko, makura avayendiko, kapishi mukonda yaYesus pantjendi, nane ngoli vakamone naLasarus, ogho avhumbulire Yesus mumfa. ¹⁰ VaPristeli vavanene kwakuyuvire ashi Lasarusinaye ndi vamudipaghe; ¹¹ mukondashi vaYuda vavangi kwayire mukonda yaLasarusimakura avapura mwaYesus. ¹² Liyuva lyakukwamako mbunga kwayire kushipito. Opo vayuvhire ashi Yesus mundyira ana kara kuna kuya kuYerusalemu, ¹³ makura avadamuna mahako ghavikereva varupuke vamukondawire kumwe nakuyimba naliywi lyalinene ashi,'' Hosiyana! Vamutange ogho anakuyo mulidina lyaHompa, Hompa wava Israeli.'' ¹⁴ Yesus awana shidongi ghona makura arondopo; yira moomo vavitjanga, ashi, ¹⁵ '' Kapishi ghukare naghoma mona Siyoni; kenga, Hompa ghoye kuna kuya, ghuye kuna rondo pashidongi ghona.'' ¹⁶ Varongwa vendi kapi vavi kwatire lighano vino vininke pamuhovo; Mara ngoli opo vamanine kumuyererepeka Yesus, ntani vana kuvhuruka ashi dino nkango ndye vaditjangera makura mbyo vana dimuruwanene. ¹⁷ Vantu ovo vakaliro kumwe naye opo aka yitire Lasarusi arupuke muntoko amuvhumbure kughufe. Avatapa ghumbangi kwavyo vyashorokiro. ¹⁸ Mukonda yino mbunga yavantu ayimukonda wiri vagwanekere naye, mukonda vayuvire ashi ndye aruwanino vino vitetu. ¹⁹ VaFalisayi avakutantere-tantere ashi,'' Monenu shi, kwato ovyo muvhura kutompora;Kengenu, Udyuni naghuntje kuna kumukwama ghuye.'' ²⁰ Mwakalire vaGereka vamwe mukatji kava vakandukiro kushipito vakatongamene. ²¹ Vavo avayendi kwaFilipus, waku Betesaida yamu Galileya, avakamushungida, nakughamba ashi,'' Mukalikuto, atwe tuna shana tumone Yesus.'' ²² Filipus ayendi atantere Andrias; Andrias ayendi naFilipus, vakatantere Yesus. ²³ Yesus avalimburura nakughamba ashi,'' Viri yinatikimo yakuyererepeka mona muntu. ²⁴ Ushili, ushili, nakumutantera, mbuto ntjene kapi yina wiri mulivhu yiferemo, mo ngoli ngayivhura kukara pantjayo ti; ano ngoli ntjeneshi ayiferemo, yayo ngayivhara muyangu wambuto yayingi. ²⁵ Ogho ahoro monyo wendi ngaukombanita; ano ngoli ogho anyengo monyo wendi wamuno mughudjuni ghuye kwaghupungulira monyo wanaruntje. ²⁶ Kehe ghuno ana shano kunkarera me, ana hepa kunkwama; kehe kuno ngani kara, namukareli wande naye nko ngakara. Kehe ghuno ngankarero, Vavava ngava fumadeka mukareli wande. ²⁷ Monyo wande kuna kukora vina kulimbi name weni omu nivhura kughamba? 'Vava, ndyoghororenumo mushirugho shino ndi'? Ano ngoli vino mbyo vina ndyito muno mushirugho. ²⁸ Vava, yererepekenu lidina lyenu.'' Liywi alitundu muliwiru ashi,'' Nali yererepeka kare ntani nganili yererepeka nka waro.'' ²⁹ Vantu ovo vakaliropo vavo kwayuvire shikukumwa makura avaghamba ashi mvhura yina kudukuto. vamwe avaghamba ashi,'' MuEngeli ana ghambo naye.'' ³⁰ Yesus alimburura nakughamba ashi,'' Lino liywi kapishi kukwande