¹ '' Kapishi mukare naghoma. Huguvarenu Karunga, huguvarenu nka mumwande. ² MuVa vava kwakaramo maghuturo ghamangi. Ashi ndi kapishi ngoli ndi namutantera, mbyovyoshi ame kuna kuyenda nikamuwapayikire maghuturo. ³ opo nganiyenda, nikamane kuwapayika maghuturo ghenu, ngani kavyuka nka waro nganuya mushimburure, mposhi nanwe ngamuka kare oku nakara. ⁴ Ndyira yaku nakuyenda mwayiyiva.'' ⁵ Tomas amulimburura ashi,'' Hompa, kapi twayiva ko oko unakuyenda, nampili oyo ndyira omo tuyiyiva ne weni?'' ⁶ Yesus amutantere ashi,'' Ame ndyira, naghushili, namonyo; kundereko wakuyenda kuVa vava ghahana kupitira mumwande. ⁷ Anwe ntjeneshi mwandyiva me, ndi naVa vava navo mwava yiva. Kutunda pano weno muna vayiva ntani muna vamono.'' ⁸ Filipus atantere Yesus ashi,'' Hompa, tuneghede vasho, mbyo tupu tuna hepa po makura.'' ⁹ Yesus amutantere ashi,'' Ame kwakara nanwe shirugho shashire unene ano ngoli shimpe ove nakundyiva shi me, Filipus? Kehe ghuno amono me amona Vavava. Weni nka omo Ughamba ashi,' Nikuneghede Vavava'? ¹⁰ Kapi wapura nane ashi ame kwakara muVa vava ntani Vavava navo mpovali mumwande? Nkango dino naghambanga kukwenu kapishi daku nkondo dande, ano ngoli Vavava ovo vakaro mumwande mbo varuwanango viruwana vyavo. ¹¹ Purenu ashi ame kwakara muVa vava, ntani Vavava navo mpovali mumwande, ndipo ntjene kapi muna kuvipura, purenu mukonda yaviruwana ko vyene. ¹² Ghushili, vyaushili, nakumutantera, kehe ghuno wakupura mumwande naye ngaruwana viruwana ovyo naruwananga, ano ngoli ghuye ngaruwana vyavinene vyakupitakana pano mukondashi ame kuna kuyenda kuVa vava. ¹³ Kehe vino ngamushungida mulidina lyande, ngani viruwana mposhi Vavava ngava yererepeke mwamonavo. ¹⁴ Kehe shino ngamushungida mulidina lyande ngani shiruwana. ¹⁵ Ntjeneshi mwakara nashihoro name, ngamu tikitamo vipango vyande, ¹⁶ Makura ngani shungida Vavava, ngava mupeko mukwafi naye peke ngaya kare nanwe naruntje- ¹⁷ Mpepo yaUshili. Udyuni nakuvhura shi kuyitambura mukondashi nakuvhura shi kuyimona ntani kapi vayiyiva. Ano ngoli anwe mwayiyiva, mukondashi papenu yakara, ntani mumwenu ngayikara. ¹⁸ Kapi nakumushuva mukare vantiwe; Nane ngoli nganika vyuka shimpe kukwenu. ¹⁹ Weno shirugho shashifupi tupu shina huparoko makura kapi ngava nkenga vamu Udyuni, ano ngoli anwe ngamu mona. Mbyovyoshi ame nimuyumi nanwe ngamukara muvayumi. ²⁰ Muliyuva olyo mpo ngamukayiva ashi ame kwakara muVa vava, anwe mumwande mwakara, ntani ame mumwenu nakara. ²¹ Ogho ahoro dimuragho dande ntani ghuye adi tikitemo ogho ndye akaro nashihoro name, kehe ghuno akaro nashihoro name Vavava ngava muhora, ntani name ngani muhora makura ngani mushorokera.'' ²² Yudas (kapishi Iskalyot) apura Yesus ashi,'' Hompa, mukonda munke ghuku horowera tupu kukwetu wahana kuku horowera Udyuni?'' ²³ Yesus amulimburura nakughamba kukwendi ashi,'' Ntjene shi muntu akara nashihoro name, ngatikitamo nkango dande. Ntani Vavava navo ngava muhora, makura ngatuya ngatuya tunge naye. ²⁴ Kehe ghuno apiro kukara nashihoro name kapi atikitangamo nkango dande. Dino nkango muna kuyuvha kapishi kukwande dina kutunda nane ngoli kVa vava ovo vantumo. ²⁵ Vino kuna mutantere, pashirugho shino nakara nanwe. ²⁶ Ano ngoli, Mukwafi-Mpepo yakupongoka oyo ngava tuma Vavava mulidina lyande-ndyo ngayiya murongo navintje ntani ngayiya muvhurukita navintje ovyo namutantera. ²⁷ Mbili yande nakumu shuvira; Mbili yande nakutapa kukwenu. Ame kapi natapanga tira momu watapanga Udyuni. Mwasha pulitira dimutjima denu dikare muliguvo, ntani kapishi mukare naghoma. ²⁸ Anwe muna yuvhu ovyo namutantere ashi,' Ame kuna kuyenda ko, Ano ngoli shimpe ngani kavyuka kukwenu.' Anwe ntjeneshi mwahora me, ndi muna hepa kukara naruhafo mukondashi ame kuna kuyenda kuVa vava, mbyovyo shi Vavava vasmpitakana me. ²⁹ Mpo ngoli shi ame kuna vimutantere kumeho vikashoroke mposhi, opo ngavi shoroka, ngamu kare nalipuro. ³⁰ Kapi nivhura nka kughamba nanwe vyaviyingi, mbyovyo shi mupangeli waghuno kuna kuya. Mara ngoli kapi akara nankondo papande, ³¹ ano ngoli muku negheda Udyuni ghuyive ashi ame nane nahora Vavava, Ame kuruwana yira momu vantantera Vavava. Shapukenu tuyendenuko.''