¹ Kumeho ngashika shoroke shilika shaPaska yavaYuda. Yesus aviyivire ashi viri yendi yina tikimo yakutunda muno mughudjuni ayende kuVashe. Ghuye kwaholire vavendi vamughudjuni, kwava holire dogoro kughuhura. ² Mudyonaghuli kwangenine mumutjima waYudas Iskalyote mona Simon, ashi ature Yesus muliyome. ³ Yesus-aviyivire ashi Vashe kwatapa vininke navintje mumaghoko ghendi ntani ghuye kwatunda kwaKarunga ntani ghuye ngavyuka kwaKarunga. ⁴ Makura ashapukapo ashuve murarero ashutura shikoverero shendi shapantunda. Makura aghupu Likeshe akudingire mumbunda. ⁵ Makura atura mema pashisha avareke kukusha mpadi davarongwa vendi kumwe nakudi kokota nalikeshe olyo akudingilire. ⁶ Opo atikire paSimoni Petrus, makura Petrus amupura ashi,'' Hompa, nane ove wakuvhura ghukushe mpadi dande ndi?'' ⁷ Yesus alimburura nakumutantera ashi,'' Ovino nakuruwana weno ove nakuviyivashi, ano ngoli ove ngaghuviyiva tupu kunyima yashirugho.'' ⁸ Petrus amutantere ashi,'' Ove kapi nganivi pulitira ghukushe mpadi dande.'' Yesus amulimburura ashi,'' Ntjene kapi nikukusha, ove kapi ngaghuvhura kuhamena kukwande.'' Simoni Petrus amulimburura ashi,'' ⁹ Hompa, kapishi ghukushe tupu mpadi pentjado, nane ngoli namaghoko namutwe wande.'' ¹⁰ Yesus amutantere kare ashi,'' Ogho vamana kukusha kwato nka ovyo ahepa, nkwandi kumukusha tupu kumpadi makura, morwa ghuye akushuka kare: anwe muna kushuka, ngoli kapishi namuvantje.'' ¹¹ (Yesus ayivire oghu ngamuturo muliyome; mbyo aghambilire ashi, ''Kapishi namuvantje muna kushuka.'') ¹² Opo amanine kukusha mpadi davo makura adwata shikoverero shendi shapa ntunda ashungiri kushilyero, makura avapura ashi,'' Muna yiva vino namuruwanene ndi? ¹³ Anwe kundyita me ashi 'Murongi' ntani 'Hompa' ghuhunga ovyo mwaghambanga, mukondashi mo ngoli. ¹⁴ Ntjene shi mo ngoli, ame Hompa ntani Murongi, nakushu mpadi denu, nanwe muna hepa kukusha mpadi denu ghumwenu-na-naghumwenu. ¹⁵ Ame kuna mupa shihonena nanwe muna hepa kuviruwana yira mbyovyo namuruwanene. ¹⁶ Ghushili, vyaghushili nakumutantera ashi, mupika kapi apitakana muhona wendi; nampili ntumi kapi apitakana ogho amutumo. ¹⁷ Anwe vana lirago ntjene muyiva vino, anwe ngamuvirughane. ¹⁸ Ame kapi natamba kukwenu namuvantje, ame nayiva ovo nahoroghora-ano ngoli litjangwa litikemo olyo lyatanto ashi:' Ndyegho nalyanga naye ndya kumwe ndye aneyiro nadimurungu.' ¹⁹ Ame kuna kuvimu tantera weno mpopano vina piri shimpe kushoroka mposhi opo ngavi kashoroka, mposhi ngamukapure ashi Ame Me. ²⁰ Ghushili, vyaushili, nakumutantera, kehe ghuno wakutambura ogho natuma ame ana ntambura, Kehe ghuno wakuntambura me kutambura ogho antumo me.'' ²¹ Opo amanine kughamba vino, akara namakulimbo mumonyo wendi. Makura adukura nakughamba ashi,'' Ghushili, vyaushili, nakumutantera ashi ghumwe mukatji kenu ndye aka nturo muliyome.'' ²² Varongwa vendi makura avakukenga-kenge vene navene, vavo vina valimbi ashi arepo ogho ana tamba. ²³ Murongwa wendi ghumwe, ogho aholire unene Yesus, kwashungilire kumwe patafura makura ayeghamene kwaYesus. ²⁴ Simoni Petrus apyata ghuno murongwa ashi,'' Mupure ashi are ogho ana tamba ogho ana kughamba.'' ²⁵ Ogho ayeghaminino kwaYesus amupura ashi,'' Hompa, are mwene ogho?'' ²⁶ Yesus amulimburura ashi,'' Ndyegho nipa mboroto ghona oyo niverera mumuhoka.'' Makura ghuye averere mboroto, ayitapa kwaYudas mona Simoni Iskalyot. ²⁷ Tupu amana kulya mboroto, Satana angene mumwendi, Yesus amu tantere ashi,'' Kehe vino una kushana kuruwana, viruwane wangu.'' ²⁸ Kwavo vakaliro navo kumwe patafura kwato ogho ayiviro ovyo vamutantilire. ²⁹ Vamwe kwaghayalire ashi, Yudas ndye apungurango ndjato yavimaliva, Yesus kuna mutumu ashi,'' Kaghure vihepwa vyapashipito,'' ndi walye aka tape vihepwa kuva hepwe. ³⁰ Yudas tupu ayitambulire mboroto arupuka wangu-wangu pandye. Shirugho kwakalire matiku. ³¹ Opo akayendire Yudas, makura Yesus aghamba ashi,'' Ntantani weno mona Muntu kuna muyererepeke, ntani Karunga naye kuna muyererepeke mumwendi. ³² Ntjeneshi Karunga kuna muyererepeke mumwendi, naKarunga naye kwayererepekera monendi mwamwene, ntani vavo ngava kara kumwe mughuyerere. ³³ Vana vande, Ame kuni kara tupu nanwe shirugho shashifupi. Anwe ngamuvareka kuntjana, shika momo natantera vaYuda ashi,' Oku nakuyenda, anwe nakuvhurashi muyendeko.' Nanwe nka mo nakumutantera ngoli. ³⁴ Ame kuna kumupako shipango shashipe, ashi kuhora-horenu ghumwenu nanaghumwenu; shika momo namuhora me, mo muvhura kukuhora-hora ngoli. ³⁵ Ntjene ngamukuhora-hora, kehe ghuno ngayiva ashi vyaghushili anwe varongwa vande. ntjeneshi kehe ghuno akare nashihoro kwaghunyendi.'' ³⁶ Simoni Petrus amupura ashi,'' Hompa, kuni nko oku unakuyenda?'' Yesus amulimburura ashi,'' Oku nakuyenda, ove nakuvhurashi ghunkwame weno, ano ngoli kumeho ko ntani ngaukankwama.'' ³⁷ Petrus amupura ashi,'' Hompa, mukonda munke nipira kuvhura kukukwama weno? Ame ngani fera papoye ove kapi ngani kushuva.'' ³⁸ Yesus amulimburura ashi,'' Nampili dikuwane mfa kapi ngaghu ntjuva? Ghushili, vyaushili, nakukutantera ashi, shikondomboro sh hana kuyigha ove kughu nkanana rutatu.''