¹ '' Ame shindyembere shaghushili, Vavava mbo mwenya shikunino. ² Ghuye kutetako kehe ghuno mutavi wande wakupira kuyima nyango, ntani ghuye kuwapayika kehe ghuno mutavi wakuyima nyango ghuyime unene nyango dadiyingi. ³ Anwe mwakushuka mwawapa kare mukonda yankango odi namutantera. ⁴ Karenu mumwande, name nikare mumwenu. Mutavi nakuvhura shi kuyima nyango pawene ntjene kapi ghuna kara kushindyembere, nanwe mo ngoli, nkwendi ngamukare mumwande. ⁵ Ame shindyembere, anwe dimutavi. Ogho akaro mumwande ntani ame nikare mumwendi, gfhuye kuyima unene nyango, ntjene kapi nakara mumwenu anwe kundereko vyakuvhura kutompora. ⁶ Kehe ghuno apiro kukara mumwande, ghuye ngava muvhukuma makura ngakukute yira mutavi, makura ngava dipongayike dimutavi ngava divhukumine mumundiro, ngava dishorepo ngadipye. ⁷ Ntjene amu kara mumwande, ntani nkango dande dikare mumwenu, anwe kushungida kehe vino muna shana, ngamuviwana. ⁸ Vavava ngava wana mfumwa mwevino, ntjene ngamuyima unene nyango, kumwe nakuva negheda ashi anwe varongwa vande. ⁹ Yira momu vahora me Vavava, name mo namuhora. Karenu mushihoro shande. ¹⁰ Ntjene ngamu tikitamo vipango vyande, ngamu kara mushihoro shande, yira momu natikitangamo vipango vyaVavava mbyo nakara mushihoro shendi. ¹¹ Ame kuna mutantere vino mposhi ruhafo rwande rukare mumwenu ntani ruhafo rutikiliremo. ¹² Shipango shande ntjoshino shi, kuhora-horenu shika momo namuhora me. ¹³ Kundereko ogho akaro nashohoro shashinene shakupitakana paghu-wakutapa monyo monyo wendi ayoghore vaghunyendi. ¹⁴ Anwe vaholi vande ntjene ngamu ruwana vino nakumutantera. ¹⁵ Ame kapi nka ngani mutwenya ashi anwe vakareli vande, mbyovyo shi mukareli nakuvhurashi ayive ovyo ana kuruwana muhona wendi. Ame kumutwenya nwe ashi vaholi vande, mukondashi ame namutantera navintje ovyo nayuvha kuVa vava. ¹⁶ Kapi shi anwe mwantoghororo, nane ngoli ame namutoghororo mbyo namutuma mukayime nyango, dakukarererapo. Makura kehe vino ngamushungida mulidina lyande, Vavava ngava vimuruwanena. ¹⁷ Kuna kumupa dino dimuragho, mposhi muku hora-hore ghumwenu na-naghumwenu. ¹⁸ Ntjene ngaumu nyenga Udyuni, yivenu tupu ashi ame wahovire kunyenga kughuto wakuyamunyenga nwe. ¹⁹ Ntjeneshi anwe nwahamena kughudjuni, Udyuni ndi wamuhora, mukondashi anwe vamo. Ano ngoli ame kwamutoghorora mo mughudjuni mbyovyoshi anwe kapishi vamughudjuni, mbyo wamunyengera ghudjuni. ²⁰ Vhurukenu nkango odi namutantera ashi,' Mukareli kapi apitakana muhona wendi.' ngava kamuhepeka, yira momu vahepekire me; ntjene shi vatikitiremo nkango dande, nankango denu ngava kaditikitamo. ²¹ Ngava kamu ruwana vino mukonda yalidina lyande, mukondashi vavo kapi vamuyiva ogho antumo me. ²² Ashi ndi kapi naya niyava tantere, vavo ndi kwato ndyo, ano ngoli weno kwato ovyo ngavi vaghupo mundyo davo. ²³ Kehe ghuno anyengo me anyenga Vavava. ²⁴ Ndi kapi naruwana vino viruwana mukatji kavo ovi vapira kuruwana rumwe vantu, vavo ndi kwato ghundyoni, kapishi po vavo vavi mona mbyo vatunyenga name naVa vava. ²⁵ Ano ngoli mukurenkitira ashi nkango odo vatjanga muveta yavo ditikemo,' Vavo kwanyenga me nahana ghundyoni.' ²⁶ Opo ngaya mukwafi- ogho ngani mutumina ngatundo kuVa vava, yayo, ndyo mpepo yaghushili, oyo ngayitundo kuVa vava- nganiya tapa ghumbangi wakuhamena kukwande. ²⁷ Nanwe nka muna hepa kutapa ghumbangi wakuhamena kukwande, mukondashi kumwe name mwakalire kutunda pakutanga.