lina ghambere, nane ngoli kukwenu. ³¹ Ntantani weno shirugho shina tikimo shakupangura ghuno Udyuni: Mupangeli wamuno mughudjuni ngava kamuvhukumina pandye. ³² Ame ntjene ngava ndamunapo nitunde palivhu, Makura navantje nganivakokera vaye kukwande'' ³³ Vino kwavighambilire avaneghede ashi mfa daweni ngavhura kufa. ³⁴ Mbunga yavantu ayi mulimburura ashiu,'' Muveta atwe kwayuvha mo ashi Kristus ngakarererapo naruntje-na-naruntje. Weni omo ghughamba ashi,' Mona muntu ngava muyerura'? Mwene ogho mona Muntu ne ndye are?'' ³⁵ Yesus makura aghamba kukwavo ashi,'' Ghukenu kughu karamo tupu shirugho shashifupi mukatji kenu. Yenderenu mo mushirugho shino muna kara mughukenu, mposhi ghupire kumu kundurukida mundema. Mukondashi kehe ghuno wakuyendera mumundema nakuvhura shi ayive oku ana kuyenda. ³⁶ Shirugho shino munakara mughukenu, karenu nalipuro lyaghukenu mposhi ngamu kare Vanuke vaghukenu.'' Vino mbyo aghambire Yesus makura atundupo aka vande. ³⁷ Nampili ngoli aruwanine Yesus vitetu vyaviyingi mukatji kavo, vavo kapi vavhulire kupura mumwendi. ³⁸ mposhi nkango damuporofeta Isaya divhure kutikamo, omo aghambire ashi:'' Hompa, are wakuvhura mbudi yetu, nkondo daHompa kware vadihorora?'' ³⁹ Mukonda ndyoyino mbyo vapilire kupura, Isaya avatantere ashi, ⁴⁰ '' Ghuye kwava tura vakare vitwiku, ntani ghuye kwatura dimutjima davo dikukute: mposhi vapire kumona namantjo ghavo ntani vapire kukwata lighano nadimutjima davo; vapire kukushighura, Ame nivhure kuva verura.'' ⁴¹ Isaya kwaghambire vino vininke mukonda amonine ghuyerere waYesus mbyo aghambelire vyakuhamena kukwendi. ⁴² Nampili ngoli, shingi shamatimbi kwapulire mwaYesus; mara mukonda yavaFalisayi, mbyo vapilire kuvi negheda mposhi vapire kuva tjida musinagoge. ⁴³ Vavo kwaholire mfumwa yakutunda kuvantu kupita kana mfumwa yakutunda kwaKarunga. ⁴⁴ Yesus ayiyiri nakughamba ashi,'' Ogho ana puro mumwande, kapishi mumwande tupu ana pura nane ngoli nandyegho antumo me, ⁴⁵ ogho ana kumono me kuna kumona ogho antumo me. ⁴⁶ Ame kwaya nuya kare shite shamughudjuni, mposhi kehe ghuno wakupura mumwande kapishi ngakare mumundema. ⁴⁷ Kehe ghuno wakuyuvha nkango dande ghuye apire kuditikitamo, ame nakumupangura shi ghuye; mbyovyo shi ame kapi nayera kuya pangura Udyuni, nane ngoli kuya yowora Udyuni. ⁴⁸ Kehe ghuno wakuntjwena me ntani ghuye apire kutambura nkango dande, mupanguli wendi mpwali. Ndo dino nkango nakughamba ndo ngadi kamupanguro kuliyuva lyakuhulilira. ⁴⁹ Mbyovyo shi ame kapi naghambanga vyana ghumwande, nane ngoli Vavava ovo vantumo me, mbo vakupanga ashi vinke nivhura kutwenya ntani vinke nivhura kughamba. ⁵⁰ Ame nayiva ashi lipangero lyendi kukutwara kuliparu lyanaruntje, ame kughamba mbyovyo vana ntantere Vavava, ashi mbyo nughamba.''